1 Corintios 8:3 - Dios Iwene

³ Jo̧kwaijayonö Diosnö ösödo̧ma, Dios öwaisökwe ö̧jobe jo̧bama.

1 Corintios 8:3 Referans Kwoze

Éxodo 33:17

Ja̧danö, Isabenö Jo̧ma Moisésnö atadijetö: —Moisés, ökwö akebi̧danö ökwödönö öbibö chi̧'yakwo̧sa, ökwönö dösölö̧jinö chedobetjö̧, ja̧danö, ökwönö chöwaisobetjö̧, omudawö chujuinökwe, jö̧ba̧lö— atadijetö Isabenö Jo̧ma Moisésnöma.

2 Timoteo 2:19

Jo̧kwaijayonö, ju'wedö tjösödi̧ waekwijayonö, Dios yöbawö ujunina wenema waekwokobe, la'akatjöda söawachokobe. Jau Timoteo, Diosma isabenö wene ujuninobe, inawa pjolachibököwadanö. Wanedö yötawa: Diosma isabenö wenesawa inawa ujuninobe, ja̧danö jawanö seyudanö wȩyukwawa jo̧be, ja̧danö baikwö laebobe wȩyukwi̧ma: Diosma iteda ömöledönö waiso̧, jö̧ba̧lö laebobe, ja̧danö ju'wibi laebobe: Okobe deinö Duluwo̧ ömöledösa jö̧ba̧ladöma, sulabetjö 'da̧bachibö tji̧'yobö jo̧be, jö̧ba̧lö laebobe.

1 Corintios 2:9

Jo̧kwaijayonö, wajwitjinajayonö, Diosma isabenö otiwa jawa ökwödönö iyobö omukwatobe Dios iwene laebi̧danö. Baikwö laebobe Dios iwene: Diosma inesö otiwa jawa otidinobe jo̧banö ösödadönö iyobö. Jojodöma jejenöjaye otiwa jawama la'akatjöda edöködö, ja̧danö la'akatjöda a̧ja̧kwöködö, ja̧danö la'akatjöda tjomajadenö omukwatöködö, tjomukwati̧tjö bajalekwönönö otiwobetjö̧. jö̧ba̧lö laebobe.

Gálatas 4:9

Jo̧kwaijayonö babema ida̧ökö Diosnö kwöwaisaduwobe, Aaa, baikwö yötawa, Diosma ida̧ökö ökwödönö waiso̧ chömöledö, jo̧kwajabetjö̧ ¿tajawedö yemidanö suli̧ jawa, julu jwii̧ böjȩ weawa jawakwö tjekachajaduwobö kwösödaduwobeda chömöledö? ¿Tajawedö yemidanö ja̧ jawa ömöayedödanö bakibaduwobö kwösödaduwobeda?

Apocalipsis 2:19

Ökwödö otiwanö kwö̧jaduwi̧ma chöwaisa. Ja̧danö, ju'wedönö kwösödaduwi̧bi, ötjönö kwo̧'wo̧ kwöwana̧laduwi̧bi chöwaisa. Ja̧danö, chöwaisa kwömöledöduwinö otiwanö pjakataduwi̧bi. Ja̧danö, sulabenö baledonöbi kwo̧'wo̧ luwo̧duwi 'dibachibö ja̧nö, ötjönö kabatibökönö kwö̧jaduwi̧bi chöwaisa. Ökwödöma otiwanö pjabatadöja. Chedemi ajayinö otiwanö ja̧nö pjakataduwinemitjö o̧penönö babe ja̧nö pjakataduwi̧ma chedobe.

Santiago 1:12

Chö̧ja̧wo̧dö, wene baledena tjo̧'wo̧ 'dibachibö, jwaikwöda, Diosnö tjo̧'wo̧ wana̧lö 'ya̧döma, Dios pjaatawö̧. Ja̧danö, jwaikwöda tji̧'yi̧ma tji̧sekwobe, Diosnöda do̧'wo̧ wana̧lö ja̧dösa, jö̧ba̧lö. Ja̧danö chö̧ja̧wo̧dö, jobadöma Dios yöbawö ujunina tjemakwedö, ba̧kwȩlö̧jatebö ja̧kwawama. Jau chö̧ja̧wo̧dö, Diosma yöbawö ujuninobe, Ötjönö ösödadönö ba̧kwȩlöjatebo ja̧kwawa chiyakwo̧sa, jö̧ba̧lö.

