Yohanes 17:19 - Tuntu i mPue ri Basa Taa

¹⁹ Wali Aku rani mangansawang sira, see naka Aku damangawaika korongKu damangkapateka sira. Aku mangika ewa wetu see sira maya seja mawali tau to rani mampolaika tuntu ngKomi anu to monso.” Wali etu semo gombo i Yesu mampokai-kaika anaguruNya.

Sura Magali Nuntu Ngkatuwu

¹⁹ Tila ntau seʼe, Yaku mampepombaika koro-Ku ewa sambaʼa anu i mPapa anu ndapatani, da naka tau seʼe woʼu mewali anu i mPapa anu ndapatani mampojaya kamonco.

Yohanes 17:19 Referans Kwoze

Ibrani 2:11

Wali i Yesu mangika see tau mawali i Pue Allah Puenya. Wali Ia to mangika palaong etu pasi kita to inikaNya mawali i Pue Allah Puenya etu, kita paka samba’aja Pa’anta. Wali see naka Ia taa mea manganto’oka kita pua’iNya.

Titus 2:14

Ia semo to nangkapateka kita see mangalapas kita yako ri kuasa nu dosa pasi mampakayongo rayanta. Ia mangika palaong to etu see kita maya mawali tau to Ia Puenya, to madota kojo mangika palaong to matao.

Yohanes 17:17

Wali Pa’angKu, pake tuntuMu mangampotundeka sira apa tuntuMu etu, etu semo anu to monso. Wali ane sira rapotundeka anu to monso etu, sira damawali tau to rani mampolaika songka ngKomi.

1 Korintus 1:2

Wali kami dua mangantulis sura si’i resi komi to nja’u kota Korintus to mangaya i Pue pasi to i Pue Allah Puenya. Wali komi napilis seja i mPue Allah mawali tauNya apa saba palaong to naika i ngKerisitu Yesu. Ia mangampilis komi sindara-ndara pei samparia tau to makai-kai resi Pue ngkita i Yesu Kerisitu ri sambawo lino. Ia semo Pue nsira pasi Pue ngkita.

2 Timotius 2:10

Wali see naka aku buya rayangku mansabaraka samparia kasesa to aku mangarata see maya mangansawang samparia tau to mangaya, tau to napilis i mPue Allah darapalaes yako ri kuasa nu dosa apa saba sira mawali samba’a pei i Kerisitu Yesu. Pasi sira maya mangarata katuwu to bae kayawanya rataka ri singkasaenya.

1 Tesalonika 4:7

Apa i Pue Allah taa mampokio kita damangika lengko to maja’a. Naka pei Ia mampokio kita see kita damangika lengko ngkatuwu to masipato naika ntau to Ia Puenya.

2 Korintus 8:9

Wali masipato komi manoto resi sa’e apa komi mangansani ewa wimba kabaenya kanoto i Yesu Kerisitu, Pue ngkita. Ia sugi kojo tempo tawa ma’i ri lino si’i, pei nempo ewa wetu, Ia buya rayanya mawali masiasi see maya mangansawang kita. Wali yako kasiasi to si Ia etu see naka kita mawali sugi.

2 Korintus 4:15

Wali samparia kasesa to narata mami tempo kami mampakarebaka komi kareba matao, paka bae batuanginya resi komi. Apa kanjo’u-njo’u kaboro-boros komi to mangarata kanoto i mPue Allah, panewa kaboro-boros tau to manganto’oka Ia tarima matao. Wali yako palaong to etu see naka tiduga-dugang tau mangabarong kayawa i mPue Allah.

Ibrani 9:26

Apa ane ewa see, Ia taa maya taa mandudu ngkani mangarata kasesa yako ri tempo pangampapowali lino si’i. Pei si’a ewa see, apa Ia masuwumo ri tempo si’i, to mosumo kapuranya temponya to si’i. Wali Ia mampampueka koroNya see dosa rapakapura kuasanya, pasi palaong etu tamo parluu raika wo’u kadua ngkaninya.

