Titus 2:11 - Tuntu i mPue ri Basa Taa

¹¹ Apa i Pue Allah re’e mampaponsanika kita to lino kanotoNya see samparia kita maya rapalaes.

Sura Magali Nuntu Ngkatuwu

¹¹ Maka Pue Ala mantujumo towe ndaya anu da mancorepaka pura-pura tolino.

Titus 2:11 Referans Kwoze

1 Timotius 2:4

Apa Ia rani samparia tau darapalaes pasi damangansani anu to monso mangkonong Ia.

Epesus 2:8

Wali yako kanoto i mPue Allah semo naka pei komi seja rapalaes apa saba komi mangaya i Kerisitu. Wali si’a yako palaong ngkomi naka pei komi rapalaes. Sora i mPue Allah semo naka pei komi rapalaes.

Ibrani 2:9

Pei to kita mangansani, parajanji i mPue Allah etu rabanangimo apa saba i Yesu semo. Etu semo jaya to napake i mPue Allah mangabanang parajanjiNya etu. Kamonsonya, tempo i Yesu ma’i ri lino si’i, Ia rapakakodi pangkaNya see kodi wo’u sangkodi pei pangka mpomakau i mPue Allah. Ia mawali ewa wetu see Ia maya mangarata kasesa sampe mate yau mangkapateka samparia tau, apa saba kanoto i mPue Allah. Roo see, apa saba Ia buya rayaNya mate yau ewa wetu, see naka tempo si’i Ia nawaika i mPue Allah pangka to meyawa pasi to ra’angga.

Epesus 2:5

Wali see naka tempo kita tiroo ewa tau matemo apa saba dosa, tempo etu semo i Pue Allah mangika jaya see kita mawali samba’a pei i Kerisitu, see naka kita mangarata katuwu. Wali yako kanoto i mPue Allah semo naka pei komi seja rapalaes.

2 Tesalonika 2:16

Wali kami makai-kai resi i Yesu Kerisitu, Pue ngkita, pasi resi i Pue Allah, Pa’a ngkita. Ia mamporayang kita pasi yako kanotoNya Ia roomo mangawaika kita karoso ndaya to singkasaenya pasi Ia mangawaika seja kita pansarumaka to matao.

Roma 5:15

Pei bae kojo pasisalanya palaong to naika i Adam pasi palaong to naika i Yesu Kerisitu. Apa sora to nawai i mPue Allah saba yako palaong to naika i Yesu etu si’a ewa dosa to naika i Adam. Apa yako dosa ntau samba’a etu see naka boros tau mate yau. Pei yako palaong i mPue Allah see naka boros tau rasawang. Wali kanoto i mPue Allah pasi sora to iwaiNya etu to bae-bae kuasanya pei dosa i Adam apa kanotoNya pasi soraNya etu mangansawang tau boros. Palaong etu mawali apa saba kanoto yako samba’a tau, etu semo i Yesu Kerisitu.

Yohanes 1:14

Wali Ia to rato’oka i Tuntu, Ia nawali seja to lino pasi Ia re’e maroo ri oyo ngkita. Tempo Ia maroo ri oyo ngkita etu Ia bae kojo kanotoNya resi tau pasi samparia to to’oNya paka monso pu’u. Pasi tempo Ia maroo ri oyo ngkita etu, kita re’e mangkita Ia bae kojo kuasaNya. Wali bae kojo kuasaNya etu apa Ia Ana i mPue Allah to samba’aja, to ma’i napokau mPa’aNya etu.

Palaong mPomakau i mPue Yesu 11:23

Ojo karata i Barnabas nja’u Antiokhia, ia masanang kojo mangkita kanoto i mPue Allah resi tau etu. Ia mampakaroso raya nsira pasi manganto’oka sira, “Nempo kesaa to mawali resi komi, ne’e rapandooka yau mangaluluka i Pue.”

Palaong mPomakau i mPue Yesu 20:24

Pei aku taa mampobuuka bae batuanginya katuwungku, apa to bae batuanginya resi aku mampakaroo palaong to nasarumakaka i mPue Yesu aku. Palaong etu semo mampakareba kareba matao mangkonong kanoto i mPue Allah. Wali see naka aku tiroo dayau ndeku Yerusalem.

Lukas 3:6

see samparia to lino damangkita ewa wimba danaika i mPue Allah mampalaes tau.’” (Yesaya 40:3-5) Wali etu semo gombo i Yesaya tempo owi mangkonong palaong i Yohanes.

1 Timotius 1:14

Palaongingku etu maja’a, pei kanoto i mPuenta bae kojo resi aku, pasi bae seja pangaya pasi pamporayang to nawaika i ngKerisitu Yesu aku.

Roma 5:2

Kita mangaya Ia, wali see naka Ia mangika jaya see kita mangarata kanoto i mPue Allah. KanotoNya etu re’emo resi kita si’i-si’i. Wali kita ndende rayanta apa kita mansarumaka kojo kita datuwu sindara-ndara pei i Pue Allah ri raya ngkayawaNya.

Kolose 1:6

Wali komi mangandonge kareba matao etu seore pasi mawali manasa mangkonong ewa wimba kamonsonya kanoto i mPue Allah. Panewa yako etu kanjo’u-njo’u kaboro-boros komi to mangaya pasi to rawali lengko ngkatuwumu. Pasi palaong to mawali resi komi etu, palaong etu mawali seja ri sambawo lino tempo tau mangandonge kareba matao. Wali kareba matao etu maya raporapaka ewa kaju to boros wuanya.

