Jẹnẹsis 39:2 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

² Ọrovwohwo vi Josẹf herọ, ọ da rhe dia omamọ rẹ ohwo kẹ uwevwi rẹ onini rọye rẹ ohwo rẹ Ijipt na.

Jẹnẹsis 39:2 Referans Kwoze

1 Samuẹl 18:14

Devid de phi kparobọ vwẹ ofovwi rọ rare ejobi; kidie Ọrovwohwo vẹ ọye herọ.

Une rẹ Ejiro 91:15

Ọke ro de se vwe, ke me kpahe kẹ, Mi nene dia vwẹ ọke rẹ ukpokpogho, ki mi yoro no ri mi de mu ọghọ kẹ.

Jerimaya 15:20

Ki mi ru we vwo kẹ ihwo nana kerẹ ogba rẹ ẹrovwo ayen che nene uwe họnre, ẹkẹvuọvo ayen che se phi we kparobọ-ọ kidie me vọ owẹ herọ. Re mi vwo sivwi uwe je chọ wẹ, eriyin Ọrovwohwo tare.

Jẹnẹsis 26:28

Ayen da ta, Avwanre mrẹre phẹphẹ nẹ Ọrovwohwo vẹ owẹ herọ, kọye avwanre vwọ tanẹ, e jẹ avwanre duvwu iyori kẹ oma, rere avwanre vẹ owẹ re ọphọ,

Jẹnẹsis 21:22

Vwẹ ọke yena, Abimẹlẹk vi Fikol rẹ onotu rẹ ofovwi rọye da ta kẹ Ebraham, Ọghẹnẹ vẹ owẹ herọ vwẹ emu kemu ri wo ruẹ ejobi,

Aizaya 43:2

Ọke wọ da wan ame vrẹn ye Me vẹ owẹ herọ, Ọ da dia evun rẹ urhie dede, o che re we-e, wọ da yan erhanre vrẹn ọ cha torhẹ owẹ-ẹ, ogidi erhanre na cha ghwọrọ owẹ-ẹ.

Jẹnẹsis 26:24

Ọrovwohwo da vwẹ oma phia kẹ vwẹ ason yena ọ da ta, Mẹvwẹ Ọghẹnẹ rẹ Ebraham rẹ ọsẹ wẹn, wọ djoshọ-ọ, kidie Me vẹ owẹ herọ ki mi bruphihọ kẹ wẹ uvwiẹ wẹn ko bu phihọ fiki rẹ odibo mẹ Ebraham.

Aizaya 41:10

wọ dje oshọ-ọ, kidie me vẹ owẹ herọ, wo jẹ ofu dje we-e, kidie Mẹvwẹ Ọghẹnẹ wẹn, Me kẹ wẹ ogangan, Me cha wẹ uko, Me vwẹ obọrhe mẹ rẹ ephiokparobọ na vwọ yọnrọn owẹ.

Une rẹ Ejiro 1:3

Kọ dia kerie urhe ra kọnre kere asan ame, rọ mọ emamọ rọye vwe ọke ororọ rọye, ẹbe rọye se vwiọro-ọ. Kemu kemu rọ ruru ejobi, ko yovwi kẹ.

Jẹnẹsis 28:15

Nighe, Me vẹ owẹ herọ ke Me sẹro wẹ vwi kasan kasan wọ rare ejobi, ke Me vwẹ owẹ rhe otọ nana, kidie Me sa yan ju we vwo-o bẹsiẹ mi vwo ru eta nana re Me ta kẹ wẹ na ejobi gba.

Une rẹ Ejiro 46:11

Ọrovwohwo rẹ otuofovwi na vẹ avwanre herọ, Ọghẹnẹ ri Jekọb ọye odjahọ rẹ avwanre

Une rẹ Ejiro 46:7

Ọrovwohwo rẹ otuofovwi na vẹ avwanre herọ; Ọghẹnẹ ri Jekọp ọye odjahọ rẹ avwanre.

