1 Timoti 3:13 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹³ kidie ayen otu ri ru iruo ri dikin na yoyovwi ji ghwe vwo omamọ rẹ owotọ kẹ oma rẹ ayen kẹ ayen ji vwo udu vwẹ esegbuyota na rọ hẹ evun ri Kristi Jesu.

1 Timoti 3:13 Referans Kwoze

Matiu 25:21

Ọrovworo da ta kẹ nẹ, Wo runọ odibo rẹ esiri na; wọ vwọ dia ọvwata vwẹ oma rẹ ememu nana, ku wọ dia ovie vwẹ enu rẹ emu buebu; mọ rhe ro aghọghọ rẹ ọrovwowe.

Hibru 6:10

Kidie Ọghẹnẹ dia orharhe rẹ ohwo ro jẹ iruo esiri kugbe ẹguọnọ rẹ ovwan vwo kẹ odẹ rọye ẹkarohọ, ri we ru kẹ ihwo efuanfon na fiki rọye, kirobo rẹ ovwan ji ruẹ na.

2 Timoti 2:1

Wẹ, ọmọ mẹ, gba gan oma vwẹ ẹserọphẹ rọ herọ vwẹ evun ri Kristi Jesu,

1 Tẹsalonaika 2:2

ẹkẹvuọvo kirobo rẹ ovwan riẹnre avwanre reoja rẹ ehwe kugbe ophọphọvwe vwi Filipae, Ọghẹnẹ je kẹ avwanre aroeyivwo rẹ avwanre vwo ghwoghwo iyẹnrẹ esiri rẹ Ọghẹnẹ na vwẹ evun rẹ ukpokpogho rode.

Filipae 1:14

Buebu vwẹ imoni na da rhe vwẹ ẹro so Ọrovwohwo na fiki rẹ uwodi re me pha, ayen de rhi yivwaro phihọ vwọ ta ota rẹ Ọghẹnẹ na.

1 Kọrẹnt 16:15

Asakiephana, imoni, ovwan riẹnre nẹ evwruwevwi ri Stifanas eye hẹ ihwo rẹsosuọ ri kurhẹriẹ vwẹ Akaya, ayen da vwẹ oma rẹ ayen phihọ otọ vwọ kẹ ẹga rẹ ihwo efuanfon na;

Iruo rẹ Iyinkọn na 21:35

Ro rhi vwo te egana na, kidie isodje na muro kpahe akoko fiki rẹ ozighi rẹ otu na;

Iruo rẹ Iyinkọn na 6:15

Ọke rẹ ihwo na ejobi ri tidia ẹguare na vwọ tẹrovio, ayen ejobi ri tidia ẹguare na da mrẹ opharo rọye kerẹ opharo rẹ amakashe.

Iruo rẹ Iyinkọn na 6:8

Ri Stivin, rhe vwọ vọn vẹ ẹserọphẹ vẹ ogangan, o de ruiruo rẹ eka kugbe igbunu ride vwẹ ohri rẹ ihwo na.

Iruo rẹ Iyinkọn na 6:5

Ota na rẹ ayen tare na da vwerhe ihwo na ejobi evun, etiyin ayen da jẹ Stivin, ohwo rọ vọnre vẹ esegbuyota kugbe Erhi Ọfuanfon, kugbe Filip, kugbe Prokorọs, kugbe Nikanọ, kugbe Tamọni, kugbe Pamenas, kugbe Nikolas, ohwo rẹ Antiọk ro kurhẹriẹ.

Iyẹnrẹ Esiri ri Luk 19:17

Ọ da ta kẹ, Wo runọ, odibo rẹ esiri! Fikiridie wọ dia ọvwata vwẹ ememu otete, ku wo che vwo ogangan vwẹ enu rẹ irere ihwe.

Matiu 20:28

Ọ dianẹ Ọmọ rẹ ohwo rhere re e vwo gbe odibo kẹ-ẹ, ẹkẹvuọvo re o vwo gbe odibo, rere ọ vwẹ arhọ rọye tan ihwo buebu.

1 Timoti 3:14

Mi si eta nana rhe we kidie mi phiẹrohọ nẹ mi bru uwe cha nanana,