Miqueas 4:3 - Bible in Tzeltal de Oxchuc y Tenejapa

³ Te Cajwaltic ya me xchajban te nacionetic, soc ya me yal stuquel te bila lec ya spasic te lumetic te bayal ta jchajbe, soc me te lumetic c'ubul ayique. Te spuñalic ya sc'atp'unic ta sjoc'jibal lum; soc te slanzaique ya sc'atp'unic ta set'jibal trigo. Ma me ayuc jchajbuc lum ya stsac yat'ejib ta yac'beyel sba guerra soc yan lum; ni ma me ayuquix p'ijubtesel yu'un guerra.

Bible in Tzeltal Bachajón

³ Ha ya xchahpanwan ta yohlil bayel pueblohetic soc ya stojobtes te nacionetic te ay yipic, te namal ayique. Ya sc'atp'unic ta azadonetic te espadahetic yu'unic, soc ta hocetic te slanzahique. Mayuc nación te ya shach espada ta scontrahinel yan nación, ma ba ya snopiquix bin ut'il ya yaq'uic guerra.

Miqueas 4:3 Referans Kwoze

Isaías 2:4

Te Cajwaltic ya xchajbanbey te c'op jajch'em yu'un te nacionetique, tsobol me lumetic ya yac'bey snop te ya xcom ta guerra. Ya me sc'atp'unic ta sjoc'jibal lum te spuñalique, te slanzaic ya me sc'atp'unic ta set'jibal trigo. Ni jpamuc lum ya stsac xan spuñal ta smilel yan, ni ma'yuquix mach'a ya yich' p'ijubtesel ta guerra.

Oseas 2:18

“Te c'alal ya sta yorail ya me jpas trato soc te ja'mal chambalametique, te ja'mal mutetic soc te chanetic, ta swenta xc'uxtayel te lum Israel. Ya me jloq'ues ta yolil lum te t'im, te puñal soc spisil guerra, swenta yu'un jun nax me yo'tan ya xcux yo'tan te lum cu'une.

Hechos 17:31

Te Diose, chapalix yu'un jun c'aal te ya yich' ta c'op spisil ants-winiquetic ta balumilal, ta swenta te jtul Winic te tsabil yu'une, ja' chican te bi yilel te yat'elique. Spisilic ya me yac' xch'uunjel yo'tanic ta stojol te Mach'a cha'cux tel ta bay animaetique —xi' te Pabloe.

Isaías 65:25

Te ja'mal jti'awal ts'i' soc te alal chije pajal me ya xwe'ic; te león-choj ya me slo' aquil jich bit'il wacax; te chan ya me smac'lin sba ta slo'el lum. Ta spisil ta bay ch'ul wits cu'une, ma me ayuc jtuluc mach'a ya xbolteswan —xi'. Jich la yal te Cajwaltique.

Salmos 98:9

ta stojol te Cajwaltic. Melel ya xtal ta mandalteswanej ta spamal balumilal; ya xmandalaj ta swenta stojil-o'tanil, soc mero pajal ya xc'uxtaywan.

Salmos 96:13

ta stojol te Cajwaltic te ya xtale. Yac, ya me xtal mandalajuc ta balumilal; ya xmandalaj ta stojol te lumetic ta q'uinal. Toj te mandaltesel yu'un soc puro ta smelelil.

Apocalipsis 19:11

Soc la quil jamal te ch'ulchane. Chicnaj cojt' saquil caballo. Te mach'a cajal ta spate “Jun yo'tan”, soc “Smelelil”, xi' te sbiile. Yu'un toj ya yaiy chajbanwanej soc toj ya yaiy tsalaw.

Zacarías 14:3

Pero te Cajwaltic ya me yac'bey guerra te nacionetic, jich te bit'il mero ya stsac sba soc ta yorail guerra.

Zacarías 9:10

Ja' me ya slajinbey te carretaetic yu'un guerra ta Efraín; ja' me ya slajinbey te caballoetic ta Jerusalén; soc ya me slajin te t'imalte'etic yu'un guerra. Ya me yac' lamajuc q'uinal ta stojol nacionetic. Ya me x'och ta muc' ajwalil ta jejch' sti'il mar c'alal ta sti'il yan mar, ta muc'ja' Éufrates c'alal ta mero sti'il te balumilale.

