Kolose 1:10 - Tuntu i mPue ri Basa Taa

¹⁰ Naka pei kami makai-kai ewa wetu, see komi damangika lengko ngkatuwu to masipato naika ntau to mangalulu i Pue pasi to sangkani mampakasanang Ia. Apa ane ewa see, boros ngaya palaong to matao to danuika ngkomi. Palaong etu maya raporapaka ewa wua ngkaju. Pasi kanjo'u-njo'u tiduga-dugang anu to komi mangansani mangkonong i Pue Allah.

Sura Magali Nuntu Ngkatuwu

¹⁰ Ane ewanceʼe da ndikotomo tuwu malulu pepokono mPue Ala anu mampakawongko raya-A, painaka mpengaya-ngaya da tongawa wuanya anu madago. Pai pangaincanimi i Pue Ala da kakoteranga-rangani woʼu.

Kolose 1:10 Referans Kwoze

Epesus 4:1

Wali apa saba etu, si’i paposia to si aku to ratarungku apa saba palaongingku resi i Pue. Aku manganto’oka komi ika lengko ngkatuwu to masipato naika ntau to napokio i mPue Allah apa monso pu’u Ia room mampokio komi.

Ibrani 13:21

see Ia damangawaika komi samparia to matao to parluu ngkomi damangika pamporaniNya. Pasi aku makai-kai see yako kuasa i Yesu Kerisitu, i Pue Allah damapalaong ri raya ngkita mangangika anu to mampakasanang Ia. Wali anu kita mangabarong Ia rataka ri singkasaenya. Amin.

1 Yohanes 3:22

Pasi bara kesaa to kita mamporapika resi Ia, Ia damangawaika kita apa kita mampalaika porentaNya pasi kita mangika seja lengko to mampakasanang Ia.

Yohanes 15:16

Wali Aku semo to mangampilis komi damawali galungKu. Si’a komi to mangampilis Aku. Pasi Aku roomo mansarumakaka resi komi palaong to danuika. Palaong etu raporapaka ewa mampowuaka wua to taa dapura yau. Wali nempo bara kesaa to komi mamporapika resi Pa’angKu, Ia damangawaika komi apa saba komi Aku puenya.

1 Tesalonika 4:1

Wali a’i-a’i, re’e wo’u to kami rani manganto’oka komi. Tempo kami re’e resi komi seore, tempo etu kami mampotundeka komi mangkonong lengko ngkatuwu to mampakasanang raya i mPue Allah. Pasi komi re’e mangika lengko ngkatuwu to ewa wetu. Wali kami mamporapika pasi mampaposiaka komi apa saba to naika i mPue Yesu see komi kanjo’u-njo’u tiduga-dugang mangika lengko to ewa wetu.

Ibrani 13:16

Wali ne’e kalingan mangika palaong to matao pasi mangansawang sa’e apa palaong to ewa wetu ewa pampue to mampakasanang raya i mPue Allah.

Yohanes 15:8

Pasi ane komi bae wua mpalaongimu, ane ewa see sa’e damangabarong Pa’angKu. Pasi re’e wo’u to damawali ane komi bae wua mpalaongimu, etu semo damanasa resi sa’e komi anagurungKu.

Titus 3:14

Pasi patundeka tau to mangaya nja’u ria see sira madota kojo mangika palaong to matao, see sira maya mangansawang tau to taa kojo gana to danapake nsira. Pasi ane sira madota kojo mangika palaong to matao, bae batuanginya katuwu nsira.

2 Petrus 3:18

Pei to tao-tao komi mampakakoroka mampodongeka tuntu i mPue Allah see kanjo’u-njo’u tiduga-dugang pangansani ngkomi mangkonong kanoto i Yesu Kerisitu, Pue ngkita pasi to Pansompo ngkita. Pasi kanjo’u-njo’u komi tiduga-dugang masinsani pei Ia. Wali anu kita mangabarong Ia mula yako tempo si’i rataka yau ri tempo to darata! Amin. Wali ungkanyamo gombongku si’i.

2 Petrus 1:8

Apa ane lengko to etu to nuika ngkomi, pasi ane kanjo’u-njo’u tiduga-dugang resi komi mangika lengko to etu, ane ewa see katuwu ngkomi damawali bae batuanginya pasi bae wua mpalaong ngkomi. Wali ane komi mangika lengko to ewa wetu, kanjo’u-njo’u tiduga-dugang komi mangansani i Yesu Kerisitu, Pue ngkita.

Kolose 2:6

Wali seore komi mangantima i Kerisitu Yesu, Pue ngkita, yako ri pangaya ngkomi, wali ewa wetu seja ika lengko ngkatuwu to masipato raika apa komi samba'a pei Ia.

