Kolose 1:28 - Tuntu i mPue ri Basa Taa

²⁸ Wali kami mampakarebaka resi samparia tau mangkonong i Kerisitu. Kami mampatiendoka sira pasi mampotundeka sira yako kasamparianya kapande to nawaika i mPue kami. Naka pei kami mangika ewa wetu see mampasilonga samparia tau etu to samba'a pei i Kerisitu Yesu.

Sura Magali Nuntu Ngkatuwu

²⁸ I Kerisitumo setu anu kapetumbu ri tau pura-pura. Kapatiendo pai kapaguru tau seʼe pura-pura ri kaloʼe ndaya. Tangara ndaya mami da naka sambaʼa-sambaʼa tau da kakeni ri Pue Ala, ewa tau anu matinuwumo ri peaya ndaya ua sambaʼa-mbaʼamo pai i Kerisitu.

Kolose 1:28 Referans Kwoze

Epesus 5:27

Naka pei Ia mangika ewa wetu see kita to tauNya dabae kojo kayawanta tempo Ia mangkeni kita ri tangoNya ewa pangantin to rakeni ri tango ntau to damangoko. Tempo etu kita raporapaka ewa to we’a to pakenya tare anu to makarika bara makuru bara anu to yusa to taa magaya. Apa kita i Pue Allah Puenya pasi tare to maya rapakasala.

Matius 5:48

Pei komi ngana i mPue Allah, wali to tao-tao lengko ngkatuwu ngkomi matao wo’u pei lengko ntau to taa mangansani Ia etu. Wali see naka masipato komi mamporayang samparia tau sewaju ewa Pa’a ngkomi to ndate saruga Ia mamporayang samparia tau.”

Kolose 3:16

Wali saka kojo samparia gombo to nato'o i ngKerisitu ri raya ngkomi. Gombo etu bae kojo batuanginya raporapaka ewa kasugi. Wali pake gombo i ngKerisitu etu damasipotunde pei masipaposiaka yako kasamparianya kapande to nawaika i mPue Allah komi. Pasi ponyanyika nyanyi ewa gombo to ratulis ri raya buku Masmur. Pasi matao seja mamponyanyika nyanyi to mangabarong i Pue Allah pasi nyanyi to yusa mangkonong Ia. Wali ponyanyika nyanyi etu resi i Pue batuanginya manganto'oka Ia tarima matao apa kabuya ndaya ngkomi.

1 Korintus 2:6

Pei nempo taa mangampake kapande nto lino, pei tiroo re’e kapande to kami mampakarebaka tau to marosomo pangayanya. Kapande to etu si’a kapande nto lino ri tempo si’i pasi si’a seja kapande ntau to bose angganya to ri tempo si’i, apa kuasa nsira dapaya yau.

Kolose 1:22

Pei si'i-si'i i Pue Allah roomo mangawali komi see komi seja maya masingkatao pei Ia. Ia mangika palaong to etu mangampake koro i ngKerisitu to mate rapaku ri kaju pasape. Pasi naka pei Ia mangika ewa wetu see tempo Ia damamposaka komi ri tangoNya komi damapasing pasi tare lengko to maya rato'o sala pasi to masipato raseko.

2 Korintus 11:2

Apa aku mamporayang komi, wali see naka aku timopo mampobuuka komi bara damangaluluka songka ntau to taa singkonong pei kareba matao. Wali aku kunsani katimopongku etu singkonong pei i Pue Allah. Apa komi raporapaka ewa tau we’a to tawa re’e nepenya to langkai. Pasi aku raporapaka ewa pa’a ngkomi to roomo mamporanika komi see komi mangkasimpandeka samba’a tau to damawali rongomu. Etu semo i Kerisitu. Wali pamporaningku komi ojo i Kerisitu semo to nululu ngkomi see komi tiroo ewa tau we’a to tawa nepenya to langkai ane ratamo temponya aku mampasiwaka komi pei Ia.

2 Korintus 4:5

Wali etu semo sabanya naka pei sira taa mangaya kareba to ipakarebaka mami etu, si’a saba kareba etu taa matao. Apa anu to ipakarebaka mami resi tau, si’a mangkonong koro mami. Kami mampakarebaka resi tau mangkonong anu to monso, etu semo i Kerisitu Yesu, Ia semo Pue. Pei to kami manganto’o mangkonong kami tempo mampakareba kareba etu ojo si’i, kami rapokau resi komi damawali to papolaong ngkomi apa saba palaong to naika i Yesu. Wali ewa wetu gombo mami.