Miqueas 5:15

Ta swenta sc'ajc'al co'tan ya me quich'bey spacol ta stojol nacionetic te ma la sc'an xch'uunbonic te jc'ope —xi'.

Joel 3:2

Ya jtsob spisil te nacionetic, ya me quic' bael ta stenlej xatal q'uinal yu'un Josafat. Tey me ya xc'o cac'bey stojic a te bila la spasbeyic te lum Israel cu'une. Melel la spucbonic bael ta swolol balumilal te israeletic, soc la spucbey sbaic te jlum-jq'uinale.

Daniel 2:44

Te c'alal ay yat'elic ta muc' ajwalil ae, te Dios ta ch'ulchan ya me yac' ochel jtul jmandalteswanej te sbajt'el q'uinal ma ba ya xlaje, soc te ma'yuc bi ora ya x'u'uninot yu'un yan nación. Ja' me ya slajin ta jyalel te yantic ajwaliletique, ja' nax me muc' ajwalil ya xjil ta sbajt'el q'uinal stuquel.

Isaías 60:12

Te lum te ma xyac' sba ta abatinel ta atojole, ya me xch'ay ta jc'axel; spamal me sq'uinal ya yich'ic jinel ta jyalel.

Isaías 51:5

Ya xnoptsaj tel ta ora te tsalaw cu'une; te cat'el ta jcoltaywanej ay meix tel ta be. Ta swenta cu'el ya me xmandalajon ta stojol te lumetique. Te lumetic ta ti'mar ya me smaliyonic, ja' me ya smuc'ulin yo'tanic te cu'ele.

Isaías 25:3

Ja' swentail te lum te tulane ya yal te ayat ta ich'el ta muc'; te lumetic yu'un te ants-winiquetic te c'ax amen yo'tanique, ya xi'at.

Isaías 9:7

Ya me xjalaj ta bay smuc'ul nactijib David, ya me xpujc' bael yu'el yat'el ta ajwalil ta bayuc; te lamal q'uinal ma me xlaj sc'oplal. Te yat'el ta ajwalil buen nacal me ya xjil ta jyalel; te yiptajibe ja' me te toj-o'tanil soc te bit'il toj ya xwentainwan c'alal ora yo'tic soc ta sbajt'el q'uinal. Ja' ya spas soc yutsil xc'uxul yo'tan te Cajwaltic te Spisil ya xju' yu'une.

Salmos 82:8

Dios cu'un, chajbana aba ta xchajbanel te mach'atic ayic ta q'uinale, melel ja'at yajwalat ta spisil te nacionetique.

Salmos 72:7

Ac'a esmajuc lamal q'uinal soc te bitic yich'oj swentail ta lec ta pasele te jayeb c'aal ochem ta ajwalil ja' to teme laj te ue.

Salmos 46:9

jc'axel la slajinbey sc'oplal te guerra c'alal ta slajibal balumilal; la sc'asix te t'imalte'etique, la swuyix te lanzaetique, la xchiq'uix te carretaetic yu'un guerra.

1 Samuel 2:10

Te Cajwaltic ya me swuy te scontro; c'alal ta ch'ulchan ya yac'bey coel tel chawuc ta stojolic. Te Cajwaltic ya me yalbey bi yilel yat'el te mach'atic ayic ta swolol te balumilale; ya me yac'bey xan yip te muc' ajwalil tsabil yu'une, ya me yac' muc'ubuc xan te yip yu'ele —xi' te Ana.

Salmos 72:3

Te witsetic ac'a yac'beyic lamal q'uinal yaiy te lum; te tseletic ac'a yac'beyic spas te bitic yich'oj swentail ta pasele.

Zacarías 8:20

Jich ya yal te Cajwaltic te Spisil ya xju' yu'un: —Ay to me mach'atic ya xtalic; ya to me xtalic yajwal muc'ul lumetic.

Salmos 46:10

“Lamana me abaic. Na'aic me te jo'on Dioson. Jo'on me toyolon yu'un spisil nacionetic; jo'on me toyolon yu'un ta spamal te balumilale”, xi' te Diose.

Oseas 2:20

Ya me quic' quinaminat, soc jun nax me co'tan ta atojol; jich yu'un te ja'ate ya me ana'bon jba te jo'on Awajwalone.