Kolose 3:16 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹⁶ We gbe jẹn ota ri Kristi dia evun rẹ ovwan, rọ kẹ ovwan aghwanre buebu, rere ovwan yono ohwohwo, rere ovwan bru ohwohwo uche, vwẹ akpata, vẹ une rẹ ejiro kugbe ine rẹ erhi, rere wa vwẹ udu rẹ ovwan so ine vwevwerhe kẹ Ọghẹnẹ.

Kolose 3:16 Referans Kwoze

Une rẹ Ejiro 119:11

Mi phi ota wẹn phihọ udu mẹ rere mi vwo ji umwemwu eruo kpahe owẹ.

Ẹfesọs 5:19

Ovwan ta ota kẹ ohwohwo vwẹ une rẹ ejiro kugbe une kugbe une rẹ erhi, vwẹ udu wẹn ejobi so une vwevwerhe kẹ Ọrovwohwo.

Iyẹnrẹ Esiri ri Jọn 15:7

Ovwan da herọ vwẹ evun mẹ, rẹ eta mẹ da dia evun rẹ ovwan, gba nọ kemu kemu rẹ ovwan guọnọre, ke ruo kẹ ovwan.

Ọbe ri Pọl si rhe Ihwo ri Rom 10:17

Ọtiọye na esegbuyota kẹ ẹme-enyo o nẹ cha, ẹme-enyo ke rha vwẹ iyẹnrẹ esiri ri Kristi re ghwoghwori na o nẹ cha.

1 Jọn 2:24

E gbe jẹn obo rẹ ovwan nyori notọrhe na dia evun rẹ ovwan. Ọ da dianẹ obo rẹ ovwan nyori notọrhe na da dia evun rẹ ovwan, ovwan ke dia evun rẹ Ọmọ na kugbe evun rẹ Ọsẹ na.

Jerimaya 15:16

A mrẹ eta wẹn, me da riẹn ayen, eta wẹn da dia aghọghọ kẹ vwẹ kugbe omavwerhovwẹ kẹ ubiudu mẹ; kidie a vwẹ odẹ wẹn se vwe nure, E Ọrovwohwo, Ọghẹnẹ rẹ ofovwi.

Ẹfesọs 1:17

rere Ọghẹnẹ rẹ Ọrovwavwanre Jesu Kristi, Ọsẹ rẹ urinrin na, sa kẹ ovwan erhi rẹ aghwanre kugbe ẹvwọphia vwẹ evun rẹ erianriẹn rọye,

ỌBE RẸ JOB 23:12

Mi ji siobọ nẹ urhi ro nẹ unu rọye rhe-e, me sẹro rẹ eta rẹ unu rọye vwẹ evun mẹ

Jems 3:17

Ẹkẹvuọvo aghwanre ro nẹ obenu rhe kọ dia yoyovwi tavwe, o ke rha vọn vẹ ufuoma, dẹndẹn, ọ fobọ kuomagbe, ọ vọnre vẹ arodọvwẹ kugbe uruemu esiri, o vwo ofẹnẹ-ẹ ọ phiẹn oma rọye-e.

2 Jon 1:2

fiki rẹ uyota rọ herọ vwẹ evun rẹ avwanre ko ji nene avwanre dia bẹdẹ:

2 Timoti 3:15

nẹ ọke emọ wẹn rhe ọye wọ vwọ riẹn ọhe ọfuanfon na rọ sa kẹ aghwanre vẹ esivwo fiki rẹ esegbuyota kpahe Kristi Jesu.

Kolose 1:9

Vwẹ ọtiọye na, rhanwẹ ọke rẹ avwanre vwo nyo ikun nana unu rẹ avwanre rha ka vẹ ẹrhovwo ra nẹ kẹ ovwa-an, rere evun rẹ ovwan sa vwọ vọn vẹ erianriẹn rọye, vẹ iroro rẹ erhi na kugbe rere ovwan vwo vwo ẹruọ rẹ ota rọye.

Ẹvwọphia 5:9

ayen da so une ọkpokpọ, tanẹ, Wọwẹ hẹ ohwo ro fori rọ sa reyọ ọbe na ro de se rhie isiaphrẹ rọye, kidie e hwe we jovwo ọbara wẹn kọye wọ vwọ tan ihwo hirhe kẹ Ọghẹnẹ nẹ orua korua kugbe ephẹrẹ kugbe ihwo kugbe ẹgborho,

1 Jọn 2:27

ẹkẹvuọvo evwoghworo na rẹ ovwan reyọ mie na ọ vẹ ovwan herọ, o rhe fo rere ohwo rhe yono ovwa-an; kirobo rẹ evwoghworo rọye yono ovwan emu kemu na, ọye na hẹ uyota, ọ dia efia-an, ọtiobo ro yono ovwan na, ovwan dia evun rọye ọtiọye.