1 Samuẹl 16:18

Emeghele na ọvo da kpahe, Nighere, me mrẹ ọmọ ri Jesse ohwo ri Bẹtlẹhẹm, rọ riẹn hworo gangan, ọ gba, ohwo rẹ ofovwi, ọ vẹ ọhọ rẹ ota, ohwo vẹ erhuvwu; Ọrovwohwo vẹ ọye herọ.

1 Samuẹl 3:19

Samuẹl da rho, Ọrovwohwo vẹ ọye da herọ o gbi jẹ ota rọye ọvuọvo she kufia-a.

1 Samuẹl 18:28

Ẹkẹvuọvo ọke ri Sọl vwọ riẹn nẹ Ọrovwohwo vẹ Devid herọ, yẹ Izrẹl ejobi guọnerọ,

1 Timoti 6:1

E jẹn ihwo ra dẹre re hẹ eviẹn ejobi mu o ọghọ ro fori kẹ iuini rayen, rere e vwo jẹ odẹ rẹ Ọghẹnẹ kugbe uyono rọye emiovwo.

Matiu 1:23

Nighe, ọmọtobẹ cha mrevun, ko vwiẹ ọmọshare, ke se odẹ rọye Immanuẹl, otọ rọye Ọghẹnẹ vẹ avwanre herọ.

Iruo rẹ Iyinkọn na 8:31

Ọ da ta, Komavọ me sa vwọ riẹn, jokpa nẹ ohwo ọvo djere kẹ vwẹ? Ọ de se Filip rhi tidia kẹrẹ.

Jẹnẹsis 21:20

Ọghẹnẹ vẹ ọmọ na da herọ, ọ da rhe rho, ọ dia evun rẹ aghwa, o de rhi hirhe ọsedada.

Jẹnẹsis 39:3

Onini rọye da mrẹ vughe nẹ Ọrovwohwo vọye herọ, nẹ Ọrovwohwo re jabọ rẹ obo rọye ruẹ ejobi vwo yovwi kẹ.

Jẹnẹsis 39:23

Olori rẹ uwodi na rha davwerhọ rẹ obo ra vwọ kẹ Josẹf yọnre na-a, kidie Ọrovwohwo vọye herọ; kemu kemu ro ruru ejobi, Ọrovwohwo da nẹrhẹ oyovwi.

Joshua 6:27

Ọtiọye kọye Ọrovwohwo vi Joshua gba herọ; usi rọye de titi ro otọ na ejobi.

Ivie rẹ Ivẹ 18:7

Ọrovwohwo vẹ ọye da herọ; asan kasan rẹ rare ejobi ko yovwi kẹ. Ọ de mukpahe ovie rẹ Asiria, o gbe rhọvwe ga-a.

Joshua 1:5

O vwo ohwo ọvuọvo ro che yivwi hirhe opharo ku we vwẹ ẹdẹ rẹ akpọ wẹn ejobi-i; kirobo mi vi Mosis diarọ, ọtiọye me vẹ owẹ je cha dia; me cha phiẹn wẹ-ẹn eyẹ me cha sẹn wẹ-ẹn.

Joshua 1:9

Ọ dia omẹvwẹ ri ji urhi na kẹ wẹ-ẹ? Goma wo yivwaro gangan, wọ phariẹ-ẹ, wo jẹ ofu dje we-e, kidie Ọrovwohwo Ọghẹnẹ wẹn vẹ owẹ herọ vwi kasan kasan wọ ra ejobi.

1 Ikun rẹ Ivie 9:20

Finehas rẹ ọmọ rẹ Eleazar ọye osun rẹ ayen vwẹ ọke rọ wanre; Ọrovwohwo vẹ ọye da herọ.

2 Ikun rẹ Ivie 1:1

Solomọn rẹ ọmọ ri Devid da nabọ rhuẹrẹ oma phihọ otọ vwẹ evun rẹ uvie rọye, Ọrovwohwo rẹ Ọghẹnẹ rọye vẹ ọye da herọ o de ruo rho gangan.