1 Corintios 15:24 - Dios Iwene

²⁴ Ikenama, böjȩ 'dö̧ibakobe chömöledö. Abönö Cristoma okobe deinö ujuluwakobe, juluwadönöbi, ja̧danö okobe deinö luwedönö mölejȩnö ju̧kwadönöbi, böjȩnö jukwadönöbi. Jejenö juluwajo̧, jo̧bada la'aka luwo̧ ö̧jakobe. Jemi ikenama, la'aka luwo̧ ö̧ji̧ma iteda Abe'do Diosnö iyakobe, Ökwöda la'aka luwo̧ kwö̧jo, jö̧ba̧lö.

1 Corintios 15:24 Referans Kwoze

Daniel 7:27

Jemi ikenama okobe deinö ajayinö ji̧nadö böjȩ luwedö tjujuluma, okobe jwiinö juluwo̧ Dios ömöledönö iyakobe. Ja̧danö ba̧kwȩlö̧jatebö yöbawö weakobe, ja̧danö okobe deinö böjȩnö tjitebotenia ju̧kwadöma jo̧ba wei̧ otidö tjö̧jakobe— jö̧ba̧lö yöawinobe.

Daniel 7:14

Ja̧danö Diosma jo̧banö iyobekwö chedatö, inesö la'aka luwo̧ baibobö. Dejatinö ujulu jo̧banö iyatö, ja̧danö yöbawö weakwa̧bi iyatö, okobe deinö böjȩ bakwameachibanö ju̧kwadö jo̧ba wei̧ tjotidobö, tjitebotenia ju̧kwadöbi, tjiwenetenia yöba̧ladöbi. Jo̧ba yöbawö wei̧ma, ba̧kwȩlö̧jatebö 'dö̧ibajökenanö yöbawö weakwo̧. Bakwo̧bi la'akatjöda söbebö loökakobe jo̧ba yöbawö wei̧ma, 'dö̧ibajökenanö kabatökönö yöbawö weakwo̧.

Mateo 28:18

Ikenama Jesúsma jobadö tjö̧jobekwö ichö yöawinobe: —Mölejȩtjöbi, böjȩtjöbi okobe deinö la'aka tjuluwo̧ batibanö ja̧ajabe Diosma,

Mateo 11:27

Jojodönö yöawinobe Jesúsma: —Chömöledö, chabe'doma okobe jwiinö ötjönö iyajabe, la'aka luwo̧ batibanö. Ötjönö Dios itji̧nö isabenö waiso̧ma bakwo̧da chömöledö, Chabe'do Diosda, ja̧danö Chabe'do Diosnö waisadöma, sule ötjö Dios itji̧da, ja̧danö ötjöda chösödi̧danö chi̧sebawö̧da— jö̧ba̧lö yöawinobe.

Daniel 2:44

Ja̧danö, jobadö tjö̧jakwa̧ möle, mölejȩbe jo̧ Diosma bakwo̧nö ujunakobe, inesö la'aka luwo̧ baibanö, ja̧danö jo̧ba yöbawö ö̧jakwa̧ma la'akatjöda 'dö̧ibökakobe. Bakwo̧bi jo̧banö ujuluwökakobe, ja̧danö jo̧ba ömöledöböködöma la'akatjöda jo̧ba yöbawö ö̧jemi balewö lotjökakwedö, öpöjojodöda webö tjö̧jobö. Jo̧bama okobe deinö jo̧batjö ajayinö ji̧nadö la'aka luwedöbinadö yöbawö tjö̧jinama söbebö loakobe, ja̧danö jo̧ba yöbawö ö̧jakwa̧ma ba̧kwȩlö̧jatebö ja̧kobe.

1 Timoteo 6:15

Jau Timoteo, Duluwo̧ Jesucristo isabenö yemidanö öwawachobö ja̧akobe Diosma, Dios badedö ujunina möle badekwachenama. Jo̧ba jojodö tjösödökwe Diosda okobe deinö tjuluwo̧ma, ja̧danö Diosda luwedö tjuluwo̧ma, ja̧danö Diosda la'aka luwedö inesö la'aka tjuluwo̧ma.

