NEHEMIAH 8:1 - PATHIAN LEKHABU THIANGTHO (BSI)

¹ Chun, tha sagi’na a tin phatin, Israel mipi zosia amau khua chiat ah a chên muan zaw phat un, mipite chu Tui Kotpi ah mun thawveng ah chun a kikhawm tau a. Lekhabu zikpa Ezra kiang in, Lalpa chun Israelte â ding ah Mosi kiang ah Dan zikna lekhabu chu hun ladok dingin a don tau a.

NEHEMIAH 8:1 Referans Kwoze

EZRA 7:6

zia Ezra chu Babulon ah kipat in a kuandok a. Ama chu Lalpa, Israelte Pathian in Mosi kiangah dan thu a la piakte dan thiam tak mi ahi’n; Lalpa a Pathian doisakna chang ahiziak in, Lengpa kiangah a dot taphot chu phal piak in a um hi.

NEHEMIAH 3:26

Ophel ah chêng tempul ah nasêmte chun, sualam kâi ah um Tui Kotpi mai jawn leh Insâng hung dawkdok tiang chu a la siampha tau a.

2 KHANGTHU 34:15

Hilkiah chun lekha zikpa Shaphan kiang in, “Lalpa In sung ah Dan Lekhabu ka mudok tai,” ti’n a gen ah; chuleh, Hilkiah chun zia Dan Lekhabu chu Shaphan kiang in a pedok a.

EZRA 7:11

Lengpa Artaxerxes in thiampu, lekhazik mi leh, Lalpa‘n a mi Israelte zui ding ah a thupiak sawmkhatte leh, dan leh mualte ah mi thiam Ezra kiangah a lekhathot thute chu ziate hi ahi’n:

MATTHAI 23:34

Ziaziakchun, la kiang un jawlneite, mipilte leh lekhazikte kha ka hun sawl a; khenkhat chu that in la tiu in, khenkhat chu a la khenden in la tiu in, khenkhat chu kikhopna Inte ah vua’n la tiu in, a khua a khua’n delzui in lau;

MATTHAI 23:13

Nanghaw, lekhazikte leh Pharisai miphalêmte haw, la chung uh a gik hi! Mi van-gam lut ding la dâl ua; nang uh la la lut puau ah a lut nuamte le la lutsak diak puau hi.

MATTHAI 23:2

Lekhazikte leh Pharisaite chu Mosi chutpha’n a kichu sek ui;

MATTHAI 13:52

Ama chun a kiang un, Chuti ahileh, lekhazik ah pang hingal ah van-gam thu ah nungzui a hung um tapo chu, Inneipa a gobawm ah thil lui leh thil thak suadok sekpa gual chu ahi, a tia.

MALAKI 4:4

Ka suakpa Mosi zilsakna leh Horeb tâng ah Israelte â ding ah ka thuguatte, ka dan thute leh ka thupiakte kha hezing un.

ISAI 8:20

Zia gual ah thugente chun phalvak mu him him pua’n au!

NEHEMIAH 12:37

Tuikhuk Kotpi ah kipat chun a ma lam ua, David khawpi kalbite ah kal to in, kulbâng kaltona ah, sualam pang Tui Kotpi lam, David In saklam kâi in a chiau a.

NEHEMIAH 8:16

Tichun, mipite chu a kuandok ua, ziate chu lakhawm in bawkcha te chu amau â ding chiat in, a In uh tawh kizom a hem, a huang sung chiat uh a hem, Pathian In tualjawl leh Tui Kotpi leh Ephraim Kotpite ah chun a suang chiat tau hi.

VAIHAWMTE 20:8

Mipi zosia chu mi pakhat gual mai in, thakhat in a dingdok ua, a leng un, “Kuama a puanbûk lam ua chiakit lo ding, kuama In lam ah chia kit le I um lo ding uh ahi.

VAIHAWMTE 20:1

Ziaphatchun, Israelte zosia Dan ah kipat Beer-sheba leh Gilgal gam tiang in a hung kuandok tau ah; mipi pungkhawmte chu kithu gual tak in Mizpah mun ah Lalpa ma-âng in a kikhawm tau a.

2 KHANGTHU 34:30

Lengpa chu Judai gam ah mipite tawh, Jerusalem ah chêngte zosia chu tawh, thiampute leh Levi mite leh mipi zosia, a lian a neute tawh Lalpa In ah chun a chia to tau a; amau haw zosia het dingin, Lalpa In ah a mudawu Thuthung Lekhabu thute chu a simdok ta’n.

EZRA 7:10

Ezra in vang Lalpa dan thute chu a zui ah, a thugente chu a hiltheina dingin Israelte kivai hawmna ding dante chu a lunggil zosia ah gunchu tak in a kizil zing sek hi.

NEHEMIAH 8:3

Jingkal vaima tak ah kipat sûnkim tiang, Tui Kotpi lam nga’n, numei leh pawsal hiatthiamna nei zosiate hiat thei dingin a hun sim tha ta’n; tichun, mipi zosiate chun zia Dan Lekhabu thute chu lunglut tak in a ngaitha tau a.

THIAMPUTE LEKHABU 9:5

Mosi gen gual in kikhopna biakbûk mai ah chun a hun kai tau a; mipi zosia le hung khawm in Lalpa âng in a ding tau a.

DAN LEKHABU 31:11

Lalpa la Pathian un a guatchuamna mun ah, Israel mi zosia a hung kilâk phat si’n ua leh, a het ngei ngei ding un, zia dante hi la simdaw sek ding uh ahi.

2 LENGTE 23:2

Lengpa chu Lalpa In ah chun a chia to ah; tichun, Judah mipi zosia tawh, Jerusalem ah chêngte zosia chunle a zui ua; thiampute tawh, jawlneite tawh, mipi a lian a neule a pang chiat tau a; tichun, Lalpa In ah lekhabu a mudawu ah kizikte chu aleng alam in mipi zosia nakhang bul ah chun a hun simdok tai.

EZRA 7:1

Ziazaw chun, Persia gamah Lengpa Artaxerxes vaihawm lai in, Ezra, Seraiah chapa, Azariah chapa, Hilkiah chapa,

NEHEMIAH 12:26

Ziate hi Jozadak tupa Jeshua chapa Joiakim dam lai, gam awppa Nehemiah tawh, thiampu leh lekha zikpa Ezra hun lai ah um a hiu a.