Aizaya 37:16 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹⁶ E Ọrovwohwo rẹ otuofovwi na, Ọghẹnẹ rẹ Izrẹl, wẹ ro tidia ekete vwẹ obenu ri chẹrobim, wọwẹ Ọghẹnẹ na; wẹ ọvo sogono, vwẹ usun rẹ ivie rẹ akpọ na; wẹ re ma odjuvwu vẹ akpọ.

Aizaya 37:16 Referans Kwoze

Une rẹ Ejiro 99:1

Ọrovwohwo na ria uvie, jẹn ihwo na phariẹ! O tidia phihọ ekete rọ hẹ enu ri cherubim, jẹn akpọ na kpogho!

Ẹyano 25:22

Etiyin kọye me vẹ owẹ da vwa oma, nẹ obenu rẹ akpanurhe rẹ arodọvwe na, nẹ uvwre ri chẹrobim ivẹ na re hẹ enu rẹ ekpeti rẹ iseri na, kẹ etiyin mi de nene uwe ta ota rẹ iji mẹ na ejobi re me vwọ kẹ ihwo rẹ Izrẹl na.

Une rẹ Ejiro 86:10

Kidie wọ pha rhuarho wo ruẹ emu rẹ igbunu, wọwẹ ọvo ọye Ọghẹnẹ.

Une rẹ Ejiro 80:1

Kerhọn, E Osuigegede rẹ Izrẹl, wọwẹ rọ sun Josẹf kerẹ ekru rẹ igodẹ! Wọwẹ rọ tidia ekete vwẹ enu ri chẹrobim, gbe lo phia.

1 Samuẹl 4:4

Etiyin ihwo na de ji ikọn kpo Shiloh, ayen de re mu ekpeti rẹ ọphọ rẹ Ọrovwohwo rẹ ofuofovwi na rhe, ro tidia ekete vwẹ enu ri chẹrobim; emeshare rẹ Eli ivẹ na, Hofni vẹ Finihas, vẹ ekpeti rẹ ive rẹ Ọghẹnẹ na vwẹ etiyin.

Hibru 4:16

E gbe jẹ avwanre sikẹre ekete rẹ ẹserọphe na vẹ ẹroẹvwọsuọ, rere avwanre mrẹ arodọvwẹ reyọ kugbe ẹserọphẹ rọ cha avwanre uko vwẹ ọke rẹ ọbẹnvwẹ.

Kolose 1:16

Kidie oma rọye a wan ma kemu kemu ejobi, re hẹ obo odjuvwu kugbe re hẹ otọ rẹ akpọ na, emu ra mrẹ kugbe irejẹmrẹ owenẹ o dia obenu rẹ ekete rẹ ivie eyẹ ubrakpọ re suẹn, eyẹ ihwo ride eyẹ ogangan; obọ rọye a wa ma kemu kemu ejobi, ọye a je ma ayen kẹ.

Iyẹnrẹ Esiri ri Jọn 1:3

oma rọye a wan mama imu na ejobi, ọ gbe dia ọye-e emu ọvuọvo ra mare na a gbe mama-a.

Aizaya 44:24

Enẹ Ọrovwohwo tare, Ọtan wẹn, rọ mama owẹ nẹ evun rhe: Mẹvwẹ Ọrovwohwo, rọ ma emu ejobi rẹ ọye ọvo vwẹ idjuvwu na tan, rọ riẹn akpọ na phihọ–Kono vẹ ovwẹ gba herọ

Aizaya 54:5

Kidie Oma rọ ma wẹ ọye ọshare wẹn, Ọrovwohwo rẹ otuofovwi na ọye odẹ rọye; Ọfuanfon Ọvuọvo rẹ Izrẹl na ọye Ọtan wẹn Ọghẹnẹ rẹ akpọ ejobi ọye e se.

Aizaya 45:22

Rhoma bru vwe rhe re wọ rho, oba rẹ akpọ na ejobi na: Kidie Mẹvwẹ Ọghẹnẹ, o gbi vwo ọfa-a

Aizaya 44:6

Enẹ Ọrovwohwo tare nẹ, Ovie rẹ Izrẹl vẹ Ọtan rọye Ọrovwohwo rẹ otuofovwi na: Mẹvwẹ ọ rẹ ẹsosuọ Mẹvwẹ ọ rọ ka oba Ọghẹnẹ ọfa gbe herọ vrẹn vwẹ-ẹ.

Aizaya 40:28

Wọ je riẹ-en? Wọ ji nyo-ọ? Ne Ọrovwohwo na ọye Ọghẹnẹ ri bẹdẹ na, ọye Ọmema rẹ oba rẹ akpọ na. Oma rhọ-ọ eyẹ oma ghwọrọ-ọ, ẹruọ rọye ọ bẹn evughe.

