Lukas 23:33 - Tuntu i mPue ri Basa Taa

³³ Wali yako etu sira rata nja’u pantana to rato’oka Wuku Wo’o. Rata nja’u ria tau to mangkeni i Yesu mangampaku Ia ri kaju pasape. Pasi sira mangampaku seja tau maja’a dua mba’a etu ri kaju pasape panewa kaju pasapenya rapokore ri awe nu ngkaju pasape i Yesu, samba’a ri sambalinya tondo ngkana, pasi samba’a wo’u ri sambalinya tondo ngkii.

Sura Magali Nuntu Ngkatuwu

³³ Kajela ntau seʼe ri pongkuntana anu ndapapotoʼo, “Takumboʼo”, napakumo ntau seʼe ri kaju ndapanggo i Yesu pai tau majaʼa radua setu – sambaʼa tau ri tondo mokana pai anu sambaʼa tau woʼu ri tondo mokaii i Yesu.

Lukas 23:33 Referans Kwoze

1 Petrus 2:24

Wali i Kerisitu etu, Ia semo to mangkeni dosa ngkita ri koroNya tempo Ia rapaku ri kaju pasape. Pasi yako wela-wela to narata i ngKerisitu seore, see naka kita rapakatao. Ewa wetu inikaNya see kita maya mawali ewa tau mate to tamo nakuasang nu dosa. Pasi Ia mangika palaong etu see kita maya tuwu damangika lengko to singkonong pei i Pue Allah.

Yohanes 18:32

Wali tempo sira manganto’o gombo etu, palaong etu mangabanang gombo to nato’o i Yesu seore. Tempo etu Ia magombo yami mangkonong ewa wimba Ia darapopate yau. Apa Ia manganto’o Ia damate rapaku ri kaju pasape, pei ojo to Roma semo to mangika palaong to etu.

Galatia 3:13

Pei tare pasi samba’a kita to takurang mangalulu samparia to nato’o mporenta i Musa etu, see naka kita samparia natanaa i mPue Allah. Pei kita tilapamo yako ri tanaa etu apa i Kerisitu mangabolos kita. Ia mangarata tanaa etu singkonong ewa to ratulis ri raya ntuntu i mPue Allah to manganto’o, “I sema-sema tau to rapaku ri kaju pasape, batuanginya tau etu natanaa i mPue Allah.” (Ulang 21:23) Wali tempo i Yesu rapaku ri kaju pasape, tempo etu Ia kono tanaa etu.

Palaong mPomakau i mPue Yesu 13:29

Wali sira mangika resi i Yesu samparia to natulis yami nto pantuntu tuntu i mPue Allah tempo owi mangkonong palaong to damawali resi Ia, panewa roo see re’e wo’u tau to mantauraka lembaNya yako ri kaju pasape panewa mampoduli ri raya mbayau mbatu.

Palaong mPomakau i mPue Yesu 5:30

I Pue Allah to napue nu bue-bue ngkita tempo owi, Ia semo to nangawangu muni i Yesu to mate nupaku ngkomi ri kaju pasape seore.

Palaong mPomakau i mPue Yesu 2:23

Wali i Yesu etu Ia roomo raposora yau resi komi, pasi tempo Ia raposora yau etu komi mampopate yau Ia apa komi mangawaika tau maja’a mampaku Ia ri kaju pasape. Pei i Pue Allah nansani yami palaong etu damawali, apa palaong etu mangalulu songka to si Ia.

Yohanes 3:14

Wali palaong to damawali resi Aku ewa palaong to mawali resi ule tambaga to naika i Musa nja’u pada bone tempo owi. Ule tambaga etu naposaka i Musa ri sampole kaju panewa inokotakanya ri tango ntau boros see tau to mangalo’aka maya rapalaes. Wali ewa wetu seja damawali resi Aku, Wiyaa nto Lino. Apa Aku taa maya taa darapaku ri kaju pei raokotaka seja ri tango ntau boros.

Lukas 24:7

Tempo etu Ia manganto’oka komi Wiyaa nto Lino taa maya taa daraposora yau resi tau to madosa. Panewa tau etu damampopate yau Ia, pei ri rayanya togo eo Ia damambangu muni yako ri kapateNya.”

Matius 26:2

“Komi mangansani ri rayanya dua mbengi si’i darata temponya roa rapangendo temponya bue-bue ngkita to Israel naliunaka mpomakau to mangkeni kapate tempo ia mangkita raa to rapalasika ri wombo nsira la’u tana Mesir tempo owi. Roa etu kita manganto’o Roa Paskah. Wali tempo etu semo Aku, Wiyaa nto Lino, daraposora yau see danapaku ntau ri kaju pasape.”

Matius 20:19

Pasi sira damangawaika Aku resi tau to si’a to Yahudi panewa tau etu damampokore Aku pasi damampedas seja Aku. Roo see sira damampopate yau Aku mangampaku Aku ri kaju pasape. Pei ri rayanya togo eo Aku damambangu muni yako ri kapatengKu.”

Masmur 22:16

Wali boros tau to balingku sira raporapaka ewa asu to maja’a kiranya mangalimpung yau aku. Tau to maja’a etu kalili-lili rani mampakaja’aka yau aku. Wali sira mangantosu palengku pasi witingku.