Ọbe ri Pọl si rhe Ihwo ri Rom 7:4 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

⁴ Eriyin ọ epha, imoni mẹ, rẹ oma rẹ ovwan rẹ awanre vi Kristi vwo ghwu vwẹ agbagba nure na, urhi kọ rhabọ nẹ ovwan, kọye ovwan vwo se vwo ogangan vwo nene, ovwan vẹ ọye ki se kuoma gbe vwo ru iruo kẹ Ọghẹnẹ.

Ọbe ri Pọl si rhe Ihwo ri Rom 7:4 Referans Kwoze

1 Pita 2:24

Omaobọ rọye ọ vwọ ghwa oghwa rẹ imwemwu rẹ avwanre vwẹ enu rẹ agbagba, rere avwanre vwo ghwu kẹ umwemwu re a mrasan rhọ kẹ ọvwata. Oma ra wanrọ na ọye e vwo sivwi ovwan.

Aizaya 54:5

Kidie Oma rọ ma wẹ ọye ọshare wẹn, Ọrovwohwo rẹ otuofovwi na ọye odẹ rọye; Ọfuanfon Ọvuọvo rẹ Izrẹl na ọye Ọtan wẹn Ọghẹnẹ rẹ akpọ ejobi ọye e se.

Ọbe ri Pọl si rhe Ihwo ri Rom 8:2

Kidie urhi rẹ Erhi rẹ arhọ vwi Kristi Jesu rhe rhan vwẹ nẹ obọ rẹ urhi rẹ umwemwu vẹ ughwu.

Ẹfesọs 2:15

Ọ da vwẹ ugboma rọye vwọ guọghọ irhi re jiri kugbe iji, rere asan rẹ ihwo ivẹ epha jovwo na ro vwo ruo phihọ ohwo ọkpokpọ ọvuọvo vwẹ evun rẹ oma rọye, kọye ufuoma sa vwọ dia,

Ọbe ri Pọl si rhe Ihwo ri Rom 7:6

Ẹkẹvuọvo asakiephana a rhan avwanre nẹ abọ rẹ urhi na, ri ghwu kẹ obo re gba avwanre phihọ ọviẹn, ọtiọye na ọ gbe dia otọ rẹ urhi rẹ awanre re siri na avwanre da ga-a ẹkẹvuọvo kẹ otọ rẹ arhọ ọkpokpọ re Erhi na.

Galesha 5:18

Ẹkẹvuọvo Erhi na de sun we yu wọ gbe hẹ otọ re urhi na-a.

Kolose 1:22

Vwẹ ugboma fiki rẹ ughwu rọye, rere ọ vwọ sa vwẹ ovwan phia kẹ fuanfon, ro jẹ upe vẹ abe evwo vwẹ obaro rọye.

Ọbe ri Pọl si rhe Ihwo ri Rom 6:22

Asakiephana re vwo si ovwan nẹ ọviẹn rẹ umwemwu nu na rẹ ovwan rha rhe vwọ dia ọviẹn rẹ Ọghẹnẹ na, osa rẹ ovwan kẹ orufuọn, oba rọye kẹ arhọ ri bẹdẹ.

Galesha 3:13

Kristi tan avwanre nẹ ekan rẹ urhi na nure, ekpuyovwi rọye da rhoma rhi hirhe phihọ ekan fiki re avwanre kidie e siro, Ekan kẹ ohwo kohwo ro churu ughwu vwẹ enu rẹ urhe.

Ọbe ri Pọl si rhe Ihwo ri Rom 6:14

Kidie umwemwu gbi che vwẹ ogangan vwẹ enu rẹ ovwan ọfa-a, kidie ovwan gbe hẹ otọ rẹ urhi-i ẹkẹvuọvo kẹ otọ rẹ ẹserọphẹ ovwan epha.

Kolose 2:14

Ro vwo phoro irhi re si kpahe ovwan uyovwi re vẹ oma rẹ avwanre shephihọ-ọ na, o de si ayen nẹ idjerhe rẹ avwanre, ọ da ra kanre ayen mu agbagba.

Kolose 1:10

Rere eyere rẹ ovwan vwo se fo kẹ Ọrovwohwo, re uruemu rẹ ovwan ejobi vwo se je rere ovwan vwo ru iruo esiri phia kugbe rere erianriẹn rẹ Ọghẹnẹ rẹ ovwan vwo bu.

Filipae 1:11

rere ovwan da rhe vọn vẹ emamọ rẹ ovwata rọ wan oma ri Jesu Kristi rhe, vwọ kẹ urinrin vẹ ejiro rẹ Ọghẹnẹ.

Ẹvwọphia 19:7

E jẹn avwanre ghọghọ re a kparọ kpenu ra vwẹ urinrin kẹ, kidie orọvwe rẹ Omogodẹ na tere, Ọpha rọye choma rọye nure;

Ọbe ri Pọl si rhe Ihwo ri Rom 6:2

Kaka vwo! Komavọ avwanre ri ghwu kẹ umwemwu obọvo nure na rhe vwo ru imwemwu ọfa?