Palaong mPomakau i mPue Yesu 20:31

Wali see naka jagai kojo. Pasi ne’e mangkalingan samparia patiendongku. Apa togo nto’u kasaenya wuri eo aku tare pandoonya mampatiendoka komi samba’a pei samba’a. Tempo etu boros ngkani aku tumangi apa mamporayang kojo komi, pei nempo ewa see aku taa mandoo mampatiendoka komi.

Palaong mPomakau i mPue Yesu 8:35

Wali i Pilipus mampakanasaka ia. Ia mula yako ri gombo i Yesaya to owo room rabasa etu panewa mampakarebaka ia kareba matao mangkonong i Yesu.

Ibrani 10:14

Wali naka pei Ia matunda ri tondo ngkana i mPue Allah apa palaongiNya room. Apa yako pampue i ngKerisitu to samba’aja etu, Ia roomo mampasilonga tau to mawali i Pue Allah Puenya rataka ri singkasaenya.

1 Timotius 3:2

Wali ketua ntau to mangaya, ia taa maya re’e lengkonya to masipato naseko nsa’e. Ia samba’aja rongonya, pasi ia mangajagai koronya ngkalio. Ia tau to masilonga pampobuukanya, pasi ia mangika lengko to masipato na’angga nsa’e. Tau to etu masanang mampalinggona tau to rata pasi ia seja pande mampotunde sa’e.

Kolose 2:10

Wali i Kerisitu semo kepala to mangkuasang samparia kepala pasi samparia to re'e kuasanya. Pasi samparia to re’e resi i Kerisitu etu paka re'e seja resi komi apa komi samba'a pei i Kerisitu.

1 Korintus 12:8

Wali sangga’a tau i Nosa Mapasing mangawaika kapande mampaponsanika sa’e pasisalanya anu to monso pasi anu to taa monso. Pasi resi tau to yusa i Nosa Mapasing to samba’aja etu mangawaika kapande mampakanasaka sa’e tuntu i mPue Allah.

Epesus 3:8

Wali aku ipu rayangku mampobuuka i Pue Allah mangawaika aku palaong to bae kojo batuanginya etu. Apa yako samparia tau to i Pue Allah Puenya, aku semo to kodi kojo angganya. Pei nempo ewa see, aku nawaika i mPue Allah kanotoNya see aku maya mampakarebaka komi to si’a to Yahudi kareba mangkonong rasi to nawai i ngKerisitu. Rasi etu raporapaka ewa kasugi to taa nakurang ntau mangarekeng.

2 Korintus 10:14

Wali kami taa mangaliunaka songka i mPue Allah resi kami, apa kami taa yau njo’u lipu to Ia taa mangawai. Pasi kami taa yau ri lipu to Ia roomo mangawaika sa’e. Wali kami taa mangaliunaka songkaNya tempo kami rata resi komi seore. Apa kami semo to uyunya rata mampakarebaka resi komi kareba matao mangkonong i Kerisitu.

1 Korintus 15:12

Wali kami room mampakarebaka resi komi manganto’o i Kerisitu rawangu muni yako ri kapateNya. Wali ane ewa see maka pei re’e komi to manganto’o tare tau to rawangu muni yako ri kapatenya?

1 Korintus 1:30

Apa ojo yako palaong to naika i mPue Allah see naka kita mawali samba’a pei i Kerisitu Yesu. Wali apa saba kita samba’a pei i Kerisitu, see naka kita mangansani kapande i mPue Allah. Ia semo to manganto’o kita tare dosanta. Pasi Ia mangika see kita mawali Ia Puenya. Pasi Ia room mangalapa kita yako ri kuasa nu dosa.

Lukas 21:15

Apa tempo komi damampogomboka tau to re’e kuasanya etu, tempo etu semo panewa Aku damampakanasaka komi gombo to danuto’o pasi Aku damangawaika komi kapande. Wali see naka tempo komi magombo etu bali ngkomi taa maya mangewa bara mangabanta gombo ngkomi.

