Kolose 3:11 - Tuntu i mPue ri Basa Taa

¹¹ Wali apa saba Ia roomo mangawaika kita katuwu to bou, see naka tare pasisalanya tau. Nempo to Yahudi pasi nempo tau to si'a to Yahudi, nempo tau to rasui pasi nempo tau to taa rasui, nempo tau to yako lipu to yusa pasi nempo tau to maila, pasi nempo tau to napowatua ntau pasi nempo tau to taa napowatua ntau, nempo ewa wimba tau, tare pasisalanya. Apa i Kerisitu semo to bae batuangiNya pasi Ia re'e maroo ri rayanya samparia tau to mangaya.

Sura Magali Nuntu Ngkatuwu

¹¹ Ua kaʼewanceʼenya bareʼemo da reʼe posisalanya to Yahudi pai anu banya to Yahudi, tau anu ndasuna pai anu bareʼe ndasuna; bareʼemo reʼe posisalanya ri oyo ntau mencua pai tau bemoada; bareʼemo reʼe posisalanya watua pai kabosenya; maka ri Kerisitu katepasambaka pura-puranya, maka Sira sambaʼa-mbaʼa pai tau seʼe pura-pura!

Kolose 3:11 Referans Kwoze

1 Korintus 12:13

Apa kita nabaptis i Nosa Mapasing anu samba’aja etu darapasimba’a mawali yau samba’a koro. Kita nempo to Yahudi, nempo si’a to Yahudi pasi nempo watua nempo si’a watua, samparia mawali samba’a koro. Pasi kita samparia mangarata i Nosa Mapasing anu samba’aja etu maroo ri raya ngkita. Wali palaong etu raporapaka ewa malagi tau to manginu yako mata nue to samba’aja.

Roma 10:12

Wali gombo etu kono kita samparia apa tare pasisalanya to Yahudi pasi tau to si’a to Yahudi. Kita to lino samparia paka samba’aja Pue ngkita. Pasi Ia bae kanotoNya resi samparia tau to makai-kai resi Ia marapi rasawang.

Epesus 3:6

Wali songka to tamo rawuni etu, songka etu mangkonong tau to si’a to Yahudi sira maya mangarata seja tilanya sindara-ndara pei to Israel. Pasi sira seja mawali samba’a koro pei to Israel pasi mangarata seja anu to naparajanjika i mPue Allah. Naka pei sira mangarata samparia to etu apa sira seja samba’a pei i Kerisitu saba mangaya kareba matao.

Epesus 1:23

Kita to mangaya rato’oka koro i ngKerisitu. Wali ane ewa koro ntau, taa saga ane ojo wo’o pei tare koronya. Pasi ewa see seja kita to mangaya, kita semo to rato’oka koro i ngKerisitu anu to mampakagana Ia. Ri kapuranya, Ia semo to mampakagana kojo samparia anu to re’e. Wali etu semo kuasaNya to bae kojo to aku mamporapika resi i Pue Allah see komi damangansani.

Roma 3:29

Apa i Pue Allah si’a ojo Pue ntau to Yahudi. Ia seja Pue ntau to si’a to Yahudi.

Galatia 5:6

Apa ane kita to samba’a pei i Yesu Kerisitu apa saba pangayanta, taa mawei nempo rasui mangalulu ada nto Yahudi, nempo taa. Apa si’a ada to etu to bae batuanginya. To bae batuanginya, etu semo pangayanta. Pasi pangayanta etu manasa saba yako pamporayanginta resi sa’e.

Yohanes 17:23

Batuanginya mawali samba’a pampobuuka, etu semo, Aku maroo ri raya nsira, pasi Komi maroo ri rayangKu, wali ane ewa see, sira maya samba’a kojo pampobuuka nsira. Pasi ane sira samba’a pampobuuka, ane ewa see, to lino to taa mangaya damangkita kasingkatao nsira etu panewa tau to taa mangaya etu damangansani Komi semo to nampokau Aku. Pasi sira damangansani Komi mamporayang tau to mangaya Aku, pasi pamporayang ngKomi resi tau to mangaya etu sewaju ewa pamporayang ngKomi resi Aku.

Galatia 2:20

Wali aku raporapaka ewa matemo, see naka si’amo aku to tuwu si’i, i Kerisitu semo to tuwu ri rayangku. Pasi ri raya ngkatuwungku ri lino si’i aku mangika lengko ngkatuwu to singkonong pei pangayangku resi Ana i mPue Allah. Apa Ia mamporayang aku pasi nangkapateka aku.

1 Korintus 7:19

Apa ane ri pangkita i mPue Allah nempo tau rasui mangalulu ada nto Yahudi, nempo taa, tare batuanginya resi Ia. To bae batuanginya resi i Pue Allah kita mangalulu samparia to Ia mamporentangika kita.

Palaong mPomakau i mPue Yesu 15:17

Naka pei Aku damangika ewa wetu see to lino to toronya damangaliwu Aku, etu semo tau to si’a to Yahudi, sira darato’oka seja Aku puenya.’

