Proverbios 10:21 - Bible in Tzeltal de Oxchuc y Tenejapa

²¹ Te c'op ya xloc' ta ye te mach'a toj yo'tan, bayal mach'a ya xp'ijubic yu'un; yan te mach'a ma sna' q'uinale, ya xlaj ta scaj te ma'yuc bila ya sna' stuquele.

Bible in Tzeltal Bachajón

²¹ Te ye te mach'a toj yo'tan, ya smac'lin tsobolic, yan te mach'atic ma sna'ic q'uinal, ya xchamic ta scaj te mayuc bin ya sna'ic stuquel.

Proverbios 10:21 Referans Kwoze

Oseas 4:6

Te lum cu'un ma'yuc bi sna'oj, ja' swentail te la yich'ix jinele. Sacerdote, ja'at la ach'oj bael te bila ay ta na'ele, jich yu'un te jo'on ya jch'ojat loq'uel ta sacerdoteil. Melel ya xch'ay ta awo'tan te p'ijubtesel yu'un te Dios awu'une; jich me ya xch'ay ta co'tan te ats'umbale.

Proverbios 17:16

¿Bi yu'un ya yich' tel taq'uin ta sc'ab te mach'a ma sna' q'uinal te ya sman p'ijilil ta sc'op a, te bit'il ma xju' yu'un snopele?

San Mateo 13:19

Te mach'a ya yaiy stojol te bit'il ay ta ajwalinel te Diose, soc te ma xc'ot ta yo'tane, jich c'oem te bit'il awalil te c'ot ta bee. Ya xtal te pucuje, ya sloq'uesbey ta yo'tan te bila la yaiy stojole.

Proverbios 1:29

melel ya awilayic te p'ijil c'ope, soc ma x'ac'an ya awich'ic ta muc' te Cajwaltique.

Proverbios 15:4

Te buen lamal c'op, te' swenta cuxinel c'oem; yan te bol c'ope, ya sboltes o'tanil stuquel.

Proverbios 5:23

Scaj te ma tojuc ya yac' sba te ya xbajt' ta lajele; ja' nix te smuc'ul sbolil te ya x'ic'ot bael ta ch'ayel yu'une.

Proverbios 5:12

Soc jich me ya awal: “¿Bi yu'un te la jch'ay te tojtesele? ¿Bi yu'un te la jch'ay te tac'uyele?

Proverbios 1:31

C'ux obol me abaic yu'un swocolil te awat'elique; tsobol me ya xjil ta atojolic te bila amen la anop ta awo'tanique.

Job 23:12

Spisil ora ja' ya jch'uunbey te sc'ope, ma ja'uc ya jpas te bila ya sc'an co'tan ta jtuquel naxe.

Jeremías 15:16

C'alal la ac'oponon, la jwe'elinbat te ac'ope; jamal q'uinal la caiy yu'un soc bin nax co'tan yu'un, melel jo'on awu'uninejon, Cajwal, te Diosat te Spisil ya xju' awu'une.

Proverbios 12:18

Ay ants-winiquetic ya x'ejch'enteswan a te sc'opique; yan te sc'op te mach'a ay sp'ijile, ya xpoxtaywan stuquel.

1 Pedro 5:2

Canantayaic te chijetic yu'un Dios te ay ta awentaique. At'ejanic ta spasemal awo'tanic, melel jich ya sc'an yo'tan te Diose. Ma me sujbiluquex ta spasel, soc ma me ta scajuc nax taq'uin te ya x'at'ejexe. Ja' ya sc'an te binuc nax me awo'tanic ta spasele.

Romanos 1:28

In te bit'il ma la sc'an sna'beyic sba ta melel te Diose, jich ijq'uitayotic yu'un Dios. Jich jowejic ta jyalel, ja' la spasic te bila ma jichuc ya sc'an pasele.

Jeremías 3:15

Ya cac'beyex ajwaliletic awu'unic te ya yac'bonic sbujts' co'tane, soc ya me xmandalajic ta atojolic ja'ex soc sp'ijilic soc te bila sna'ojic ta leque.

Salmos 37:30

Te mach'a lec yo'tan, ay me sp'ijil ya xc'opoj stuquel; te mach'a lec yo'tan, mero stojil me ya xc'opoj.

San Mateo 12:35

Te mach'a lec yo'tane, lec ya xc'opoj, yu'un lec te bila nojel ta yo'tane. Yan te mach'a amen yo'tane, ma lecuc ya xc'opoj, yu'un nojel ta yo'tan te bila amene.

Proverbios 6:32

Mero ma'yuc sp'ijil te mach'a ya spas mulwej soc yan ants; te mach'a jich ya spase ja' nix ya yac' sba ta lajel a.

Proverbios 10:11

Te bila ya yal te mach'a toj yo'tane, sloq'uibja' c'oem yu'un cuxlejal; yan te mach'a amen yo'tane, ya xmilot yu'un te bila amen ya spase.

Proverbios 1:32

Te mach'atic ma'yuc bila sna'ojique, ja' nix ya xmilotic yu'un te ma'yuc bila sna'oje; ja' te mach'atic ma sna'ic q'uinale, ja' nix ya xlajinotic yu'un te bila ma ba la yich'ic ta wenta.

Proverbios 5:2

Jich me ya ana' stsajtayel aba ta lec a; soc na'biluc me awu'un ta lec te bila ya awal te c'alal ya xc'opojate.

Proverbios 15:7

Te mach'atic ay sp'ijil yo'tanic ya spuquic ta alel p'ijil c'op; yan te mach'atic ma sna'ic q'uinale, ma lecuc spisil te bila ya spasique.

Eclesiastés 12:11

Te p'ijil c'opetic yu'un te mach'atic ay sp'ijilique, jich c'oemic te bit'il chicote ya quich'tic tojtesel ae. Te c'alal yich'ojix chajbanel a, jich c'oemic te bit'il estacaetic te buen lec yich'ojic ts'apele, ts'apbil yu'un jtul nax jcanantaywanej.

Isaías 5:13

Jich yu'un, te bit'il ma sc'an xyaiyic stojol te lum cu'une, ya me x'ic'otic bael ta mosoil. Ta spisil te lum soc te ajwaliletic yu'un ya me xlajic ta wi'nal soc ta taquinti'il.