Matiu 13:11 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹¹ Ọ da kpahe kẹ ayen nẹ, Ovwan a tare nẹ e riẹn odjahọ rẹ uvie rẹ odjuvwu, ẹkẹvuọvo ihwo efa itẹ kọye a vwọ ta kẹ ayen.

Matiu 13:11 Referans Kwoze

1 Kọrẹnt 2:14

Ohwo ro vwo erhi na-a se vwo ẹse rẹ Erhi rẹ Ọghẹnẹ na-a, kidie ugheghẹ ọ dia kẹ, o se vwo ẹruọ rọye-e fikiridie erhi e vwo dje ayen.

Matiu 19:11

Ẹkẹvuọvo ọ da ta kẹ ayen nẹ, Ihwo ejobi sa reyọ ota nana-a, jokpa nẹ otu re djere kẹ.

Jems 1:5

Ẹkẹvuọvo ohwo ro rhe vwo aghwanre vwẹ usun rẹ ovwa-an, e jọ nọ vwẹ obọ rẹ Ọghẹnẹ, ọye ri se siobọ nẹ kemu kemu kẹ ohwo, ọ ghwọ kuẹ ohwo-o; kọ vwọ kẹ.

1 Jọn 2:27

ẹkẹvuọvo evwoghworo na rẹ ovwan reyọ mie na ọ vẹ ovwan herọ, o rhe fo rere ohwo rhe yono ovwa-an; kirobo rẹ evwoghworo rọye yono ovwan emu kemu na, ọye na hẹ uyota, ọ dia efia-an, ọtiobo ro yono ovwan na, ovwan dia evun rọye ọtiọye.

1 Jọn 2:20

Ẹkẹvuọvo Ọfuanfon Ọvuọvo na vwẹ evwri ghworo ovwan nure, yẹ ovwan ejobi riẹnrẹ.

Matiu 16:17

Jesu da kpahe ta kẹ nẹ, Ebruba kẹ wẹ Saimọn omo ri Jona; kidie ugboma eyẹ ọbara djere kẹ wẹ-ẹ, jokpa rẹ ọsẹ mẹ rọ hẹ obo odjuvwu.

Ẹfesọs 1:9

Kidie ọ nẹrhẹ avwanre riẹn vwẹ evun rẹ aghwanre ejobi kugbe emramrẹ rẹ igbunu rẹ ọhọre rọye, kirobo rẹ ejiroro rọ jẹ kpahe Kristi epha.

Aizaya 35:8

Idjerhe rode kọ cha dia etiyin, ke che se nẹ Idjerhe Ọfuanfon, emu ogbegbe cha sa wanvrẹ-ẹn, ẹkpa gbi che se ghwru vwọ-ọ.

Ẹfesọs 5:32

Ọnana igbunu rode, ki mi vwiro dje Kristi kugbe ishọshi na.

Ọbe ri Pọl si rhe Ihwo ri Rom 16:25

Asakiephana vwọ kẹ ohwo ro se ru ovwan gan kirobo re iyenrẹ esiri mẹ epha kugbe eghwoghwo ri Jesu Kristi, kirobo rẹ ẹvwọphia rẹ igbunu rọye teri re sinu rhabae rhe

Iyẹnrẹ Esiri ri Luk 8:10

ọ da ta, ''Ovwan a vwe rọ kẹ ne riẹn odjahọ rẹ uvie rẹ Ọghẹnẹ na; ẹkẹvuọvo ihwo efa itẹ kọyen e vwo kpe ke ayen, rere dede nẹ ayen mrẹ-ẹ, enyo ayen nyo jọ sa ro aye-en.

1 Kọrẹnt 15:51

Nighe igbunu me ta kẹ ovwan na. Avwanre ejobi cha vwerhẹ-ẹ, ẹkẹvuọvo e che wene avwanre ejobi,

1 Kọrẹnt 2:7

Ẹkẹvuọvo avwanre yono obo re sinu, aghwanre rẹ Ọghẹnẹ rọ djahere, rẹ Ọghẹnẹ ji iji kpahe rhabae vwọ kẹ urinrin rẹ avwanre.

Iyẹnrẹ Esiri ri Jọn 6:65

Ọ da ta, Ọnana re sorọ re me vwọ ta kẹ ovwan nẹ ohwo ọvuọvo se bru uvwe rhe-e jokpa nẹ Ọsẹ na rhọvwe phihọ.

1 Timoti 3:9

ayen me yọnre igbunu rẹ esegbuyota gan vẹ evun ọfuanfon.

1 Kọrẹnt 13:2

Mi de vwo ogangan rẹ aroẹmrẹ, mi de vwo ẹruọ rẹ igbunu ejobi kugbe erianriẹn ejobi, ọ da dianẹ mi vwo esegbuyota, ro se ghwie ugbenu, ẹkẹvuọvo yi mi vwo ẹguọnọ-ọ, yo mẹvwẹ ohwo diodi.

