Matiu 6:13 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹³ Wo suẹn avwanre ro ọdavwini-i, ẹkẹvuọvo si avwanre nẹ ukpokpogho.

Matiu 6:13 Referans Kwoze

1 Kọrẹnt 10:13

O vwo ọdavwini ọvuọvo ro te we oma ro jẹ ohwo ọfa oma ete-e. Ọghẹnẹ ohwo rẹ uyota, ọ sa rhọvwe nẹ a davwẹ owẹ ni vrẹn obo rẹ udu wẹn gbare-e, ẹkẹvuọvo vwẹ evun rẹ odavwini na ọ je gbẹn idjerhe wọ vwọ djẹ vabọ, rere wo vwo se chiro.

Iyẹnrẹ Esiri ri Jọn 17:15

Me rẹ re nẹ wo si ayen nẹ evun rẹ akpọ na-a, ẹkẹvuọvo rere wọ vwọ sẹro rẹ ayen nẹ obọ rẹ ohwo umwemwu na.

Matiu 26:41

Rhẹrẹ wa rẹ, rere we jẹ odavwini ẹruọ; erhi na rhọvwere, ẹkẹvuọvo ugboma vwiẹrẹ.

Ẹvwọphia 19:1

Rẹ ọnana vwọ wan nu mi de nyo edo rọ họhọ urhuru rode rẹ urogho rode vwẹ obo odjuvwu, ro kuvwie, Hi Iye! Esivwo kugbe urinrin kugbe ogangan e rẹ Ọghẹnẹ rẹ avwanre,

2 Tẹsalonaika 3:3

Ẹkẹvuọvo Ọrovwohwo vwo esegbuyota; kọ kẹ ovwan ogangan ọ me rha sẹro rẹ ovwan nẹ obọ rẹ emu umwemwu.

Matiu 6:10

Jẹn uvie wẹn rhe, ru ẹguọnọ wẹn vwẹ akpọ na kirobo re ruẹ vwẹ obo odjuvwu.

Jerimaya 15:21

Mi sivwi uwe nẹ obọ rẹ oriumwemwu na, mi ji sivwi uwe nẹ ugodo rẹ ihwo ogbarogba na.

2 Pita 2:9

kẹ ọtiọye Ọrovwohwo je riẹn obo ro sivwi ihwo efuanfon rọye nẹ ọdavwini, ọ me rha sẹrọ rẹ ohwo umwemwu hẹrhe ehwe bẹsiẹ rẹ ẹdẹ rẹ ẹdjọeguo na vwo te.

1 Tẹsalonaika 1:10

rere a hẹrhẹ Ọmọ rọye ro che nẹ odjuvwu rhe, rọ kpare nẹ ughwu rhe, Jesu ro sivwi avwanre nẹ ophu rọ cha.

Une rẹ Ejiro 47:7

Kidie Ọghẹnẹ hẹ ovie rẹ akpọ na ejobi; So ejiro vẹ une!

1 Ikun rẹ Ivie 29:11

Wẹ, E Ọrovwohwo, vwo ọrho, kugbe ogangan, vẹ urinrin vẹ ephiokparobọ vẹ ẹgba; fikiridie emu rẹ obo odjuvwu vẹ akpọ ejobi ewẹn; Ọwẹn ọye uvie na E Ọrovwohwo, wẹ a kpare kpenu vwẹ enu ri kemu kemu ejobi.

Ẹvwọphia 21:4

ko ririe ameoviẹ nẹ ẹro rayen, ughwu gbe cha dia ọfa-a, eyẹ omaemuohọ eyẹ oviẹ eyẹ odjadja ọfa-a, kidie emu rẹ awanre na wanvrẹn nure.

Une rẹ Ejiro 10:16

Ọrovwohwo ovie rhiri bẹdẹ bẹdẹ; ẹgborho na cha ghwọrọ nẹ otọ rọye.

Ẹvwọphia 3:10

Fikiridie wọ yọnrọn ota mẹ vwe erhiori vẹ akoechiro na, ke me yọnrọn owẹ vwẹ ọke rẹ odavwini rọ cha akpọ na ejobi na, rọ cha davwe ihwo ejobi re dia akpọ na ni.

1 Jọn 3:8

Ohwo ro ru umwemwu hẹ ọmọ rẹ idẹbono; kidie idẹhono hẹ oruimwemwu notọrhe. Fiki rẹ Ọnana ọye Ọmọ rẹ Ọghẹnẹ vwọ rhe rere ọ vwọ mrasan guọghọ iruo rẹ idẹhono.