Aizaya 37:20

Eriyin Asakiephana, E Ọrovwohwo Ọghẹnẹ rẹ avwanre, sivwi avwanre nẹ obọ rọye, rere uvie rẹ akpọ na ejobi vwọ riẹn nẹ wọwẹ ọvo kpoi re hẹ Ọrovwohwo.

Aizaya 8:13

Ẹkẹvuọvo Ọrovwohwo rẹ otuofovwi na, ọye ọvo wọ reyọ nẹ ọ fonro rọ dia oshọ wẹn, re ọ je dia ophariẹ wẹn.

Aizaya 6:3

Ọvo de se ọrivẹ ọ da tanẹ: Ẹfuọn, ẹfuọn, ẹfuọn ọye Ọrovwohwo rẹ otuofovwi na; akpọ na ejobi vọnre vẹ urinrin rọye.

Une rẹ Ejiro 146:6

rọ ma odjuvwu vẹ akpọ, abadi na, kugbe obo re dia evun rẹ ayen ejobi, rọ yọnrọn esegbuyota rọye bẹdẹ;

Une rẹ Ejiro 46:11

Ọrovwohwo rẹ otuofovwi na vẹ avwanre herọ, Ọghẹnẹ ri Jekọb ọye odjahọ rẹ avwanre

Une rẹ Ejiro 46:7

Ọrovwohwo rẹ otuofovwi na vẹ avwanre herọ; Ọghẹnẹ ri Jekọp ọye odjahọ rẹ avwanre.

Ivie rẹ Ivẹ 5:15

Etiyin o de rhivwi bru ohwo rẹ Ọghẹnẹ na ra, te ọye te usun rọye o de rhi mudia obaro rọye; ọ da ta Nighe, Me riẹnre nẹ Ọghẹnẹ hẹ akpọ na ejobi-i jokpa rẹ Izrẹl, ọtiọye gbe rhie abọ wọ reyọ okẹ nana mie odibo wẹn.

1 Ivie 18:32

ibieragha na ke eye ọ vwọ so agbada vwẹ odẹ rẹ Ọrovwohwo na. ọ da tọn ukpotọ riariẹ agbada na phihọ, hẹhẹre kerẹ ẹrhẹ ọnẹ ivẹ.

2 Samuẹl 7:26

Ke ru odẹ wẹn rho bẹdẹ ra tanẹ, Ọrovwohwo rẹ Ofovwi ọye Ọghẹnẹ ro sun Izrẹl, kugbe uwevwi rẹ Odibo wẹn Devid ko ghwotọ bẹdẹ.

Urhi Rivẹ 10:17

Kidie Ọrovwohwo Ọghẹnẹ wẹn na, ọye Ọghẹnẹ rẹ ẹdjọ, gbe Ọrovwohwo rẹ irivwohwo, Ọghẹnẹ rode, ro mu oshọ, ro nẹ ohwo ẹro-o, ọ je ria udi-i.

Jẹnẹsis 1:1

Nẹ otọ rhe Ọghẹnẹ vwọ ma odjuvwu vẹ akpọ.

Ezra 1:3

Kono vwẹ usun rẹ ovwan na vwẹ evun rẹ ihwo rọye na, e jẹn Ọghẹnẹ rọye nene dia, gbe jo kpo obi Jerusalẹm ri Juda, rere ọ rhoma bọn uwevwi rẹ Ọrovwohwo Ọghẹnẹ rẹ Izrẹl rọye. Ọghẹnẹ ro hẹ evun ri Jerusalẹm

Aizaya 37:15

Etiyin Hẹzikaya da nẹ ẹrhovwo kẹ Ọrovwohwo.

Aizaya 40:22

Ọye ri tidia phihọ usikẹ rọ hẹ obenu rẹ akpọ na, ihwo re dia ejobi họhọ ebaka; ohwo rọ vwẹ odjuvwu tan kerẹ amwa, rọ vwe rọ tan kerẹ utughẹ ra dia;

Aizaya 42:5

Enẹ Ọghẹnẹ tare, Ọrovwohwo na, rọ ma idjuvwu rọ da nabọ riẹn phihọ na, rọ riẹn akpọ na phihọ vẹ obo re djẹ no rhe ejobi, rọ vwẹ ẹnwẹn kẹ ihwo re dia evun rọye kugbe erhi kẹ ihwo re yan vwẹ evun rọye.

Aizaya 45:12

Mẹvwẹ re ma akpọ na, Me da ma ohwo phihọ enu rọye, obọ mẹ me vwọ riẹn idjuvwu na phihọ, Mẹvwẹ re vwẹ urhi kẹ otu rẹ herọ ejobi.

1 Ivie 8:6

Etiyin irherẹn na de mu ekpeti rẹ ọphọ rẹ Ọrovwohwo na kpo asan rọye, vwẹ obo ẹtan rẹ ẹshẹ rẹ uwevwi na, vwẹ asan rọ ma fon na, vwẹ obotọ rẹ ibekpe ri shẹrobim na.