Ibrani 12:2 - Tuntu i mPue ri Basa Taa

² Pasi anu kita mangalo’aka yau resi i Yesu apa Ia semo mata njaya to nalulu ngkita pasi Ia semo to mampasilonga pangayanta. Ia mate rapaku ri kaju pasape, pasi kapate to etu napobuuka ntau to tempo etu kapate to masipato kojo rapokea. Pei nempo ewa wetu, taa mawei resi i Yesu, Ia ojo mangainsoka apa Ia mampobuuka kandende ndaya to Ia damangarata karoonya Ia mangika palaong to etu. Wali si’i-si’i Ia matunda ri awe nggadera i mPue Allah ri sambali tondo ngkana.

Sura Magali Nuntu Ngkatuwu

² Tawianakamo pai neʼe telapa matata ri Yesu, maka Sira anu mampakaroso peaya ndayata pai anu mamponinika kita ungka ri pontepuʼunya rata ri kapusanya. I Yesu todo mantodosaka pari ri kaju ndapanggo! Bareʼemo ndatora eamata kapate-A ri kaju ndapanggo setu, inceʼemo jaya ngkapate anu mepakae-A. Sira maendo wongko ndaya anu nepa da ndarata ripurinya. Wawaseʼi Sira ndate motunda ri tondo mokana mPue Ala, moparenta sangkani-ngkani pai Sira.

Ibrani 12:2 Referans Kwoze

1 Petrus 3:18

Apa sakowa i Kerisitu, Ia mangarata seja kasesa. Ia sangkanija mate mangansompo dosa ngkita, pasi kapateNya etu ganamo. Ia tare dosaNya, pei Ia mangkapateka kita to madosa see Ia maya mangika kita see mawali masingkatao pei i Pue Allah. Wali koroNya namate yau, pei yako kuasa i Nosa Mapasing Ia rawangu muni yako ri kapateNya etu.

Ibrani 1:3

Wali AnaNya etu semo to mampaporaoka kita kayawa i mPue Allah. Pasi Ia ewa lengke to mampaporaoka kita ewa wimba kamonsonya i Pue Allah, apa Ia sewaju kojo pei i Pue Allah. Pasi Ia mampasilonga pasi mangampiara samparia anu to re’e yako ri gomboNya semo to bae kuasa. Ia semo to mampakayongo kita to lino yako ri dosa ngkita, panewa tempo Ia room mangika palaong to etu, Ia yau matunda ri awenya to Makuasa ndate saruga ri sambaliNya tondo ngkana.

Epesus 5:2

Pasi porayang sa’e ewa naika i ngKerisitu mamporayang kita. I Kerisitu mangkapateka kita pasi mampampueka koroNya resi i Pue Allah. Wali pampue i ngKerisitu etu mampakasanang kojo raya i mPue Allah, ewa pampue to magaya waunya to rapampueka resi Ia. Wali anu kita mamporayang sa’e ewa wetu.

Pilipi 1:6

Wali pansawang ngkomi resi aku etu, etu semo tondong i Pue Allah re’e mangika palaong to matao ri raya ngkomi. Pasi manasa kojo resi aku Ia to mampomulaka palaong to matao etu, Ia seja damampasilonga palaongiNya etu rataka ri temponya i Kerisitu Yesu dama’i wo’u.

Ibrani 9:28

Pasi ewa see seja i Kerisitu sangkanija rapampueka resi i Pue Allah damangansompo dosa ntau boros. Pasi darata temponya Ia dama’i kadua ngkaninya. Tempo etu Ia si’a dama’i damangansompo wo’u dosa ntau, pei Ia dama’i resi tau to mangampeas Ia damampalaes sira yako ri kasusa ngkatuwunya ri lino to madosa si’i.

1 Petrus 3:22

Wali tempo i Yesu Kerisitu mambangu muni yako ri kapateNya, yako etu Ia yau muni nto’u saruga. Wali tempo si’i Ia re’e ri tondo ngkana i mPue Allah, ri tampa to bae kojo angganya. Pasi tempo si’i Ia mangkuasang pomakau i mPue Allah ndate saruga, pasi mangkuasang seja samparia to maporenta pasi to re’e kuasanya. Wali manasa resi kita saba yako kasesa to narata i ngKerisitu, see naka bae kojo kayawa to Ia mangarata. Wali masipato kita buya seja rayanta nempo mangarata kasesa sewaju ewa to narata i ngKerisitu etu.

Palaong mPomakau i mPue Yesu 5:31

I Pue Allah mangokotaka i Yesu etu pei mamposaka Ia ri ri tampa to bae angganya ri aweNya tondo ngkana. Wali si’i-si’i Ia semo Kepala ngkita pasi to Pansompo ngkita. Wali naka pei i Pue Allah mangika ewa wetu see kita to Israel maya mangandolika tangonta resi Ia see daralapas dosa ngkita.