1 Pita 5:8

Jẹn ẹro hiẹ wẹ, rhẹrẹ. Ukọn wẹn idẹbono na ọ rọ rhẹrẹ kerẹ okpohrokpo rọ guan, ro guọnọ obo rọ rọ.

Une rẹ Ejiro 41:13

Ebruba kẹ Ọrovwohwo, Ọghẹnẹ re Izrẹl, nẹ bẹdẹ bẹdẹ re te bẹdẹ bẹdẹ! Isẹ kugbe Isẹ.

1 Ikun rẹ Ivie 16:36

Ebruphihọ kẹ Ọrovwohwo na, Ọghẹnẹ rẹ Izrẹl nẹ bẹdẹ bẹdẹ re te rhiri bẹdẹ. Etiyin ihwo na ejobi da ta, Isẹ!, ayen de jiri Ọrovwohwo.

1 Ikun rẹ Ivie 4:10

Jabẹz de se Ọghẹnẹ rẹ Izrẹl, ọ da ta, Manẹ kẹ wo bruphihọ kẹ vwẹ rere wo ji ru otọ mẹ rho, re wo nene uvwe dia re wọ sẹro mẹ nẹ ukpokpogho rere o ju vwe oma ẹwan! Ọghẹnẹ de ru obo rọ nọre kẹ.

Urhi Rivẹ 8:16

ọ rọ vwẹ mana ghẹrẹ owẹ vwẹ evun rẹ aghwa na, mana rẹ esẹ wẹn riẹnre-e; ro vwo ru we vwẹ oma kpotọ, rọ vwọ davwẹ owẹ ni, ro vwo ru we yovwi vwẹ oba rẹ akpọ wẹn;

Ẹyano 15:18

Ọrovwohwo re uvie bẹdẹ bẹdẹ.

Jẹnẹsis 22:1

Rẹ imu nana ejobi vwọ wan nu Ọghẹnẹ da davwe Ebraham ni, ọ da ta kẹ, Ebraham; O de nyo nẹ, Mẹvwẹ na.

Galesha 1:4

ohwo rọ reyọ oma rọye vwo ru ẹse kẹ avwanre rere ovwo se sivwi avwanre nẹ umwemwu rẹ akpọ nana vwẹ ọtiobo ro de fo kẹ ẹserọphẹ rẹ Ọghẹnẹ rẹ ọsẹ rẹ avwanre.

2 Kọrẹnt 1:20

Kidie ive rẹ Ọghẹnẹ ejobi vwẹ evun rọye E na ọvo re herọ. Kọye avwanre vwọ wan oma rọye ku Isẹ, vwọ ke urinrin rẹ Ọghẹnẹ.

Une rẹ Ejiro 47:2

Kidie Ọrovwohwo ọ ro me kpenu, o mu oshọ, ovie rode vwẹ enu rẹ akpọ na ejobi.

Ukeri 5:22

gbe jẹn ame nana rọ ghwẹ ekan cha na su ame vọn we evun rọ nẹrhẹ oma wẹn vwọ rere ekpoghowọ wẹn kpare nẹ uwe oma. Aye na kọ ta, Isẹ, Isẹ.

Ẹvwọphia 2:10

Wọ djẹ oshọ rẹ oja ru wọ cha re na-a. Nighe, idẹbono cha kpare ẹvo vwẹ usun rẹ ovwan na phihọ uwodi, rere a davwe ovwan ni, kẹ ovwan reoja ẹdẹ ihwe soso. Ovwan vwo esegbuyota re te ughwu, ke me vwẹ erhu rẹ arhọ na kẹ ovwan.

Ẹvwọphia 1:18

rọ rhọre bẹdẹ na; mi ghwuru jovwo, gbe nighe me rhọre bẹdẹ, ko mẹvwẹ ri vwo usiaphrẹ rẹ Ughwu vẹ Ushi vwẹ obọ mẹ.

Matiu 5:37

Ẹkẹvuọvo jẹ Ẹjo wẹn dia Ẹjo, ji E wẹn dia E; ọ da vrẹn enẹ kẹ efian.

Daniẹl 4:25

nẹ, a cha djẹ we nẹ ohri rẹ ihwo, wọ vẹ eranvwe rẹ aghwa kọye gba cha dia, ke che ru we vwọ re odi kerẹ erhuẹn, oma wẹ kọ kpọrhọ vẹ irho ro nẹ obo odjuvwu cha, ẹgbukpe ighwrẹ kọ wan wẹn vrẹn bẹsiẹ wọvwọ riẹn nẹ ọ rọ Me Kpenu ejobi ri suẹn uvie rẹ ihwo, nẹ ọ vwọ kẹ ohwo ro jere.

