1 Corintios 15:3 - Dios Iwene

³ Jau chömöledö, inesö mikwawi̧ wene ötjö cha̧ja̧kwina wenema ökwödönö yötawijatö. Ja̧ yötawina wenema biya̧ chömöledö: Damötjö Dios iwene wȩyudinadö imidawakwo̧nö tjiwȩyudinadanö, Cristoma midawö woinobe, ökwödö dusuli̧ imidawo jö̧ba̧lö.

1 Corintios 15:3 Referans Kwoze

1 Pedro 2:24

Jau chömöledö, Cristoma isabenö ökwödönö pjabatö usula emawinobe. Ökwödö sulabenö ja̧dobetjö̧ Dios lȩebi̧tjö demo jö̧da̧linobe chömöledö, jo̧kwaijayonö ökwödö demawo jö̧da̧linama, jo̧bada dusula emawö towisa'onö ö̧linobe. Jejenö midawö woinobe, ökwödöma suli̧ ujulutjö ji̧bö, otiwanö ja̧bö dö̧jakobetjö̧. Jau chömöledö, kwakwatji̧tjö jo̧bada usula emawinobetjö̧, ökwödöma kwö'wöchaduwi̧tjö ji̧binadöja.

Gálatas 1:4

Böjȩ sulaböjȩtjö dö̧jibobö, jo̧ba Jesucristoma ökwödö dusula midawö woinobe, Dabe'do Dios ajayitjöda omukwatö ujuninadanö.

1 Juan 2:2

Jo̧ba Jesucristoma ökwödö diminö imidawinobe dusula dumusidi̧ma sulabenö ja̧di̧ Diosma söbebö loobö. Ja̧danö chö̧ja̧wo̧dö, ökwödönödamaökö. Okobe deinö böjȩnö ju̧kwadönöda pjabatö imidawinobe Jesúsma, okobe deinö suli̧ ja̧tji̧ma söbebö loobö. Chö̧ja̧wo̧dö, Jesucristoda ökwödönö pjabato̧, suli̧ ja̧denama, Diosnö abebö, ja̧ suli̧ ja̧di̧ma söbebö loobö.

Gálatas 1:12

Jau chömöledö, yötawi̧ wenema jojodötjö cha̧ja̧kwijökötö, ja̧danö ja̧ wenema jojodö la'akatjöda tjöba̧ja̧dinokobe ötjönöma. Jesucristoda ja̧ wene yöbawö i̧sebinobe ötjönöma chömöledö.

Apocalipsis 1:5

Ja̧danö, Jesucristoma ökwödönö lȩlö̧jino edobö chösöda, kwo̧'wo̧ luwo̧duwi ösöwachibanö kwö̧jaduwobö. Jesucristoma Dios omukwati̧ jweinö yöbawo̧. Ja̧danö, jo̧bama wobinadötjö abönö tjebachajina. Ja̧danö, okobe deinö böjȩ la'aka luwedönö webö jo̧ Jesucristoma, inesö la'aka luwo̧obetjö̧. Chömöledö, Jesúsma ökwödönö jwiinö ile nibebo̧. Jo̧bama iteda ökwösobu ebawinö imidawinobetjö̧, sulabe wei̧ a̧ja̧kwökönö, otiwanö dö̧jobö jo̧be.

Romanos 4:25

Jau chömöledö, Diosma Cristonö weinobe, ökwödö sulabe dujuna̧li̧ midawö woobö. Ja̧danö, jo̧banö woawatjö tjeachajinö ja̧inobe, ökwödö sulabe jwibadö badibanö ja̧bö.

Efesios 5:2

Cristoma ökwödönö ile niebobetjö̧ dumusidi̧ midawö ö'wöchijetö, dö̧jibinö pjabatö. Jejenö pjabatö, Diosnö söinö nöekwi̧ jawa juwö tjiyinadanö Cristoma midawö iyijetö Diosnöma. Ja̧danö chömöledö, Cristo ökwödönö ile niebi̧danö ökwödöbi kwömöledöduwinö ile nibebö ja̧duwi.

2 Corintios 5:21

Jau chömöledö, otiwa jawa wenema baikwö laebobe: Cristoma la'akatjöda sulabenö ja̧inököjayonö, Diosma weinobe, ökwödö sulabenö ja̧di̧ma Cristonö baibobö, jo̧bada midawö woobö. Jejenö weinobe chömöledö, ökwödöma Cristokwö dötewanö ja̧nö, Cristonötjö Dios sulabe jwii̧ ökwödöbi dujuna̧lakobetjö̧.

