1 Juan 2:7 - Dios Iwene

⁷ Chö̧ja̧wo̧dö chösödawö̧, tupakwö yötawobö jö̧ta̧la ökwödöda ösödabikwawö dö̧ji̧ma. Diosma weobe jejenö dö̧ja̧wo̧dökwö dö̧jobö, ösödabikwawö. Ja̧ Dios wei̧ma ida̧ökö kwa̧ja̧kwinaduwobe. Belö Jesúsnö do̧batö kwemaduwinemitjö baikwö, ja̧ Dios wei̧, Ökwödöda ösödabikwawö kwö̧jaduwo, jö̧ba̧lö, kwa̧ja̧kwinaduwobe.

1 Juan 2:7 Referans Kwoze

1 Juan 3:11

Ja̧danö chö̧ja̧wo̧dö, ida̧ökö kwa̧ja̧kwinaduwobe, Ökwödö Jesúsnö ösödadöma kwö̧ja̧wo̧dökwö ösödabikwawö kwö̧jaduwo, jö̧ba̧lö. Cristonö ajayinö do̧batö kweminaduwemitjö baikwö ja̧ wei̧ma kwa̧ja̧kwinaduwobe. Chömöledö, ja̧ wei̧ a̧ja̧kwö dö̧jaduwo, dö̧ja̧wo̧dökwö ösödabikwawö.

1 Juan 3:23

Ja̧danö, Dios wei̧ma dötölataja jawa. Abönö jawa biya̧: Jesucristonö dösödobö weobe, Jesucristoma Dios Itji̧, jwiinö inesö jo̧, jö̧ba̧lö. Ikenama jawa, Dios wei̧ma biya̧: Ökwödöda ösödabikwawö dö̧jobö weobe.

Deuteronomio 6:5

Jwaikwöda kwuluwo̧duwi Isabenö Jo̧ Diosnö ile nibebö kwösödaduwobö jo̧be chömöledö, okobe jwiinö kwo̧'woduwinö, okobe jwiinö kwomajadenö, okobe jwiinö kwujuluduwinö jwaikwöda jo̧banöda kwösödaduwobö jo̧be.

1 Juan 2:24

Chö̧ja̧wo̧dö, kwomukwatuduwoko jobadö jelobekwö omukwatadö tjomukwati̧danö, Jesúsma Dios Itji̧bö̧kö̧, jö̧ba̧lö. Ökwödöma ajayinö isabenö ji̧ yötjawi̧ kwa̧ja̧kwinaduwada kwo̧'wo̧ luwo̧duwinö ösödö kwi̧'yaduwobö jo̧be chö̧ja̧wo̧dö, Jesúsnö do̧batö kwemaduwena yötjawinama. Ja̧danö, ja̧ isabenö ji̧ yötjawi̧ ösödö kwi̧'yaduwena Dioskwöbi Itji̧ Jesúskwöbi dötewinö kwi̧'yaduwobe.

Mateo 5:43

Tupakwö yöawinobe Jesúsma: —Yötjawi̧ kwa̧ja̧kwinaduwobe chömöledö, kwömöledö kwipjeanö ju̧kwadönö kwösödo, jo̧kwaijayonö kwöpöjojodönö kwöpöjödo, jö̧ba̧lö yötjawi̧ kwa̧ja̧kwinaduwobe, ¿jö̧tö?

Hechos 17:19

Ikenama jobadö Atenasnö ju̧kwadöma Pablonö öbibö 'yi̧jadötö la'aka luwedö ko̧ko̧kwö ba̧nö yötja̧lakwawobekwö, Areópago mikwobe, jobadönö yöawobö. Jobe tjichibena la'aka luwedöma abebijadötö Pablonöma: —Ökwödöma da̧ja̧kwobö jö̧da̧la ökwö yökawi̧ma, la'akatjöda a̧ja̧kwajidökö jawama. Yöbawi döwaisachibanö.

Juan 13:34

Ja̧danö, 'yayi̧ weti̧, babe weti̧ma wetobö jö̧ta̧la ökwödönöma, biya̧: Ökwödödada ile nibekwö kwö̧jaduwo. Ötjö ökwödönö ile nitebi̧danö kwömöledöduwinö ile nibekwö kwö̧jaduwo.

