1 TIMOTHI 5:8 - PATHIAN LEKHABU THIANGTHO (BSI)

⁸ Chuleh, kua’nle a chanaute leh a diak ah ama Insung mite nêk ding a ngaitua piak lo chun, ginna chu a phatsan ta’n, ginglo mi sâng ah gilo zaw ahi.

1 TIMOTHI 5:8 Referans Kwoze

GALATIA 6:10

Chutichun, hun lemchâng I nei dan dan un, mi zosia chung ah thilpha bawl chiat hitiu; ginna’ I Inkuanpiteu chung in bawl diak hitiu.

2 KORINTH 12:14

Ngai un, la kiang ua hung ding ka guat a thumveina ahi tai. Hun sugik pua’ng ka, la thil nei uh hawl ka hipua’n, nanghaw hawl ka hizawi. Chate’n nu leh pa â ding a khol ngai puau ah, nu leh pa’n chate â dingin a khol piak ding uh ahi zawi.

ISAI 58:7

Gilkialte nêk ding la piak ah, In leh lou bei gentheite la In ah la chênsak ah, nîk leh puan beite la thuam ah, la sang la suaiteu la kisêlmang san lo ding uh hilo maw?

TITA 1:16

Pathian he a kitiu in, himaleh a nasep ua chun ama a kihetlosak ui. Ki’dak um tak leh thu awilo tak in, thilpha hi’na ding lam taphot in a ting zo ta puau hi.

MATTHAI 7:11

Nang uh mi phalo in bawn, la chateu thilpha piakna châng la het ua leh, la Pau van ah um chun a donte chu thilpha pia zaw ma malo ding a hem?

2 TIMOTHI 3:5

pawlam bep ah Pathian ngaisak, himaleh a thilhitheina taksanglote hi ding a hiu. Zia gual mite chu kiheisan in!

THILSIAM THU 30:30

Kei hung ma’ khan tawmcha la nei ah, tu’hin vang tam tak a pha tau hi; ka kiheina lam taphot ah Lalpa’n a hun maljawl la hi hilam. Ahi’nla, bangtik leh keima Insung chan ding ka sêmdok ta diam?” a tia.

THUPUAN 3:8

La thil hi dante kha ka hia’i; en tiam in, la âng in kuama khâk theilo ding kot honsa’n ka koi hi; hâtna neukhat bep la nei ah, ka thu le la zawm ah, ka min le la kilepsan kha puai.

THUPUAN 2:13

La thil hi zosia leh la chênna munte, chuleh, Setan chutpha umna natiang ka hia’i; ka min chu det tak in la vop zing a, Antipas hun lai ah ka palai ginum, Setan chênna la lak ua a tha lai khan le, keima lei ginna chu la haisan diak puai.

2 PETER 2:1

Himaleh, mite lak ah jawlnei lêmte a hung pawt gual un, la lak unle thu diklo hilte hung intin uh, amau chun amau chawpa a puu hial chule kiheisan in, mi susiathei gindan chuamte a gûk in hun paw lut intiu in, amau chung in thakhat in manthaina tung in a.

JOHAN 15:22

Keima hung lo in, a kiang un thu hung gen lo hileng chu, gitlona neilo hiding a hiu a; himaleh, tu’hin vang a gitlonau suanlam ding bangma a nei ta puau hi.

JUDA 1:4

Mi kuate a hem a gûk in la lak un a hung lut un, amau chu malai ah kipat thiamlo chang ding ah guatsa, Pathian ngaisak lo mi, I Pathian uh hepina chu hûkna chansakte leh I Hotuu leh I Lalpau, Jesu Khrista kihiatlosakte a hiu hi.

2 KORINTH 6:15

Khrista leh Belial inle bang a hem a chan khawm uh? Ahiloleh, gingtu leh ginglo in bang a hem a chankhawm uh?

MATTHAI 18:17

Chutia, a hun ngaisak diak lo chun, la thuu chu kochuam ah tut in; chuleh, kochuam le a ngaithâk nop diak lo ahi chun, ama chu nang â dingin Jentel leh sedawlte gual hita hen.

1 KORINTH 6:6

Himaleh, suapi pakhat in a suapi chu vaihawmna ma’ tut in, ginglote kiang hinalai lo a hem?

2 TIMOTHI 2:12

I thok uh chun, ama tawh vaihawm khawm hitiu; ama I kilepsan uh chun, ama’nle ei kilepsan in a.