2 Ọke wọ da wan ame vrẹn ye Me vẹ owẹ herọ, Ọ da dia evun rẹ urhie dede, o che re we-e, wọ da yan erhanre vrẹn ọ cha torhẹ owẹ-ẹ, ogidi erhanre na cha ghwọrọ owẹ-ẹ.
wọ dje oshọ-ọ, kidie me vẹ owẹ herọ, wo jẹ ofu dje we-e, kidie Mẹvwẹ Ọghẹnẹ wẹn, Me kẹ wẹ ogangan, Me cha wẹ uko, Me vwẹ obọrhe mẹ rẹ ephiokparobọ na vwọ yọnrọn owẹ.
Ọ dia omẹvwẹ ri ji urhi na kẹ wẹ-ẹ? Goma wo yivwaro gangan, wọ phariẹ-ẹ, wo jẹ ofu dje we-e, kidie Ọrovwohwo Ọghẹnẹ wẹn vẹ owẹ herọ vwi kasan kasan wọ ra ejobi.
O vwo ohwo ọvuọvo ro che yivwi hirhe opharo ku we vwẹ ẹdẹ rẹ akpọ wẹn ejobi-i; kirobo mi vi Mosis diarọ, ọtiọye me vẹ owẹ je cha dia; me cha phiẹn wẹ-ẹn eyẹ me cha sẹn wẹ-ẹn.
Ẹkẹvuọvo Ọrovwohwo de mudia cha vwẹ ọ da kẹ ogangan mi vwo ghwoghwo ota na gbagba, rere ihwo ri Keferi na ejobi vwo nyo. Vwẹ ọtiọye na e vwo sivwi uvwe nẹ unu rẹ okpohrokpo na.
Ki mi che phi ẹkẹn rerha nana phihọ erhanre, re ruo fon kirobo re ru idọnọ fuan ye, ka davwe ayen kirobo ra davwe oro na. Ayen se odẹ Mẹ, ki mi nyo ke ayen. Ke Me ta nẹ, Ayen ihwo mẹ, Kẹ ayen ta nẹ, Ọrovwohwo na Ọghẹnẹ Mẹ.
Gbe nighe, ẹdẹ cha, ọ tuabọ kerẹ enyerhanre, ọke yena ihwo ri herẹ vẹ i ri ruẹ umwemwu ejobi ke cha dia kerẹ ehẹbẹ; ẹdẹ ro cha na kọ cha torhẹ ayen ejobi, eriyin Ọrovwohwo rẹ otuofovwi na tare, ọtiọye na o gbi che jẹ o vwo owọ eyẹrẹ eghọ-ọn.
Ọ da kpahe kẹ nẹ, “Mi che mi nene uwe ra; ọnana kọ dia oka kẹ wẹ, nẹ Mẹvwẹ ri ji we; ọke wọ da rọye ihwo na nẹ otọ rẹ Ijipt rhe nu, ku wọ cha gọ Ọghẹnẹ vwẹ ugbenu nana.
Wa djẹ oshọ rẹ ovie ri Babilọn na-a, ohwo rẹ oshọ rọye mu ovwan na, wa djẹ oshọ rọye-e, eriyin Ọrovwohwo tare, kidie me vẹ ovwan herọ, ki mi sivwi ovwan mi ji si ovwan nẹ obọ rọye rhe.
Wọ djẹ oshọ-ọ, E Jekọp odibo mẹ, eriyin Ọrovwohwo tare, kidie me vẹ owẹ herọ. Mi che furhie ẹgborho na ejobi re me cha djẹ ovwan ra na, ẹkẹvuọvo mi che furhie ovwa-an, ẹfa me cha fa wẹ mi che je ovwan vwo riẹrieriẹ-ẹ.