Juan 10:14

Ja̧danö, ötjöma, jejenömabö̧kö̧sa. Otiwanö te'ada̧lo̧sa. Ötjö cha̧jwi̧munöma chöwaisawö̧. Ja̧danö, cha̧jwi̧muma ötjönö waisadö.

Mateo 7:23

Jejenö yötja̧lijayonö, baikwö chatadakwo̧sa jobadönö: Chö̧jelö döbibajaduwi, la'akatjöda wajwitawö̧ja ökwödö sulabenö ja̧badönöma, jö̧ba̧lö chatadakwo̧sa— jö̧ba̧lö yöawinobe Jesúsma.

1 Juan 4:19

Ja̧danö chö̧ja̧wo̧dö, Diosma ökwödönö ajayitjöda ile niebinobetjö̧ jo̧banöbi dö̧ja̧wo̧dönöbi ile nibebö dö̧jobö jo̧be.

Apocalipsis 2:9

Jo̧bama baikwö yöawobe ökwödö Esmirna jojodönö, jo̧banö ösödadönöma: Ökwödö, Esmirna jojodönö inia tjököbaduwinö baledi̧ma chöwaisa. Yelösöda, jwibadöja, usulasedö babibinadöja, chöwaisa. Jo̧kwaijayonö, ökwödöma kwo̧'wo̧ luwo̧duwinö okobe jwiinö juna̧ladödanö kwö̧jaduwobe, böjȩ jawa jwiköbaduwijayonö. Chöwaisa, judío jojodötjö ju'wedöma omöna yötja̧lobe ökwödönöma, Sulabenö ja̧badö, jö̧ba̧lö. Jobadöma, Ökwödödasa Dios ömöledö, jö̧ba̧lö, yötja̧lijayonö, tjo̧'wo̧ luwo̧nö Dios ömöledö babibinöködö. Jobadöma Awetjanöda ösödadö.

1 Pedro 1:8

Jau chömöledö, ökwödöma la'akatjöda Jesúsnö edinöködöja, ¿jö̧tö? Jo̧kwaijayonö, la'akatjöda Jesúsnö kwedinaduwököjayonö, jo̧banö ile nibebö ösödadöja, ja̧danö jo̧bama kwedaduwökökwejayonö, jo̧ba yöawi̧ ösödadöja, isabenö jö̧a̧li̧danö ja̧akwo̧ jö̧ba̧lö. Jejenö ösödö, kwo̧'wo̧ luwo̧duwi ösöwachibanö ja̧döja. Chömöledö, isabenö jwiinö kwo̧'wo̧ luwo̧ ösöwachibanö ja̧döja, ja̧danö jejenö kwo̧'wo̧ ösöwachibanö kwö̧jaduwi̧ma böjȩ jojodö tjomukwati̧tjö bajalekwönönö kwo̧'wo̧ ösöwachibanö kwö̧jaduwobe, kwo̧'wo̧ luwo̧ ösöwachibanö kwö̧jaduwi̧ma Diostjöda ichobetjö̧.

Éxodo 33:12

Ja̧danö, Moisés yöba̧lijetö Isabenö Jo̧nö: — Ökwöma weköbijatö ötjönö bidö Israel jojodönö belö labebö öbibö chi̧'yobö jelobe, kwi̧sebakwemima. Ja̧danö, yöka̧lijatö, Moisés chöwaisa ökwönöma, omudawö chujunökweja, jö̧ba̧lö, jö̧ba̧lö. Jejenö yöka̧lijayonö ötjönö pjabatö i̧'yobö weköbökwema ¿tida? Yöka̧lijökötö.

