HOSEA 8:13 - PATHIAN LEKHABU THIANGTHO (BSI)

¹³ Amau in doichuam thillatte pemaleu, sate chu ne maleu, Lalpa‘n ziate chu a pom puai. Tu’hin, a khawlonateu chu hezing intin, a gitlo’nau chu gawt in a; amau chu Aigupta lam in kile’kit in au.

HOSEA 8:13 Referans Kwoze

HOSEA 9:9

Gibeah ah a um lai gual uh khan, amau leh amau nasa tak in a kisubuak ui; a khawlonau chu hezing intin, a gitlonau chu gawt ding ahi.

HOSEA 9:6

Siatna pumpel in suakcha maleu, Aiguptate’n chom khawm intiu in; Memphis in amau vui in au. A dangka golûlteu chu zakthâite’n lua intin; a puanbûkteu ah chun lingte um in a.

AMOS 8:7

Lalpa chu, Jakob lopina sal in a kihaksial tai: a thilbawl dan zosiau chu hemil pua’ng ka.

AMOS 5:22

Hâlmang thillat leh thâi thillatte hun lân maleu chin, a la pom lo ding ka hi; la chamna thillat uh gancha thau tak takte chule, hun ngaisak diak pua’ng ka.

HOSEA 11:5

Aigupta gam ah kile’kit intiu in, ka kiangah a hung kile’kit nop lo ziak un, Assuria chu a lengpau hung hi’n a.

HOSEA 5:6

Lalpa hawl dingin a belam honteu leh, a bawng honteu tawh chia intiu in, himaleh, mu zo pua’n au; amau a kilepdok san ta’ngal a.

JEREMIAH 14:10

Zia mite chungchâng ah hin Lalpa‘n zia gual hin a gen hi: Vâkmang a nuam tun tun un, a kengteu chu a thunun zo puau hi; ziaziakchun, Lalpa‘n a pom ta pua’n, tu’hin a nunsiatnau hezing in, a gitlonateu ziak ah chun, hun gawt ta’n a.

ISAI 1:11

Lalpa‘n zia gual hin a gen hi: La kithoinau zozaipi hi, kei â dingin bang phachuam a hem? Hâlmang kithoina ding ah kêlchal leh, gancha kivâkthau ka hau hi; bawgchalte, belamte leh, kêlchate thisan hi ka lop ta puai.

DAN LEKHABU 28:68

Lalpa‘n Aigupta gam zuan ah long in hun pui intin; ahi’n, la kipatna lam uh chu mu kit talo ding ah thutiam dungzui in; zia gam chun la mêlmateu kiang ah suakpa leh suaknu dingin kizuak maleu chin, a hun chaw ding kuama um ta pua’n ah, ti in.

THUPUAN 16:19

Tichun, khawpi lopi chu mun thum in a hung kikhen ah, namte khawpi chu a chim tai; chun, Pathian in Babulon khawlopi tatdan chu a hezing ah, a lungnatna uain hai chu a butthâk khum ta ahi.

1 KORINTH 11:29

Lalpa taksa chu ngaitua lo hial ah a nêk leh a dawn chun, ama chung ah vaihawmna dingin a ne’n a dawn ahi.

1 KORINTH 11:20

Lalpa an thiang nekhawm ding ah kikhawm la hi ngai puau hi.

HOSEA 12:11

Gilead ah thudiklo’na a um ah, bangmalo mai hung suak têi ding a hiu. Gilead ah chun bawngchalte’n a kithawi un, tichun, a mâichâmteu chu jawtlam chung ah, suang kisia khawm gual in hung um in a.

HOSEA 7:16

A phachuam lo lam ngen in a kihei un, thalpi mat tâk lo gual a hiu hi; a pau hoithawnau ziakin a milianteu chu, chemjam in pûk in au. Aigupta gam ah a phunchiak ziak un, zia cheng chu a chung un ka bawl ahi.

HOSEA 7:2

A gitlonau zosia ka he suak hi ti lam a ngaitua puau hi. Tu’hin, a thil bawlteu in a umchil ta’n, ka ma-âng ngei in a um tau hi.

HOSEA 4:9

Mipite thok gual chu thiampute chung inle tung in a; a tawi dan dungzui un gawt ing ka tin, a thilbawlteu chu thuk ing ka.

THUPILTE 21:27

Migilo kithoina chu luaksuak um tak ahi’n; ngaituana phalo pum ah a thillat hun chawi vang chu, bang gual bep in a luaksuak a um ta diam!

1 SAMUEL 15:22

Ziaphatchun Samuel in: “Lalpa‘n a thu mat sâng ah, hâlmang thilpiak leh kithoina kipakpi zaw a hem? Ahi’pen chu, kithoina sâng in thumat a phazaw’n, a thu ngaisak chu belamchal thau tak, piak sâng ah le phazaw ma ma ahi.

PAWTDAWNA THU 32:34

Himaleh, tu’hin nangma chia inla, mipite hi la kiang ah ka hun hilna gam chu lua dingin vapui in; en in, ka vansawlchâk in hun pui zing ding ahi. Ahi’nla, ka gawtna hun a hung tun phat leh amau gitlona dungzui ah chun hun gawt ding ka hi,” a tia.

PAWTDAWNA THU 20:3

Keima tilo Pathian dang him him la nei lo diu ahi.

LUKA 12:2

Puandaw lo ding ah îmgûk bangma a um pua’n, suklat lo ding ah sêlgûkle bangma a um diak puai.

1 KORINTH 4:5

Chutichun, a hun masang in bangma genchian kiu in; Lalpa chun thim ah thil sêlgukte chu vâk ah hun tâkdok intin, lungthim ah tupnate le hilang in a. Ziaphat chuleh, mi zosia’n Pathian ah kipat pakchak law chiat ta’n au.

JEREMIAH 6:20

Sheba ah kipat begaw a hun puau a, gamla tak ah kipat kêlzu thum tak a hun puak uh haw hi; kei â dingin bang ah pang ding a hem? La hâlmang thilpiakteu pom tâk a hipua’n, la kithoinateu le kipak um ahi diak puai.

EZEKIEL 29:16

Aiguptate chu Israel Inkuante’n kisuanpi ngai ngai ta pua’n au; a panpi ding ah a vachial phat uh leh le, a la bawl khial dan uh hiatsak zaw ta’n au. Ziaphat chuleh, Kei hi Lalpa Pathian ka hi ti hun he ta’n au.

HOSEA 7:11

Ephraim chu vakhu lung mawl, hetna nei lo gual chu ahi; Aiguptate a ko un, Assuria lam in a chiau hi.

HOSEA 9:7

Gawtna nite chu a hung tung in, thukna nite chu a hung tung tai; Israel in ko intin, “Jawlnei chu mingol ahi’n, thagau mi chule a ngol ahi tai,” ti in. La khawlona huaisia tak ziakin, la huatna le a huaisia ahi.

HOSEA 6:6

Kithoina hilo in ja’ngaina ka dawi in; hâlmang thilpiakte sâng in, Pathian hetna chu ka doi zaw ngal a.

AMOS 3:2

Khawvel ah Inkuan zosia lak ah, nang uh bep hi ka het la hiu in, ziaziakchun, la dukdaklo’nau zosia ziakin hun gawt ding ka hi.