Números 13:33 - Bible in Tzeltal de Oxchuc y Tenejapa

³³ Soc la quiltic tey a te muc'ul najt'il winiquetic te mach'atic sts'umbal Anac. Jich quileltic ta stojolic la caiytic te bit'il c'ulubetic, soc jich wan la yilotic te jo'otique —xiic ta yalel.

Bible in Tzeltal Bachajón

³³ Soc la jquilcotic tey a c'ax nahtil muc'ul winiquetic, ha te snich'nab Anac. Hich la jca'iy jbahcotic bin ut'il c'ulub, soc ha nix hich la yilotcotic, xchihic.

Números 13:33 Referans Kwoze

Deuteronomio 1:28

Yo'tic ¿banti ya xbootic? Te mach'atic jun jlumaltic soc, ya yalic te mero bayal yipic soc te mero najt'ic te mach'atic tey ayic a, c'axem laj jichic a te bit'il jo'otique. Soc niwac lumetic laj ay yu'unic soc mero toyolic laj sjoyob ts'ajc'ul, soc ay laj la yilbeyic sts'umbal te c'ax najt'il winic Anac tey a. Ta spisil, jc'axel ya spejc'anbotic co'tantic”, xaex.

Isaías 40:22

Te Diose ay smuc'ul nactijib ta sba sjamalul te ch'ulchane; jich ta ilel yu'un ants-winiquetic te bit'il ch'in yaxal c'ulubetic. Jich ya slim bael ch'ulchan te bit'il paq'ue, jich ya sjam bael te bit'il nailpac'.

Génesis 6:4

Te mach'atic najt'il winiquetic chicnajic ta balumilal te c'alal la yic' sbaic soc yantsil-nich'nab winiquetic te snich'nab te Diose. Soc chicnajic xan ta patil bael, ja'ic te mach'atic pujq'uem sc'oplalic te bit'il tulanic ta namey q'uinale.

1 Samuel 17:42

C'alal te filisteo la yil te David te querem to, soc te mero tsaj yelaw soc buen t'ujbil, jich ma ba la yich' ta wenta.

Deuteronomio 9:2

Mero muq'uic soc mero najt'ic te yajwale, ja' pajal snajt'ilic soc te sts'umbal te c'ax najt'il winic Anac. Te ja'exe ay awaiyojiquix te ay ta alel te ma'yuc mach'a ya xju' yu'un te ya xba stsal sba soc teme ja'ic te sts'umbal Anac, te c'ax najt'il winique.

Deuteronomio 3:11

(Te muc' ajwalil Og ja' slajibal sts'umbal te refaimetique. Te swayibe puro taq'uin pasbil, ay chaneb metro snajt'il soc jteb xanix ma ba staoj cheb metro sjamalul. Chican to ta ilel ta lum Rabá te ay ta sq'uinal te amonetique.)

1 Crónicas 11:23

Soc ta yan buelta, la smil jtul egipcio-winic te muc' snajt'il, ay olil yoxeb metro te snajt'ile, chapal bael ta lec soc te slanza, te jich smuc'ul yilel te bit'il ste'el jalabile. Te Benaía la yac'bey te', jich la sloq'uesbey ta sc'ab te slanzae. La smil, ja' nix smiljibal a c'ot te slanzae.

Deuteronomio 2:10

(Te lumq'uinal in to, ta namey ja' la slumalinic te emitaetic, te c'ax muq'uic soc te mero tsobolique, najt'ic jichic te bit'il sts'umbal Anac te c'ax najt'il winique.

Números 13:22

Ochic bael ta Néguev, c'otic c'alal ta lum Hebrón. Tey nainemic a te Ahimán, Sesai soc Talmai, te sts'umbalic Anac. Te Hebrón sjuquebalix ja'wil spastajel a te la yich' pasel te Zoán ta Egipto.

Números 13:28

Ja'uc me to, te mach'atic nainemic tey a, tulanic ta lec. Te lumetic mero muq'uic ta jyalel, soc ay ts'ajc' joytaybilic a chajbalchajp. Soc la quiltic te sts'umbal Anac te muc'ul najt'il winiquetique.

Números 14:1

Jich yu'un te israeletic jajch'ic ta aw, ta sjunal ajc'ubal c'ax yu'unic ta oq'uel.

Josué 11:21

Soc ju' yu'un Josué stsalel soc la sjin spisil te lumetic yu'un te sts'umbal Anac te ayic ta wits Hebrón, ta lum Debir, ta lum Anab soc spisil ta witstiquil yu'un Judá soc yu'un Israel.

Josué 14:12

Ja' swentail te ya jc'anbat yo'tic te q'uinal ta witstiquil te la yalbon stuquel te Cajwaltique. Ana'oj te sts'umbal muc'ul najt'il winic Anac tey ay yo'tic a. Ay muc'ul lumetic yu'unic te buen chapalic, te tey tulan yac'oj sbaic a. Ja'uc me to, ja' ay ta co'tan te Cajwaltic ya sjoinon soc ya scoltayon ta sloq'uesel bael, jich nix bit'il yaloj —xi' te Caleb.

Josué 15:14

Te Caleb la sloq'ues bael tey a te oxtul sts'umbal te najt'il winic Anac, ja'ic te Sesai, Ahimán soc Talmai.

1 Samuel 17:24

Jich te israeletic, te c'alal la yilic te winique, la xi'ic, soc jijts'ic loq'uel ta stojol ta ora.