1 Corintios 11:23

Chömöledö, Duluwo̧ ötjönö yöawina jawa belö ökwödönö yötawijatö, baikwö yötawa: Jesús ömöayo̧ jo̧banö iyö loina yö̧tema, Duluwo̧ Jesúsma panpja̧ emibö,

Hechos 3:18

Jo̧kwaijayonö ökwödö sulabenö weköbaduwinama Diosda webijetö, iteda yöawi̧ yöbawadö yötjawina badekwachinö. Damötjö Dios yöawi̧ yöbawadöma yöbawijadötö Dios weakwo̧ usula emawakwa̧ma. Ja̧danö, yöbawijadötö Dios yöawi̧ yöbawadöma, Dios yöbawö ujuninökwe, jojodö tjö̧jibinö pjaatobö yöbawö ujuninökwema, usula emawakobe, jö̧ba̧lö.

Juan 1:29

Ju'wi dewachö Juanma edinobe iteda ö̧jobekwö Jesús ichobe. Jesúsnö edö jö̧a̧linobe itekwöda ju̧kwadönö: —Edaduwi. Ite baikwö icho̧ma, Dios weinökwe obeja itji̧danö jo̧. Diosma jo̧banö ö'wöchinö midawö, jojodö tjusuli̧ söbebö loobö weinobetjö̧, obeja itji̧danö jo̧, ötjabökwe.

Efesios 1:7

Ja̧danö, Diosma ökwödönö jwiinö lȩlö̧jino edö webijetö itji̧ Jesucristonö, dö̧jibanö pjaatobö. Weinökwema ökwösobu ebawinö midawö dö̧jibanö pjaatinobetjö̧ ökwödö dusuli̧ma söbebö lobijetö Diosma.

Gálatas 3:13

Ja̧danö, Dios weina Moisés iwȩyudinatjö Dios lȩebi̧ma demo jö̧da̧linobe chömöledö, okobe jwiinö laebi̧danö ja̧dokobetjö̧. Jo̧kwaijayonö ökwödö Dios lȩebi̧tjö demo jö̧da̧linama, Cristonöda baibinobe. Dios lȩebi̧ma Cristonö baibinobe Dios iwene laebi̧danö. Baikwö laebobe Dios iwenema: Okobe deinö towinö la̧dönöma, Dios lȩebawö̧, jö̧ba̧lö laebobe.

Romanos 3:25

Jau chömöledö, Jesúsda woinobetjö̧, Jesúsnö ösödadönö lȩbebö̧kö̧ Diosma. Jejenö ja̧bö i̧sebobe Diosma, iteda suli̧ jwii̧bi, jojodönö suli̧ jwitjinö ja̧i̧bi. Jau chömöledö, damötjö Diosma lȩlö̧jinö edö, jojodö sulabenö ja̧tji̧ lȩebinokobe.

Mateo 26:28

Bi'do̧sobu chökwösobuma, Dios 'yayinö yöbawö ujunakwa̧ wene yöawobe, chökwösobu ebawobetjö̧ Dios isabenö jojodö tjusula söbebö loakwa̧ wenema.

1 Pedro 3:18

Jau chömöledö, Diosma isabenö ökwödö usula kwemawaduwobö weena, baikwö yötawa: Duluwo̧ Cristo usula emawobö weinobe, ¿jö̧tö? Ja̧danö Duluwo̧ Cristo usula emawobö ji̧natjö̧ma, ¿ökwödö usula demawobö jwienaji̧? Jȩna chömöledö. Jau chömöledö, sulabe dujuna̧li̧ imidawo jö̧ba̧lö, Cristoma bakwötanöda midawö woinobe, okobe deinö tjusula midawö. Sulabe jwibo̧da midawö woinobe chömöledö, ökwödö dusula juna̧ladö Dioskwö dichibobö ja̧bö. Jau chömöledö, iteba'oma kwabö lotjinobe, jo̧kwaijayonö Diosma o̧'wo̧ luwo̧nö 'yaibajinö ja̧inobe.

Hebreos 5:3

Ja̧danö, jo̧ba böjȩtjö Diostjö jojodötjö ö'weje la'aka pjabato̧ma ömöledö tjusula tjumusidi̧ midö otidina, Diosnö iyö. Jo̧kwaijayonö, ¿jo̧ba umusidi̧ja? Jo̧babi suli̧ juna̧lina ¿jö̧tö? Jau, jojoobetjö̧ jo̧babi suli̧ juna̧lina. Jo̧kwaobetjö̧ iteda Diosnö iyi̧bi iyobö weinobe, iteda usula umusidi̧ midö. Jojodö tjusuli̧ tjumusidi̧ midö iyinadanö, itedada usuli̧bi midö iyina.