1 Korintus 2:15

Pei tau to re’emo i Nosa Mapasing resi ia, tau etu nakurang mangansani batuanginya samparia to yako resi i Pue Allah. Pei tau to taa nansani i Pue Allah, ia taa seja nansani batuanginya lengko ngkita to mangaya i Pue Allah.

1 Korintus 1:23

Pei kami mampakareba mangkonong i Kerisitu mate rapaku ri kaju pasape. Wali ane mangandonge kareba etu, to Yahudi sira makodi rayanya, pasi tau to si’a to Yahudi sira mampobuuka gombo ntau bea.

Roma 16:25

Wali barong i Pue Allah. Ia nakurang mampakaroso pangaya ngkomi ewa to room aku manganto’o tempo aku mampakarebaka komi kareba matao mangkonong i Yesu Kerisitu. Kareba matao etu semo songka i mPue Allah to rawuni yako ri temponya lino si’i tawa rapapowali.

Palaong mPomakau i mPue Yesu 17:3

Ia mangabasaka tau etu gombo to ratulis yami ri raya ntuntu i mPue to manganto’o i Kerisitu, Makole parajanji i mPue Allah Ia taa maya taa rasesai sampe mate yau, pei roo see Ia damambangu muni yako ri kapateNya etu. Wali ojo karoonya i Paulus mangabasaka sira tuntu i mPue etu ia mampakanasaka resi sira, to’onya, “Gombo etu semo to mampakatantu raya ngkita i Yesu to kupakarebaka resi komi etu, Ia semo i Kerisitu, Makole parajanji i mPue Allah.”

Palaong mPomakau i mPue Yesu 10:36

Wali komi bara roomo mangandonge mangkonong kareba matao to napakarebaka i mPue Allah resi to Yahudi. Etu semo kareba to manganto’o tau maya masingkatao pei i Pue Allah apa saba palaong to naika i Yesu Kerisitu, Pue nto lino samparia. Pasi komi mangansani seja mangkonong palaong to mawali mula ri propinsi Galilea rataka sambawo propinsi Yudea. Palaong etu namula ri tempo i Yohanes to Pombaptis roomo mampakarebaka resi tau manganto’o, ‘Pojeamo pei rabaptis.’

Palaong mPomakau i mPue Yesu 9:20

Pasi ia mansaka yau ri banua-banua to napampotunde nto Yahudi, panewa ia mampakarebaka tau nja’u ria mangkonong i Yesu, Ia semo ana i mPue Allah.

Palaong mPomakau i mPue Yesu 8:5

Pasi re’e samba’a tau to sanganya i Pilipus ia yau seja njo’u kota ri propinsi Samaria. Nja’u ria ia mampakarebaka tau boros mangkonong i Kerisitu, Makole parajanji i mPue Allah.

Palaong mPomakau i mPue Yesu 5:42

Wali yako etu, ponto eo sira yau ri banua i mPue Allah pasi ri banua ntau, sira tare pandoonya mampotundeka tau pasi mampakarebaka tau manganto’o, “I Yesu Ia semo i Kerisitu, Makole parajanji i mPue Allah.”

Palaong mPomakau i mPue Yesu 3:20

Apa ane ewa see Ia damangawaika komi kasanang ndaya to mampakaroso raya ngkomi. Pasi Ia damampokau i Yesu Kerisitu ma’i wo’u resi komi, apa i Yesu semo to Ia roomo mangampilis mawali Makole ngkomi.

Markus 6:34

Wali ojo kadongka nsira nja’u ria i Yesu mangkita tau boros kojo etu. Ia mamporayang tau boros etu apa sira ewa domba to tare to mangkampang. Wali Ia mula mampotundeka sira mangkonong tuntu i mPue Allah. Masae Ia mampotundeka sira.

Matius 28:20

Pasi patundeka sira see sira damangika seja samparia anu to roomo kuporentangika resi komi. Pei ne’e nukalingan, Aku sangkani re’e resi komi rataka ri kapuranya temponya to si’i, pasi rataka ri singkasaenya.” Wali etu semo patuu i Yesu.

