Jẹnẹsis 19:7 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

⁷ ọ da ta, Me rẹ ovwan, imoni mẹ, we ruẹ emu umwemwu tiọnana-a.

Jẹnẹsis 19:7 Referans Kwoze

Ọbe ri Jud 1:7

kirobo ri Sodọm vi Gomora kugbe irere re riariẹ ayen phihọ na, re vwẹ oma rayen kẹ ọfanrhiẹ egbe rẹ urhuru sivwe rẹ ugboma si ghwru na, ra da vwẹ ayen ru oka vwọ reoja rẹ ehwe rẹ erhanre ri bẹdẹ na.

Ọbe ri Pọl si rhe Ihwo ri Rom 1:24

Fiki rẹ ọnana kugbe urhuru sivwe ofefe rẹ udu rẹ ayen Ọghẹnẹ de siobọ nẹ ayen kẹ iruo rẹ inuhu, rere ayen vwọ phọphọ oma rayen.

Iruo rẹ Iyinkọn na 17:26

Ọ da ma ihwo phihọ ẹgborho ọvuọvo nẹ e dia enu rẹ akpọ na, ọ da kẹ ayen uchọke rẹ ayen dia akpọ na te kugbe ughwru ro gbere kẹ ẹdia rayen,

Iguẹdjọ 19:23

Etiyin ọshare na, ro vwo uwevwi na, de bro ayen ra ta kẹ nẹ, Ẹjo, imoni mẹ, we ru emu omiomiovwi tiọye-e, ovwan mrẹre nẹ ọshare nana bru uvwe rhe uwevwi, ovwan ruẹ igbiruo-o.

Urhi Rivẹ 23:17

E ja gọ ẹdjọ rẹ igberadja vwẹ uherevie rẹ emetẹ rẹ Izrẹl na-a, eyẹ e je ẹdjọ rẹ ofarhiẹ egbe dia uherevie rẹ emeshare rẹ Izrẹl na-a.

Livitikọs 20:13

Eshare ivẹ de du ohwohwo, ayen ihwo ivẹ gbe ẹgua, ke hwe ayen kufia, ọbara rayen ọ uyovwi rayen.

Livitikọs 18:22

We nene ọshare vwerhe kerẹsiẹ re de nene aye vwẹrhẹ-ẹ, ọye ẹgua.

Jẹnẹsis 19:4

Ẹkẹvuọvo tavwe rẹ ayen ki rhi sherhẹ, eshare rẹ orere na, eshare ri Sodọm, te omotete te ọkpako, ihwo na ejobi tototo, de sogodogo riariẹ uwevwi na;

Jẹnẹsis 19:6

Lọt da ro otafe ra vwa ihwo na, ọ da kare ẹchẹ gbe erhorha na,

Jẹnẹsis 19:8

Nighe, mi vwo emetẹ ivẹ re je riẹn ọshare-e, ju vwe vwẹ ayen kẹ ovwan, ru we ru ayen obo ri je ovwan, ẹkẹvuọvo wa vwẹ obọ te erhorha mẹ na-a, kidie uwevwi mẹ ayen rhi wo.

Iguẹdjọ 9:26

Gaal ọmọ rẹ Ebẹd vẹ ekru rọye da kua kpo obi Shikẹm; eshare ri Shikẹm da vwẹ ẹnwẹ vwọ kpahọ.