1 Timotius 1:16 - Tuntu i mPue ri Basa Taa

¹⁶ pei nempo ewa see i Pue Allah mamporayang aku. Naka pei Ia mamporayang aku to bae kojo dosangku si’i see damawali tondong mangkonong ewa wimba kabaenya sabara i ngKerisitu Yesu. Wali sabaraNya to resi aku etu mawalimo tondong yako ri tempo si’i resi tau to damangaya Ia, pei to damangarata katuwu to singkasaenya saba sira mangaya Ia.

Sura Magali Nuntu Ngkatuwu

¹⁶ Paikanya inceʼemo puʼunya ndapokapuru i mPue Ala yaku, da naka tongawa ewambeʼi kalulu ndaya i ngKerisitu Yesu ri yaku, tau anu maʼai ngkasalaa seʼi. Pai inceʼi mewali sambaʼa pandiri ri waʼa ntau anu nepa da meaya ri Sira pai da marata katuwu anu bareʼe da reʼe kapusanya.

1 Timotius 1:16 Referans Kwoze

1 Timotius 1:13

Nempo maja’a kojo lengkongku resi Ia tempo aku tawa mangaya, Ia tiroo mangawaika aku palaong to etu. Tempo aku tawa mangaya, tempo etu aku semo tau to manto’o maja’a i Kerisitu, pasi aku tau to mampakasesai Ia pasi mangarunes Ia. Pei i Pue Allah mamporayang aku apa samparia palaong etu inikangku saba kabeangku apa aku tawa mangaya.

Epesus 2:7

Wali naka pei i Pue Allah mangika palaong to etu see ane ri tempo to darata Ia maya mampapokitaka samparia to lino pasi pomakauNya ndate saruga ewa wimba kabaenya kanotoNya resi kita. Bae kojo kanotoNya etu. Ia mamporayang kojo kita apa saba kita samba’a pei i Kerisitu Yesu.

Lukas 7:47

Wali see naka Aku manganto’oka korom, tau we’a si’i bae kojo pamporayanginya resi Aku apa dosanya to boros kojo roomo ralapa. Pei tau to mangepe ia taa boros dosanya to ralapa, tau etu taa bae kojo pamporayanginya.”

2 Petrus 3:15

Pasi ne’e rakalingan sabanya naka pei i Pue ngkita bae sabaraNya, see tau maya darapalaes. Wali ewa wetu seja to nato’o i mPaulus, a’i ngkita to taporayang. Apa ewa wetu to ia nangantulisika komi seore yako ri kapande to nawaika i mPue Allah ia.

2 Petrus 3:9

Wali re’e tau to mampobuuka i Pue Allah malengi kojo mangabanang parajanjiNya. Pei si’a ewa wetu. Ojo kita to lino to mangepe malengi apa pampobuuka ngkita taa sewaju pei pampobuuka i mPue Allah. Wali kamonsonya sabanya naka pei i Pue Allah taa mansaka mampakaja’aka yau lino, apa Ia ojo mangansabaraka kita to lino see tiroo re’e temponya tau damajea. Apa Ia taa rani sako samba’a tau darapakaja’aka yau.

1 Petrus 3:20

Wali tau to tonii nsira ratarungku, etu semo tau to taa mampolaika i Pue Allah tempo owi, ri tempo i Nuh. Tempo etu i Pue Allah bae sabaraNya resi sira mangampeas temponya bangka bae roomo napasilonga i Nuh. Pei roo see taa malagi tau to rapalaes apa tau to boros bo’onya mampalaika i Pue Allah. Ojo wayu mba’a tau to rapalaes yako ri samal ue apa sira masua ri raya bangka etu.

Yohanes 20:31

Pei palaong to re’e ratulis, naka pei ratulis see komi maya mangaya i Yesu Ia Ana i mPue Allah, pasi Ia semo i Kerisitu, Makole parajanji i mPue Allah. Panewa yako pangayamu etu, see naka komi maya mangarata katuwu apa saba komi Ia puenya.

