Titus 3:2 - Tuntu i mPue ri Basa Taa

² To’oka seja sira taa matao manto’o maja’a sa’e, pasi taa seja matao ane batingka bara makasar magombo resi sa’e. Ika to manoto pasi to matao resi tau samparia.

Sura Magali Nuntu Ngkatuwu

² Toʼoka tau seʼe neʼe boi reʼe tau anu napetikodi paikanya da mosintuwu ri kamonconya pai pande mporaya. Mbolimo tau seʼe da malulu raya ri tau pura-pura.

Titus 3:2 Referans Kwoze

Epesus 4:31

Wali posaka yau samparia palaong to mampakamawo i Nosa Mapasing. Palaong to etu ewamo makodi raya, mapoi raya, maja’a raya, matingka, pasi manto’o maja’a sa’e. Posaka yau palaong to etu sindara-ndara pei samparia ngaya nu lengko to maja’a.

Epesus 4:2

Wali lengko to masipato, etu semo ne’e mabae-bae raya ngkomi pasi ne’e seja makasar resi sa’e. Pakabae sabara ngkomi resi sa’e, pasi porayang sa’e naka ne’e majoli masusa resi sira.

1 Timotius 3:3

Ia si’a to panginu, bara to batingka, pasi ia taa makasar. Ia si’a tau to mangaliwu rani masibanta, pasi ia si’a tau to ojo rani doi.

1 Petrus 3:10

Apa re’e to ratulis ri raya ntuntu i mPue Allah to manganto’o, “Tau to rani tuwu masanang pasi rani mangarata katuwu to matao, tau etu to tao-tao mangajagai nganganya naka ne’e manganto’o gombo to maja’a pasi gombo to manipu.

1 Petrus 3:8

Wali ri lelenya ri kapuranya to si’i aku re’e to rani manganto’oka komi samparia. Etu semo, masipato komi samba’a pampobuuka ngkomi, pasi mangepe seja kandende ndaya pasi kamawo ndaya to naepe nu yunu ngkomi samba’a pei samba’a. Pasi masipato komi masiporayang ewa tau to moa’i. Pasi masipato seja komi ne’e mabae-bae rayamu. Pasi matao seja komi rani mangansawang tau to ri raya ngkasusa.

Yakobus 4:11

Wali a’i-a’i, ne’e komi masito’o maja’a samba’a pei samba’a. Apa ane komi manto’o maja’a a’imu to samba’a pangaya, bara mampakasala ia, batuanginya komi mangewa porenta i mPue Allah, apa sewaju ewa manganto’o nempo taa mampalaika porenta etu, taa mawei. Pasi ane komi manto’o maja’a a’imu to samba’a pangaya, komi ewa mangokotaka koro ngkomi damawali ewa to pobotus nsira. Apa komi mampobuuka ojo komi semo to mangansani batuanginya porenta etu, pasi komi manto’o maja’a tau to taa singkonong pei komi. Pei kamonsonya si’a komi to masipato mangabotus sa’e.

Galatia 5:22

Pei lengko to naika ntau to mangalulu pamporani i Nosa Mapasing, lengko etu raporapaka ewa wua ngkaju to matao. Wali lengko etu semo sira mamporayang sa’e, ndende rayanya pasi rodo rayanya. Sira bae sabaranya, matao resi sa’e, manoto resi sa’e pasi masipato rasarumaka.

Matius 11:29

Lulu anu to Aku mampotundeka komi pei powali anagurungKu, apa Aku taa makasar pasi taa bae-bae rayangKu. Wali ane komi ma’i resi Aku, komi damangarata kalindo ndaya.

1 Petrus 2:1

Wali apa saba tuntu i mPue Allah to singkasaenya etu roomo mangawaika komi katuwu to bou, see naka posaka yau samparia lengko to maja’a, pasi samparia wuti. Ne’e ojo gombo ngkomi to manoto, pasi ne’e seja timopo. Pasi posaka yau seja samparia gombo to manto’o maja’a sa’e.

Yakobus 3:17

Pei ane tau to re’e kapande to yako resi i Pue Allah ndate saruga, tau etu ewa si’i lengkonya, to uyunya, ia matao lengkonya panewa ia rani tuwu masingkatao pei sa’e, ia taa makasar, ia simpalai, ia rani kojo mangansawang sa’e, pasi boros palaong to matao to inikanya to raporapaka ewa wua ngkaju to matao. Pasi tau etu taa mampasisala tau pasi si’a ojo gombonya to manoto.

Galatia 6:10

Wali anu kita sangkani pakayoaka mangika matao resi samparia tau, taa manto’o resi pua’i ngkita to samba’a pangaya.

