Epesus 5:3 - Tuntu i mPue ri Basa Taa

³ Wali saba komi ana i mPue Allah see naka ne’e kojo re’e samba’a komi to mangika lengko to maja’a resi tau to si’a rongonya. Pasi ne’e mampobuuka bara mampolengkoka anu to yusa to makarika. Pasi ne’e seja bamporomung. Apa lengko to ewa wetu taa kojo masipato napobuuka ntau to i Pue Allah Puenya, taa manto’o ane naika nsira.

Sura Magali Nuntu Ngkatuwu

³ Komi inceʼemo dompu i mPue Ala. Inceʼe painaka posalara pai waʼa mpowia anu bareʼe sintinaja bara kabagagu da neʼe reʼe ri oyomi. Da naka neʼe napoyondo ntau ntaninya da mantoʼo komi mampowia waʼa anu ewancetu.

Epesus 5:3 Referans Kwoze

Kolose 3:5

Wali posaka yau pamporani ngkoro ngkomi to maja’a naka ne'e damangika lengko to taa singkonong pei i Pue Allah. Lengko etu semo ewamo mangika lengko to maja'a resi tau to si'a rongomu, mampobuuka anu to balamas bara mampolengkoka lengko to makarika, pamporani ndaya to taa rata'amaka, pamporani ndaya to maja'a, pasi lengko to bamporomung. Bamporomung etu sewaju pei mampue tau-tau.

Epesus 5:5

Apa komi nunsanimo re’e tau to taa damangarata anu to matao to rawaika resi tau to i Kerisitu pasi i Pue Allah Makolenya. Tau to taa damangarata anu to matao etu semo tau to sangkani mangika palaong to maja’a resi tau to si’a rongonya, tau to sangkani mampobuuka pasi mampolengkoka anu to makarika, pasi tau to bamporomung. Bamporomung etu sewaju pei mampue tau-tau.

1 Tesalonika 4:3

Wali ewa si’i pamporani i mPue Allah resi kita. Ia rani kita mangika lengko ngkatuwu to masipato naika ntau to Ia Puenya. Ne’e kita magoyal pasi masala.

1 Korintus 6:18

Wali ane komi ragoda bara damagoyal bara masala, piyai yako ri palaong to maja’a etu. Apa samparia dosa to yusa to naika ngkita to lino, tare to kono ri koro. Pei i sema-sema to magoyal bara masala, dosa etu kono kojo ri koro to si ia.

1 Tesalonika 4:7

Apa i Pue Allah taa mampokio kita damangika lengko to maja’a. Naka pei Ia mampokio kita see kita damangika lengko ngkatuwu to masipato naika ntau to Ia Puenya.

1 Korintus 6:13

Pasi re’e wo’u tau to manganto’o, “Pangkoni raika daraposaka la’u raya ngkompo. Pasi kompo raika damangantima pangkoni.” Wali monso seja ewa rato’o etu, pei daratamo temponya i Pue Allah damampakapura samparia etu. Wali re’e komi to mampobuuka nempo kesaa palaong to kita mangika ri koronta si’i, taa mawei. Pei koro ngkita si’i naika i mPue Allah si’a darapake masala pasi magoyal. Koro ngkita naika i mPue darapake mangika pamporani to si Ia. Pasi Ia maroo ri raya ngkoro ngkita mangansawang kita.

Matius 15:19

Apa ri raya sia ntau re’e mampobuuka anu to maja’a sampe napolengkoka anu to maja’a etu, ewamo mampopate sa’e, masala, magoyal, malima, mawali matamanasa to taa monso, pasi manto’o maja’a sa’e.

Pangkita 2:21

Wali Aku roomo mangawaika i Isebel etu temponya ia mangandolika tangonya yako ri dosanya, pei ia bo’onya mangandolika tangonya yako ri palaong magoyal etu.

1 Korintus 10:8

Pasi ne’e seja kita magoyal pasi masala ewa naika ntau ri oyo nsira. Apa yako ri lengko nsira to maja’a etu, see naka dua mpuyu pei togo nsowu mba’a sira to namate yau ri rayanya seo.

Pangkita 22:15

Pei tau to makarika lengkonya, to raporapaka ewa asu, pasi tau to mangadoti sa’e, tau to magoyal, tau to mampopate sa’e, tau to mampue pue to yusa, pasi samparia tau to masanang sangkani mawuti, sira samparia paka nja’u sambali ngkota.

Pangkita 21:8

Pei tau to maleo, pasi tau to taa mangaya Aku, tau to kajimi, tau to mampopate sa’e, tau to magoyal, tau to mampake do’a, tau to mampue pue to yusa pasi samparia tau to masanang sangkani mawuti, tau to ewa wetu tare ri Yerusalem to bou, sira re’e la’u rano nu apu pasi sedawa to mawea. Etu semo kapate to kadua.”