Matius 3:7

Wali tempo etu re’e seja boros to Yahudi to yau seja mampago danabaptis i Yohanes. Ri oyo ntau etu malagi to aliran Parisi pasi malagi seja to aliran Saduki. Pei tempo i Yohanes mangkita sira ma’i, ia manganseko sira, to’onya, “Gete, komi ewa ule to mampeyaa mampiyaika apu nja’u pada! Wimba, komi bara mampobuuka ane ma’i darabaptis, ane ewa see komi maya mampiyaika huku to danaporata i mPue Allah? Gete, taa mawali ewa wetu, apa ane ojo gombo ngkomi to manoto, nempo roomo rabaptis pei komi tiroo damangarata huku nu dosa ngkomi.

2 Petrus 3:15

Pasi ne’e rakalingan sabanya naka pei i Pue ngkita bae sabaraNya, see tau maya darapalaes. Wali ewa wetu seja to nato’o i mPaulus, a’i ngkita to taporayang. Apa ewa wetu to ia nangantulisika komi seore yako ri kapande to nawaika i mPue Allah ia.

Ibrani 13:21

see Ia damangawaika komi samparia to matao to parluu ngkomi damangika pamporaniNya. Pasi aku makai-kai see yako kuasa i Yesu Kerisitu, i Pue Allah damapalaong ri raya ngkita mangangika anu to mampakasanang Ia. Wali anu kita mangabarong Ia rataka ri singkasaenya. Amin.

1 Timotius 3:16

Wali monso pu’u bae kojo batuanginya anu to napaponsanika i mPue Allah mangkonong pangaya ngkita. Etu semo, I Pue Allah nama’i mawali tau, Pasi i Nosa Mapasing mampakanasa Ia tare dosa. Ia nakita mpomakauNya yako ndate saruga, Pasi kareba mangkonong Ia rapakarebaka resi tau samparia bansa. Pasi tau sambawo lino re’e to mangaya Ia. Pasi Ia tiokotaka nto’u saruga ri raya ngkayawaNya.

1 Tesalonika 4:6

Wali ane mangkonong palaong to etu, ne’e re’e pasi samba’a kita to mangampake to we’a to si’a rongonya, bara mangika sala resi a’i ngkita to samba’a pangaya. Apa i Pue semo to mampakakonoka samparia palaong to ewa wetu, ewa kami roomo manganto’oka pasi mampatiendoka yami komi seore.

1 Korintus 4:14

Wali a’i-a’i naka pei aku mangantulisika komi gombo to si’i si’a damampakamea komi. Naka pei aku magombo ewa si’i mangampatiendoka komi apa aku mangepe komi ewa nganangku to kuporayang.

Palaong mPomakau i mPue Yesu 13:38

Wali a’i-a’i, re’e to aku rani komi mangansani see naka kami mampakarebaka resi komi, etu semo i Pue Allah Ia tamo mangkitanaka dosa ngkomi apa saba palaong to naika i Yesu.

Palaong mPomakau i mPue Yesu 11:20

Pei ri oyo nsira re’e sawei mba’a tau to yako pulo Siprus pasi kota Kirene. Tau etu rata nja’u Antiokhia panewa nja’u ria sira mampakarebaka seja tau to si’a to Yahudi kareba matao, sira manganto’o, “I Yesu Ia semo i Pue.” Etu semo to nato’o nsira.

Palaong mPomakau i mPue Yesu 17:18

Wali ri kota etu re’e seja tau to aliran Epikuros pasi aliran Stoa. Tau to mampoguru aliran etu re’e masibanta pei i Paulus. Panewa re’e tau to manganto’o mangkonong i Paulus, sira manganto’o, “Gete! Kesaa nansani ntau si’i? Gombonya boros kojo, pei tare batuanginya.” Pasi re’e wo’u tau to manganto’o, “Bara pue ntau to yusa to ia mampakarebaka kita ta’anya.” Naka pei sira manganto’o ewa wetu apa i Paulus re’e mampakarebaka sira mangkonong i Yesu pasi ia manganto’oka sira, “I Yesu nambangu muni yako ri kapateNya pasi samparia tau to mate darawangu muni seja yako ri kapatenya.”

Kolose 4:12

Wali i Epapras, to yako ri lipu ngkomi, ia taa seja mangkalingan komi. Ia seja to papolaong i ngKerisitu, pasi ia sangkani maroso rayanya mampokai-kaika komi. Ia mamporapika resi i Pue Allah see Ia mampakaroso pangaya ngkomi pasi mampasilonganaka pansarumaka ngkomi mangkonong samparia pamporani to si Ia.