Hibru 1:11 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹¹ ayen cha ghwọrọ, ẹkẹvuọvo yu wọ herọ; ayen cha ghwo kerẹ ewun,

Hibru 1:11 Referans Kwoze

Aizaya 51:6

Kpare ẹro kpo obo odjuvwu, re wo ni akpọ rọ he obo otọ, kidie idjuvwu na cha ravwiẹn kerẹ ivwirhi akpọ na cha phoriẹn kerẹ ewun, ihwo re dia evun rọye na ki che ghwu kerẹ oro; ẹkẹvuọvo esivwo Mẹ kọ dia bẹdẹ, esivwo Mẹ gbi se vwo oba bẹdẹ-ẹ.

Iyẹnrẹ Esiri ri Mak 13:31

Odjuvwu kugbe akpọ cha wan ẹkẹvuọvo ota mẹ sa wa-an.

Aizaya 34:4

Usun re otu re obo odjuvwu ejobi che gbo kufia, obenu na ko che kpirhi kere eni. Otu rayen ejobi ki che she, kere obo re che kpara ne vain, kere che ri fig rọ kpara she ne urhe rọye

Ẹvwọphia 21:1

Etiyin me da rhe mrẹ odjuvwu ọkpokpọ kugbe akpọ ọkpokpọ; kidie odjuvwu rẹsosuọ kugbe akpọ rẹsosuọ wanvrẹn nure, abadi dede gbe herọ-ọ.

Iyẹnrẹ Esiri ri Luk 21:33

Odjuvwu vẹ akpọ cha wanvrẹn, ẹkẹvuọvo eta mẹ cha wanvrẹ-ẹn.

Matiu 24:35

Odjuvwu vẹ akpọ cha wan, ẹkẹvuọvo ota mẹ se she fia-a.

Hibru 12:27

Ephẹrẹ nana, Kẹ ẹsiẹvo ri chekọ na, dje phia nẹ e che si obo ri kpogho no, kọye hẹ obo ra mare, rere obo ri je kpogho vwọ daji.

Aizaya 65:17

Kidie gbe nighe, Me ma idjuvwu ọkpokpọ vẹ akpọ ọkpokpọ, ekuakua rẹ awanre na a gbe karophihọ aye-en eyẹ iroro gbe ra-a.

Une rẹ Ejiro 90:2

Tavwe rẹ igbenu na ke rhe tan phia, eyẹ tavwe wọ ke rhe mama otọ na vẹ akpọ na, nẹ irhiri re duvwu irhiri wọwẹ ọye Ọghẹnẹ

Une rẹ Ejiro 10:16

Ọrovwohwo ovie rhiri bẹdẹ bẹdẹ; ẹgborho na cha ghwọrọ nẹ otọ rọye.

Ẹvwọphia 20:11

Etiyin me da mrẹ ekete ọfuanfon rode ọvo kugbe ohwo ro tidia enu rọye; opharo rẹ ohwo ro tidia na da nẹrhẹ akpọ vẹ odjuvwu va djẹ, a gbe mrẹ asan vwọ kẹ aye-en.

Ẹvwọphia 2:8

Kẹ enẹ o si rhe amakashe rẹ ishọshi ri Simana. Eta rẹ ohwo rẹsosuọ kugbe ọ rọ ka oba, ohwo ro ghwuru rọ da rhoma varhe.

Ẹvwọphia 1:11

rọ tanẹ, Si obo ru wọ mrẹre na phihọ ọbe re wo vwo rhe ishọshi ighwrẹ na, vwo rhe Ẹfesọs kugbe Simana kugbe Pẹgamọm vwo rhe Taetira vwo rhe Sadis vwo rhe Filadẹlfia vwo rhe Laodisia.

Aizaya 50:9

Nighere, Ọrovwohwo Ọghẹnẹ cha vwẹ uko; kono ri bru orhiẹn hwe vwe? Nighere, ayen ejobi cha phoriẹn kerẹ ewun, eghwọghwọ ke re ayen nu.

Aizaya 41:4

Kono vwẹ ona vwo ru ọnana, ro se orua na nẹ ẹtuọho rhe? Mẹvwẹ, Ọrovwohwo na, ọye ẹsosuọ, kugbe ọ rọ ka oba, Mẹvwẹ ọye.

Une rẹ Ejiro 29:10

Ọrovwohwo tidia phihọ ekete vwe enu re oghwe, Ọrovwohwo tidia kerẹ ovie vwẹ enu rẹ ekete bẹdẹ.

Aizaya 51:8

Kidie eghwọghwọ cha re ayen kerẹ ewun, ihori ke cha re ayen kerẹ ẹton rẹ ogegede; ẹkẹvuọvo esivwo Mẹ kọ dia bẹdẹ, arhọ Mẹ kọ dia kẹ uvwiẹ na ejobi.

Aizaya 44:6

Enẹ Ọrovwohwo tare nẹ, Ovie rẹ Izrẹl vẹ Ọtan rọye Ọrovwohwo rẹ otuofovwi na: Mẹvwẹ ọ rẹ ẹsosuọ Mẹvwẹ ọ rọ ka oba Ọghẹnẹ ọfa gbe herọ vrẹn vwẹ-ẹ.

Une rẹ Ejiro 102:26

Ayen cha ghwọrọ, ẹkẹvuọvo wọ dia bẹdẹ; ayen cha nẹ kerẹ ewun. Wo che wene ayen kerẹ amwa, ke ayen cha wanvrẹn;

Hibru 8:13

Rọ vwọ ta ota rẹ ọphọ ọkpokpọ na o de dje nẹ ọ rẹsosuọ na kpo awanre re. Ọbo ri kpo awanre rọ ghworo yo muegbe rọ vwọ ranvwiẹ re.