Pangkita 2:14

Pei re’e sala ngkomi to Aku mangkitanaka, apa re’e sawei mba’a komi to mangaluluka anu to napotundeka i mBileam tempo owi. I Bileam etu mampotundeka i Balak see i Balak mangansani ewa wimba raika mangamomis to Israel see sira mangkoni pangkoni to roomo rapampueka resi pue to yusa pasi mangamomis seja sira see sira magoyal pasi masala.

1 Korintus 5:1

Wali ponto-ponto lipu rapakarebaka mangkonong palaong to mawali ri oyo ngkomi, kareba etu manganto’o re’e tau to masala. Pasi palaong to mawali etu mapari kojo apa sakowa tau to taa mangaya i Pue sira taa mangika. Pei re’e ri oyo ngkomi to mamporouka indo wokunya.

Posuwunya 20:17

“Pasi ne'e mamporani anu nsa’e, nempo banuanya, bara rongonya, to papolaonginya, sapinya, keledainya, bara kesaa wo'u to ia puenya.” Wali etu semo porenta-porenta to nato’oka i mPue Allah resi tau Israel.

Pangkita 9:21

Sira taa seja mangandolika tangonya yako palaong nsira to maja’a, etu semo mampopate sa’e, mangampake do’a, magoyal, pasi malima.

2 Petrus 2:3

Wali tau to mampotunde anu to taa monso etu, sira rani kojo sugi. See naka sira damanganto’o gombo to mawuti damangamomis komi see komi damangawaika sira doi. Pei tamo masae sira darahuku. Apa masaemo i Pue Allah, to Pobotus nsira, Ia mangansani sala nsira etu pasi Ia mangansani seja ewa wimba Ia mangangika damangahuku sira. Wali huku to etu tamo masae dakonomo sira.

Ibrani 12:16

Wali pakatao seja see tare komi to masala bara magoyal. Pasi pakatao seja see tare lengko ngkomi to ewa lengko i Esau. I Esau etu ia bo’onya manga’angga i Pue Allah. Pasi panta to ia masipato danawaika mpa’anya apa saba ia semo ana to tu’anginya, panta to etu ia mampobalu yau resi tua’inya mangoli sampinggaja pangkoni.

2 Korintus 12:21

Wali aku moru rayangku mampobuuka temponya aku darata wo’u resi komi. Apa aku mampobuuka tempo aku darata ri oyo ngkomi i Pue Allah ngkita bara damanganto’oka aku tamo masipato aku mangepe masanang mangkonong komi apa lengko ngkomi tamo singkonong pei Ia. Wali ane ewa see aku damawali mea. Pasi aku bara damawo kojo rayangku mangkita boros komi to roomo mangika dosa pei tawa mangandolika muni tango ngkomi yako ri palaong to maja’a to nuika ngkomi etu. Etu semo palaong to mampakarikasika raya komi, magoyal pasi masala, pasi palaong to masipato rapokea. Wali tuwu-tuwuja si’a ewa wetu lengko ngkomi tempo aku rata resi komi.

Titus 2:3

Panewa patundeka seja tau we’a to tu’amo see lengko nsira masipato ewa lengko ntau to ojo i Pue Allah Puenya. Taa matao ane sira bawiwi pasi taa seja matao ane banginu. Pei pamporani i mPue Allah sira mampotundeka seja tau to yusa anu to matao.

2 Timotius 3:2

Apa tau to tuwu ri tempo etu, sira ojo damamporayang koronya ngkalio, pasi ojo rani sugi. Sira datibaro pasi mangei. Pasi sira damangarowis sa’e, pasi mangewa tau tu’anya, pasi bo’onya manganto’oka sa’e tarima matao, pasi bo’onya seja manga’angga i Pue Allah.

Palaong mPomakau i mPue Yesu 15:20

Ne’e kita mampakasaaka sira mangalulu samparia porenta i Musa. Kasimbalinya yako etu, to tao-tao kita ojo mangantulisika sira sura pei manganto’oka sira ne’e mangkoni pangkoni to makarika, etu semo pangkoni to room rapampueka resi tau-tau. Pasi ne’e masala bara magoyal. Pasi ne’e seja mangkoni raa pasi wombo binatang to mate taa masuwu raanya.

2 Petrus 2:14

Sira sangkani rani masala ane mangalo’aka tau we’a. Pasi sira tare pandoonya mangika dosa. Sira mangakal tau to taa maroso pangayanya. Pasi raya nsira sangkani mamporani anu nsa’e. Wali sira natanaa yau i mPue Allah.

2 Petrus 2:10

Wali samparia tau to maja’a lengkonya darahuku, taa manto’o tau to mangika lengko ngkatuwu to ojo mangaluluka yau pamporani ngkoro nsira to makarika, pasi tau to taa manga’angga i Pue anu bae kayawaNya. Wali tau to mampotunde anu to taa monso, sira makoje pasi mangei. Pasi sira taa meka manganto’o maja’a tau to bose pangkanya.