Kolose 2:10

Wali i Kerisitu semo kepala to mangkuasang samparia kepala pasi samparia to re'e kuasanya. Pasi samparia to re’e resi i Kerisitu etu paka re'e seja resi komi apa komi samba'a pei i Kerisitu.

Roma 1:14

Wali aku mangepe kainda resi samparia tau see naka aku mampakarebaka kareba matao resi samparia tau nempo tau to Yunani pasi to si’a to Yunani, nempo tau to malangan sekolanya, pasi to tare sekolanya.

Yohanes 15:5

“Wali Aku semo to raporapaka ewa pu’u nu anggur pasi komi ewa ra’anya. Wali i sema tau to maroo masingkatao pei Aku, pasi Aku maroo masingkatao pei ia, tau etu raporapaka ewa ra’a nu anggur to singkenta pei pu’unya see naka maya mawali malagi wuanya. Wali tau to maroo masingkatao pei Aku etu, tau etu dabae kojo wua mpalaonginya. Pei ane komi taa maroo masingkatao pei Aku, komi taa maya mangika bara kesaa to bae batuanginya.

Palaong mPomakau i mPue Yesu 28:4

Wali tau to maroo nja’u lipu etu, sira mangkita ule kansa’u-nsa’u ri pale i mPaulus, wali sira magombo samba’a pei samba’a, sira manganto’o, “Matantu kojo tau etu re’e nangampopate sa’e apa lo’a, nempo ia taa mate malodong, pue to we’a to mangabotus tau taa mangawaika ia datuwu.”

Palaong mPomakau i mPue Yesu 28:2

Tau nja’u ria manoto kojo resi kami. Sira masanang mangansawang kami samparia pasi sira mampotuwuka kami apu apa mula uja wo’u pasi loto rao.

Yohanes 14:23

Wali i Yesu mangansono, Ia manganto’o, “Ane tau mamporayang Aku, ia damampalaika gombongKu. Wali Pa’angKu damamporayang ia, pasi Kami dama’i maroo resi tau etu.

2 Yohanes 1:9

Wali ne’e kojo mangaluluka yau to pantipu etu. Apa bara i sema tau to taa mangkongko anu to roomo napotundeka i ngKerisitu, pei mangaliunaka, tau etu tare i Pue Allah maroo ri rayanya. Pei i sema to mangkongko anu to napotundeka i ngKerisitu, tau etu re'e i Pue Allah, Pa'a, pasi AnaNya seja maroo ri rayanya.

1 Yohanes 5:20

Pasi kita tansani seja Ana i mPue Allah nama'imo. Pasi Ia roomo mampakanasaka kita see naka kita maya mangansani i Pue Allah to monso. Wali kita roomo mawali samba'a resi i Pue Allah to monso etu apa kita samba'a pei AnaNya, i Yesu Kerisitu. Ia semo i Allah to monso pasi Ia semo pu'u ngkatuwu to singkasaenya. Wali see naka masipato kita tuwu masingkatao pei Ia.

Epesus 6:8

Apa komi mangansani samparia palaong to matao to naika ntau, nempo watua, nempo si’a, paka danawaika i mPue ntanapanya.

Epesus 3:17

Pasi aku makai-kai see i Kerisitu damasanang maroo ri raya ngkomi pasi masingkatao pei komi apa saba pangaya ngkomi. Apa ane ewa see, komi danapakaroso yako pamporayangiNya see komi mawali ewa kaju to maroso kalenya pasi ewa banua to maroso pondasinya.

1 Korintus 14:11

Pei ane aku taa manasangku batuanginya gombo ntau to magombo etu, tau etu mampobuuka aku ewa tau to rata ri lipu ntau to yusa. Pasi aku mampobuuka ia ewa see seja apa kami taa masinsani.

Roma 3:22

Wali jaya etu semo samparia tau to mangaya i Yesu Kerisitu, tau etu danato’o i mPue tare dosanya. Ia taa mampasisala tau.

Epesus 2:14

Apa i Kerisitu semo to mampasimba’a kami to Yahudi pasi komi to si’a to Yahudi, wali si’i-si’i kita masingkatao. Apa Ia mangawaika koroNya mate ri kaju pasape. Ewa wetu inikaNya mampakapura kuasa mporenta i Musa to manganto’oka to Yahudi kesaa pura to daraika pasi to taa daraika. Tempo ruyu, porenta i Musa etu ewa rindi to mangangoyot kami to Yahudi pasi komi to si’a to Yahudi, see naka kita masimusu. Pasi tempo etu kita dua suku, pei si’i-si’i kita roomo rapasimba’a apa kita samba’a pei i Kerisitu. Wali etu semo sabanya naka pei i Kerisitu mate ri kaju pasape. Ia mate see kami to Yahudi pasi komi to si’a to Yahudi tamo masimusu, pei maya masingkatao apa saba napasimba’a i ngKerisitu. Pasi Ia mate see kita to lino to rapasimba’a etu maya masingkatao pei i Pue Allah saba yako palaong to inikaNya.