Iyẹnrẹ Esiri ri Mak 4:11

Ọ da ta kẹ ayen, ovwan a vwẹ rọ kẹ rere e vwọ riẹn imu re djahere vwẹ uvie rẹ Ọghẹnẹ na; ẹkẹvuọvo otu re hẹ obo otafe itẹ kọye e vwo kpe kẹ ayen,

Kolose 2:2

rere e vwo se bru ẹnwẹn rayen uche rere ayen vwọ gba oma rẹ ayen koko vwẹ evun rẹ ẹguọnọ kugbe erianriẹn rẹ ota rọye, rere ayen vwo vughe igbunu rẹ Ọghẹnẹ vwẹ oma ri Kristi.

Ẹfesọs 6:19

Ovwan je rẹ kẹ vwẹ rhe, rere mi vwo vwo aroeyivwo vwo rhie unu mẹ vwo ghwoghwo igbunu rẹ iyẹnrẹ esiri na.

1 Kọrẹnt 4:7

Kidie ono re mrẹ ofẹnẹ vwẹ oma rẹ ovwan? Die wo vwori ro jẹ uwe obọ e te? Wo de rhe vwo nu, die wọ rha vwọ yan eyan kerẹsiẹ ra mrẹ nẹ ọphẹ wọ mrẹ rẹ-ẹ?

1 Kọrẹnt 4:1

E nẹ ohwo kohwo se roro avwanre phihọ, kerẹ idibo ri Kristi kugbe imuidi rẹ igbunu rẹ Ọghẹnẹ.

Iyẹnrẹ Esiri ri Jọn 7:17

ọ da dianẹ ohwo vwo ọhọre ro vwo ru ọhọre rọye gba, ko cha riẹn sẹ uyono na obọ rẹ Ọghẹnẹ o nurhe eyẹ se ogangan robọ mẹ me vwọ ta ota na.

Une rẹ Ejiro 25:14

Ugbeyan re Ọrovwohwo eye ihwo re djẹ oshọ rọye, kọ cha vwẹ ọphọ rọye phia kẹ ayen.

1 Timoti 3:16

Ẹtẹkuẹte, oye hẹ ẹrhọvwọ, rẹ igbunu rẹ egagọ rẹ avwanre na; Ọ rọ phiare vwẹ ughoma, ẹ Erhi Ọfuanfon brorhiẹ kẹ, rẹ emakashe mrẹre, re ghwoghwori vwẹ ohri rẹ ẹgborho na, re segbuyota vwẹ akpọ na, re mu kpenu vwẹ urinrin.

Ẹfesọs 1:18

Ọke rẹ ẹro rẹ udu rẹ ovwan de rhie nu, ovwan vwọ sa riẹn obo rẹ iphiẹrohọ rẹ use re se ovwan phihọ na epha, obo rẹ urinrin rẹ ukuẹriọ bute kẹ ihwo efuanfon na.

Aizaya 29:10

Kidie Ọrovwohwo ku erhi rẹ okpovwerhẹ ku we, o ki rhe rhurhu ẹro rẹ ovwan rẹ emraro na, o rhurhu iyovwi rẹ ovwan rẹ ọmrẹ na.

Iruo rẹ Iyinkọn na 16:14

Aye ọvo re se Lidia de nyo ota rẹ avwanre, ohwo rẹ orere ri Taitira, ifenudu ọ shẹ, ọgọ Ọghẹnẹ o ruẹ. Ọrovwohwo de rhie udu rọye phihọ kẹ eta ri Pọl ta kẹ.

Aizaya 29:11

Eta ra arọẹmrẹ nana ejobi rhi hirhe phihọ ota rẹ obe ra tangbe. Ọke ra da vwọ kẹ ọvo no gbe se re, ne, Se ọnana, ọ da ta, Mi se se-e, kidie a tanrọ gbe.

Matiu 13:10

Idibo rọye de bro rhe, ayen da ta kẹ nẹ, Die nẹrhẹ owẹ kpe itẹ kẹ ayen?

Matiu 20:23

Ọ da ta kẹ ayen nẹ, Uyota ovwan sa da uko na, ẹkẹvuọvo re vwo tidia vwẹ obọrhe mẹ eyẹ obohwẹre mẹ, Ọ dia omẹvwẹ ri se ruo-o, ẹkẹvuọvo ọ herọ kẹ ihwo rẹ ọsẹ mẹ rhuẹrẹ phihọ otọ kẹ.

Iyẹnrẹ Esiri ri Mak 10:40

ẹkẹvuọvo re vwo tidia obọrhe mẹ eyẹ obọhwẹre mẹ ọ dia omẹvwẹ rẹ vwọ kẹ-ẹ; ẹkẹvuọvo ọ rẹ otu ra rhuẹrẹ phihọ otọ kẹ.

Ọbe ri Pọl si rhe Ihwo ri Rom 11:25

Wọ da rha ghwanre kẹ omobọ wẹn ọvo, imoni mẹ, me guọnọre nẹ ovwan riẹn igbunu nana, udu ogangan bru abọvo rẹ ihwo rẹ Izrẹl rhe, bẹsiẹ rẹ unu rẹ ihwo ri Keferi vwọ gba,