1 Petrus 5:2

Wali si’i semo paposiangku resi komi to penatua, ewa wimba naika nto pangkampang domba mangararamaka dombanya, ewa wetu seja danuika ngkomi mangararamaka samparia tau to i Pue Allah Puenya, to roomo rasarumakaka resi komi. Pei to tao-tao komi mampasilonga sira yako ri kabuya ndaya ngkomi, si’a apa saba rapakasaaka. Pasi pakasanang kojo raya ngkomi mangika palaong to etu. Ne’e mangika apa saba komi ojo rani sugi.

Titus 1:11

Wali tau to ewa wetu ne’e rabiaka mampotundeka tau to mangaya, apa sira mampotundeka tau anu to taa masipato rapotundeka. Wali anu to napotunde nsira etu ojo mampakasusa tau. Apa ane ri oyo ntau santina pei samba’a mangaya gombo ntau etu, damawali kasusa ri oyo nsira. Wali tau to mampotunde anu to taa monso etu, naka pei sira mangika palaong etu apa sira ojo rani sugi.

Titus 1:7

Apa ketua ntau to mangaya nawaika i mPue Allah palaong, wali ia taa maya ane re’e lengkonya to maya napakasala nsa’e. Ia taa maya mangei pasi ia taa maya majoli maja’a rayanya. Pasi ia si’a to panginu, si’a to batingka, pasi si’a tau to ojo rani sugi.

1 Timotius 3:3

Ia si’a to panginu, bara to batingka, pasi ia taa makasar. Ia si’a tau to mangaliwu rani masibanta, pasi ia si’a tau to ojo rani doi.

Pilipi 1:27

Pei nempo bara kesaa to mawali resi aku, ika lengko ngkatuwu to singkonong pei kareba matao mangkonong i Kerisitu. Ika ewa wetu see aku nempo rata wo’u resi komi bara ojo mangarata kareba mangkonong komi, matantu rayangku mampobuuka kasingkatao ngkomi mainti kojo, pasi komi samba’a pampobuuka mapalaong sindara-ndara mampakarebaka kareba matao see sa’e damangaya seja.

Roma 16:2

Ia darata resi komi, wali aku mamporapika resi komi see komi damangantima ia ri kasanang ndaya apa ewa wetu to masipato naika ntau to i Pue Allah Puenya mangantima a’inya to samba’a seja pei i Pue. Pasi kuporapika seja see ane bara re’e to taa gana resi ia, komi damangansawang ia, apa ia room mangansawang boros tau. Pasi ia seja mangansawang aku.

Roma 6:13

Ne’e kita mangabiaka pasi sangaya saga ngkoro ngkita rapake damangika anu to maja’a. Kita ewa tau to room mate pei nawangu muni i mPue Allah. Wali to tao-tao kita mangawaika koronta resi i Pue Allah see Ia maya mangampake kita damangika anu to singkonong pei Ia.

Roma 1:29

Wali mpangaya-ngaya lengko to madosa to naika nsira yako ri pampobuukanya etu. Etu semo sira magoyal, sira mangika palaong to maja’a, sira bamporomung, pasi rani mampakaja’a sa’e. Sira kaloo pasi timopo, pasi sira rani mampopate sa’e. Sira batingka, pasi manipu, pasi sangkani mampobuuka anu to maja’a mangkonong sa’e. Sira bawiwi

Palaong mPomakau i mPue Yesu 20:33

Wali tempo aku maroo resi komi seore aku tare mamporani doi ngkomi bara pake ngkomi.

Lukas 16:14

Wali tempo i Yesu manganto’o samparia gombo etu, re’e to Yahudi to aliran Parisi to mangandonge seja. Sira mamporayang kojo kasugi, see naka sira mampokore i Yesu.

Yeremia 6:13

Wali samparia tau Israel, to kodi angganya pasi to bose angganya, sira paka bamporomung see naka sira mangoko yau kasugi to taa masipato sira mangoko. Wali pasiwa tau to pantuntu tuntu i mPue Allah pasi to pampue, sira seja taa maya rasarumaka.

1 Samuel 8:3

Pei sira dua taa mangaluluka lengko ngkatuwu mpa’a nsira. Kasimbalinya yako etu, sira dua ojo rani sugi. Wali see naka tempo sira mangabotus sa’e, re’e tau to mangamomis sira. Tau etu re’e to mangawaika yami sira doi bara sora to yusa, see naka sira damangika botu to taa masipato. Sira ojo mangika botu to singkonong pei pamporani ntau to mangabayar sira etu.

1 Timotius 6:10

Apa ane ewa pinamuya, yako ri kalenya mawali tuwunya. Wali ane tau ojo mamporayang doi, to etu maya raporapaka ewa kale mpinamuya apa yako ri pamporayanginya doi etu mawali samparia anu to maja’a. Apa re’e tau to mamporayang kojo doi, see naka sira re’e mampiyaika pangayanya. Wali tau etu sira roomo mangarata kasesa to yako ri soso ndaya nsira.

Lukas 12:15

Roo see, Ia manganto’oka wo’u tau boros, “Pakatao kojo naka ne’e komi mawali bamporomung. Apa nempo bae kasugi ntau ri lino, si’a kasugi etu to mangawaika ia katuwunya.”