Galatia 2:21

Pei ane yako mangalulu porenta i Musa semo naka pei tau maya nato’o i mPue Allah tare dosanya, ane ewa see tare batuanginya kapate i ngKerisitu etu. Wali tau to manganto’o ewa wetu, tau etu sewaju ewa manganto’o tare batuanginya kanoto i mPue Allah mangawai AnaNya etu. Wali gete, aku bo’ongku manganto’o ewa wetu.” Wali etu semo gombongku resi tau to nja’u Antiokhia seore.

2 Korintus 6:1

Wali kami mapalaong sindara-ndara pei i Pue Allah, see naka kami mampaposiaka komi manganto’o, pake kanoto to nawaika i mPue Allah komi naka ne’e kanoto etu damawali yau tare batuanginya resi komi.

Palaong mPomakau i mPue Yesu 13:47

Apa ewa see porenta i mPue Allah resi kami. Ia manganto’oka kami, to’oNya ‘Aku room mangampilis komi damampaponsanika resi tau to si’a to Yahudi mangkonong Aku. Wali komi damawali ewa reme to mangansindo tampa to mawuri. Pasi Aku mampokau komi see komi damampakarebaka resi tau ri suogi lino mangkonong ewa wimba sira maya mangarata katuwu to singkasaenya.’ (Yesaya 49:6) Etu semo gombo i mPue Allah resi kami.”

Palaong mPomakau i mPue Yesu 13:43

Wali yako etu sira samparia masuwu yako ri banua etu. Tempo sira masuwu, boros to Yahudi pasi tau to yusa to mangalulu kojo agama nto Yahudi, sira mangalulu i Paulus sira dua i Barnabas. Wali i Paulus sira dua magombo wo’u mampakaroso raya ntau boros etu naka ne’e sira mandoo mansarumaka kanoto i mPue Allah.

Yohanes 1:9

Wali i Reme to napakarebaka i Yohanes etu, Ia Reme to monso to ma’i ri lino si’i. I Reme etu ma’i damampaponsanika samparia tau mangkonong jaya i mPue Allah ewa naika mpansona mampakaremeka tau jaya ri raya mburi.

Lukas 24:47

Pasi re’e seja gombo to ratulis to manganto’o saba yako kuasa i ngKerisitu, see naka tau damampakarebaka resi sa’e manganto’oka sira, ‘Pojea see dosa ngkomi tamo danakitanaka i mPue Allah.’ Wali kareba etu darapakarebaka ri kota Yerusalem ruyu panewa yako etu kareba etu darapakarebaka resi samparia bansa nto lino.

Markus 16:15

Roo see i Yesu manganto’oka wo’u sira, “Inta resi samparia tau ri sambawo lino pei pakarebaka resi sira kareba matao.

Matius 28:19

Wali apa saba kuasangKu etu, see naka Aku manganto’oka komi inta resi samparia tau ri sambawo lino pei pakarebaka resi sira kareba matao see sira damawali seja anagurungKu. Panewa baptis sira mangika tondong see nansani nsa’e sira i Pue Allah Pa’a puenya, pasi Ana i mPue Allah puenya, pasi i Nosa Mapasing seja puenya.

Ibrani 12:15

Pakatao see tare pasi samba’a komi to mangandolika tangonya yako kanoto i mPue Allah. Pasi ne’e mangabiaka tau mangarotai komi. Apa tau to ewa wetu raporapaka ewa kale to tuwu mawali pinumuya to mapa’i. Apa yako tau samba’a etu, taa masae boros tau rapakasusa panewa damangika dosa.

2 Timotius 4:17

Pei nempo tare tau to mampasimbalika aku, i Pue re’e ri awengku. Ia mampakaroso rayangku see aku gana karosongku mampakarebaka samparia kareba matao, see samparia tau to si’a to Yahudi maya mangandonge. Pasi Ia mangalapa aku yako ri kuasa ngkepala measa to raporapaka ewa singa.

Kolose 1:23

Ewa wetu damawali resi komi ane komi tare pandoonya mangaya i Pue see raya ngkomi mawali maroso pasi rodo. Pasi ne'e bata-bata raya ngkomi mansarumaka anu to nato'o ngkareba matao to nudonge ngkomi seore. Masipato komi mansarumaka kareba matao, apa kareba matao etu, etu semo kareba matao to roomo rapakarebaka resi samparia tau ri sambawo lino. Pasi naka pei aku mawali to papolaong see damampakarebaka kareba matao etu. Wali masipato kojo komi mansarumaka kareba etu.

Roma 10:18

Pei aku mampotanaka, “Wimba, to Yahudi bara taa mangandonge kareba matao? Nadonge kojo! Apa re’e to ratulis ri raya ntuntu i mPue Allah to manganto’o, “Loo ntau to mampakarebaka kareba matao nadonge ntau ri sambawo lino. Pasi gombo nsira natikareba rataka ri suogi lino.” (Masmur 19:4) Etu semo to ratulis, wali manasa sira re’emo mangandonge kareba matao.

Palaong mPomakau i mPue Yesu 17:30

Tempo ruyu, tempo to lino tawa mangansani pamporani i mPue Allah, tempo etu i Pue Allah ojo mangansabaraka sala to naika ntau etu. Pei ri tempo si’i Ia mamporentang samparia tau ri sambawo lino, to’oNya, ‘Pajeamo!’

2 Timotius 1:10

Pasi si’i-si’i Ia room mampaponsanika kita songkaNya pasi kanotoNya etu, apa i Kerisitu Yesu, to Pansompo ngkita, Ia nama’imo. Wali i Kerisitu Ia room mampakapura kuasa ngkapate, pasi yako ri kareba matao Ia re’e mampaponsanika kita jaya to mangarata katuwu to tare kapuranya.