Matiu 19:21 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

²¹ Jesu da ta kẹ nẹ, Wọ da guọnọ nẹ wọ fon, gba ra she obo ri wo vwori ejobi, re wọ vwẹ ayen kẹ ivwiogbere, ku wo vwo efe vwẹ obo odjuvwu, gba yanrhe ri wo nene uvwe.

Matiu 19:21 Referans Kwoze

Iyẹnrẹ Esiri ri Mak 10:21

Ri Jesu vwo no ọ de je, ọ da ta kẹ Emu ọvo kanre owẹ; kpo, ra shẹ emu kemu ri wo vwori, re wọ vwo ayen kẹ igbere ku wo che vwo efe vwẹ obo odjuvwu; wọ rhe rhi nene uvwe.

Iyẹnrẹ Esiri ri Luk 18:22

Ọke ri Jesu vwo nyo, ọ da ta kẹ, Emu ọvo je kanre owẹ. Shẹ obo wo vwori ejobi re wọ ghare ayen kẹ ivwiogbere, ku wo vwo efe vwẹ obo odjuvwu; re wọ rhe, ri nene uvwe.

Iyẹnrẹ Esiri ri Luk 12:33

Shẹ eyere wẹn, ru ẹse, kọn phihọ ekpo ro jẹ bẹrẹ, efe rẹ odjuvwu ro je re, asan rẹ oji se te-e rẹ eghwọghwọ da ria-a.

Iyẹnrẹ Esiri ri Luk 14:33

Vwẹ ọtiọye na, kohwo kohwo rọ rha sen emu kemu ro vwori-i ọ sa dia odibo mẹ-ẹ.

Iruo rẹ Iyinkọn na 2:45

Ayen da shẹ etọ vẹ ekuakua rẹ ayen ejobi, ayen da ghare ayen kẹ ihwo na ejobi, kirobo rẹ ohwo ọvuọvo guọnọre.

Iyẹnrẹ Esiri ri Jọn 12:26

Ohwo da ga vwẹ, ko nene uvwe; asan re me epha, kẹ etiyin idibo mẹ je dia rhe; ohwo da ga vwẹ, Ọsẹ na kọ vwẹ ọghọ kẹ.

Iyẹnrẹ Esiri ri Luk 9:23

Ọ da ta kẹ ayen ejobi, Ohwo da tanẹ ọye nene uvwe, e jẹn ọ sen oma rọye ro mu agbagba rọye kẹdẹ kẹdẹ ro nene uvwe.

Iyẹnrẹ Esiri ri Jọn 10:27

Igodẹ mẹ nyo urhuru mẹ, me riẹn ayen, ayen nene uvwe;

Matiu 5:48

Ọtiọye na ovwan gba fon kirobo rẹ Ọsẹ rẹ ovwan rọ hẹ obo odjuvwu fonro na.

Iyẹnrẹ Esiri ri Luk 16:9

Me ta kẹ ovwan, we mu ugbeyan rẹ ẹro hrehre rẹ efe rẹ okpakpa na, rere o de ku we rhire ayen mrasan reyọ owẹ kpo ighẹn ri bẹdẹ.

Matiu 19:28

Jesu da ta kẹ nẹ, Uyota me ta kẹ wẹ, Ovwan ri nene uvwe na, ọke rẹ Ọmọ rẹ ohwo de che tidia vwẹ enu rẹ ekete rẹ urinrin rọye, ovwan ki ji che tidia enu rẹ ekete ihwivẹ na de guẹdjo rẹ Izrẹl.

Matiu 16:24

Jesu da ta kẹ idibo rọye nẹ, ohwo da guọnọ nẹ ọye nene uvwe, e jọ siẹn oma rọye re o mu agbagba rọye re o nene uvwe.

Iyẹnrẹ Esiri ri Luk 6:40

Ọ re yono sa rhonọ oyono rọye-e, ẹkẹvuọvo ọ re yono ra nabọ yono kọ họhọ oyono rọye.

Iyẹnrẹ Esiri ri Luk 5:27

Rẹ enana ejobi vwọ wan nu, ọ da ro otafe, ọ da mrẹ omiarhọghọ, re se Livae, ro tidia ọguan re de mie arhọghọ, ọ da ta kẹ Nene uvwe.

Iyẹnrẹ Esiri ri Mak 8:34

O de se otu na kugbe idibo rọye bro rhe, ọ da ta kẹ ayen, Ohwo kohwo da guọnọ ovwẹ nene, e gbe jọ sen omobọ rọye ro mu agbagba rọye ro nene uvwe.

Matiu 9:9

Ri Jesu vwọ yan nẹ etiyin, ọ da mrẹ ọshare ọvo re se Matiu, ro tidia vwẹ ọguan re de toro arhọghọ. Ọ da ta kẹ nẹ, Nene uvwe. O de vrẹn, o de nene.

Hibru 10:34

Kidie ovwan re ehrọre re otu re mu phihọ uwodi, re vwo gborho ekuakua wẹn oma da vwerhe owẹ, kidie okpuyovwi wẹn riẹnre nẹ wo vwo ekuakua ri yoma nọ eyena re je tọn nọ.

Iyẹnrẹ Esiri ri Mak 2:14

Rọ vwọ wan vrẹn ọ da mrẹ Livae rẹ ọmọ rẹ Aifiọs ro tidia vwẹ asan re de toro arhọghọ, ọ da ta kẹ, Nene uvwe. O vrẹnre o de nene.

Matiu 8:22

Ẹkẹvuọvo Jesu da ta kẹ nẹ, nene uvwe; jẹ ihwo ri vwo orivwi re shi orivwi rayen.

Matiu 4:19

Ọ da ta kẹ ayen nẹ, We nene uvwe, ki nu ru ovwan vwọ dia ihwiyeri rẹ ihwo.

Une rẹ Ejiro 37:37

Ka oka phihọ ohwo ro je abe ẹriọ na, re wo ni ohwo rọ dia ọsoso, kidie oba rẹ ohwo yena ufuoma.

ỌBE RẸ JOB 1:1

Ohwo ọvo herọ vwẹ otọ rẹ Uz, odẹ rọye Job; ohwo na vwẹ eka-an jẹ ohwo ọsoso oruẹ, ohwo rọ djẹ oshọ rẹ Ọghẹnẹ, o de sioma nẹ umiovwo.

Jẹnẹsis 17:1

Ọke rẹ Ebram vwọ ikpe ọvo nuro vwẹ ujori re Ọrovwohwo da vwẹ oma phia kẹ Ebram, ọ da ta kẹ, Mẹvwẹ Ọghẹnẹ ro vwo Ẹgba, yan nene uvwe, wo gbe ẹgua-a.

Jẹnẹsis 6:9

Enana ke ye orua ri Noa. Noa kẹ ọvwata oruẹ, o vwo eka vwẹ orua rọye na-a; Noa da yan kpahọ Ọghẹnẹ.

Matiu 19:20

Emeghene na da ta kẹ nẹ, Me yọnrọn irhi na ejobi. Kọ rhọ ji chekọ?

Matiu 19:22

Ẹkẹvuọvo ọke rẹ emeghene na vwo nyo, o de mu opharo phihọ: kidie o vwo efe buebu.