ISAI 3:8 - PATHIAN LEKHABU THIANGTHO (BSI)

⁸ A kamsuak leh a thilbawl dan uh, Lalpa dodâlna leh pâmpaina ngen ahiziak in, Jerusalem chu a kisui ta’n, Judah chu a kipûk tai.

ISAI 3:8 Referans Kwoze

1 KORINTH 10:22

Lalpa chu thangsiat sak gua I hiu em? Ama sâng in I hat zawu ah a hem?

HOSEA 7:16

A phachuam lo lam ngen in a kihei un, thalpi mat tâk lo gual a hiu hi; a pau hoithawnau ziakin a milianteu chu, chemjam in pûk in au. Aigupta gam ah a phunchiak ziak un, zia cheng chu a chung un ka bawl ahi.

JUDA 1:15

mi zosia chung ah vaihawm intin, mi zosia’n Pathian ngaisak lo tak ah, Pathian ngaisak lona thil a bawl zosiau leh, migilo, Pathian ngaisaklote’n a chung ah khau tak ah a gen zosiau mawchansak in a,” ti in.

HABAKKUK 1:13

Thil phalo en dingin la mitte, a thiangtho talua hen, thil phalo bawlte chu la entha pei puai; bang ziak ah mi dawhathûkte la ngaithei ah, amau sâng ah diktat zaw te a valzaw tak uh leh, thipsan hiat hiat la hem?

MIKAH 3:12

Ziaziakchun, nangma ziakin Zion chu, lou gual ah kaibuat in hung um in a; Jerusalem chu ki’dak buaksia paikhawmna mun hung hi’ntin, tempul umna mual chule gammâng thingbuk lak hung suak in a.

EZEKIEL 9:9

Ama’n ka kiang in, “Israel leh Judah Inkuante thil bawl khial chu a huaisia ma ma hi; gam pumpi thisan sua’na’n a dim ah, khawpi sungle nunsiatna’n a dim zo tai; amau in, ‘Lalpa‘n gam hi a nungngat ta’n, Lalpa‘n en talo ahi,’ a ti’ngal ui.

EZEKIEL 8:12

Ziaphatchun, ka kiang in, “Mihing, Israel Inkuan ah upa vaihawmte’n, pindan sung thim nuai ah a milimteu bang law a hiu em ti la mu em? Amau in, ‘Lalpa‘n ei mu pua’n, Lalpa‘n gam hi a nutsia ahi tai,’ a ti ta’ngal un,” a hun tia.

JEREMIAH 26:18

“Moreseth khua jawlnei Mikah in, Judai gam ah Lengpa Hezekiah dam lai in thu a gen a, Judai gam ah mipi zosiate kiang in: ‘Sepai honte Lalpa‘n zia gual hin thu a gen hi,’ a ti’n: ‘Zion chu lou gual ah kai hi’n a; Jerusalem khua chu ki’dak kipaikhawm vûm gual hi’ntin, tempul umna tâng le gammâng hung suak in a,’ ti in,” a tia.

JEREMIAH 26:6

ziaphat chuleh, zia In hi Shilloh gual in siam ing ka tin, zia khawpi hi lei chung nam zosiate hânsia dong in siam ding ka hi, ti in.

ISAI 57:4

Kua a hem tawtbawlna la mat uh? Kua eulauna ding ah la kam uh lian tak ah kâ, la lei uh thadok sek la hiu em? Bawsiatna chate, mithepna suan leh pâkte hilo la hiu em?

ISAI 9:17

Ziaziakchun ahi, Lalpa‘n a khanglaiteu a lainat lo ah, a nauchagateu leh a meithâiteu le a lungsiat lo; mi tin in Pathian neilo leh, thil phalo bawl ah zuau thu a gen ziak un. A lungnatna hâi thei lo in a chung un, a khut a lâm nalai lai ahi.

ISAI 1:7

La gam uh nutsia’n a um ta’n, la khawpiteu mei in a kâng tum tai; la mit muu in la lou gateu chu, gam dang mite’n a ne zo tau hi; gam dang mite’n a nuaisia tâk ziak un, a hawm ah nutsia in a um zo tai.

2 KHANGTHU 33:11

Ziaziakchun, Assuria lengpa sepaite hotu haw chu Lalpa‘n hun sawl in, Manasseh chu man in thikkhau lingnei leh kol busak in, Babulon khua lam in a pui mang tau hi.

2 KHANGTHU 28:18

khawpite chu a la buluu ah, Beth-shemesh, Aijalon, Geereth, Soko leh a khawpelteu tawh, Timnah leh a khawpelte tawh, Gimzo leh a khawpelte zosia chu a la la zo tauah; tichun, zia khuate ah hin a la chêng den tau hi.

ISAI 6:11

Ziaphatchun keima’n: “Aw Lalpa, bang chan ahi diam?” ti’n ka dong a. Ama’n ka kiang in: “Khawpite a lua ding um lo ah nutsia a hung hiu a, Inte le a chêng ding um lo ah, gam pumpi hisiat dim dem ah, a hawm ah nutsia ahi masia;

ISAI 49:19

La mun se’sau, giauchangte leh, la gam suktawp ah umte chu, matheilo in chêng dim kit in, neu talua hun sa hial ta’n lau; nanghaw hun chomgamte chu vang, gamla tak in jam ta’n au.

ISAI 59:3

La khutteu chu thisan ah sukbuak a la hita’n, la khutzungteu chule khawlona sukbuak a la hi zo ta’ngal a; la mûk un zuau thu a gen tau a, la lei un nunsiatna thu ngen, a gendok ta’ngal a.

JEREMIAH 4:13

En un! Sûmpi gual in a hung kuandok hi, a sakol kângtalaiteu chule chîmpei a bang hi; a sakolteu chule mupi sâng in, a chan-gang zaw’n, I chung uh a gik na e! Suksiat I hi ta’ngal un.

JEREMIAH 44:3

a chêngte’n thil phalo bawl ah ei la suklungnat ziak un. Amau chun pathian dang, a pu leh pateu, nangmau leh amau ziang inle a la ho khâk ngailoteu chu ho in, a kiang ah kithoinate a la lân tau a.

KÂ LATE 1:9

A buakna chu a nîk in a bek ah, a khawnung thu ding bangma a gêl puai; a kiak niamna chu huaisia tak ahi, a thamuan ding khat le a um puai. “Aw Lalpa, ka haksat dan hi hun en tiam in, mêlmate’n ei tawden tau hi!” a ti’n.

MIKAH 6:12

La mi hausateu chu kipawngbawlna’n a dim un, zia chêngte chun a kam un thep hatna lei in zuau thu a gen un.

THUPILTE 26:27

Mi kiaklutna ding ah kawkhûk cho tapo chu ama ke’lut intin, suang lîk khum gaw tapo chung in suang chu hung kilîk in a.

JEREMIAH 23:36

Himaleh, “Lalpa puaknat chu,” ti hivang la gen puak tâk lo ding uh ahi; puaknat chu mi tinte kamsuak haw zosia hi a hiziak in; tichun, Pathian hing, sepai honte Lalpa, I Pathian uh kamsuakte chu la kaikawi zo ta’ngal un.

HOSEA 5:5

Israel chu a chapona ziakin ama thiamlo a chansak in; Ephraim chu a thulimlona’n a kipal pâi hi; Judah le amau tawh a kipal pâi khawm hi.