Yakobus 3:17 - Tuntu i mPue ri Basa Taa

¹⁷ Pei ane tau to re’e kapande to yako resi i Pue Allah ndate saruga, tau etu ewa si’i lengkonya, to uyunya, ia matao lengkonya panewa ia rani tuwu masingkatao pei sa’e, ia taa makasar, ia simpalai, ia rani kojo mangansawang sa’e, pasi boros palaong to matao to inikanya to raporapaka ewa wua ngkaju to matao. Pasi tau etu taa mampasisala tau pasi si’a ojo gombonya to manoto.

Sura Magali Nuntu Ngkatuwu

¹⁷ Paikanya tau anu mampotumpu loʼe anu ungka ri wawonya, kaʼisa siʼa da malino, napokono simadago, madago pai malulu raya. Siʼa pande mporaya pai waʼa mpowianya madago. Siʼa bareʼe moata ncambali pai bareʼe topokira-kira.

Yakobus 3:17 Referans Kwoze

Yakobus 3:15

Apa tau to rato’oka pande, ane ewa wetu lengkonya, kamonsonya kapande to re’e resi ia si’a kapande to yako resi i Pue Allah ndate saruga. Pei kapande ntau to ewa wetu lengkonya, ojo yako ri lino si’i semo, yako pamporani ndayanya pasi yako i Kepala nto pantipu.

Roma 12:9

Wali ne’e dua-dua rayanta mamporayang sa’e. Anu kita mangandolika tangonta yako ri lengko to maja’a pei mangkongko kojo lengko to matao.

Yakobus 1:17

Apa samparia sora to matao pasi samparia sora to masilonga paka yako ndate saruga kama’inya, yako resi i Pue Allah, Pa’a ngkita. Ia semo to nampapowali samparia anu to mareme to ndate yangi. Anu to mareme to ipapowali etu, remenya re’e pombalinya apa re’e temponya rakita pasi re’e wo’u temponya taa rakita. Pei i Pue Allah tare pombaliNya pasi remeNya sangkani re’e resi kita.

Yakobus 1:5

Pei ane re’e tau ri oyo ngkomi to taa gana kapandenya mangkonong palaong to etu, to tao-tao tau etu makai-kai mamporapika resi i Pue Allah, wali i Pue Allah damangawaika ia kapande etu. Kita mangansani i Pue Allah damangawaika kapande etu apa Ia manoto kojo resi samparia tau pasi Ia taa manganseko tau to marapi sawang resi Ia.

1 Yohanes 3:18

Wali ngana-nganangku, ne'e kita mamporayang sa'e ojo ri gombo ngkita, pei anu kita mamporayang sa'e ri lengkonta seja. Pasi ne'e kita mamporayang sa'e ojo ri nganga ngkita, pei anu kita mamporayang ri kamonso-monsonya.

1 Petrus 1:22

Wali si’i-si’i Nosa i mPue Allah mangansawang komi mangampolaika anu to monso, see naka katuwu ngkomi roomo rapakayongongika. Wali etu semo sabanya naka pei komi nukoto mamporayang pua’i ngkita to samba’a pangaya ri kamonso-monsonya. Wali to tao-tao komi masiporayang kojo yako ri kabuya ndaya ngkomi.

Matius 5:8

Masanang tau to ojo pamporani i mPue Allah to napobuuka nsira, apa sira damangkita i Pue Allah.

1 Yohanes 3:3

Wali i sema-sema tau to masanang mangampeas temponya ia damawali ewa i Kerisitu etu, tau etu mangajagai lengko ngkatuwunya see pasiwa tempo ia maroo ri lino si’i ia mapasing seja ewa i Kerisitu mapasing.

Lukas 21:15

Apa tempo komi damampogomboka tau to re’e kuasanya etu, tempo etu semo panewa Aku damampakanasaka komi gombo to danuto’o pasi Aku damangawaika komi kapande. Wali see naka tempo komi magombo etu bali ngkomi taa maya mangewa bara mangabanta gombo ngkomi.

Lukas 6:36

Wali porayang sa’e ewa naika mPa’a ngkita mamporayang tau.”

Ibrani 12:14

Wali ri raya ngkatuwu ngkomi, pakadota tuwu masingkatao resi samparia tau, pasi pakadota mangika lengko to masipato naika ntau to i Pue Allah Puenya. Apa tau to taa mangika palaong to etu, tau etu taa damangansani ewa wimba kamonsonya i Pue.

2 Timotius 2:24

Pasi kita to papolaong i mPue, kita seja taa masipato ane batingka. Kasimbalinya yako etu, masipato kita mangika lengko to matao resi samparia tau. Pasi kita taa maya taa takoto mampotundeka tau, pasi pakabae sabaranta.