Hebreos 5:1

Jo̧kwaobetjö̧ chömöledö, Dios ö̧jobekwö, jo̧banö abebö ichakwa̧ma yekabiduwa. Jesús, ökwödönö lȩlö̧jino edo̧, ökwödönö pjaatobö waiso̧ma jobeda, Dios öba a'o jo̧. Chömöledö, jo̧bama Diostjö jojodötjö ö'weje la'aka pjabato̧. Jo̧kwaobetjö̧ yekabiduwa Diosnö abeböma. Ja̧danö ¿böjȩtjö Diostjö jojodötjö ö'weje la'aka pjabato̧ ö̧jinaja? Jo̧ba otidinama ¿tajida? Chömöledö, böjȩtjö Diostjö jojodötjö ö'weje la'aka pjabatinama jojo. Diosma jojodötjö 'da̧batö ujuninökwe, ö'weje la'aka pjabato̧ baibanö. Jo̧bama Diosnö iyiainobe, jojodö Diosnö ösödö tjiyi̧bi, jojodö tjumusidi̧ midö iyawabi.

1 Corintios 11:2

Chömöledö, ökwödöma otiwanö kwomukwataduwobe ötjö ja̧bö chö̧jinama, ja̧danö ökwödönö wetina jawama otiwanö ja̧bö kwö̧jaduwobe, baikwö ja̧bö kwö̧jaduwo jö̧ba̧lö ökwödönö wetina jawama. Ja̧danö, jejenöobetjö̧, otiwa jö̧ba̧lö yötawaduwakwö chömöledö.

Génesis 3:15

Ja̧danö, ökwöma isuju jöpöjojo kwö̧jakwo̧ja. Ja̧danö, isujuma kwöpöjojosuju jö̧jakwuju. Ba̧kwelö̧jatebö wene ja̧kobe ökwötjö tupadanö ju̧kwadökwö, isujutjö tupadanö jojodökwö. Kwöpöjojodöda tjuju̧kwakwedö. Ja̧danö, isujutjö tupadanö jojodötjö bakwo̧ma kwuunö öja̧takwo̧ja. Ja̧danö, jo̧ba ökesayunö yö̧köbakwo̧ja— lȩbebö jö̧ba̧lijetö Isabenö Jo̧ Diosma a̧ko'danöma.

Mateo 26:24

Jau chömöledö, ötjö jojo baibanö jeminökwema, isabenö ö'wö batibobö jo̧be, Dios iwene damötjö tjiwȩyudina laebi̧danö. Jo̧kwaijayonö ötjönö iyö loakwo̧nö, isabenö labinö lȩebakwo̧ Diosma chömöledö, ojo'do jo̧banö la'akatjöda jeminökötjö̧ma, o̧penönö otiwo jö̧a̧linena, Dios lȩebi̧tjö emapji jö̧ba̧lö— yöawinobe Jesúsma.

Lucas 24:25

Yötjawiökwe, Jesúsma jobadönö yöa̧linobe: —Chömöledö, isabenö wajwibö omukwatadöja, ja̧danö ökwödönö waiyobe okobe jwiinö Dios yöawi̧ yöbawinadö tjiwȩyudina kwösödaduwobö.

Hechos 8:32

Jejenö jö̧a̧liökwe Felipema koluka okwa nöchö a̧jibijetö. A̧jibö a̧ja̧kwijetö Etiopía jojo yöa̧lobema, Isaías iwȩyudina. Baikwö yöba̧lijetö: Jo̧bama obeja jwöbeba̧lökönö ö̧ji̧danö jo̧, u̧lume'a 'witjebobö öbibö tji̧'yinökwema. Ja̧danö, obeja öwö'ye 'witjonö jwöbeba̧lökönö ö̧ji̧danö jo̧.

Hechos 17:2

Jobe ja̧nö Pabloma, judío jojodö tjotidökö möle baibena yöbawö tebachajiadanö judío jojodö yötjawejunö yöbawö tebachijetö. Wa̧pötakwa semana jenanö, tjotidökö möle baibena yöbawö tebachijetö Pabloma. Jejunö tebachö Dios iwenetjö eda̧lö yöba̧lijetö. Jejenö yöba̧lö tebachajadökwö yöba̧lijetö, jobadö wainö yötja̧li̧ atada̧lö.