HOSEA 9:12 - PATHIAN LEKHABU THIANGTHO (BSI)

¹² Chate hun nei ta mawng leule, pakhat ziang le a sûn lo uh koi pua’ng ka. Amau ka nutsia dingte chung chu a gik na lawm lawm e!

HOSEA 9:12 Referans Kwoze

HOSEA 7:13

Ka kiang ah kipat a vâk mang ziak un, a chung uh a gik hi! Ka chung ah a helnau ziakin, a chung un siatna tung in a! Amau hukdok nuam maleng, ka chung ah zuau thu bep a gen ui!

HOSEA 9:16

Ephraim chu jep in a um ta’n, a zung a keu tai, ga sua kit ta pua’n au. Nau hun hing maleu, a sul ah nau a doi um tak chu that tho tho ing ka.

DAN LEKHABU 32:25

Kotzing ah chemjam in, pindan sung ah dipdap na’n; nungak leh tangval, nawichep lai leh samkângtate, kibang tak in tun khum ta’n a.

DAN LEKHABU 31:17

Ziaphat chuleh, a chung ua ka lungnatna kuangjak intin, amau chu kilepsan ing ka tin, ka mai sêlgu ta’ng ka; thil phalo leh tizat um tak in hun chup ta’n ah. Zia ni phat chuleh, ‘I Pathian un ei umpi lo ziak ah zia gual buainate hi tuak hi talo I hiu em leh?’ ti’n tiu in.

HOSEA 9:13

Tu’ma khan Ephraim chu mun nuam tak ah, tûm thingno kiphut gual in ka la mu’n; himaleh, tu’hin Ephraim in, a chate chu thâ gam dingin, hun puidok têi ding ahi.

KÂ LATE 2:20

Aw Lalpa, hun en inla, ngaitua tia! Kuate chung ah zia gual hi bawl la hem? Numeite’n amau gil ah ga ngei, a nau awi laiteu sa chu, ne mai ding a hitau em? Thiampu leh jawlnei chu, Lalpa mun thiangtho ah, tha ah um ding a hiu em?

JEREMIAH 15:7

A umchan uh a khiam lo ziak un, gam sung ah kotpi bul tincheng ah, bu vokna mol ah vua’n ka thîtchil tai; a cha leh nauteu ka sûn sak ta’n, ka mipite chu ka that gam tai.

JOB LEKHABU 27:14

Cha a nei tam po ua leh, chemjam ah thi ding bep hi’n tiu in, a suante chun a nêk khop nei ngai pua’n au.

2 LENGTE 17:23

A suak jawlneite mang ah a la gen taksa gual in, Israel chu Lalpa‘n ama mit mu ah a chawn mang ah. Zia ziak tak ah chun Israel chu a gam ua kipat in Assuria lam ah pui mang in, tu’ni tiang hin a um zing tau ahi.

2 LENGTE 17:18

Ziaziakchun, Lalpa chu Israel chung ah chun a lung a hung na ma ma ta’n, ama mit mu ngei ah chun amau chu a hun koimang ta’n; Judah namte tilo ngal chu pakhat chale khek a nei ta puai.

1 SAMUEL 16:14

Tu’hin Lalpa thagau in Saul a pawt dawsan ta’n; tichun, Lalpa‘n thagau buak hun sawl in Saul chu a gawt tai.

VAIHAWMTE 4:16

Barak in kângtalai leh sepaite chu Harosheth-ha-goiim tiang in a vadel zui ah. Sisera sepai zosia chu chemjam âng in a puk zo tau ah; a suakcha khat chale a um puau hi.

DAN LEKHABU 28:32

La mu zing un la chapateu leh la chanuteu chu midangte suak ding ah kaimang in um in au; nisa tum in la mit un en zui maleu chin bangma law thei pua’n lau.

KISIMNA LEKHABU 26:65

Lalpa‘n a chung thuu ah: “Gamthip ah thi malam ding ahiu,” ti ah a la gensa gual in, a lak un Jephuneh chapa Kaleb tawh, Nun chapa Joshua tilo ngâl kuama a dam a um ta puau hi.

JEREMIAH 6:8

Aw Jerusalem, vauhilna hi ngai in, achutiloleh, hun nungngat ing ka tin, nutsia ah um in, kuama chên lo’na’n, hun siam mai ding ka hi.

MALAKI 2:12

Sepai honte Lalpa kiang ah zia gual ah thil lân ah, hetpi leh lemguatpi ah pang taphot chule Lalpa‘n Jakob puanbûk ah kipat in paidok mai hen.

KISIMNA LEKHABU 14:34

Gam etthâkna hun la suklût uh ni sawmli dungzui in, ni khat chu kum khat ah sim hi’ntin, la gitlo man uh kum sawmli la puak diu ahi; chutichun, ka lungawi lo dan tak chu he ta’n lau,” a tia.

DAN LEKHABU 28:18

La gil ua gate, la gam ua gate, la bawng hon leh la belam gualteu ah le hânsiadong in um in lau.

KÂ LATE 2:22

Kil tin ah kipat ka mêlmateu chu, kût thupi tak ah pang ding gual in, la chial khawm a; Lalpa lungnatna ni ah chun, hingle a hingdok puau, ka hin leh ka dot seilette chu, ka mêlmate’n a that gam tai.