Apocalipsis 2:13

Jo̧bama baikwö yöawobe ökwödö Pérgamo jojodönö, jo̧banö ösödadönöma: Ötjöma chöwaisa, jobe kwiteboduwima Awetja ba̧nö wei̧danö jo̧be. Jo̧kwaijayonö chedemi ökwödöma jweinö omukwatö, otiwanö kwö̧jaduwobe, Jesúsnöda ösödadösa, jö̧ba̧lö. Ja̧danö, bakwo̧, ötjönö ba̧kwȩlö̧jatebö yöbawo̧, Antipas mikwo̧nö, kwabö lotjenabi ökwödöma kwo̧'wo̧duwi 'dibachibö kakatibinaduwokobe ötjönöma.

Juan 21:17

Ikenama yemidanö abebö a̧ja̧kwinobe, wa̧pötakwanö baibanö: —Simón, Juan itji̧ ¿jwiinö ile nikebiji̧ ötjönö?— abebö a̧ja̧kwiökwe Pedroma o̧'wo̧ tjo̧bekwibö ö̧jinobe, Jesús wa̧pötakwanö abebö a̧ja̧kwobetjö̧. Ja̧danö atadinobe: —Chuluwo̧, ökwöma okobe jwiinö waiso̧ja. Kwöwaisa. Ökwönö jwiinö ile nibebo̧sa—atadiökwe: —Jo̧kwatjö̧ma cha̧jwi̧mu o̧bȩja̧dönö kwite'ada̧lo— weinobe Jesúsma.

Santiago 2:5

Chö̧ja̧wo̧dö chösödawö̧, a̧ja̧kwaduwitjö. Böjȩnö ju̧kwadöma usulasedönö edö, Bidöma mikwawöködö, jö̧ba̧lö, tjomukwatobe. Jo̧kwaijayonö Diosma jobadönö edö, Jwiinö mikwawadö, jö̧ba̧lö, edobe. Diosma jobadö jwibadönö omudawö ujuninobe jwiinö juna̧ladöda batjibobö, tjo̧'wo̧ luwo̧ jawa, Jesucristonö tjo̧'wo̧ tjöwana̧lobetjö̧. Ja̧danö, Diosma jobadönö omudawö ujuninobe ju'wi möle jo̧bakwö webö tjö̧jobö, iteda La'aka Luwo̧ webö ö̧jobe ja̧nö. Jau chö̧ja̧wo̧dö, usulasedönöbi jejenö tjö̧jobö omudawö ujuninobe Diosma okobe deinö jo̧banö ösödadö tjö̧jakwa̧ma.

Romanos 11:2

Diosma iteda ömöledönöma kaatibinokobe, damötjö 'da̧batö ujuninawö̧nöma. ¿Ina Elías ö̧jina wene kwomukwataduwiji̧, Elías Diosnö yöawina wenema? Baikwö laebobe Dios iwene, Elías Diosnö yöawinama:

1 Corintios 13:12

Ja̧danö, babema wajuwanöma dedokobe Diosnöma chömöledö, tjöbadekwawöte sulabötetjö dediakwawobedanö ichejekwa, jo̧kwaijayonö mölejȩbetjö, döbabiyakwena öwawinö dedakobe. Ja̧danö, babe Diosnö chöwaisi̧ma, ja'öda chöwaisobe, jo̧kwaijayonö mölejȩbetjö, jo̧ba ötjönö öwaisi̧danö balekwa mikwa jo̧banö chöwaisakobe chömöledö.

1 Juan 4:7

Chösödawö̧, isabenö dö̧ja̧wo̧dökwö ösödabikwawö dö̧jaduwo. Ja̧danö, ösödabikwawö dö̧jobö dujuluma ¿detjö ichobeda? Diostjöda ichobe chö̧ja̧wo̧dö, iteda i̧tji̧munö pjaati̧ma. Ja̧danö, ösödabikwawö dö̧ji̧ma di̧sekwobe, Ökwödöma Dios i̧tji̧mu babibinadösa, jö̧ba̧lö. Ja̧danö, dö̧ja̧wo̧dökwö ösödabikwawö dö̧ji̧ma di̧sekwobe, Diosnö waisadösa, ja̧danö, jo̧bakwö dötewinö 'ya̧dösa, jö̧ba̧lö.