Aizaya 40:11 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹¹ Ọ ghẹrẹ uchuru rọye kerẹ osuigodẹ, o mu emọ rẹ igodẹ na phihọ igbabọ rọye, ọ mu ayen phihọ agada rọye, ko sun e re ghẹrẹ emọ dẹndẹn.

Aizaya 40:11 Referans Kwoze

Ẹvwọphia 7:17

Kidie Omogodẹ na rọ hẹ uherevie rẹ ekete na kọ dia osuigegede rayen, ko sun ayen kpo ogbugbu rẹ arhọ na; Ọghẹnẹ ko rhie ameoviẹ nẹ ayen ẹro.

Maika 5:4

Ko vrẹn mudia ghẹrẹ igegede rọye vwẹ ogangan rẹ Ọrovwohwo na, vwẹ ọrhọ rẹ odẹ rẹ Ọrovwohwo Ọghẹnẹ rọye. kọ cha dia vwẹ egbemọphẹ, vwẹ ọke yena kọ cha rho re duvwu ẹtan rẹ akpọ na.

Izikiẹl 34:23

Ke me vwẹ osuigegede ọvo mu kẹ ayen, kọye odibo mẹ Devid, kọ cha ghẹrẹ ayen, ko ghẹrẹ ayen ko dia osuigegede rayen.

1 Pita 2:25

Kidie ovwan ghwrẹ jovwo kerẹ igegede, ẹkẹvuọvo asakiephana ovwan rhivwi bru Osuigegede kugbe Ọrhẹrotọ rẹ ẹnwẹn rẹ ovwan re.

Izikiẹl 34:31

Ovwan kẹ igegede mẹ, igodẹ rẹ egbri mẹ, mẹvwẹ kẹ Ọghẹnẹ wẹn, eriyin Ọrovwohwo Ọghẹnẹ tare.

1 Pita 5:4

Ọke rẹ onotu rẹ Osuigegede na da cha phia ku wo vwo erhu rẹ urinrin ro jẹphoriẹ.

Hibru 13:20

Asakiephana e gbe jẹ Ọghẹnẹ rẹ ufuoma rọ kpare Ọrovwavwanre Jesu nẹ ughwu rhe, osuigegede rode na, vwẹ ọbara rẹ ọphọ re rara na,

Une rẹ Ejiro 80:1

Kerhọn, E Osuigegede rẹ Izrẹl, wọwẹ rọ sun Josẹf kerẹ ekru rẹ igodẹ! Wọwẹ rọ tidia ekete vwẹ enu ri chẹrobim, gbe lo phia.

Zekaraya 11:7

Ọtiọye Me rhe dia osuigegede rẹ igodẹ re reabe rẹ ughwu na vwọ kẹ otu rẹ chua eki rẹ igodẹ na. Me reyọ ekpọ ivẹ; mi de se ọvo Ẹserọphẹ, ọrivẹ mi de rhe se okugbe. Me da ghẹrẹ igodẹ na.

Izikiẹl 37:24

Odibo mẹ Devid kọ dia ovie vwẹ enu rẹ ayen, ayen ki vwo osuigodẹ ọvo. Ayen ki nene irhi mẹ, je jomaotọ vwọ yọnre iji mẹ.

Jẹnẹsis 33:13

Ẹkẹvuọvo Jekọp da ta, kẹ, Ọrovwovwe riẹnre nẹ emọ na pha mwẹmwẹ, kugbe uchuru na ri vievie na e ro vwẹ ẹwan, a da djẹ ayen kpata kpata nọ ẹdẹ ọvo, uchuru na ejobi ki ghwu.

Izikiẹl 34:16

Ke me guọnọ i ri ghwruru, i ri suosuo ghwru ke me vwẹ ayen rhivwi rhe, e rẹ awọ rayen vwirhiri ke me gba ayen, e rẹ oma rhọ ke me kẹ ayen ogangan, e re pha tubie tubie kugbe e re oma rayen ganre ke me rhẹrẹ ayen; ke me ghẹrẹ ayen vwẹ uyoyovwi.