1 Tesalonika 2:12

see komi damangika lengko ngkatuwu to singkonong pei i Pue Allah. Apa Ia roomo mampokio komi damawali seja tau to Ia Makolenya pasi to mangarata seja kayawaNya.

Kolose 4:5

Wali ri raya ngkasintuwu ngkomi resi tau to taa mangaya, pake kapande to nawaika i mPue komi. Pasi pakayoaka mangika palaong to bae batuanginya.

Epesus 5:15

Wali pakatao kojo ri katuwu ngkomi see komi taa mangika lengko to ewa lengko ntau to madoyo. Pei ika lengko to ewa lengko ntau to pande.

Epesus 2:10

Apa kita napapowali i mPue Allah damawali tau to bou. Apa kita samba’a pei i Kerisitu Yesu, see naka i Pue Allah mampapowali kita mawali tau to bou. Naka pei Ia mangika palaong to etu see kita maya mangika palaong to matao to napasigenaka yami i mPue Allah kita.

2 Korintus 2:14

Pei nempo taa lindo rayangku seore, aku tiroo manganto’oka i Pue Allah tarima matao. Apa Ia sangkani mangansawang kami naka pei bali mami nangi. Naka pei Ia mangansawang kami apa saba kami samba’a pei i Kerisitu. Pasi Ia mangampake kami damampakarebaka resi tau ri ponto ponto lipu kareba mangkonong i Kerisitu. Wali kareba etu raporapaka ewa anu to magaya kojo waunya.

Roma 6:4

Wali tempo kita rabaptis mawali samba’a pei i Kerisitu ri raya ngkapateNya etu, tempo etu kita seja nato’o i mPue Allah rapongkeli sindara-ndara pei i Kerisitu. Wali ojo karoonya i Kerisitu rapongkeli yau Ia rawangu muni saba yako kuasa i mPue Allah to bae kojo. Wali see naka kita takurang mampolengkoka lengko ngkatuwu to bou.

Epesus 5:10

Wali samparia lengko to danuika ngkomi to tao-tao rapobuuka ruyu see ransani lengko to imba to mampakasanang i Pue.

Epesus 5:2

Pasi porayang sa’e ewa naika i ngKerisitu mamporayang kita. I Kerisitu mangkapateka kita pasi mampampueka koroNya resi i Pue Allah. Wali pampue i ngKerisitu etu mampakasanang kojo raya i mPue Allah, ewa pampue to magaya waunya to rapampueka resi Ia. Wali anu kita mamporayang sa’e ewa wetu.

Pilipi 1:27

Pei nempo bara kesaa to mawali resi aku, ika lengko ngkatuwu to singkonong pei kareba matao mangkonong i Kerisitu. Ika ewa wetu see aku nempo rata wo’u resi komi bara ojo mangarata kareba mangkonong komi, matantu rayangku mampobuuka kasingkatao ngkomi mainti kojo, pasi komi samba’a pampobuuka mapalaong sindara-ndara mampakarebaka kareba matao see sa’e damangaya seja.

1 Yohanes 5:20

Pasi kita tansani seja Ana i mPue Allah nama'imo. Pasi Ia roomo mampakanasaka kita see naka kita maya mangansani i Pue Allah to monso. Wali kita roomo mawali samba'a resi i Pue Allah to monso etu apa kita samba'a pei AnaNya, i Yesu Kerisitu. Ia semo i Allah to monso pasi Ia semo pu'u ngkatuwu to singkasaenya. Wali see naka masipato kita tuwu masingkatao pei Ia.

Titus 3:1

Wali patiendoka tau to mangaya nja’u ria see sira taa mangewa songka mpomarenta pasi tau to mangawakil pomarenta. Pamporani i mPue Allah sira mangaluluka songka mpomarenta pasi mangika palaong to matao ri kabuya ndayanya.

Kolose 3:20

Pasi komi to ngana, palaika samparia songka ntau tu'a ngkomi, apa palaong to etu mampakasanang kojo i Pue.

Epesus 4:13

Wali palaong etu mawali sampe rata temponya kita samparia mawali samba’a pampobuuka apa saba kita mangaya pasi mangansani Ana i mPue Allah. Tempo si’i kita raporapaka ewa ngana mayunu pei tempo kita mawali samba’a pampobuuka etu, kita damawali ewa tau bose tu’a. Pasi tempo etu kita damasilonga kojo sewaju pei i Kerisitu.

Ibrani 11:5

Wali i Henokh seja mangaya i Pue Allah, pasi apa saba pangayanya etu, see naka ia taa mangarata kapate. Ia kodi majoli naokotaka i mPue Allah nto’u saruga, wali ia tamo narata ntau to mangaliwu ia. Apa ri raya nTuntu i mPue re’e ratulis mangkonong i Henokh manganto’o ri katawanya ia tiokotaka, ia mangika lengko to mampakasanang i Pue Allah.