1 Petrus 2:1

Wali apa saba tuntu i mPue Allah to singkasaenya etu roomo mangawaika komi katuwu to bou, see naka posaka yau samparia lengko to maja’a, pasi samparia wuti. Ne’e ojo gombo ngkomi to manoto, pasi ne’e seja timopo. Pasi posaka yau seja samparia gombo to manto’o maja’a sa’e.

Yakobus 2:4

Wali ane ewa wetu nuika ngkomi batuanginya komi mawali ewa to pobotus to maja’a pampobuukanya, apa komi mampasisala tau.

Ibrani 12:11

Wali ri rayanya kita rapotunde, matempo-tempo kita ratidas. Pasi tempo kita ratidas etu kita taa ndende rayanta, kita mawo rayanta. Pei yako patunde etu, roo see kita mangika lengko to singkonong pei i Pue Allah pasi kanjo’u-njo’u tiduga-dugang kalindo ndayanta.

Kolose 1:10

Naka pei kami makai-kai ewa wetu, see komi damangika lengko ngkatuwu to masipato naika ntau to mangalulu i Pue pasi to sangkani mampakasanang Ia. Apa ane ewa see, boros ngaya palaong to matao to danuika ngkomi. Palaong etu maya raporapaka ewa wua ngkaju. Pasi kanjo'u-njo'u tiduga-dugang anu to komi mangansani mangkonong i Pue Allah.

Roma 15:14

Wali a’i-a’ingku, aku si’i kunsani kojo komi bae kojo kanoto ngkomi samba’a pei samba’a, pasi komi mangansani kojo anu to rapoguru mangkonong pangaya resi i Pue Yesu. Pasi aku kunsani komi pande masipotunde, mampaposiaka raya ngkomi samba’a pei samba’a.

1 Korintus 12:8

Wali sangga’a tau i Nosa Mapasing mangawaika kapande mampaponsanika sa’e pasisalanya anu to monso pasi anu to taa monso. Pasi resi tau to yusa i Nosa Mapasing to samba’aja etu mangawaika kapande mampakanasaka sa’e tuntu i mPue Allah.

Yakobus 4:8

Pasi pakamosu resi i Pue Allah, apa ane komi mampakamosu resi i Pue Allah, Ia damampakamosu resi komi. Pasi komi to mangika palaong to madosa, pakayongo lengko ngkomi, ewa tau to makarika palenya matao ane mamue. Pasi komi to dua-dua rayamu mangkonong pangaya ngkomi, pakayongo raya ngkomi etu.

1 Timotius 5:21

Wali aku mamporapika resi i Pue Allah pasi i Kerisitu Yesu pasi pomakau i mPue Allah to ipilisiNya see sira mawali matamanasa mangkonong paposia to kuto’oka korom si’i. Paposia etu manganto’o lulu kojo porenta to aku room manganto’oka korom etu. Pasi tempo korom mangabotus palaong to mawali, ne’e mangampilis tau.

Palaong mPomakau i mPue Yesu 11:24

I Barnabas etu, ia tau to matao pasi bae kojo karoso ndaya to nawaika i Nosa Mapasing ia. Pasi ia maroso pangayanya resi i Pue. Wali boros wo’u tau to nja’u ria mangalulu i Pue.

Matius 23:28

Wali ewa see seja komi. Apa ane ri pangkita nu mata ntau, lengko ngkomi singkonong pei i Pue Allah. Pei raya ngkomi maja’a kojo pasi ojo gombo ngkomi to manoto.

1 Tesalonika 2:7

Ewa naika nu indo mangararamaka ananya, ewa see kuika resi komi.

Pilipi 4:8

Wali a’i-a’i, si’i semo paposiangku to kapuranya. Jagai kojo anu to nupobuuka ngkomi. To matao rapobuuka, etu semo anu to monso, anu to masipato ra’angga, anu to singkonong pei i Pue Allah, anu to mapasing, anu to magaya, pasi anu to nato’o nsa’e matao. Wali samparia anu to matao kojo pasi to masipato rabarong, etu semo anu to danupobuuka ngkomi.

Palaong mPomakau i mPue Yesu 9:36

Wali tempo etu, nja’u kota Yope re’e samba’a tau we’a ia anaguru i mPue Yesu seja. Tau etu sanganya i Tabita. (Sanganya etu ane ri basa Yunani rato’oka i Dorkas, Dorkas etu batuanginya “lago”.) Wali i Dorkas etu sangkani mangika palaong to matao pasi ia sangkani mangansawang tau to masiasi.

Yohanes 1:47

Wali sira dua yau mangampago i Yesu. Tempo i Yesu mangkita i Natanael ma’i, Ia manganto’o mangkonong i Natanael etu, to’oNya, “Lo’aja tau etu. Ia tau to mangika lengko ngkatuwu to masipato naika nto Israel. Ia tare kojo mangantipu sa’e.