Lukas 24:26

Apa sira mampakanasaka mangkonong i Kerisitu, Makole parajanji i mPue Allah, Ia taa maya taa mangarata kasesa to nusaritaka resi Aku etu panewa roo see Ia damangarata kayawaNya.”

Yesaya 53:3

Wali to Papolaong i mPue Yawe, Ia narowis ntau pasi napobo’o nsira. Ia bae kojo kamawo ndayaNya pasi Ia malagi ngkani mangarata kasesa. Wali kita mangarowis Ia pasi taa manga’angga Ia, see naka kita ewa mangandolika yau tango ngkita yako resi Ia.

I Yudas 1:21

Pasi anu kita sangkani mampobuu-buuka pamporayang i mPue Allah. Pobuuka pamporayangiNya etu ri rayanya kita mangampeas temponya i Yesu Kerisitu, Pue ngkita, damangkeni kita ri katuwu to singkasaenya. Ia damangika ewa see apa saba pamporayangiNya etu.

Ibrani 8:1

Wali ewa si’i batuanginya gombo to kita manganto’o etu, kita re’e kojo to pampue to bae anggaNya to ewa wetu, to room matunda ri awe nggadera i Makuasa ndate saruga ri sambali tondo ngkana.

2 Timotius 4:8

Wali si’i-si’i re’e dalengku to mangampeas aku ndate saruga. Dale etu raporapaka ewa so’o mbo’o to meyawa to darawaika tau to singkonong pei i Pue Allah. Wali dale to etu danawaika i mPue aku ri temponya darapangabotus. I Pue Ia to pobotus to sangkani mangika ewa to Ia room manganto’o, pasi Ia semo to damangawaika aku dale etu. Pei si’a ojo aku to damangarata dale etu, samparia tau to mawongko rayanya mangampeas kama’i i mPue paka damangarata seja dale etu.

Pilipi 3:20

Pei ane kita, kamonsonya lipu ngkita ri saruga semo. Pasi kita mangampea-mpeas kama’i nto Pansomponta yako ndate saruga etu. To Pansomponta etu, etu semo i Pue Yesu Kerisitu.

Markus 14:36

Ia manganto’o, “O Baba, Komi semo Pa’angKu! Tare kesaa to taa Nukoto ngKomi mangika. Wali Kuporapika resi Komi see Komi mangalimba kasusa to daKurata si’i. Pei ne’e raluluka pamporaningKu. Biakamo pamporani ngKomi semo damawali.”

Pangkita 2:8

Wali yako etu i Pue manganto’oka wo’u aku, “Tulisika seja pomakau ntau to mangaya Aku to siromu nja’u kota Smirna. To’oka ia: Si’i gombo to yako resi Ia to uyunya pasi to purinya, Ia to namatemo pasi mambangu muni yako ri kapateNya etu.

Ibrani 13:13

Wali apa saba etu, ewa naika i Yesu buya rayaNya yau ri sambali ngkota danarunes ntau, anu kita buya seja rayanta ewa mangampago Ia njo’u sambali ngkota nempo kita narunes seja ntau sewaju ewa Ia seore.

Ibrani 5:9

Wali apa saba i Yesu mangarata kasesa ewa wetu, see naka Ia masipato kojomo mawali to pampue to bae anggaNya. Apa Ia roomo mangepe to naepe nto lino. Wali Ia nato’oka i mPue Allah to pampue to bae angganya sewaju ewa i Melkisedek tempo owi. Pasi Ia semo to mangika jaya see samparia tau to mampolaika Ia maya rapalaes rataka ri singkasaenya.

Yohanes 13:3

Pei i Yesu mangansani Ia ma’i yako resi i Pue Allah pasi Ia damawolili muni resi i Pue Allah. Pasi Ia mangansani Pa’aNya roomo mangawaika Ia kuasa mampasilonga samparia to mawali.

Lukas 17:5

Wali anaguruNya etu manganto’oka i Pue, sira manganto’o, “Pakaroso pangaya mami.”

Markus 9:24

Wali pa’a nu ana etu mansaka kaboo pasi ia manganto’o, “Pue, aku kuaya Komi, pei tawa maroso pangayangku etu. Sawang aku see tidugang wo’u karosonya!”

Ibrani 12:3

Wali pobuuka i Yesu. Ia mangainsoka tempo mangarata kasesa etu yako resi tau madosa to mangewa Ia. Pobuuka Ia see komi taa damawali manganga pasi mayu’u raya ngkomi ane mangarata kasusa.