Galatia 6:1

Wali a’i-a’i, ane kita re’e mangangkita samba’a yununta to ra’akal see naka ia mangika palaong to sala, to tao-tao kita to nakentar i Nosa Mapasing yau mampakakonoka tau etu. Pei tempo kita mampakakonoka ia etu, ne’e kita makasar resi ia. Masipato kita masisawang ewa naika ntau to mangansawang yununya mangkoyo anu to mabeu. Apa ane kita masisawang, batuanginya kita mangalulu porenta i ngKerisitu. Pei anu kita mangajagai kojo naka ne’e kita daragoda damangika seja palaong to naika ntau etu.

1 Timotius 3:11

Wali ewa see seja rongo ntau to mawali diaken. Sira seja tau to masipato na’angga nsa’e, pasi si’a tau to bawiwi. Pei sira mangajagai koronya ngkalio pasi sira nempo kesaa palaong to nikanya, sira maya rasarumakaka.

1 Tesalonika 2:7

Ewa naika nu indo mangararamaka ananya, ewa see kuika resi komi.

Pilipi 4:5

Pasi paponsanika samparia tau kanoto ndaya ngkomi apa i Pue mosu rata.

1 Korintus 9:19

Wali saba tare to mangawaika aku saro, see naka tare pasi samba’a tau to masipato mamponsongkaka aku. Pei nempo ewa see, aku mamporayaka mawali ewa watua ntau samparia. Naka pei aku mangika ewa wetu see tempo aku mampakarebaka tau mangkonong i Kerisitu, kanjo’u-njo’u kaboro-boros sira to mangaya Ia.

2 Korintus 12:20

Apa aku moru rayangku mampobuuka temponya aku darata wo’u resi komi. Apa tempo etu bara re’e lengko ngkomi to taa singkonong pei pamporaningku resi komi. Pasi ane ewa see, lengko to si aku taa dasingkonong pei pamporani ngkomi apa aku ojo damanganseko komi. Wali moru rayangku apa aku taa rani mangarata komi masibanta, timopo pei kaloo, pasi maja’a raya ngkomi samba’a pei samba’a. Pasi aku taa rani mangarata komi matingka, manto’o maja’a sa’e, bawiwi, mangei pasi marotai.

2 Korintus 10:1

Wali re’e to yusa to aku rani manganto’oka komi. Apa aku rani kojo mampaposiaka komi si’i-si’i. Ane ewa panto’o ntau, ane aku siwaka pei komi aku meka-meka rayangku, pei ane longko yako resi komi aku makoje rayangku magombo. Ewa see nato’o ntau. Pei si’a ewa see, apa i Kerisitu Ia taa mabae-bae rayanya pasi taa makasar resi sa’e. Wali ewa wimba lengko i ngKerisitu etu, ewa see seja aku damangika mampaposiaka komi apa aku taa seja damakasar resi komi.

Palaong mPomakau i mPue Yesu 23:5

Wali i Paulus mangansono, “A’i-a’i, tempo aku manganto’o gombo to ewa wetu ngena aku taa mangansani ia bara kepala nto pampue to bae angganya. Ane aku mangansani ia kepala nto pampue, aku taa damanganto’o gombo to ewa wetu apa nja’u ratulis ri raya ntuntu i mPue Allah, manganto’o, ‘Ne’e manto’o maja’a kepala-kepala ngkomi!’”

I Yudas 1:10

Pei ane tau to rata ri oyo ngkita etu, sira manganto’o maja’a samparia anu to taa nansani nsira. Sira maya raporapaka ewa binatang, apa binatang taa pande kojo mampobuuka, pei re’e to nansani yami nsira. Wali ewa see seja tau etu. Re’e anu to nansani yami nsira, pasi anu to nansani yami nsira etu semo to mampakaja’a sira.

I Yudas 1:8

Wali ewa to naika ntau tempo owi etu, ewa see seja naika ntau to rata ri oyo ngkita tempo si’i. Sira mampobuu-buuka anu to taa masipato panewa yako ri pampobuuka nsira etu see naka sira mangampolengkoka lengko to mangkarikasika koro nsira. Pasi see naka sira mangewa samparia to re’e kuasa, pasi manto’o maja’a samparia anu to bose angganya.

2 Petrus 2:10

Wali samparia tau to maja’a lengkonya darahuku, taa manto’o tau to mangika lengko ngkatuwu to ojo mangaluluka yau pamporani ngkoro nsira to makarika, pasi tau to taa manga’angga i Pue anu bae kayawaNya. Wali tau to mampotunde anu to taa monso, sira makoje pasi mangei. Pasi sira taa meka manganto’o maja’a tau to bose pangkanya.

1 Petrus 4:4

Wali tempo si’i yunu ngkomi to tempo ruyu etu, sira ipu rayanya apa komi tamo rani sindara-ndara pei sira mangika wo’u palaong to mapari kojo kaja’anya. Wali see naka sira manganto’o maja’a komi.

1 Korintus 6:10

tau to malima, tau to bamporomung, tau to banginu, tau to mampoja’a sa’e, pasi tau to manipu, samparia tau to ewa wetu taa damangarata anu to matao to rawaika resi tau to Makolenya i Pue Allah.