Matiu 8:12 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹² Ẹkẹvuọvo emọ rẹ uvie na dẹn ka cha djẹ ayen ro otafe, ra ro ebri ri hwin. Kẹ etiyin ayen da viẹ da re ako.

Matiu 8:12 Referans Kwoze

Matiu 25:30

We mu odibo ọbrahra na phihọ uwodi; kẹ etiyin o de beroma ọ da reako.

Iyẹnrẹ Esiri ri Luk 13:28

Kẹ etiyin wọ da viẹ wọ da reako wẹn, vwẹ ọke wọ da mrẹ Ebraham kugbe Aizik kugbe Jekọp kugbe emraro na ejobi vwẹ uvie rẹ Ọghẹnẹ ra da djẹ ekpuyovwi rẹ ovwan ro otafe.

Matiu 21:43

Eriyin na me ta kẹ ovwan nẹ, Ke che mie ovwan uvie rẹ Ọghẹnẹ na, ka vwọ kẹ ẹgborho ọfa, ro sa vwẹ emamo esiri phia vwẹ ọke rọye.

Matiu 13:50

Ka cha ghwẹ ayen phihọ erhanre rode; etiyin ayen da viẹ reako rayen.

Matiu 13:42

Ka ghwẹ ayen phihọ erhanre ri bẹdẹ; kẹ etiyin ayen da reako kugbe oviẹ.

Matiu 24:51

kọ nyavwọ ibribro, ke muo phihọ uwodi, kẹ etiyin o de beroma ọ da reako.

Ọbe ri Jud 1:13

omimi rẹ abadi rọ họnra, ro gbe iphughe puọpuọ kẹ omaẹvuọ rayen; isio ro beghe ra vwọ hẹrhẹ ebri hwi bẹdẹ.

2 Pita 2:17

Enana hẹ ito re kpọ yamu kugbe evwru rẹ ogiribo muẹ; kidie a rhanre okuku hwi na hẹrhẹ ayen.

2 Pita 2:4

Kidie ọ da dianẹ Ọghẹnẹ vwo ghwovwo emakashe ri ru umwemwu-u, ẹkẹvuọvo ọ da kpare ayen phihọ erhanre e de mu ayen phihọ ukpotọ rẹ obo etan rẹ ebri hwi bẹsiẹ rẹ ẹdẹ ẹdjọ vwo te;

Ọbe ri Pọl si rhe Ihwo ri Rom 9:4

Ayen hẹ ihwo rẹ Izrẹl, ayen e se emọ, ayen vwo urinrin, vẹ ọphọ, ayen a vwẹ urhi na kẹ, vẹ ẹga, kugbe ive na;

Iruo rẹ Iyinkọn na 3:25

Ovwan ke emọ rẹ emraro na vwẹ oma rẹ ọphọ na rẹ Ọghẹnẹ vẹ esẹ rẹ ovwan rere, rọ vwọ ta kẹ Ebraham nẹ, Uvwiẹ wẹn kọye cha nẹrhẹ Uvwiẹ rẹ akpọ na ejobi vwo ebruphihọ.

Matiu 13:38

Udju na vwenẹ kẹ akpọ na; emamọ esiri na kọye hẹ emọ rẹ uvie na; ẹgo na kẹ emọ rẹ idẹbono;

1 Samuẹl 2:9

Ọ sẹro rẹ awọ rẹ ihwo esiri, ẹkẹvuọvo ka nyavwe ihwo umwemwu kufia vwẹ ebri, kidie ọ dia ẹgba ohwo cha vwọ rhọ-ọ.

Une rẹ Ejiro 112:10

Ohwo umwemwu mrẹrẹ ivun dẹ miovwo; ọ riako rọye jọ wran yanran; ẹguọnọ rẹ ohwo umwemwu che vwo oba.

Aizaya 65:14

nighere, idibo Mẹ cha so ine fiki rẹ aghọghọ rọ hẹ udu rayen ẹkẹvuọvo wọ che kperi fiki rẹ ọdjadja rọ he udu wẹn, wo che beroma fiki rẹ ọdjarhe re erhi wẹn.

Ẹvwọphia 22:15

Otu rẹ eranko na, emraro rẹ ofian, evwofanrhiẹ, izighẹ, egọedjọ, kugbe otu re vwọrọn ofian, ki che mudia otafe.