Juan 13:3

Ja̧danö, Jesúsma omukwatinobe, Chabe'doma ötjönö okobe jwiinö ujulu iyo̧, jö̧ba̧lö. Chabe'do itebobetjö ichinasa. ja̧danö, jo̧ba ö̧jobekwö chȩwa̧jakwo̧sa, jö̧ba̧lö, omukwatinobe Jesúsma.

Isaías 9:7

Isabenö inesö la'aka duluwo̧ ö̧jakwo̧ jo̧ba jitji̧ma, ajayitjö bajalekwönönö, ujulu nöamachibanö ba̧kwelöjatebö 'dö̧bibajökönö webö ö̧jakwo̧. Ja̧danö webö ö̧jobetjö̧ 'dö̧bibajökönö ba̧kwelöjatebö wene jwiinö dö̧jakwedösa. Jo̧bama Davidmine iteaka inesö la'aka luwo̧ ö̧binakanö öbamatakwo̧, jadanö David webö ö̧jinemi webö ö̧jakwo̧. Jau, David webö ö̧jinemima yemidanö ditebo baibanö 'diinö 'dö̧bibajökönö ujunakobe, la'akatjöda 'dö̧ibajökö ditebo baibanö, ja̧danö babe jamatö, ba̧kwelöjatebö 'dö̧ibajökönö baibanö, jweinö jwebebö, Dios wei̧danö webö ö̧jakwo̧. Jau, ökwö Okobe Jwiinö Juluwo̧ Isabenö Jo̧ Diosma jobekwö ö̧jobö kwösödobetjö̧, jobekwö baledakobe, jo̧kwajabetjö̧ kwömöledö israel jojodöma kwöba a'otjö tjo̧'wo ösöwachibanö tju̧ju̧kwobe, jö̧balö yöta̧la, tupakwö otiwanö tjö̧jakwa̧ jawama.

Juan 3:35

Dabe'do Diosma jwiinö ile niebobe itji̧nö. Ja̧danö, jo̧banö pjaatobe, okobe jwiinö iyö—yöawinobe—.

Mateo 24:13

Jo̧kwaijayonö chömöledö, jejenö sulabenö baledijayonö, tjo̧'wo̧ 'dibachibö baledadöma, isabenö tjö̧jibakobe.

Lucas 10:22

Ikenama Jesúsma yöawinobe: —Chömöledö, Chabe'doma okobe jwiinö ötjönö iyajabe, la'aka luwo̧ batibanö. Ötjönö Dios itji̧nö isabenö waiso̧ma bakwo̧da chömöledö, Chabe'do Diosda, ja̧danö Chabe'do Diosnö isabenö waiso̧ma sule ötjö Dios Itji̧da, ja̧danö ötjöda chösödi̧danö chi̧sebawö̧da— jö̧ba̧lö yöawinobe Jesúsma.

Mateo 10:22

Jau chömöledö, okobe deinö jojodöma ökwödönö tjöpöjödakobe, chöba̧ja̧di̧ waisachadö kwö̧jaduwobetjö̧, jo̧kwaijayonö ja̧ jawa tjo̧'wo̧ 'dibachibö baledadöma isabenö tjö̧jibakobe.

1 Pedro 4:7

Ja̧danö chömöledö, 'dö̧ibaji̧ möle yöneawachibobe. Jo̧kwajabetjö̧, jweinö omukwatö eda̧lakwawö kwö̧jaduwo, ja̧danö waisanö omukwatö Diosnö abebö kwö̧jaduwo.

Daniel 12:13

Ja̧danö baikwö yöta̧lakwö Daniel, kwo̧'wo̧ ösöwanö kwö̧jo, 'dö̧ibaji̧ möle baibenanö kabatö. Ökwöma ö'wö babiböda, kwö'wachakwo̧ja, ja̧danö okobe jwiinö 'dö̧ibajenama, yemidanö woawatjö tjekachajakwo̧ja, Dios ökwönö iyakwa̧ otiwanö kwemobö— jö̧ba̧lö yöawinobe ángelma Danielnö, tupakwö baledakwa̧ jawama.