Palaong mPomakau i mPue Yesu 5:41

Wali pomakau etu masuwu muni yako ri tango nto pobotus etu. Sira ndende rayanya mampobuuka i Pue Allah manga’angga kojo sira see naka Ia mangabiaka sira narunes nsa’e apa saba mangalulu i Yesu.

Yohanes 12:32

Pei ane Aku, tempo Aku rapaku pei raokotaka ri kaju pasape, tempo etu Aku mangansale samparia tau dama’i resi Aku.”

1 Petrus 1:11

Sira mangansani yami i Pue Allah damangansawang to lino apa Nosa i ngKerisitu re’e ri raya nto pantuntu tuntu i mPue Allah tempo owi etu, pasi Ia manganto’oka yami sira mangkonong kasesa to danarata i Makole parajanji i mPue Allah. Pasi Ia manganto’oka seja sira mangkonong kayawa to Ia damangarata ri temponya Ia roomo rasesai etu. Pei re’e anu to tawa manasa resi sira pasi sira rani kojo mangansani mangkonong to etu. Wali to naporani kojo nsira mangansani, etu semo bara tau to imba damangarata kasesa pasi kayawa etu, pasi bara mpia temponya napowali mpalaong etu.

Ibrani 10:14

Wali naka pei Ia matunda ri tondo ngkana i mPue Allah apa palaongiNya room. Apa yako pampue i ngKerisitu to samba’aja etu, Ia roomo mampasilonga tau to mawali i Pue Allah Puenya rataka ri singkasaenya.

Yohanes 12:24

Aku manganto’oka komi, monso pu’u ane rapanya sampa’i pae, ane taa rapomuya pei mawali ewa daboo yau, pae etu taa tuwu pei tiroowa sampa’ija. Pei ane rapomuyamo pae etu mawali ewa daboo yau, pei roo see ia tuwu pei mawali malagi mpa’i. Pasi ewa wetu seja to damawali resi Aku tempo Aku rapongkeli yau, apa yako etu Aku datuwu muni, roo see malagi tau to damangarata katuwu.

Yohanes 8:56

Wali i Abraham, bue ngkomi, ia ndende kojo rayanya tempo owi mampobuuka temponya Aku dama’i ri lino si’i. Pasi ia roomo mangkita kama’ingKu etu, wali masanang kojo rayanya.”

Yohanes 1:29

Wali yako etu, ojo kaeonya wo’u rao i Yohanes mangkita i Yesu ma’i mangampago ia. Wali ia mangansani i Yesu semo to damawali pampue nu dosa ewa ana nu domba to napampueka ntau resi i Pue Allah ane sira mangika dosa. Wali see naka ia manganto’oka tau boros, “Lo’aja tau etu! Ia semo Ana nu Domba to nawai i mPue Allah, Ia ma’i damangansompo dosa nto lino!

Lukas 23:11

Panewa yako etu i Herodes pasi tentaranya mangarunes pasi mampokore i Yesu. See naka sira mamposunsuka Ia pake to magaya kojo ewa pake makole pei manganto’oka tau mangkeni muni Ia resi i Pilatus.

Matius 20:28

Matao komi sewaju ewa Aku, Wiyaa nto Lino. Aku ma’i si’a ma’i danasawang ntau, Aku ma’i damangansawang tau pasi damangkapateka tau boros damangansompo dosa nsira.”

Matius 16:21

Wali yako ri tempo etu semo i Yesu mula mampakanasaka resi kami to anaguruNya, to’oNya, “Aku taa maya taa yau ndeku Yerusalem. Pasi nda’a ria boros kasesa to Aku damangarata yako resi tau tu’a nto Yahudi pasi kepala-kepala nto pampue pasi tau to mampoguru porenta i Musa. Wali Aku darapopate yau, pei yako etu, ri rayanya togo eo Aku darawangu muni yako ri kapatengKu.”

Pangkita 1:17

Wali tempo aku mangkita Ia, aku mapuka yau ewa tau mate ri wawo ntana ri tango nbitiNya. Pei tempo etu Ia mamposaka paleNya tondo ngkana ri wawongku, panewa manganto’o, “Ne’e meka. Aku semo to uyunya pasi to purinya.

Pangkita 1:11

pei manganto’o, “Aku semo Alpa pasi Omega, batuanginya Aku semo to pamulanya pasi to kapuranya. Wali oko buku pei tulis mangkonong palaong to danukita. Panewa buku etu danupokatuka resi tau to mangaya Aku ri pitu kota nja’u tana Asia. Wali kota to pitu etu semo kota Epesus, Smirna, Pergamas, Tiatira, Sardis, Piladelpia pasi Laodikia.”

Ibrani 7:19

Apa ane porenta i Musa, taa nakurang mampasilonga bara kesaa. Wali porenta etu rabolosika anu to matao wo’u to kita maya mansarumaka, see kita maya mosu resi i Pue Allah.

