1 TIMOTHI 1:17 - PATHIAN LEKHABU THIANGTHO (BSI)

¹⁷ Khang zosia ah Lalpen, thi theilo, muthei lo, Pathian pakhat bep kiang ah chun kumtuang in choihoina leh lopina um zing ta hen.

1 TIMOTHI 1:17 Referans Kwoze

JUDA 1:25

Pathian tak bep I Hukdampau kiang in, I Lalpau Jesu Khrista jal in, lopina, lalna, thilhitheina leh thuneina, hun chiasa leh tu’hun leh kumtuang in um zing ta hen. Amen.

THUPUAN 19:1

Ziazaw chun, mipi tam tak aw gi van ah kipat in ka he: “Halleluijah, hukdamnate, lopinate, choihoinate, leh thilhitheinate chu I Pathian â ahi.

1 KHANGTHU 29:11

Aw Lalpa, letna leh thilhitheina, lopi’na, zaw’na leh lalna zosia chu nang â ahi; van ah thil um zosia leh lei ah thil um zosia hile nang â a hiu; aw Lalpa, leng gam zosia nang â a hiu ah, thil zosia chung ah sâng pen ah choisa’n la hi.

THUPUAN 17:14

Amau chun Belamno chu do intiu in; himaleh, Belamno chun amau chu zo in a; lalte Lal leh hotute Hotu ahi ngal a; tichun, a ko te leh a têl te leh ginumte chu a kiang ah chun um ta’n au, a tia.

KOLOSSA 1:15

Ama chu mu theilo Pathian mêlpu ahi’n, thilsiam zosia lak ah piang masa pen ahi.

THUPUAN 19:16

A puan chung leh a malpi chung in min a kizik a, “LALTE LAL LEH HOTUTE HOTU,” ti in.

ROMTE 1:23

Pathian thi theilo lopina chu, mihing thitheite lim gual po ah siam in, vacha lim po, gamsa keng pali nei lim po leh ganhing bokvâk haw lim gual po in a sângtha tau hi.

SAM 45:6

Aw Pathian, la lalchutpha chu kumtuang, kumtuang in a um hi. La lal tiang chule dangdâk diak, neilona lal tiang ahi hen;

THUPUAN 19:6

Mipi tam tak aw tawhbang, tui tampi git tawhbang, van nasa tak git tawhbang hial in: “Halleluijah, Lalpa Pathian Bangkim hi’thei chun vai a hawm tai.

1 JOHAN 4:12

Kuama’n Pathian a mu kha nai puai; I kihepitua chiat ua chun Pathian chu eimau ah um in, a hepina chu eimau ah a hung bukim ahi.

JOHAN 1:18

Kuama’n bangtik lai inle Pathian a mu kha puau hi; himaleh, a Chapa changkhat neisun, Pa lung tawh kituak chun a chanchin a genchian hi.

MATTHAI 6:13

Gilo ding ah thepna hun in ei puilût kin la, gilo lak in ei hukdok zaw’n: Gamte, thil hi’theinate, lopinate, kumtuang in nang â ahi, Amen,” ti in.

SAM 90:2

Tângte la siam masang leh, khawvel leh leilung la siam ma’nle, kumtuang ah kipat kumtuang tiang in, Pathian la hi.

SAM 10:16

Lalpa chu kumtuang, kumtuang â dingin lal ahi’n; a gam ah kipat namtin mangthai ta’n au.

THUPUAN 15:3

Pathian suak Mosi La leh Belamno La chu a sau a: “Bangkim Hi’thei Lalpa Pathian, la thilhite chu a mak in a lopi hi; nang kumtuang Lal, la lampite chu a fel in a dik hi.

THUPUAN 7:12

zia gual hin La a sau a: “Amen! Maljawlna, lopina, pilna, choihoina leh kipak thu genna, thilhitheina leh hâtna chu, I Pathian kiang un, kumtuang kumtuang in um zing ta hen! Amen,” a tiu a.

2 PETER 3:18

I Lalpa leh Hukdampa Jesu Khrista hepina leh hetna ah chun khanglian zaw tau in. Tu’ leh kumtuang tiang in ama kiang in lopina um ta hen. Amen.

1 PETER 5:11

Ama kiang in thilhitheina kumtuang in um ta hen. Amen.

HEBRAITE 11:27

Ginna’n lengpa lungnatna chu lau lo in, Aigupta chu a taisan ah, mutheilo Pathian chu a mu ziakin a thuak ham ham hi.

ROMTE 16:27

Pathian pil pakhat bep kiang ah chun, Jesu Khrista jal in lopina chu kumtuang in um ta hen! Amen.

ROMTE 11:36

Ama ah kipat leh ama ziak leh, ama â ding ah thil zosia hung um ahi ngal ah; ama kiang ah chun kumtuang lopina chu um ta hen, Amen.

ROMTE 2:7

Kuale thilpha hi ah, dawthei tak ah umte chun, lopina leh choisânnate, thitheilona leh kumtuang hinna chu chang in au.

