Aizaya 44:6 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

⁶ Enẹ Ọrovwohwo tare nẹ, Ovie rẹ Izrẹl vẹ Ọtan rọye Ọrovwohwo rẹ otuofovwi na: Mẹvwẹ ọ rẹ ẹsosuọ Mẹvwẹ ọ rọ ka oba Ọghẹnẹ ọfa gbe herọ vrẹn vwẹ-ẹ.

Aizaya 44:6 Referans Kwoze

Aizaya 41:4

Kono vwẹ ona vwo ru ọnana, ro se orua na nẹ ẹtuọho rhe? Mẹvwẹ, Ọrovwohwo na, ọye ẹsosuọ, kugbe ọ rọ ka oba, Mẹvwẹ ọye.

Ẹvwọphia 1:8

Mẹvwẹ hẹ Ẹsosuọ na kugbe Oba na, eriyin Ọrovwohwo Ọghẹnẹ na tare, ohwo rọ herọ vwẹ asakiephana rọ je herọ rhabae kugbe ọ rọ je cha rhe vwobọ, Ọrovwoẹgba na.

Ẹvwọphia 22:13

Mẹvwẹ hẹ Ẹsosuọ kugbe Oba, ẹtuọhọ kugbe ure.

Aizaya 44:8

Wọ djẹ oshọ-ọ, eyẹ wo bru udu-u, Me rha vuẹ wẹ jovwo nẹ awanre rhe-e? Ovwan ọye iseri mẹ! Ọghẹnẹ ọfa je herọ nọ vwẹ? O vwo Oragha ọfa-a, Me je riẹn ọfa-a.

Aizaya 48:17

Enẹ Ọrovwohwo tare, Ọtan wẹn, Ọfuanfon Ọvuọvo rẹ Izrẹl na. Mẹvwẹ Ọrovwohwo Ọghẹnẹ wẹn, ro yono uwe vwọ mrẹ erere, ro sun we vwẹ idjerhe ru wọ cha wan na.

Aizaya 48:12

Kerhọn mẹ, E Jekọp, kugbe Izrẹl, ri mi seri! Mẹvwẹ Ọye, Mẹvwẹ ọ rọ ẹsosuọ je Mẹvwẹ re cha ka oba.

Urhi Rivẹ 32:39

Gba mrẹ nẹ Mẹvwẹ, mẹvwẹ vẹ ekpuyovwi mẹ ọye, ọye ọghẹnẹ ọfa gbe herọ chọ vwẹ ra-a. Mi se hwe mi ji sivwi rhọ; Me sa woma mi mi ji se hworo kpo; ọ ro se sivwẹ nẹ obọ mẹ herọ-ọ.

Aizaya 42:8

Mẹvwẹ Ọrovwohwo, ọye odẹ mẹ; urinrin mẹ me sa vwọ kẹ ohwo ọfa-a, eye ejiro me vwọ kẹ ema ra mare-e.

Aizaya 44:24

Enẹ Ọrovwohwo tare, Ọtan wẹn, rọ mama owẹ nẹ evun rhe: Mẹvwẹ Ọrovwohwo, rọ ma emu ejobi rẹ ọye ọvo vwẹ idjuvwu na tan, rọ riẹn akpọ na phihọ–Kono vẹ ovwẹ gba herọ

Urhi Rivẹ 6:4

E nyo, E Izrẹl; Ọrovwohwo Ọghẹnẹ avwanre na Ọrovwohwo ọvuọvo;

Urhi Rivẹ 4:39

Vwẹ ọtiọye na gba riẹn nonẹ na, wo mi phio phihọ udu wẹn, nẹ Ọrovwohwo na Ọghẹnẹ rọ evun rẹ odjuvwu vẹ enu rẹ akpọ rọ herọ vwẹ obotọ na; ọfa herọ-ọ.

Aizaya 43:1

Ẹkẹvuọvo Asakiephana enẹ Ọrovwohwo tare, ọ rọ ma wẹ, E Jekọp, ọ rọ mama owẹ, E Izrẹl. Wọ dje oshọ-ọ, kidie Me tan wẹ nure, Mẹvwẹ ri mu odẹ se we, wọwẹ ọmẹ.

Aizaya 37:16

E Ọrovwohwo rẹ otuofovwi na, Ọghẹnẹ rẹ Izrẹl, wẹ ro tidia ekete vwẹ obenu ri chẹrobim, wọwẹ Ọghẹnẹ na; wẹ ọvo sogono, vwẹ usun rẹ ivie rẹ akpọ na; wẹ re ma odjuvwu vẹ akpọ.

Urhi Rivẹ 4:35

Wẹwẹ a vwẹ rọ nẹ rere wọ vwọ mrasa riẹn nẹ Ọrovwohwo na ghinẹ Ọghẹnẹ; ọfa herọ vwọ ba-a.