Kolose 4:6

We jẹ ota rẹ ovwan dia dẹndẹn rere ota avwerhe nẹ unu rẹ ovwan rhe, re ovwan riẹn obo rẹ ovwan kpahe ota kẹ ohwohwo.

Ẹfesọs 5:17

Vwẹ eriyin na we gbi ghẹ-ẹ, ẹkẹvuọvo we gbe vwo ẹruọ rẹ obo rẹ ọhọre rẹ Ọrovwohwo epha.

Une rẹ Ejiro 28:7

Ọrovwohwo ogangan mẹ kugbe ekpọfia mẹ; ọye udu mẹ vwẹ ẹro so, ọtiọye na ka cha vwẹ uko, udu mẹ ko ghọghọ, une mẹ kọye me vwọ kpẹvwẹ.

Jems 5:13

Ono re reoja vwẹ uherevie rẹ ovwan? e jọ nẹ ẹrhovwo. Ohwo rẹ ivun vwerha? E jọ so une rẹ ejiro.

Une rẹ Ejiro 71:23

Ẹbẹrunu mẹ ko kperi ukperi rẹ aghọghọ, vwẹ ọke re me da so ejiro kẹ wẹ, te erhi mẹ rhe, ri wo yoro nẹ ughwu.

Taitọs 3:6

Ọ ro ku kuẹ avwanre buebu, vwẹ oma ri Jesu Kristi Ọsivwi rẹ avwanre;

1 Kọrẹnt 14:26

Kidie vwo, imoni? Ọke we de rhi si koko, rẹ ohwo ọvuọvo da so une, ọvo de vwo obo ro yono, rẹ ọvo de vwo obo rọ vwọ phia, rẹ ọvo da jẹ ephẹrẹ, eyẹ ọvo fan otọ rọye. E jẹn e ru ayen rere emu ejobi vwọ gba.

Jems 1:5

Ẹkẹvuọvo ohwo ro rhe vwo aghwanre vwẹ usun rẹ ovwa-an, e jọ nọ vwẹ obọ rẹ Ọghẹnẹ, ọye ri se siobọ nẹ kemu kemu kẹ ohwo, ọ ghwọ kuẹ ohwo-o; kọ vwọ kẹ.

Kolose 1:28

Kọye avwanre ghwoghwo na, rere kohwo kohwo ejobi sa vwọ dia ohwo ri Kristi;

Une rẹ Ejiro 32:7

Wẹ asan odjahọ mẹ, Wẹ ri sivwi vwe nẹ ukpokpogho, wẹ re reyọ esivwo vwo rhuo vwe yariẹ.

Nehemaya 12:46

Kidie vwe ọke re awanre Devid kugbe Asaf vwọ hẹ olori re ibuine, ayen ji vwo ine re ejiro vẹ akpẹvwẹ ra sua kẹ Ọghẹnẹ.

1 Ivie 3:28

Izrẹl ejobi de nyo orhiẹn rẹ ovie bruru na; udidi rẹ ovie de mu ayen, fikiridie ayen mrẹ vughe nẹ aghwanre rẹ Ọghẹnẹ rhere, rere o vwo bru orhiẹn rẹ ọsoso.

Ẹvwọphia 15:3

Ayen da so une ri Mosis, Odibo rẹ Ọghẹnẹ na, kugbe une rẹ Omogodẹ na, tanẹ, Iruo wẹn pha rhuarho igbunu, E Ọrovwohwo Ọghẹnẹ Ọrovwoẹgba! Ọsoso kugbe uyota hẹ idjerhe wẹn, E Ovie rẹ oge ejobi.

1 Jọn 2:14

Mi si rhe ovwan, esẹ na, fikiridie ovwan riẹnrẹ rọ herọ notọrhe. Mi si rhe ovwan, imighene na, fikiridie ovwan ganre, ota rẹ Ọghẹnẹ ke rha hẹ evun rẹ ovwan, ovwan ki rhe phi ohwo umwemwu na kparobọ.

1 Timoti 6:17

Nabo yono ayen otu ri feri vwẹ akpọ na nẹ, ayen bru ọrho-o, eyẹ ayen vwẹ ẹro so efe rọ muẹro-o ẹkẹvnọvo ayen vwẹ ẹro so Ọghẹnẹ rọ kẹ avwanre efe ro muẹ avwanre geie na.

2 Tẹsalonaika 3:15

Ovwan rha jẹ eghrẹ-ẹ, ẹkẹvuọvo ovwan ta ota kẹ kerẹ oniọvo.

1 Tẹsalonaika 4:18

Fiki rẹ ọtiọye na ovwan gba vwẹ eta nana bru ohwohwo uche.