Yohanes 3:36

Wali i sema tau to mangaya AnaNya etu, tau etu re’e katuwu to singkasaenya. Pei i sema tau to taa mangaya AnaNya etu, tau etu taa damangarata katuwu to etu. Kasimbalinya yako etu, tau etu danahuku i mPue Allah rataka ri singkasaenya.” Wali etu semo gombo i Yohanes resi anagurunya.

Roma 6:23

Apa ntanapa ntau mangika dosa, etu semo kapate. Pei sora to yako resi i Pue Allah, etu semo katuwu to singkasaenya. Wali kita maya mangarata sora etu apa saba kita samba’a pei i Kerisitu Yesu, Pue ngkita.

Palaong mPomakau i mPue Yesu 13:39

Ane porenta i Musa, taa maya mangalapas kita yako samparia dosa ngkita, pei ane i Yesu Ia maya. I sema tau to mangaya i Yesu, tau etu ralapas yako samparia dosanya.

Yohanes 6:54

Pei tau to mangkoni korongKu pasi manginu raangKu, tau etu re’emo katuwu to singkasaenya. Pasi ane rata ri kapuranya temponya to si’i, Aku damangawangu muni tau etu yako ri kapatenya.

Ibrani 7:25

Wali see naka Ia nakurang mangampalaes samparia kita to mangampago i Pue Allah apa saba pansarumakanta resi Ia. Ia nakurang mangampalaes kita rataka ri singkasaenya apa Ia tuwu singkasaenya damamponsaruka kita ri tango i mPue Allah.

2 Tesalonika 1:10

Palaong etu damawali ri tempo nakama’i i mPue. Naka pei Ia dama’i etu see Ia danabarong ntau to Ia Puenya pasi mampakaipu raya ntau songonya to mangaya Ia. Pasi komi seja damawali ewa wetu apa komi mangaya gombo to napakarebaka mami resi komi seore.

Epesus 1:12

Naka pei Ia mangika ewa wetu see kami, to uyunya mansarumaka i Kerisitu, damangabarong kayawaNya.

Epesus 1:6

Wali masipato kita mangabarong i Pue Allah, apa bae kojo kanotoNya to buya rayaNya mangawaika kita apa saba kita samba’a pei AnaNya anu naporayang kojo.

2 Korintus 4:1

Wali yako pamporayang i mPue Allah, see naka Ia mansarumakaka kami mapalaong mampakarebaka kareba to bou. Wali see naka kami taa mawali mayu’u raya mami mangika palaong to etu.

Roma 15:4

Wali samparia tuntu i mPue Allah anu to ratulis tempo owi paka ratulis damangampotunde kita. Wali yako tuntu i mPue etu, see naka kita maya mangansabaraka kasusa pasi mawali maroso wo’u rayanta. Apa ane ewa wetu kita maya mangkongko kojo pansarumaka ngkita resi i Pue.

Yohanes 6:37

Pei re’e tau to yusa to dama’i mangalulu Aku. Tau etu semo tau to nasarumakaka mPa’angKu Aku. Pasi samparia tau to ma’i mangalulu Aku etu, Aku taa kojo damangarubak yau.

Yohanes 5:24

“Aku manganto’oka komi, monso pu’u i sema tau to mampodongeka gombongKu pasi mangaya Ia to nampokau Aku, tau etu re’e katuwu to singkasaenya, wali ia tamo darahuku. Apa ia tamo re’e ri jaya to mangarata kapate pei ia re’emo ri jaya to mangarata katuwu.

Lukas 23:43

Wali i Yesu manganto’oka ia, “Aku manganto’oka korom, monso pu’u seo si’i korom dasiwaka pei Aku ri tampa to bae kojo kayawanya, to rato’oka bonde i mPue Allah.”

Lukas 15:10

Wali Aku manganto’oka komi, ewa see seja kandende ndaya mpomakau i mPue Allah ndate saruga tempo re’e samba’a tau madosa to majea.”

1 Korintus 7:25

Wali ane mangkonong ngana we’a to tawa re’e nepenya to langkai, aku tare porenta yako resi i Pue Allah. Ojo pampobuuka to si aku semo to dakuto’oka komi. Pei gombongku masipato rasarumaka apa yako ri pamporayang i mPue Ia mangansawang aku magombo.