2 Timotius 2:4

Apa ane tentara to tongonya mapalaong, ia rani mampakasanang kepalanya. Wali see naka palaong to yusa tamo mangantalas ia mangika palaong ntentara.

Kolose 2:19

Pasi tau etu raga'a yako resi i Kerisitu, kepala ngkita to mangawaika kita karosonta. Wali ewa rapanya koro ntau, samparia saganya napasingkenta nu yotusnya pasi uanya, pei naka pei tuwu pasi maroso saba yako wo'onya semo. Pasi ewa see seja kita to raporapaka ewa koro i ngKerisitu. Kita seja rapasimba'a, pei ojo yako resi Ia to wo'o ngkita naka pei kita kanjo'u-njo'u karoso-roso tuwu singkonong ewa wimba pamporani i mPue Allah.

Pilipi 4:18

Wali tempo si’i gana kojo to re’e resi aku, tamore to kupoipu apa aku roomo mangantima sora to nakeni i Epaproditus yako resi komi. Pasi kamonsonya re’e mayabimo yako ri anu to dakupake. Wali sora ngkomi etu maya raporapaka ewa pampue to magaya waunya to masanang kojo i Pue Allah mangantima.

Epesus 1:17

Aku makai-kai resi Pa’a ngkita anu masipato rabarong apa saba kuasaNya pasi kayawaNya, etu semo Allah i Yesu Kerisitu, Pue ngkita. Wali aku mamporapika resi Ia see yako kuasa i Nosa Mapasing Ia mangawaika komi kapande pasi mampakanasaka komi mangkonong Ia see komi mangansani kojo Ia.

2 Korintus 9:8

Pasi i Pue Allah, Ia re’e kuasa mampaponsanika komi kanotoNya to yabi wo’u pei to naparluu ngkomi. Ewa wetu inikaNya see komi sangkani gana kojo samparia to danupake ngkomi. Naka pei Ia mangika ewa wetu see komi gana kojo to danupake ngkomi damangika samparia ngaya mpalaong to matao.

Yohanes 17:3

Wali batuanginya katuwu to singkasaenya, batuanginya etu semo tau maya mangansani Komi. Apa Komi semo i Pue Allah to monso pasi to samba’aja. Pasi katuwu to singkasaenya etu, batuanginya seja sira maya mangansani i sema kamonsonya Aku. Apa Aku semo i Yesu Kerisitu, to nupokau ngKomi.

2 Korintus 4:6

Wali tempo owi, tempo lino si’i ojo mawuri, i Pue Allah manganto’o, “Powalimo reme,” panewa re’e reme to mangansindo lino to mawuri etu. Wali tempo si’i i Pue Allah semo to ewa mangansindo pampobuuka ngkita see mareme seja. Batuanginya naka pei Ia mangika ewa wetu, see kita mangansani pasi maya mampaponsanika sa’e mangkonong kayawa i mPue Allah apa saba roomo mangalo’aka lio i Yesu Kerisitu.

Roma 4:12

Pasi i Abraham etu mawali seja pa’a ntau to rasui to mangaya. Naka pei ia mawali seja pa’a nsira apa sira si’a ojo rasui sewaju ewa ia, pei apa sira mangaya seja i Pue Allah ri raya ngkatuwu nsira sewaju ewa naika mpa’a ngkita i Abraham tempo ia tawa rasui.

Roma 1:13

Wali a’i-a’ingku, aku rani komi mangansani aku malagi ngkanimo mangika songka dayau resi komi, pei ponto ngkani aku mangika songka etu paka re’e wo’u anu to mangantalas aku. Naka pei aku mansongka dayau resi komi, see aku maya mangika palaong i mPue ri oyo ngkomi pei damangkita wua mpalaong etu, sewaju ewa to nikangku ri oyo ntau to si’a to Yahudi ri lipu-lipu to yusa.

2 Korintus 5:9

Wali nempo re’ewa ri raya ngkoro si’i, bara nempo mate pei yau siwaka pei Ia, kami tiroo rani mangika palaong to mampakasanang Ia.

3 Yohanes 1:6

Wali tau to nusawang ngkorom etu, sira roomo mampakarebaka ri tango ntau to mangaya to siromu rire mangkonong pamporayang ngkorom etu. Wali to kuporapika resi korom, etu semo ane rata wo'u tau etu resi korom, panewa roo see rata wo'u temponya sira dapolas, matao korom mangansawang wo’u sira. Apa masipato kita mangansawang tau to mangika palaong i mPue Allah.