Ibrani 13:1 - Tuntu i mPue ri Basa Taa

¹ Wali ne’e mandoo masiporayang ewa to masipato naika ntau to pua’i to samba’a pangaya.

Sura Magali Nuntu Ngkatuwu

¹ Mbolimo komi da todo ri pombepotowe sambaʼa pai sambaʼa da ewa waʼa nto Kerisitu anu sangkompo.

Ibrani 13:1 Referans Kwoze

1 Yohanes 4:20

Wali anu kita mamporayang pua’i ngkita to samba’a pangaya. Apa ane re'e tau to manganto'o, "Aku kuporayang i Pue Allah," pei tau etu maja'a nakita a'inya to samba'a pangaya, ane ewa see gombonya etu palaku. Apa ane ia taa mamporayang a'inya etu to roomo nakita nu matanya, batuanginya ia taa seja nakurang mamporayang i Pue Allah to taa nakita nu matanya etu.

1 Petrus 3:8

Wali ri lelenya ri kapuranya to si’i aku re’e to rani manganto’oka komi samparia. Etu semo, masipato komi samba’a pampobuuka ngkomi, pasi mangepe seja kandende ndaya pasi kamawo ndaya to naepe nu yunu ngkomi samba’a pei samba’a. Pasi masipato komi masiporayang ewa tau to moa’i. Pasi masipato seja komi ne’e mabae-bae rayamu. Pasi matao seja komi rani mangansawang tau to ri raya ngkasusa.

1 Petrus 1:22

Wali si’i-si’i Nosa i mPue Allah mangansawang komi mangampolaika anu to monso, see naka katuwu ngkomi roomo rapakayongongika. Wali etu semo sabanya naka pei komi nukoto mamporayang pua’i ngkita to samba’a pangaya ri kamonso-monsonya. Wali to tao-tao komi masiporayang kojo yako ri kabuya ndaya ngkomi.

2 Petrus 1:7

Pasi ri rayanya komi mangika lengko to mampakasanang i Pue Allah etu, dugangika wo’u pamporayang ngkomi resi pua’i to samba’a pangaya. Pasi ri rayanya mangamporayang pua’i to samba’a pangaya, dugangika wo’u pamporayang ngkomi resi samparia tau.

1 Petrus 2:17

Wali see naka angga samparia tau, porayang pua’i ngkita to samba’a pangaya, palaika i Pue Allah saba manga’angga Ia, pasi angga i Makole.

Ibrani 10:24

Pasi anu kita mampobuuka see tansani ewa wimba dataika masipakaroso rayanta damamporayang sa’e pasi damangika palaong to matao.

2 Tesalonika 1:3

Wali a’i-a’i masipato kami manganto’oka i Pue Allah tarima matao apa saba komi. Masipato kami manganto’oka Ia tarima matao apa kanjo’u-njo’u karoso-roso pangaya ngkomi. Pasi kanjo’u-njo’u karoso-roso komi samparia masiporayang.

1 Petrus 4:8

Pasi ri temponya komi tiroowa tuwu ri lino si’i, to bae kojo batuanginya komi masiporayang kojo. Apa ane komi mamporayang yunu ngkomi, see naka boros sala nu yunu ngkomi to taa danukitanaka ngkomi.

Galatia 5:22

Pei lengko to naika ntau to mangalulu pamporani i Nosa Mapasing, lengko etu raporapaka ewa wua ngkaju to matao. Wali lengko etu semo sira mamporayang sa’e, ndende rayanya pasi rodo rayanya. Sira bae sabaranya, matao resi sa’e, manoto resi sa’e pasi masipato rasarumaka.

Galatia 5:13

Wali a’i-a’i, naka pei komi napokio i mPue Allah see komi seja daralapa yako ri ara ngkuasa mporenta i Musa. Pei nempo kita ralapa, si’a batuanginya kita maya mangaluluka yau muni pampobuuka ngkita to masae. Wali ne’e kita mangika ewa wetu. To tao-tao, anu kita masisawang apa saba kita masiporayang.

Pangkita 2:4

Pei re’e sala ngkomi to Aku mangkitanaka apa komi si’amo ewa seore. Seore, tempo komi owo mangaya, komi bae pamporayangmu resi Aku pasi resi sa’e, pei si’i-si’i tamo bae pamporayangmu.

1 Yohanes 3:23

Wali si’i semo porenta i mPue Allah resi kita: To uyunya, aya AnaNya, i Yesu Kerisitu, pasi yako etu, masiporayang ewa to roomo nato'oka i ngKerisitu kita.

Galatia 5:6

Apa ane kita to samba’a pei i Yesu Kerisitu apa saba pangayanta, taa mawei nempo rasui mangalulu ada nto Yahudi, nempo taa. Apa si’a ada to etu to bae batuanginya. To bae batuanginya, etu semo pangayanta. Pasi pangayanta etu manasa saba yako pamporayanginta resi sa’e.

Yohanes 15:17

Wali porentangKu resi komi, etu semo masiporayang.”

Epesus 5:2

Pasi porayang sa’e ewa naika i ngKerisitu mamporayang kita. I Kerisitu mangkapateka kita pasi mampampueka koroNya resi i Pue Allah. Wali pampue i ngKerisitu etu mampakasanang kojo raya i mPue Allah, ewa pampue to magaya waunya to rapampueka resi Ia. Wali anu kita mamporayang sa’e ewa wetu.

Epesus 4:3

Komi roomo napasimba’a i Nosa Mapasing. Wali tuwu masingkatao imba pata mpangkurang ngkomi apa ewa wetu raika mangajagai kasimba’a ngkomi etu.

Palaong mPomakau i mPue Yesu 4:32

Wali songonya tau to mangaya i Yesu etu, sira samba’a pampobuukanya pasi samba’a raya. Tare pasi samba’a sira to manganto’o, “Ngaya-ngaya to si’i akuja puenya.” Wali samparia to re’e resi sira, paka sira samparia puenya.

Palaong mPomakau i mPue Yesu 2:1

Wali yako etu ratamo temponya roa to rato’oka roa Pentakosta. Tempo etu samparia tau to mangaya i Yesu siromu ri samba’a banua ri kota Yerusalem.