Aizaya 33:22

Kidie Ọrovwohwo na oguẹdjọ re avwanre, Ọrovwohwo osun re avwanre, Ọrovwohwo na ovie re avwanre, o se sivwi avwanre

Aizaya 41:14

Wọ djẹ oshọ-ọ, we ri Jekọp re ohori, ovwan ihwo rẹ Izrẹl! Me sa cha we uko, eriyin Ọrovwohwo tare, Ọtan wẹn ọye Ọfuanfon Ọvuọvo rẹ Izrẹl na.

Ẹvwọphia 2:8

Kẹ enẹ o si rhe amakashe rẹ ishọshi ri Simana. Eta rẹ ohwo rẹsosuọ kugbe ọ rọ ka oba, ohwo ro ghwuru rọ da rhoma varhe.

Matiu 25:34

Ovie na kọ ta kẹ ihwo re hẹ obọrhe rọye nẹ, Wa yanrhe ihwo rẹ ọsẹ mẹ bruba kẹ, wa rhe reuku rẹ uvie ra rhuẹrẹ vwọ otọ kẹ ovwan nẹ otọ rẹ akpọ rhe.

Aizaya 54:5

Kidie Oma rọ ma wẹ ọye ọshare wẹn, Ọrovwohwo rẹ otuofovwi na ọye odẹ rọye; Ọfuanfon Ọvuọvo rẹ Izrẹl na ọye Ọtan wẹn Ọghẹnẹ rẹ akpọ ejobi ọye e se.

Malakae 1:14

Ekan kẹ ohwo rọ ghwa ihwo ria ro vwo egbo vwẹ ohri rẹ igode rọye, rọ nabọ ve ive nu, ọ da ra reyọ eranvwe ro vwo ẹgua vwo ze izobo kẹ Ọrovwohwo na; kidie mẹvwẹ Ovie rode, eriyin Ọrovwohwo rẹ otuofovwi na tare, ihwo rẹ akpọ na ejobi djẹ oshọ kẹ odẹ mẹ.

Jerimaya 50:34

Ọ rọ tan ayen hirhe na ogba ọgangan, Ọrovwọhwo rẹ otuofovwi na ọye odẹ rọye. O che mie ayen unu vwo gun, rere ọ vwọ mrasan kẹ akpo na omerovwo, ẹkẹvuọvo ọdjorho kọye dia kẹ ihwo ri Babilọn.

Aizaya 59:20

Kọ cha rhe Zayọn kerẹ Ọtan, bru otu ri Jekọp ri kurhẹriẹ nẹ ogbigbiru, eriyin Ọrovwohwo tare.

Matiu 27:37

Ayen de si urhi re vwo muo nẹ, ỌNANA JESU OVIE RI JU.

Aizaya 37:20

Eriyin Asakiephana, E Ọrovwohwo Ọghẹnẹ rẹ avwanre, sivwi avwanre nẹ obọ rọye, rere uvie rẹ akpọ na ejobi vwọ riẹn nẹ wọwẹ ọvo kpoi re hẹ Ọrovwohwo.

Aizaya 41:21

Guẹdjọ wẹn phia, eriyin Ọrovwohwo na tare, vwẹ iseri wẹn rhe, eriyin ovie ri Jekọp na tare.

1 Timoti 3:16

Ẹtẹkuẹte, oye hẹ ẹrhọvwọ, rẹ igbunu rẹ egagọ rẹ avwanre na; Ọ rọ phiare vwẹ ughoma, ẹ Erhi Ọfuanfon brorhiẹ kẹ, rẹ emakashe mrẹre, re ghwoghwori vwẹ ohri rẹ ẹgborho na, re segbuyota vwẹ akpọ na, re mu kpenu vwẹ urinrin.

Ẹvwọphia 1:11

rọ tanẹ, Si obo ru wọ mrẹre na phihọ ọbe re wo vwo rhe ishọshi ighwrẹ na, vwo rhe Ẹfesọs kugbe Simana kugbe Pẹgamọm vwo rhe Taetira vwo rhe Sadis vwo rhe Filadẹlfia vwo rhe Laodisia.

Une rẹ Ejiro 86:10

Kidie wọ pha rhuarho wo ruẹ emu rẹ igbunu, wọwẹ ọvo ọye Ọghẹnẹ.

Aizaya 63:16

Kidie we he Ọsẹ rẹ avwanre, dede na nẹ Ebraham riẹn avwanre-e , Izrẹl je mrẹ avwanre vughe-e, we, E Ọrovwohwo, ọye Ọsẹ rẹ avwanre, Ọtan rẹ avwanre nẹ ọke rẹ awanre rhe ọye odẹ wẹn.

Aizaya 40:18

Kono ghwrara wo vwo dje Ọghẹnẹ, eyẹ ki didi emu re họherọ?

Aizaya 43:9

Jẹn ẹgborho na ejobi si koko, re ihwo na rhe ghwẹ koko. Ono vwẹ usun rayen na ri se dje Ọnana, Ono ri se dje imu re awanre? Jẹn ayen vwẹ iseri rayen rhe ro muẹro, re ayen nyo re ayen ta, Uyota o ruẹ.

Jerimaya 10:1

Nyo ota rẹ Ọrovwohwo ta kẹ wẹ, E uwevwi rẹ lzrẹl.