ROMTE 1:20

Khawvel siamtil ah kipat ama kumtuang thilhitheina leh, a van hin dan, mit ah mu theilo chu, a thilsiamte ah kipat chun hiat thiam leh mu in a hung um tai; kuama’n suanlam a nei theilona ding un.

MATTHAI 28:20

la kiang ua thu ka piak zosia hi jawm dingin zilsak un. Kumkhua’n, khawveltawp tiang in la kiang un um zing ding ka hi ti hezing un,” a tia.

MATTHAI 25:34

Ziaphat chuleh, Lengpa chun, a changlam ah umte kiang ah chun, hung un, nang haw ka Pa maljawlna changte haw, khawvel siam lim ah kipat nang uh â ding ah siam gam chu lua tau in;

MALAKI 1:14

A gan hon lakah a chal tuai mâmpha piak ding ah kitiam zosa hi ta’ngal ah, Lalpa kiang ah demkâi hun lân, mi zuauthei chu hânsia law in um ta hen; keima hi Lal lopi tak ka hi’n ka min le namtin lak ah ja ah um ahi ngal ah, sepai honte Lalpa chun a ti ahi.

MIKAH 5:2

Himaleh, nang Ephrath ah Beth-lehem, Judah phungneute lak ah khat himale chinle, nangma ah kipat in Israelte vaihawm piak ding, mi pakhat hung pawt ding ahi ngal a; a hung kipatna chu nidang lai ah, khanglui hun ah kipat ahi.

DANIAL 7:14

A kiang ah vaihawmna, lopina leh lalna piak ahi’n; tichun, mi zosia, nam zosia leh, pau zosia’n a na a septheina ding un. A vaihawmna’n kumtuang a dai in, tawp ngai ngai pua’n a; a lalna le hisiat thei hipua’n a.

DANIAL 4:37

Tichun, keima Nebukadnezar in van ah Lalpa chu pâk ah, chawihoi in ja’na ka pia tai: “A thilbawlte chu a dik in, a lampite le vaihawmna dik ahi ngal a; chuleh, kisathei tak ah umte chu a hi’niam thei hi,” ka ti tai.

DANIAL 4:34

A hunte chu a bei phatin, keima, Nebukadnezar in van lam ka etto ah, ngaituana pangai ka hun nei kit phatin; Hat Chungnung chu ka pâkcha tai. Ama kumtuang ah hingzingpa chu pâk in ka chawihoi ta’n: A lalna’n kumtuang a dai in, a lenggam in khang zosia a dai hi;

JEREMIAH 10:10

Himaleh, Lalpa chu Pathian tak ahi, Ama chu Pathian hing leh kumtuang Lal ahi. A lungnat phat leh lei pumpi a kithing in, a lungnatna chu kuama’n a thuak zo ngai puau hi.

SAM 145:13

La lenggam chu kumtuang lenggam ahi’n, la thuneina chun suan zosia tiang dai in ah. Lalpa chu a thugen zosia’n a ginum in, a thilbawl zosia ah lainatna nei ahi.

SAM 106:48

Lalpa, Israel Pathian chu, kumtuang ah kipat kumtuang tiang in pâk in um ta hen. Mi zosia’n, “Amen,” ti tau hen. Lalpa chu pâk tau in!

NEHEMIAH 9:5

Ziaphatchun, Levite, Jeshua, Kadmiel, Bani, Hashabneiah, Sherebiah, Hodiah, Shebaniah leh Pethahiah te chun, “Ding unla, Lalpa I Pathian uh chu kumtuang ah kipat kumtuang in pakcha tau in. Lalpa, la min lopi tak chu, maljawlna leh pâkna zosia chung ah choisa’n in um ta hen,” a hun ti tau a.

DANIAL 2:44

Chuleh, zia gual ah lengte um sung ah chun, van Pathian in lenggam khat hun tungdok intin, zia chu kuama’n susia thei pua’n tiu in, zia lenggam chun kuama â ding khêk ta pua’n a. Zia lenggam chun lenggam dang zosia khen nawn dim dem in, subei zo ta’n a; ama chu vang kumtuang in umden ta’n a;

SAM 57:11

Aw Pathian, vante khêl lam pek ah, choisân in um ta’n! La lopina chun leilung zosia lua suak ta hen!

SAM 45:1

Ka thinlung hi pau mêlpha’na dimlêt hen; lengpa chu la’n ka chawi ta’n; ka lei hi lekhazik thiam tak kawlom gual ahi.

SAM 41:13

Lalpa, Israel Pathian chu, kumtuang ah kipat kumtuang tiang in, chawihoi in um ta hen. Amen, Amen.

JOHAN 5:44

Pathian bep ah pâkchâkna hawl ding ahi dan helo in, nangmau kipâkchâkna mai la hawl ua leh, bangti’n gingcha thei ding la hiu em?

ROMTE 2:10

ahi’n la, thilpha bawlte chung ah chun lopinate, choisânnate leh thamuannate Judate chung ah tung masa’n tin, ziazaw chuleh Jentelte chung inle tung in a.

HEBRAITE 2:7

Amau chu vansawlchâkte sâng ah nuainung zaw deu in la siam tadi in, lopina leh za umna la khuk sak in, a keng nuai ah bangkim la koi a,” ti in.