Ibrani 1:13

Pei i Pue Allah tare manganto’oka pasi samba’a pomakauNya ewa si’i, Ia tare manganto’o, “Patundamo ri awengKu ri sambali tondo ngkana sampe rata temponya Aku damanganangi balimu pei mangawaika komi mangangkuasang sira.” (Masmur 110:1) Wali i Pue Allah tare mampogomboka pomakauNya ewa wetu. Ojo AnaNya semo to Ia mampogomboka ewa wetu.

Palaong mPomakau i mPue Yesu 2:36

“Wali a’i-a’ingku to Israel, aku mampaponsanika komi samparia see manasa kojo i Yesu to nupaku ngkomi ri kaju pasape etu, Ia semo to naokotaka i mPue Allah mawali Pue pasi mawali Makole to naparajanjikaNya.”

Markus 9:12

Wali i Yesu mangansono see damanasa resi sira i Yohanes to Pombaptis, ia semo to rato’oka i Elia. I Yesu manganto’o, “Monso pu’u i Elia ia matiruyu damampasilonga muni samparia. Pei Aku manganto’oka komi i Elia ia roomo nama’i muni, pasi tau ojo mangika maja’a resi ia mangalulu pamporani to si siraja. Wali palaong to etu mangabanang gombo to ratulis ri raya ntuntu i mPue Allah tempo owi mangkonong i Elia. Pei re’e seja gombo to ratulis ri raya ntuntu i mPue Allah mangkonong Aku, Wiyaa nto Lino. Gombo etu manganto’o Aku darasesai pasi danarunes ntau.”

Pangkita 1:8

Wali i Pue Allah anu Makuasa, Ia manganto’o, “Aku semo Alpa pasi Omega, batuanginya Aku semo to pamulanya pasi to kapuranya. Aku re’e tempo si’i, pasi Aku re’emo tempo owi, pasi Aku dare’e ri tempo to darata.” Etu semo gombo i mPue Allah.

Ibrani 11:36

Pasi re’e tau to rakaengas pasi to racambuk, pasi re’e wo’u to rapunguka rante pasi ratarungku.

Ibrani 10:33

Wali ri rayanya komi mangarata kasesa etu, matempo-tempo komi narunes nsa’e pasi nasesai nsa’e ri tango ntau boros. Pasi re’e wo’u temponya yunu ngkomi rarunes pasi rasesai ewa wetu, wali tempo etu komi mangepe seja kasesa ndaya nsira.

Markus 16:19

Wali ojo karoonya i Yesu mampogomboka anaguruNya, Ia tiokotaka nto’u saruga. Panewa Ia matunda ri awe i mPue Allah ri sambaliNya tondo ngkana, tampa to bae angganya.

Palaong mPomakau i mPue Yesu 3:15

Panewa komi mampopate yau i Yesu anu pu’u ngkatuwu. Pei karoonya komi mampopate yau Ia i Pue Allah mangawangu muni Ia yako ri kapateNya. Pasi kami semo matamanasa palaong to etu.

1 Korintus 1:18

Kita mampakarebaka resi sa’e pei manganto’oka sa’e i Kerisitu rapaku ri kaju pasape mangkapateka kita. Wali tempo tau mangandonge kareba etu, tau to taa mangaya, to re’emo ri jaya yau lo’u apu naraka, sira manganto’o, “Gete! Gombo ntau bea etu!” Pei ane kita to mangaya, to rapalaes yako ri apu naraka, kita manganto’o, “Kareba etu semo kuasa i mPue Allah.”

1 Korintus 1:23

Pei kami mampakareba mangkonong i Kerisitu mate rapaku ri kaju pasape. Wali ane mangandonge kareba etu, to Yahudi sira makodi rayanya, pasi tau to si’a to Yahudi sira mampobuuka gombo ntau bea.

Yakobus 2:1

Wali a’i-a’ingku, Pue ngkita, i Yesu Kerisitu, Ia semo Pue to bae kojo kayawaNya. Wali apa saba kita mangaya Ia, see naka taa matao ane kita mampasisala tau.

Pombilang 21:9

Wali i Musa mangika ule yako tambaga etu panewa mamposaka ndate woto ntinja. Wali yako etu monso pu’u i sema tau to natungku nu ule to kayangu ngisinya etu, ane ia mangalo’aka re’e ule tambaga etu, ia taa mate.

Markus 15:28

Wali palaong etu mangabanang gombo to ratulis yami ri raya ntuntu i mPue Allah mangkonong i Yesu. Gombo etu manganto’o, “Ia rapobuuka seja ewa tau to mangewa porenta i mPue Allah.” (Yesaya 53:12)