Jerimaya 20:3 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

³ Vwẹ ẹdẹ rivẹ, ri Pashọ vwọ rhan Jerimaya nẹ igoni na nu, Jerimaya da ta kẹ, Ọrovwohwo se odẹ wẹn Pashọ-ọ, ẹkẹvuọvo Imuọshọ vwẹ abọ kabọ.

Jerimaya 20:3 Referans Kwoze

Jerimaya 20:10

Kidie mi nyo ophiọrọ buebu. Imuọshọ ọ hẹ asan ejobi! phọphọ! Jẹn avwanre phọphọ! emamọ rẹ igbeyan mẹ ejobi tarọ rẹ ayen vwọ rhẹrẹ eshe mẹ. Ọkeọvo ya cha phiẹ, avwanre ki che phiọ kparobọ rẹ avwanre de ruo keri.

Uvwerhe 2:22

Wọwẹ ri se avwanre kpo ẹdorẹ re bruru uguegue vwi kabọ kabọ; vwẹ ẹdẹ rẹ ophu rẹ Ọrovwohwo ohwo ọvuọvo sa vabọ-ọ eyẹ ke sa rhọ-ọ, Ayen otu re me fẹnre re me ghẹre ivwighrẹ mẹ mie vwe ghwọrọ.

Jerimaya 46:5

Die jabọ me vwọ mrẹ? ofu dje ayen ayen de rhivwi kpuko. E hwe egbofovwi rayen totọ, ayen da djẹ okpokpakpa, ayen gbi ni uko-o. Oshọ vwẹ asan ejobi: eriyin Ọrovwohwo na tare.

Une rẹ Ejiro 31:13

E, mi nyo ophiọrọ re otu buebu– oshọ vwi kabọ kabọ– rẹ ayen vwọ rua ero kpahe ovwẹ, rẹ ayen vwọ jẹ iroro re vwo hwe vwe!–

Jerimaya 6:25

Wa yan kpo evun rẹ aghwa na rẹ, wa je yan vwẹ idjerhe na-a, kidie ọvweghrẹ na yọnrọn ọlọkọ vwẹ obọ oshọ herọ vwi kabọ kabọ.

Aizaya 8:3

Mi de bru ọmraro rẹ aye na ra, ọ da mrevun o de vwiẹ ọmọshare. Etiyin Ọrovwohwo da ta kẹ vwẹ, se odẹ rọye Mahashalal-hashbaz;

Iruo rẹ Iyinkọn na 16:30

Ọ da reyọ ayen rhe uphẹphẹ ọ da ta, Ẹshare, kidie mi ru me vwọ rhọ?

Jerimaya 29:29

Zefanaya rẹ orherẹn na de se ọbe nana kẹ Jerimaya rẹ ọmraro na nyo.

Jerimaya 19:6

Ọtiọye na, nighe, ẹdẹ cha, eriyin Ọrovwohwo tare, re gbi se etinẹ na Tọfẹt ọfa-a, eyẹ Iyara ri Hinnọm ọfa-a, ẹkẹvuọvo ke se nẹ Iyara re de hwe ihwo.

Jerimaya 19:2

wọ yan kpọ Iyara rẹ Hinnọm vwẹ asan anurhoro rẹ Igbephẹre na, wo dia etiyin de ghwoghwo eta re me ta kẹ wẹ na.

Jerimaya 7:32

Ọtiọye na, gbe nighe, ẹdẹ cha, eriyin Ọrovwohwo na tare, re vwo je se Tofẹt ọfa, ẹkẹvuọvo ke se iyara rẹ Ihwehwe, kidie Tofẹt kọye ayen che shi ihwo phihọ, kidie asan ọfa gbe herọ-ọ.

Jẹnẹsis 32:28

Etiyin ọ da ta, E gbi se odẹ wẹn Jekọp ọfaa, ẹkẹvuọvo kẹ Izrẹl, fikiridie wọ vẹ Ọghẹnẹ kugbe ihwo rẹ akpọ muabọ, yi wo sheri-i.

Jẹnẹsis 17:15

Ọghẹnẹ da ta kẹ Ebraham, Vwọ kẹ Serai rẹ aye wẹn, wo gbi se Serai ọfa-a, ẹkẹvuọvo Sera kọye dia odẹ rọye.

Jẹnẹsis 17:5

E gbi se we Ebram ọfa-a, ẹkẹvuọvo ke se we Ebraham, fikiridie mi ru we vwọ dia ọsẹ rẹ ẹgborho buebu.

Izikiẹl 13:9

Obọ mẹ ko mukpahe emraro na re mrẹ emramrẹ rẹ ọphiẹvwe re bọ epha rẹ efian; ayen gbe cha dia ukoko rẹ ihwo mẹ-ẹ, eyẹ e gbi che si ayen phihọ ọbe rẹ uwevwi rẹ Izrẹl na-a, eyẹ ayen gbe vwẹriẹ otọ rẹ Izrẹl na-a. Kẹ ovwan cha riẹn nẹ mẹvwẹ ọyen Ọrovwohwo Ọghẹnẹ na.