Oseas 4:12 - Bible in Tzeltal de Oxchuc y Tenejapa

¹² Te lum cu'un ay bila ya sjojc'obeyic te yajcananic te spasojic ta te'; ta swenta snabate'ic ya sta ta sc'opic te sujt'ibe. U'uninbilic yu'un mulwej te lum cu'une, jich yu'un st'unojic nix jowil beetic a. Te ya spasic mulweje, jich ya yijq'uitayonic te Dioson yu'unique.

Bible in Tzeltal Bachajón

¹² Te pueblo cu'un ya sjoc'obe te loc'omba yu'un te pasbil ta te', te si' ya sjac'be sc'opic; como ac'otic ta howiyel yu'un te yantsiwejic, la yihquitayic te Dios yu'unic ta scuenta yantsiwejic.

Oseas 4:12 Referans Kwoze

Oseas 5:4

Amen yat'elic te lume, ta swenta te yat'elic ma xc'otic ta stojol te Dios yu'unique. Te bit'il u'uninbilic yu'un te mulweje, ma sna'beyic sba Cajwaltic yu'un.

Jeremías 2:27

Melel ya awalbey te te': “Ja'at jtatat”, ya awut, soc ya awalbey te tone: “Ja' jme'at”, ya awut. Yan te jo'one, ja' ya awac'bon quilbat te apate, ma ja'uc te awelawe. Ja'uc me to, te c'alal nax ya awilic ya xtal ta atojolic te bila chujc'ule, ya awalbonic: “¡La', coltayawotic!”, xaex ta ora.

Habacuc 2:19

¡Ya me awil awocol ja'at te ya awalbey swic' sit te jun loc'omba-te'e, soc te ya awalbey stejc'an sbae te jp'ij ton uma'e! ¿Ya bal xju' yu'un te ay bila ya yalbotic jtebuque? Ma'yuc, melel ma ba cuxulic, manchuc me potsbilic ta oro soc ta plata.

Deuteronomio 31:16

Te Cajwaltic jich la yalbey te Moisés: —Nopolix ya xlajat. Te lum in to ya me xc'ax bolob ta jc'axel ta swenta te xch'uunel diosetic yu'un te yantic lumq'uinaletic te ya xba yich'e. Jich me ya xch'ayon ta yo'tanic, ya me sjinic te trato jpasoj soque.

Números 15:39

Jich yu'un te c'alal ya awilic te stsijts'mal, tey me ya ana'ic spisil te mandaliletic te cac'ojbeyexe, soc jich me ya ach'uunic. Jich ma ba ya awich'-o'tantay abaic soc te bila ya snop awo'tanic, teme ma junuc awo'tanic ta jtojole.

Miqueas 2:11

Teme ay mach'a ya sle ta yo'tan lot te jich ya yal: “Jo'on ya calbey sc'oplal vino soc tulan uch'balil”, teme xie, ja' me j'alwanej te ya smulanic te lum abi —xi' te Cajwaltique.

Oseas 9:1

Israel, ma me binuc nax awo'tan; ma me xwilat yu'un sbujts' awo'tan jich bit'il yantic lum. Melel la apas mulwej c'oem a te bit'il la awijq'uitay ta awo'tan te Dios awu'une. Ta yawilic smajibal trigo, ta bay ya yich' loq'uesel te site, bin nax awo'tan yu'un te tey ya awich'bey stojol a te amulweje.

Ezequiel 21:21

Te muc' ajwalil yu'un Babilonia tey la yaq'uix sba ta banti ya xjetin jajch'el te cheb be. La spasbey snúmero ta na'el te bila ya to xtal ta stojole. Jich la xchajulay te yat'ejibalul t'imalte'e, soc la sjojc'obey te bila cuybil ta diosetic yu'une, soc ta sejc'ub chambalametic.

Jeremías 10:8

Spisilic, bol yo'tanic, ma'yuc ni jtebuc sp'ijilic. Ma xju' ya sp'ijubtesex te smajc'alel te'e.

Salmos 73:27

Te mach'atic ya xc'ubic ta atojol, ya me xlajic; ya me alajin te mach'atic ma junuc yo'tanic ta atojole.

2 Crónicas 21:13

ja'uc me to, ja' la anopbey yat'el te muc' ajwaliletic yu'un Israel. Ja'at ta acaj te ma tojuquix yo'tanic ta stojol Cajwaltic te Judá soc yajwal Jerusalén; jich la apas te bit'il la spas te mach'atic ay yu'un te Acab. Soc la amil te awijts'inab, te ja' mero lequic xan stuquelic a te bit'ilate.

Levítico 20:5

jo'on me ya jcontroin, soc te mach'atic ay yu'un, ya me jloq'ues ta yolil slumal soc te mach'atic pajal bolob soque, te pajal bajt'ic ta stojol Moloc.

Levítico 17:7

Tey ma'yuquix bi ora ya yac'beyic milbil smajt'an a te pucujetique, ja' te la xch'uunic ta neelal to soc ja' ta scaj te bolobenique. Ja' jmandal in to ma'yuc bi ora ya xlaj sc'oplal awu'unic, te ya me sc'an ya yich' ch'uunel yu'un tatiletic soc nich'aniletic ta cajalcaj bael.

Salmos 106:39

la sboltes sbaic melel mulwej la spasic a ta spisil te yat'elique.

Oseas 14:3

Asiria ma xju' ya scoltayotic; soc ma xju' xcolotic yu'un te caballoetique. “Dios cu'untic”, ma me xoocotic ta stojol te bila jpasojtic ta jc'abtique. Melel ja'at nax atuquel, Cajwal, te ya ana'bon yo'bolil jba te me'ba alalone —xaat me ta stojol te Diose.

Jueces 18:5

Jich yu'un la yalbeyic: —Jojc'obotic ta stojol Dios teme lec ya xbeenotic baele, swenta yu'un ya me jna'tic stojol —xiic.

2 Reyes 17:7

Jich c'ot ta pasel, melel ja'ic nix te israeletic te la sle smulic ta stojol Cajwaltic te Dios yu'unique, te ic'otic loq'uel tel ta Egipto yu'un, soc te coltayotic ta sc'ab te muc' ajwalil yu'un Egipto, ja' te faraón. Yu'un och xch'uunic lotil diosetic.

Jeremías 23:13

“Jo'on quiloj te j'alwanejetic yu'un Samaria, ya spasic te bitic ma smulan co'tan; melel j'alwanejetic yu'un Baal, jich la sjowtesbonic te lum Israel cu'une.

Ezequiel 20:32

Jich c'oem ta awo'tanic te ja' pajal ya xc'oex soc te yantic nacionetic ta balumilale, te ya xch'uunic te' soc ton, pero ma me jichuc ya xc'ot.

Oseas 6:10

Ta bay Israel ay bila la quil te xiweltic sba tey a: Ja' te Efraín la yaiy mulwej, soc te Israel la sboltes sba.