Isẹ 30:8

Kpọ ofian evwọnrọ vẹ ọphiẹnvwẹ chọ vwẹ ra shesheri, Wọ kẹvwẹ ogbere eyẹ efe-e, vwẹ emu ro fori ghẹrẹ ovwẹ.

Urhi Rivẹ 8:2

Wọ Me karohọ idjerhe ejobi rẹ Ọrovwohwo Ọghẹnẹ wẹn de sun we vwẹ ẹgbukpe ujuvẹ vwẹ evun rẹ aton na, ro vwo ru we vwẹ oma kpotọ, vwọ davwẹ owẹ ni, rọ vwọ riẹn emu rọ herọ vwẹ udu wẹn, se wọ rhọvwe yọnrọn irhi rọye eyẹ ẹjo.

1 Kọrẹnt 14:16

Ọ rha dia ọtiọye-e, ọ da dianẹ wọ vwẹ erhi nẹ ẹrhovwo, komavọ ogbori se vwo ku isẹ phihọ ẹkpẹvwẹ wẹn yọ riẹn obo ru wọ ta-a?

Matiu 28:20

Wẹ yono ayen vwọ riẹn otọ rẹ imu na ejobi re dje kẹ ovwan na. Nighe, me vẹ ovwan herọ vwẹ ọke ejobi, rhiri rhi te oba rẹ akpọ na.

Daniẹl 7:18

Ẹkẹvuọvo ihwo efuanfon rẹ ọ ro Me Kpenu ejobi keye cha reyọ uvie na, kẹ ayen yọnre uvie na rhiri bẹdẹ.

Une rẹ Ejiro 106:48

Ebruphihọ kẹ Ọrovwohwo na, Ọghẹnẹ rẹ Izrẹl na, nẹ rhiri bẹdẹ re te rhiri bẹdẹ! E gbe jẹn ihwo ejobi ta, Isẹ! Jiri Ọrovwohwo na!

Une rẹ Ejiro 89:52

Ebruphihọ kẹ Ọrovwohwo rhiri bẹdẹ! Isẹ kugbe Isẹ.

Une rẹ Ejiro 72:19

Ebruphihọ kẹ odẹ rẹ uririn rọye bẹdẹ, e jẹn urinrin rọye vọn akpọ na ejobi, Isẹ, Isẹ.

1 Ivie 1:36

Bẹnaya ọmọ ri Jehoyada da kpahe kẹ ovie, Isẹ, Ẹ jẹn Ọrovwohwo, Ọghẹnẹ rẹ ọrovwovwe ovie, ta ọtiọye.

Ẹvwọphia 19:4

Ekpako uje gbẹ ẹne na kugbe eranvwe ekpokpọ ẹne na de she diguẹ ayen da gọ Ọghẹnẹ ro tidia vwẹ enu rẹ ekete na, tanẹ, Isẹ. Hi Iye.

Ẹvwọphia 5:13

Mi de nyo eranvwe keranvwe vwẹ evun rẹ odjuvwu kugbe akpọ na kugbe evun rẹ otọ rẹ akpọ na kugbe abadi na, kugbe obo re hẹ evun rẹ ayen ejobi, tanẹ, Ebruba kugbe ọghọ kugbe urinrin kugbe ẹgba kẹ ohwo ro tidia vwẹ enu rẹ ekete na kugbe Omogodẹ na bẹdẹ bẹdẹ!

Ẹvwọphia 3:14

Kẹ enẹ o si rhe amakashe rẹ ishọshi ri Laodisha: Eta rẹ ohwo re se Isẹ, ro segbuyota kugbe oseri rẹ uyota, ẹtuọhọ rẹ emama rẹ Ọghẹnẹ.

Hibru 11:36

A vwẹ evo jehwẹ a vwẹ ugbudia fa evo, a vwẹ igoni kanre evọ e mu evo phihọ uwodi.

1 Timoti 1:17

Asakiephana vwọ kẹ ovie ri bẹdẹ, ro jeghwo, re jẹmrẹ, Ọghẹnẹ ọvuọvo kpoi, ọye a vwẹ ọghọ vẹ urinrin kẹ rhiri bẹdẹ. Isẹ.

Jerimaya 28:6

Jerimaya rẹ ọmraro na da ta, Isẹ! E jẹn Ọrovwohwo ru ọtiọye; e jẹn Ọrovwohwo ru eta ro wọ tare na re dia uyota, re ekuakua ra ghwa nẹ uwevwi rẹ Ọrovwohwo, kpo Babilọn na, vẹ ighivwu na, a rhoma reyọ ayen rhe etinẹ.

Une rẹ Ejiro 22:28

Kidie uvie na ọ rẹ Ọrovwohwo, ọye osun rẹ ẹgborho na ejobi.