Daniel 12:9

Jejenö abebö cha̧ja̧kwökwe, atadinobe: —Ja̧ jawa omukwatöma kwo̧'wo̧ tjokekwa Daniel, abebö kwa̧ja̧kwaja̧ chatadobö jwiobe. Jau Daniel, 'dö̧ibaji̧ möle baibenanö kabatö ja̧ wene tojö ujunakobe Diosma, jo̧kwajabetjö̧ ja̧ omukwatöma kwo̧'wo̧ tjo̧kekwa.

Romanos 8:38

Jau chömöledö, biya̧ wenema isabenö wene. Jesúsma ökwödönö ile niebobetjö̧ 'da̧batö loawama jwiobe yelösöda ökwödönöma. Dö̧jitjö̧böbi, woditjö̧böbi, ina bakwainö 'da̧bachibö dö̧jökena. Ja̧danö, ángelesdötjöbi, ju'wedö mölejȩbe ju̧kwadötjöbi, juluwadötjöbi, bakwo̧bi deobe, ökwödönö 'da̧batö lobo̧ma. Ja̧danö, babe baledi̧bi, tupakwö baledakwa̧bi, ju'wi jayetjöbi jwiobe yelösöda ökwödönö 'da̧batö loawa jawama.

Daniel 12:4

Ja̧danö, ökwönö baikwö wetakwö Daniel, ökwönö yötawaja̧ jawa tojö kwujuno. Ju'wedö tjedapji jö̧ba̧lö, kwialu'ye kwiwȩyuda'ye mu'dudö tojö kwujuno, 'dö̧ibaji̧ möle baibenanö kabatö. Ja̧danö, ba̧jekwadö tjöwaisachibotö jö̧ba̧lö jelobebi, jelobebi tji̧'yakobe, ja̧danö ajayinö tjöwaisinatjö bajalekwönönö tjöwaisachibakobe— jö̧ba̧lö yöawinobe ángelma.

Efesios 5:20

Jejenö lo̧bö Diosnö kwösödaduwo ba̧kwȩlö̧jatebö, jwiinö sulabenö baledenabi, otiwanö jenabi. Jesucristoma ökwödö kwuluwo̧duwiobetjö̧, Diosnö kwösödaduwo, Dabe'do ökwönö dösöda, otiwanö pjabato̧ja, jö̧ba̧lö.

Colosenses 2:10

Cristoma okobe deinö luwedö inesö la'aka tjuluwo̧, ja̧danö weawa luwedö inesö la'aka tjuluwo̧ chömöledö. Ja̧danö jo̧banö dötewadö kwö̧jaduwobetjö̧, tjo̧wi̧ okobe jwiinö ja̧kwawa juna̧ladö bakibinaduwobe ida̧ökö chömöledö.

Colosenses 2:15

Ja̧danö, mölejȩbe luwedö ja̧danö weawa luwedö tjujulu söbebö lobö, jobadönö ujuluwinobe, ja̧danö wanedö yötawa, okobe deinö tjöba a'otjö tjöbaledobö ja̧inobe, bidöma chujuluwajawö̧ jö̧ba̧lö.

2 Pedro 1:11

Jau chömöledö, kwöwaisaduwa, dö̧jibinö pjabato̧ Duluwo̧ Jesucristoma, la'aka luwo̧ ja̧nö yöbawö ö̧jakobe, ja̧danö ökwödö jo̧banö ösödadöma jo̧bakwö dö̧jakwedösa, ¿jö̧tö? Ja̧danö chömöledö, ju'wibi yötawaduwakwö, yötawaja̧danö jwaikwöda ja̧bö kwö̧jaduwobö kwisakwaduwitjö̧ma, jobe tekachaduwenama Diosma isabenö jwiinö otiwanö ökwödönö iyakobe, ina böjȩnö kwö̧jaduwayi chösödi̧danö otiwanö ja̧bö ji̧nadöja jö̧ba̧lö.