Jẹnẹsis 49:24

dede na umurhabọ rọye yegherii, Etiyin abọ rọye ke tua vwẹ obọ rẹ Ogangan ọvuọvo ri Jekọp (vwẹ odẹ rẹ Osuigodẹ, Orhaga rẹ Izrẹl).

Aizaya 63:11

Etiyin ọ da karophihọ ọke re awanre, ọke ri Mosis odibo rọye. Tivọ ọ re mu nẹ ame rhe na epha osuigodẹ re ihwo rọye na? Tivọ ọ re phihọ uherevie rayen na epha Erhi ọfuanfon rọye na,

Aizaya 42:3

ugbẹn rẹ eyareya dede o se vwirho-o, urhukpẹ rẹ evwri yẹrẹyẹrẹ o se fuo-o, orhiẹ rẹ uyota vẹ ọsoso ọye o che bru.

Une rẹ Ejiro 27:10

Kidie te ọsẹ mẹ te oni mẹ sen vwe, ẹkẹvuọvo Ọrovwohwo sa kpare ovwẹ vrẹn.

Une rẹ Ejiro 28:9

E sivwi ihwo wẹn, re wo bruphihọ kẹ ireuku wẹn, dia osuigegede rayen, re wọ ghwa ayen bẹdẹ.

Une rẹ Ejiro 37:3

Vwẹ ẹro so Ọrovwohwo, ru wo ru ọ re esiri ko wọ dia otọ na, oma ko fu we.

Une rẹ Ejiro 100:3

Riẹn nẹ Ọrovwohwo ọye Ọghẹnẹ! Ọye re ma avwanre, avwanre erọye; avwanre ihwo rọye, kugbe igegede rẹ egbri rọye.

Jerimaya 31:8

Nighe, me cha reyọ ayen nẹ orho rẹ obọhwerẹ ọnre rhe, koko ayen nẹ oboshesheri rẹ akpọ rhe, irhuẹro vẹ ikpono dia ohri rayen, aye vẹ ọmọ kugbe ọ rọ chuẹ uvwiẹ gbe koko; usun rode na, ayen che rhivwi rhe etinẹ.

Jerimaya 31:10

Nyo ota rẹ Ọrovwohwo, E ẹgborho na, rere wo ghwoghwo vwẹ erhuru rẹ obo ogboko na, ta nẹ, Ọ rọ hra Izrẹl na ji che koko, ọ je cha sẹro rọye kirobo rẹ osuigegede sẹro rẹ igegede rọye.

Izikiẹl 34:2

Ọmọ rẹ ohwo, mraro kpahe isuigegede rẹ Izrẹl, mraro, rere wo ta kẹ ayen, ikpuyovwi rẹ isuigegede na, E nẹ Ọrovwohwo Ọghẹnẹ tare: E isuigegede rẹ Izrẹl re ghẹrẹ oma rayen ọvo! Ọ dianẹ isuigegede ye ghẹrẹ igegede na?

Maika 7:14

Vwẹ ọkpọ wẹn sun ihwo wẹn, igegede re wọ vwọ reuku, rẹ ayen ọvo dia evun rẹ egbo ọvo sogolo vwẹ ohri rẹ okogbe; jẹn ayen ghẹrẹ oma vwo Bashan vi Gilẹad kerẹ ọke rẹ awanre.

Zekaraya 13:7

Vrẹn, E ọlọkọ, vwọ kpahe osuigegede Mẹ, vwọ kpahe ohwo ro mudia kere ovwẹ na, Ọrovwohwo rẹ otuofovwi tare . Nyavwe osuigegede na, rere vwọ mrasan hra, Me cha rhẹriẹ obọ mẹ kpahe emọ rẹ igegede na.

Izikiẹl 34:15

Mẹvwẹ ọvo kọye dia osuigegede rẹ igegede mẹ, ke me vwẹ ayen shevwerhẹ te otọ, eriyin Ọrovwohwo Ọghẹnẹ tare.