Kolose 2:20

Ọ da dianẹ ovwan vi Jesu ghine ghwu nẹ erharhe eravwọ rẹ akpọ nana, die rha suọ, rẹ ovwan rhe vwo mu ọghọ kẹ irhi ifefe, kerẹsiẹ rẹ ovwan da rhoma hẹ akpọ na.

Kolose 1:6

Ota ro bru ovwan rhe na, obo rẹ ota na hrabọ ro akpọ na ejobi te, kirobo rọ je ghwa hrabọ te vwẹ uherevie rẹ ovwan na, nẹ ẹdẹ rẹsosuọ rẹ ovwan vwo nyo ota rẹ uyota rẹ ẹserọphẹ rẹ Ọghẹnẹ na.

Filipae 4:17

Ọ dianẹ ke me guọnọ ọko-o; ẹkẹvuọvo obo re me guọnọre kẹ iruo esiri rẹ ovwan.

Iyẹnrẹ Esiri ri Jọn 3:29

Ọ rọ yanvwe ọpha ọye hẹ ọshare rẹ ọpha; ugbeyan rẹ ọshare rẹ ọpha na, ro mudia kẹrẹ ro nyo ota rọye, oma ra vwerhọn vwẹ urhuru rẹ ọpha na ro nyo; vwẹ ọtiọye na aghọghọ mẹ na kẹ ọvọnvọn.

Matiu 26:26

Rẹ ayen vwọ ria emu na, Jesu da reyọ ikara, ọ da nẹ ẹrhovwo ọ de bro, ọ da vwọ kẹ idibo na, ọ da ta nẹ, Reyọ ona re, ọnana oma mẹ.

Ẹvwọphia 21:9

Etiyin ọvo vwẹ usun rẹ emakashe ighwrẹ na, ro vwo idjokpo ighwrẹ rọ vọnre vẹ etiekọ ighwrẹ re ka uko na, da ta ota kẹ vwẹ, nẹ, Yanrhe, me vwẹ Ọpha na nẹ wẹ, aye rẹ Omogodẹ na.

Hibru 10:10

Vwẹ oma rẹ ọhọre yena a wan ru avwanre fon fiki rẹ iye ri Jesu Krisri vwẹ ugboma rọye gọ ẹsiẹvo kẹ ihwo ejobi.

2 Kọrẹnt 11:2

Me hẹ evu rẹ omaẹriọ ro nẹ obenu rhe kpahe ovwan, kidie me sa ovwan vwọ hẹ otọ kẹ Kristi rere ovwan dia omamọ rẹ ọpha kẹ ọshare ọvuọvo na.

1 Kọrẹnt 10:16

Uko rẹ ebruba na rẹ avwanre nẹ ẹrhovwo phihọ na, ọ dia ọdakugbe vwẹ evun rẹ ọbara ri Kristi? Ikara rẹ avwanre bruru na, ọ dia ọrekugbe vwẹ evun rẹ oma ri Kristi?

Iyẹnrẹ Esiri ri Jọn 15:8

Vwẹ oma rẹ ọnana kọyẹ a vwọ vwẹ urinrin kẹ Ọsẹ mẹ rere ovwan vwọ mọ ibi buebu, ọtiọye kọye e vwo dje phia nẹ ovwan idibo mẹ.

Iyẹnrẹ Esiri ri Jọn 6:51

Mẹvwẹ hẹ Ikara ro je ghwo na ro nẹ obo odjuvwu rhe na; ohwo da re ikara nana nu, kọ rhọ bẹdẹ; ikara na re me cha kẹ fiki rẹ arhọ rẹ akpọ na ọye hẹ uvwo rẹ oma mẹ.

Aizaya 62:5

Kirobo rẹ emeghene jovwo ọmọtobẹ na, eriyin emọ wẹn cha rọvwọ owẹ, kirobo rẹ ọshare re ọpha ghọghọ gbe ọpha rọye na, eriyin Ọghẹnẹ wẹn ghọghọ vwẹ oma wẹ.

Iyẹnrẹ Esiri ri Mak 4:20

Ena e ra kọn phihọ otọ esiri na i ri nyo ota na, ayen da reyọ, ọ da mọ emamọ, ẹvo ọgban ẹvo ujorha, ẹvo ujori.

Ọbe ri Pọl si rhe Ihwo ri Rom 6:11

Ọtiọye na we gbe ji roro oma rẹ ovwan nẹ we ji ghwu kẹ umwemwu jovwo, ẹkẹvuọvo ovwan da rha rhọ fiki ri Kristi Jesu vwọ kẹ Ọghẹnẹ.

Ọbe ri Pọl si rhe Ihwo ri Rom 7:3

Ọke rẹ ọshare na da hẹ akpọ, aye na de bru ọshare ọfa ra ke se igberadja. Ẹkẹvuọvo ọshare na de rhe ghwu nure, owẹne aye na reyọ oshare ọfa dede e gbi rhe se igberadja-a, kidie yọ gbe hẹ otọ rẹ urhi rọye ọfa-a.