Hebreos 6:9

Chösödawö̧ chö̧ja̧wo̧dö, ja̧ wanedö yötawijayonö jö̧ta̧lökö, Aaa ökwödöma jelobekwö omukwatö 'yi̧nadödanö kwi̧'yaduwobe, Dios lȩebakwawö̧danö, jö̧ba̧lö. Jejenömaökö chö̧ja̧wo̧dö. Chomajade okwanö chöwaisa, Isabenö ökwödöma otiwanö kwi̧'yaduwakwedöja, jö̧ba̧lö. Chöwaisa. Dios yöbawö junö otiwi̧ iyakwa̧, tjö̧jibinö pjaatawö̧nö iyakwa̧ma kwemaduwakwedöja.

1 Juan 3:2

Chö̧ja̧wo̧dö chösödawö̧, yötawaduwakwö. Isabenö, ökwödöma Dios i̧tji̧musa. Jo̧kwaijayonö Diosma ökwödönö ina öwawinö i̧sebokobe mölejȩbe ichibö balewachibö dö̧jakwa̧ma. Ina waiya. Wajwidobe ¿dakwö dichejekwakwa̧jö, jö̧ba̧lö? Ja̧danö, domajadenö ¿dakwö omukwatö dö̧jakwa̧jö? jö̧ba̧lö, ina waiya. Jo̧kwaijayonö ja'yubeda döwaisa, biya̧: Cristo yemidanö ichena ökwödöma jo̧badanö babibö dö̧jakwedösa. Ja̧ mölema Cristoma ökwödönö wajuwanö öwawachobetjö̧ jo̧badanö ichejekwadö dö̧jakwedösa.

1 Juan 3:21

Ja̧danö chö̧ja̧wo̧dö chösödawö̧, otiwanö omukwatö dö̧jena, dö̧ja̧wo̧dökwö ösödabikwawö, domajade okwanö döwaisa, Ökwödöma Dios isabenö ji̧ yöawi̧ a̧ja̧kwö ja̧dösa, jö̧ba̧lö. Jejenö waisö dö̧jobetjö̧ Diosnö adebena yebabökönö adebobö jo̧be.

1 Juan 4:1

Chö̧ja̧wo̧dö chösödawö̧, a̧ja̧kwaduwitjö. Okobe jwiinö yöawakwawa kwa̧ja̧kwaduwi̧ma juluwanö kwösödaduwoko, Jweinö yöbawo̧, jö̧ba̧lö. Isabenö, bakwo̧ yöawi̧ a̧ja̧kwö ö'wiawakwa̧lö̧jönö kwa̧ja̧kwa̧laduwobö jo̧be, ba̧jekwadö omöna yöbawadö tjö̧jobetjö̧. Jau chö̧ja̧wo̧dö, ö'wiawakwa̧lö̧jönö kwa̧ja̧kwa̧laduwo kwöwaisaduwobö, Ite yöbawo̧ma ¿Dios O̧'wo̧ Luwo̧ öibökweji̧? Ja̧danö, yöawi̧ma ¿Dios O̧'wo̧ Luwo̧tjö̧ ichobeji̧? jö̧ba̧lö.

1 Juan 4:7

Chösödawö̧, isabenö dö̧ja̧wo̧dökwö ösödabikwawö dö̧jaduwo. Ja̧danö, ösödabikwawö dö̧jobö dujuluma ¿detjö ichobeda? Diostjöda ichobe chö̧ja̧wo̧dö, iteda i̧tji̧munö pjaati̧ma. Ja̧danö, ösödabikwawö dö̧ji̧ma di̧sekwobe, Ökwödöma Dios i̧tji̧mu babibinadösa, jö̧ba̧lö. Ja̧danö, dö̧ja̧wo̧dökwö ösödabikwawö dö̧ji̧ma di̧sekwobe, Diosnö waisadösa, ja̧danö, jo̧bakwö dötewinö 'ya̧dösa, jö̧ba̧lö.

1 Juan 4:11

Ja̧danö, Diosma jejenö ökwödönö jwiinö ile niebinobetjö̧ ökwödöbi dö̧ja̧wo̧dönö ile nibebö dö̧jobö jo̧be.

1 Juan 4:21

Chö̧ja̧wo̧dö, Dios wei̧ma biya̧: Ötjönö ösödö ju̧kwadöma tjö̧ja̧wo̧dökwö ösödabikwawö tjö̧jobö jo̧be. Jo̧kwaobetjö̧ chömöledö, ökwödöma dö̧ja̧wo̧dökwö ösödabikwawö dö̧jaduwo.