Matius 24:4 - Tuntu i mPue ri Basa Taa

⁴ Wali i Yesu mangansono, “Pakatao kojo see komi taa natipu ntau mangkonong temponya Aku dama’i muni ri lino.

Sura Magali Nuntu Ngkatuwu

⁴ Mesono i Yesu ndatoʼoka tau seʼe, “Ndipakadago, neʼe boi komi ndatengosi!

Matius 24:4 Referans Kwoze

1 Yohanes 4:1

Pei ngana-ngana to kuporayang, ne'e mansaka mangaya samparia tau to manganto'o, "Aku magombo yako ri kuasa i Nosa Mapasing." Pei paresa ruyu gombo ntau etu see manasa bara monso pu'u yako resi i Pue Allah. Ika ewa wetu apa boros to pantuntu tuntu to taa monso to masuwu ri sambawo lino si'i.

2 Tesalonika 2:3

Wali nempo bara kesaa to nato’o ntau, ne’e natipu ntau etu. Kita mangansani taa monso gombo ntau etu apa kamonsonya tempo etu tawa darata ane tawa rata temponya boros tau tiokotaka yako ri lino si’i. Pasi temponya i Pue mula maporenta ri lino etu tawa darata ane tawa rapapokitaka resi to lino samba’a tau to mangewa kojo i Pue Allah, etu semo tau to taa maya taa darapakaja’aka yau.

Kolose 2:8

Wali pakatao kojo see komi taa na'akal ntau to magombo yako ri kapande nto lino. Apa gombo ntau etu kamonsonya tare batuanginya pasi ojo mangantipu tau. Tau etu ojo mampotundeka sa'e mangkonong ada to napotundeka nu bue-bue ngkita to lino. Pasi sira mampotundeka sa'e pampobuuka ntau mangkonong lino si'i. Wali anu to napotundeka nsira etu si'a yako resi i Kerisitu kama'inya.

Epesus 5:6

Wali ne’e natipu ntau to manganto’o palaong to ewa wetu taa danahuku i mPue Allah, apa gombonya etu taa monso. Apa saba yako palaong to ewa wetu naka pei i Pue Allah mangahuku tau to taa mampalaika Ia.

Markus 13:22

Apa ri tempo etu boros tau to damangawutis tau, sira manganto’o, ‘Aku semo i Kerisitu, Makole parajanji i mPue Allah.’ Pasi re’e seja to manganto’o, ‘Aku semo to pantuntu tuntu i mPue Allah.’ Tau etu sira damangika palaong to taa rapobiasa to mawali tondong resi tau, pasi palaong to mampakaipu raya ntau. Sira mangika palaong to etu apa sira mampobuuka bara maya mangantipu yau tau, nempo tau to natipu etu tau to roomo napilis i mPue Allah.

Epesus 4:14

Apa pamporani i mPue kita tamo ewa ngana mayunu to maya ratipu. Ane tau to ewa wetu, sira maya raporapaka ewa duangan to kanggoli-nggoli naika nu bombang pasi to nakeni nu ngoyu marimbo njo’u-ma’i njo’u-ma’i. Apa sira ojo mangaluluka yau gombo ntau to mampoguru ojo mpangkewanya. Pasi sira naakal ntau to pande mangika songka to manipu. Wali ne’emo kita ewa wetu.

Lukas 21:8

Wali i Yesu mangansono, “Pakatao kojo see komi taa natipu ntau mangkonong temponya Aku dama’i muni ri lino. Apa dama’i boros tau to damampoanika Aku, sira damanganto’o samba’a pei samba’a, to’onya, ‘Aku semo i Makole parajanji i mPue Allah.’ Pasi sira damanganto’o, ‘Daratamo tempo ngkama’i i Makole parajanji i mPue Allah.’ Ewa wetu danato’o ntau, pei ne’e mangalulu tau etu.

Kolose 2:18

Wali re'e tau to mangepe sira semo to bae angganya apa sira manganto’o sira mandudu ngkani mangkita pangkita to taa rapobiasa. Tau etu manganto'o ne'e mangei pei kamonsonya sira semo to mangei. Pasi sira manganto'o to tao-tao kita ojo mampue resi pomakau i mPue Allah yako ndate saruga. Wali a'i-a'i, ne'e natipu ntau to ewa wetu apa kamonsonya tare to naika nsira see masipato sira mawali mangei. Apa pampobuuka nsira ojo pampobuuka nto lino.

Galatia 6:3

Apa ane re’e tau to mangei mampobuuka pei manganto’o, “Aku semo to tao-tao pei yunungku,” tau etu ojo mangantipu koronya. Apa kamonsonya si’a ia to tao-tao pei yununya etu.