1 Kọrẹnt 14:15

Kidie mi ru vwọ? Me vwẹ erhi mẹ nẹ ẹrhovwo me je vwẹ udu mẹ nẹ ẹrhovwo rhe; me vwẹ erhi mẹ so une me je vwẹ udu mẹ so une rhe.

Matiu 26:30

Ọke rẹ ayen vwọ so me nu, ayen da yanran kpo ugbenu rẹ Oliv.

Isẹ 14:8

Aghwanre rẹ ọvwiroro ọye ri dje idjerhe kẹ, ẹkẹvuọvo ughenghẹn rẹ ẹkpa rhoma phiẹn.

Une rẹ Ejiro 138:1

Me kpẹvwẹ owẹ, E Ọrovwohwo, vẹ udu mẹ ejobi; vwẹ obaro rẹ ẹdjọ na, me so ejiro kẹ wẹ,

Une rẹ Ejiro 119:54

Iji wẹn rhi hirhe phihọ une mẹ vwẹ uwevwi rẹ ọyoyan mẹ.

Ọbe ri Pọl si rhe Ihwo ri Rom 15:14

Imoni mẹ, o mu vwe ẹro nẹ, ovwan vọnre vẹ uruemu esiri buebu, nẹ ovwan je vọn vẹ erianriẹn, rẹ ovwan vwo se yono ohwohwo.

Iyẹnrẹ Esiri ri Luk 2:51

Ọ vẹ ayen da yanran kpo Nazarẹt, ọ da vwẹ oma kpotọ kẹ ayen; oni rọye de phi eta nana vwọ hẹ evun.

1 Ikun rẹ Ivie 25:7

Unu rayen vẹ imoni rayen, re yonori ri suine kẹ Ọrovwohwo, re nabọ riẹn, da dia uri gbẹ ujọne gbẹ ẹrenre.

Aizaya 10:2

ri kue orhiẹ rẹ uyota rhẹriẹ kẹ ọ rẹ akpọ bẹn ayen mi mie ihwo mẹ ri vwiogbere ẹkẹn ute rayen, rere eyauku vwọ dia emuọre rayen, ayen mi rhe ru ọmọphrorivwi phihọ eranvwe rayen!

Ẹvwọphia 19:10

Etiyin mi de she diguẹ vwẹ asan awọ rọye me da gọ, ẹkẹvuọvo ọ da ta kẹ vwẹ, Wo ruẹ ọyena-a! Mẹvwẹ je hẹ odibo kugbe omoni kirobo wọ epha rọ yọnrọn iseri ri Jesu. Gọ Ọghẹnẹ. Kidie iseri ri Jesu vwenẹ ọye hẹ ohwo ro vwo erhi rẹ aroẹmrẹ.

Aizaya 30:29

Ku wọ cha so ine vwẹ ason ra da re orẹ ọfuanfon; kugbe aghọghọ re udu, kere ọke rẹ ohwo de gbe cha nene edo re owanre kpo enu rẹ ugbenu re Ọrovwohwo, vwo kpo obo Oragha rẹ Izrẹl.

Aizaya 26:1

Vwẹ ẹdẹ yena ka so une nana vwẹ otọ ri Juda. Avwanre vwo orere ọvo rọ ganre ọ vwẹ esivwo vwo vi kerẹ igbẹhẹ ra vwẹ ogben vi.

Aizaya 5:1

Ju vwe so une kẹ ọrojevwe une rẹ ivuavwerhe kpahe ogba ri vain rọye. Ọrojevwe de vwo ogba ri vain vwẹ enu rẹ ugbenu ro yovwe emu gangan.

Solomon 1:1

Une re ine ri Solomọn

Ẹvwọphia 14:3

ayen da so une ọkpokpọ vwẹ obaro rẹ ekete na kugbe obaro rẹ eranvwe ekpokpọ ẹne na kugbe obaro rẹ ekpako na. Ohwo ọvuọvo riẹn une na-a jokpa rẹ uriori ujori kugbe ujughwrẹ gbẹ ẹne na ra tanhirhe nẹ evun rẹ akpọ na.

Isẹ 18:1

Ohwo ra phiẹn ghwru ri ruẹ omeru rere ọ vwọ guọghọ omamọ rẹ orhiẹn kufia.

Ẹfesọs 5:26

rere o vwo ruo fon, rere ọ vwẹ ame rẹ ota rọye hworhẹ fon,

1 Tẹsalonaika 1:8

Kidie ọ dianẹ usi rẹ ota rẹ Ọrovwohwo na ọvo ri kperi nẹ obọ rẹ ovwan rhe vwi Masidonia kugbe Akaya-a, ẹkẹvuọvo esegbuyota rẹ ovwan kpahe Ọghẹnẹ ji kperi usi ro kasan kasan, ọtiọye na o gbi vwo emu ọvuọvo rẹ avwanre ta-a.