Yohanes 1:14

Wali Ia to rato’oka i Tuntu, Ia nawali seja to lino pasi Ia re’e maroo ri oyo ngkita. Tempo Ia maroo ri oyo ngkita etu Ia bae kojo kanotoNya resi tau pasi samparia to to’oNya paka monso pu’u. Pasi tempo Ia maroo ri oyo ngkita etu, kita re’e mangkita Ia bae kojo kuasaNya. Wali bae kojo kuasaNya etu apa Ia Ana i mPue Allah to samba’aja, to ma’i napokau mPa’aNya etu.

Titus 3:2

To’oka seja sira taa matao manto’o maja’a sa’e, pasi taa seja matao ane batingka bara makasar magombo resi sa’e. Ika to manoto pasi to matao resi tau samparia.

Titus 1:15

Kamonsonya ane tau to roomo napakayongongika i mPue Allah rayanya, ane tau etu tare bara kesaa to maya mampakarikasika rayanya. Pei ane tau to taa napakayongongika i mPue Allah rayanya, etu semo tau to taa mangaya, ane tau to etu samparia paka makarika resi ia apa pampobuukanya pasi rayanya makarika.

Roma 12:18

Ane re’e kasusa to mawali ri oyo ngkita ne’e kita semo to bo’onta masingkatao muni pei yunu ngkita. Anu kita rani tuwu masingkatao pei yunu ngkita samparia.

Epesus 5:9

Apa yako reme etu mawali lengko ngkatuwu to raporapaka ewa wuanya. Lengko ngkatuwu etu manoto pasi singkonong pei i Pue Allah pasi masipato rasarumaka.

2 Korintus 10:1

Wali re’e to yusa to aku rani manganto’oka komi. Apa aku rani kojo mampaposiaka komi si’i-si’i. Ane ewa panto’o ntau, ane aku siwaka pei komi aku meka-meka rayangku, pei ane longko yako resi komi aku makoje rayangku magombo. Ewa see nato’o ntau. Pei si’a ewa see, apa i Kerisitu Ia taa mabae-bae rayanya pasi taa makasar resi sa’e. Wali ewa wimba lengko i ngKerisitu etu, ewa see seja aku damangika mampaposiaka komi apa aku taa seja damakasar resi komi.

2 Korintus 9:10

Wali i Pue Allah semo to mangawaika resi tau to mampomuya anu to danapomuya etu. Pasi Ia seja to mangika see anu to rapomuya etu mawali pangkoni. Wali Ia seja to damangawaika komi samparia to danusoraka sa’e. Pasi kanjo’u-njo’u tiduga-dugang anu to nawaika i mPue Allah komi etu, see kanjo’u-njo’u tiduga-dugang wua mpalaong ngkomi to singkonong pei Ia.

Matius 5:9

Masanang tau to mangansawang yununya to masimpayu raya nsira naka mawali masingkatao muni. Masanang tau etu apa sira darato’oka ana i mPue Allah.

2 Korintus 6:6

Pasi re’e wo’u lengko mami to mampaponsanika sa’e kami to papolaong i mPue Allah. Etu semo, kami taa mangika lengko to masipato rapokea, pasi kami mangansani anu to monso mangkonong i Pue Allah, kami mansabaraka pasi mangika manoto resi sa’e. Pasi kami re’e i Nosa Mapasing resi kami, pasi mamporayang sa’e ri kamonso-monsonya.

2 Korintus 7:11

Wali pobuuka kojo palaong to mawali saba yako kamawo ndaya to singkonong pei pamporani i mPue Allah to nurata ngkomi seore. Gete bae kojo batuanginya! Apa yako kamawo ndaya ngkomi etu, see naka komi mampakakoro mangika anu to masipato raika. Komi rani kojo mampakakonoka palaong to maja’a to nawali ri oyo ngkomi seore. Pasi maja’a kojo raya ngkomi mampobuuka palaong to maja’a etu. Pasi komi mawali meka raya ngkomi mampobuuka palaong etu. Pasi bae kojo kawongko ndaya ngkomi rani mangkita wo’u aku. Pasi bae seja kadota ngkomi mampakaroo palaong to nawali, pasi mangabotus tau to mangika dosa etu. Wali samparia to roomo nuika ngkomi etu mampakanasa tamo re’e sala ngkomi ane mangkonong palaong to nawali seore.

Yakobus 2:13

Apa i sema-sema tau to taa mamporayang sa’e, tau etu taa seja daraporayang ane ratamo temponya darapangabotus. Tau etu darahuku. Pei tau to mamporayang sa’e, nempo masipato rahuku ia taa darahuku. Wali ane ewa see, pamporayang i mPue Allah resi tau etu damanganangi huku to masipato ia mangarata. See naka matao kojo ane kita taa mampasisala tau.

1 Petrus 2:18

Wali komi to napowatua ntau, polaika songka ntau pue ngkomi, pasi angga kojo sira. Wali ika ewa wetu nempo tau pue ngkomi etu matao pasi manoto pei nempo wuku-wuku.