Miqueas 1:1 - Bible in Tzeltal de Oxchuc y Tenejapa

¹ Ja' sc'op Cajwaltic te la yalbey te Miqueas te talem ta lum Moreset, albot te bit'il ay sc'oplal Samaria soc Jerusalén. Ja' yorail ay ta ajwalil a te Jotam, Acaz soc Ezequías te mandalajic ta Judá.

Bible in Tzeltal Bachajón

¹ Ha te sc'op Jehová te tal ta stojol Miqueas te talem ta Moreset, te bin la yil sc'oblal Samaria soc Jerusalén ta yorahil te Jotam, Acaz soc Ezequías, ajwaliletic yu'un Judá.

Miqueas 1:1 Referans Kwoze

Jeremías 26:18

—C'alal ay ta q'uinal te Ezequías te muc' ajwalil yu'un te Judá, te Miqueas te talem ta Moreset c'opoj ta swenta te Cajwaltic ta stojol spisil te lum Judá, jich la yal: “Jich la yal te Cajwaltic te Spisil ya xju' yu'une: ‘Te Sión ya xc'atp'uj jilel ta jinem q'uinal, te Jerusalén busulbus ya xjil te sts'ajc'ule, te switsul templo ya xnoj ta pimil q'uinal’, xi' me”, xi' ta yalel.

Isaías 1:1

Te j'alwanej Isaías, snich'an Amoz, ac'bot sna' stojol te bit'il ay sc'oplal yu'un Dios te Judá soc Jerusalén, te c'alal ayic ta muc' ajwalil yu'un Judá a te Uzías, Jotam, Acaz soc Ezequías.

Oseas 1:1

Ja' sc'op Cajwaltic te tal ta stojol te Oseas te snich'an Beeri. Ja' yorail a te xmelmon c'axic ta muc' ajwalil ta Judá te Uzías, Jotam, Acaz soc Ezequías, soc ja' yorail te ay ta at'el a te Jeroboam te snich'an Joás, muc' ajwalil yu'un Israel.

Amós 1:1

Ja' sc'op te Amós, te jcanan-chij ta lum Tecoa, te ac'bot ta swenta yalel yu'un Dios te sc'oplal Israel. Cheb ja'wil sc'an xtal nijq'uel a, ta yorail Uzías te muc' ajwalil ta Judá, soc Jeroboam snich'an Joás te muc' ajwalil ta Israel.

Miqueas 1:5

Ta spisil ya xc'ot ta pasel ta scaj stoybail te sts'umbal Jacob, ta scaj smul te israeletic. ¿Banti ay te stoybail te sts'umbal Jacob? ¡Ta lum Samaria! ¿Banti ay te toyol ch'uunjibaletic ta Judá? Ja' ta bay Jerusalén.

Amós 6:1

Ya me yil swocolic te mach'atic ayic ta cuxinel ta Sión. Ya me yil swocolic te mach'atic ja' smuc'ulinej yo'tanic te cuxinel ta Samaria, ja' te mach'atic jtsobwanejetic yu'un te nación te muc' sc'oplalique, soc te mach'atic te israeletic ya xbajt'ic ta stojolique.

Oseas 8:14

Israel ya spas palacioetic yu'un ajwalil; ja'uc me to, ya xch'ay ta yo'tanic te mach'a jpaswanej yu'une. Judá ya spas bayal ta jpam lumetic te tulanic sts'ajc'ule; ja'uc me to, ya cac'bey tiluc sc'aal te ya xtanub ta c'ajq'uel te muc'ul naetic yu'une —xi' te Cajwaltique.

Oseas 4:15

“Teme ya apas mulwej ja'at, Israel; ja'uc me to, te manchuc ya sle smul stuquel te Judá. Ma me xbaex ta Gilgal te ja'exe, ni ma me xmoat bael ta Bet-avén, ni ma me x'ata ta alel te cuxul Diose.

Habacuc 1:1

Ja' sc'op Cajwaltic te ac'bot sna' stojol te j'alwanej Habacuc.

2 Pedro 1:21

te melel ma sc'anjeluc nax yo'tanic te c'opojic te namey q'uinal j'alwanejetique. Melel ja' ac'bot sna' ta yo'tanic yu'un te Ch'ul Espíritu te c'opojique, te melel u'uninbilic yu'un Dios te winiquetique.

2 Reyes 15:5

Te Cajwaltic la yac'bey castigo te muc' ajwalile, tsacot ta c'a'el-chamel, asta jich ay a te laje. Ja' yu'un te muc' ajwalil stuquel nain ta jun cuarto ta sna, la squejch'an yat'el ta mandalteswanej. Te Jotam, ja' te snich'ane, ja' c'ot ta swenta te at'ele, ja' la swentain te nacione.

2 Reyes 15:32

Ta xchebal ja'wil yochel ta muc' ajwalil a te Peka, snich'an Remalías, te Jotam, snich'an Uzías, och ta muc' ajwalil ta Judá.

2 Reyes 16:1

Ta sjuclajunebal ja'wil yochel ta muc' ajwalil a te Peka, snich'an Remalías, och ta muc' ajwalil ta Judá te Acaz, snich'an Jotam.

2 Reyes 18:1

Ta yoxebal ja'wil yochel ta muc' ajwalil yu'un Israel a te Oseas snich'an Ela, och ta muc' ajwalil ta Judá te Ezequías snich'an Acaz.

2 Crónicas 28:1

Te Acaz ay jtab ya'wilal a te c'alal jajch' ta at'el ta muc' ajwalile, at'ej ta Jerusalén waclajuneb ja'wil. Ja'uc me to, te yat'ele ma ba toj ta sit Cajwaltic, ma jichuc la spas te bit'il antiguo smam David.

2 Crónicas 29:1

Te Ezequías jajch' ta at'el ta muc' ajwalil te c'alal jo'eb xcha'winic (25) ya'wilal a, at'ej ta Jerusalén baluneb xcha'winic (29) ja'wil. Abi te sme', yantsil-nich'an Zacarías.

Isaías 7:1

Te muc' ajwalil yu'un Siria, ja' te Rezín sbiil, soc te muc' ajwalil yu'un Israel, ja' te Peka snich'an Remalías, ba yac'beyic guerra te Jerusalén. C'an yochintayic; ja'uc me to, ma ba ju' yu'unic. Ja' me a te c'alal ay ta muc' ajwalil ta Judá te Acaz te snich'an Jotam, te ja' smam te Uzías.

Miqueas 3:9

Ajwaliletic soc jtsobwanejetic yu'un Israel, aiya me awaiyic stojol ta ora to. Te ja'exe ya awilayic te bila toj ta pasele; ja' ya ajinic spisil te bila toj aye.

Isaías 1:2

Ch'ulchan soc balumilal, aiya awaiyic stojol te bila ya yal te Cajwaltique: —La jmuc'tes te jnich'nab ja' to c'alal la sta yipic; ja'uc me to, caj stoy sbaic ta jtojol.