Ibrani 10:29

Wali ane ewa wetu kaparinya huku to narata ntau to mangewa porenta i Musa, bae wo’u huku to masipato narata ntau to mampobo’o Ana i mPue Allah. Apa tau to etu raporapaka ewa mangalombu yau Ia. Tau etu manganto’o tare batuanginya raa i Yesu, etu semo raa to tondong parajanji i mPue Allah, pei kamonsonya raa etu semo to mangika see ia mawali i Pue Allah Puenya. Pasi ia mangarowis Nosa to mangawaika to lino kanoto. Wali tau to mangika palaong to etu masipato mangarata huku to mapari kojo.

Ibrani 9:13

Wali tau to ri ara mporenta i Musa, ane sira mangika bara kesaa naka pei rato’oka makarika ewa ada mporenta i Musa etu, tau etu rapedasaka raa nu bembe pongka pasi raa nu sapi pongka pasi ue to sigalo awu nu ana nsapi to room ratunju yau. Wali ane ewa porenta, raa pasi awu etu mampakayongo muni koro ntau etu see ia maya mampue mampakabae i Pue Allah apa ia tamo rato’oka makarika.

Ibrani 9:18

Wali ewa see seja parajanji to uyunya naika i mPue Allah. Parajanji etu taa seja re’e batuanginya ane tare raa to rapake. Raa etu mampakanasaka re’e to roomo namate yau.

Yohanes 10:36

ane ewa see taa manto’o Aku. Apa Aku napilis i mPue Allah, Pa’angKu, mawali Iaja puenya pasi Aku napokau i mPue Allah ma’i ri lino si’i. Wali maka pei komi mampakasala Aku pei manganto’o Aku manto’o maja’a i Pue Allah apa saba Aku manganto’o, ‘Aku Ana i mPue Allah’?

Yohanes 15:3

Wali komi roomo rapakayongo apa saba komi mangaya gombo to Aku room manganto’oka komi.

Yohanes 15:13

Pasi ane mangkonong pamporayang, tare pamporayang to bae wo’u pei pamporayang ntau to buya rayanya mate mangkapateka galunginya.

Yohanes 17:20

Wali i Yesu mampakapolas pokai-kaiNya, Ia manganto’o wo’u, “Wali si’a ojo anagurungKu etu to Aku mampokaika. Aku mampokaika seja samparia tau to damangaya Aku ri tempo to darata saba yako kareba to nakeni nu anagurungKu etu.

2 Korintus 7:14

Wali ndende raya mami, apa ri katawanya i Titus nayau resi komi, tempo etu aku re’e mampogomboka ia mangabarong komi. Pasi si’i-si’i miyala resi ia monso pu’u gombongku mangkonong komi, wali aku taa mawali mea. Wali gombo mami resi komi sangkani monso, pasi ewa see seja gombongku resi i Titus mangabarong komi seore. Manasamo monso seja gombongku etu.

Kolose 1:6

Wali komi mangandonge kareba matao etu seore pasi mawali manasa mangkonong ewa wimba kamonsonya kanoto i mPue Allah. Panewa yako etu kanjo’u-njo’u kaboro-boros komi to mangaya pasi to rawali lengko ngkatuwumu. Pasi palaong to mawali resi komi etu, palaong etu mawali seja ri sambawo lino tempo tau mangandonge kareba matao. Wali kareba matao etu maya raporapaka ewa kaju to boros wuanya.

1 Yohanes 3:3

Wali i sema-sema tau to masanang mangampeas temponya ia damawali ewa i Kerisitu etu, tau etu mangajagai lengko ngkatuwunya see pasiwa tempo ia maroo ri lino si’i ia mapasing seja ewa i Kerisitu mapasing.

1 Yohanes 3:18

Wali ngana-nganangku, ne'e kita mamporayang sa'e ojo ri gombo ngkita, pei anu kita mamporayang sa'e ri lengkonta seja. Pasi ne'e kita mamporayang sa'e ojo ri nganga ngkita, pei anu kita mamporayang ri kamonso-monsonya.