San Mateo 6:9 - Bible in Tzeltal de Oxchuc y Tenejapa

⁹ Jich yu'un te ja'exe jich me xac'oponic te Diose: “Jtatic Dios te ayat ta ch'ulchane, ac'a ich'otuc ta muc' te ach'ulbiile.

Nuevo Testamento Tzeltal de Amatenango

⁹ “Te jaꞌexe, jich me xꞌakꞌoponik te Diose: “Jtatik Dios te ayat ta chꞌulchane, a me chꞌuunekix ta lek te achꞌul-biile.

Bible in Tzeltal Bachajón

⁹ Te ha'exe, hich me xac'oponic te Diose: Jtatic te ayat ta ch'ulchan, ac'a ich'otuc ta muc' ach'ul bihil.

San Mateo 6:9 Referans Kwoze

Apocalipsis 4:11

“Cajwal, ja' awu'un te ich'el ta muq'ue, ya sc'an alel awutsilal soc awu'el. Yu'un ja'at la achicnantes spisil te bitic aye, soc ja' sc'anjel awo'tan te bitic ayic ta q'uinale soc te bitic la yich' chicnantesel awu'une”, xiic.

Romanos 8:15

Melel te Espíritu te ac'botex awiq'uique, ma ja'uc ya yaq'uex xan ta mosoil yu'un te xiwele. Melel ja' ya yaq'uex ta alnich'an yu'un te Diose. Ja' swentail te jich ya caltique: “Jtat”, te xootic ta stojole.

Ezequiel 36:23

Ya me cac' ta ilel ta nacionetic te smuc'ul te jch'ul-biile, te la aboltesbeyic sc'oplal ta stojolic te nacionetique. Te c'alal ya jpase, ya me sna'ic te jo'on Ajwalilone. Jo'on Ajwalilon te jich caloje.

Malaquías 1:11

Ta spisil nacionetic ta balumilal ay mach'atic te yich'ojonic ta muq'ue; ta bayuc ta spisil ya xchiq'uic pom ta swenta quich'jibal ta muc', soc ya yac'bonic majt'aniletic te lequique.

Salmos 111:9

La yac' ta libre te lum yu'un; soc la stulantesbey sc'oplal sbajt'el q'uinal te trato yu'une. Ch'ul Dios stuquel soc xiweltic sba.

Isaías 64:8

Ja'uc me to, ja' jtaticat atuquel Cajwal; jo'otic ajch'alotic, ja'at jpac'jomat cu'untic, ta jpisiltic ja'at Jpaswanejat cu'untic atuquel.

Isaías 57:15

Melel te Mach'a toyole, ja' te mach'a stalel cuxule, te Ch'ul Dios, xi' sbiil, jich ya yal: —Jo'on nainemon ta jun toyol awilal te ch'ultesbile; ja'uc me to, joinej te mach'a peq'uel soc te mach'a ay swocol ta mel-o'tane. Ya cac'bey sbujts' yo'tan soc ya xjam q'uinal yaiy.

Gálatas 4:6

Ta swenta te bit'il yal-snich'anex te Diose, la sticun tel ainuc ta awo'tanic uuc te Espíritu yu'un te Snich'ane. Ja' swentail te jich ya xc'opoje: “¡Abba, Jtat!”, xi' ta stojol te Diose.

Isaías 6:3

Jich yacalic ta yalel juju-jtul: —Ch'ul Dios, Ch'ul Dios, Ch'ul Dios, ja' te Cajwaltic te Spisil ya xju' yu'une; nojel ta spamal balumilal te yutsilale —xiic.

Apocalipsis 5:12

Tulan yacalic ta aw te jich la yalique: “Te Alalchij te la yich' milele, ay ta swenta yich'el yu'el, soc sc'ulejal, soc sp'ijil, soc yip. Ay ta ich'el ta muc' soc te yutsilale”, xiic ta aw.

Salmos 115:3

Te Dios cu'untic ay ta ch'ulchan; ja' la spas spisil stuquel te bitic la sc'an yo'tane.

Nehemías 9:5

Te levitaetic ja'ic te Josué, Cadmiel, Binuy, Hasabnías, Serebías, Hodías, Sebanías soc Petaías, jich la yalic: —Jajch'anic, albeyaic yutsilal te Cajwaltic te Dios cu'untic spisil ora ta sbajt'el q'uinal. Bayaluc yutsilal, ac'a yich' alel yutsil sc'oplal, soc ac'a toyuc xan yutsil slequilal te sbiile —xiic.

San Mateo 7:11

Melel te ja'exe, manchuc teme amen awo'tanique, ja'uc me to, ya nax ana'ic yaq'uel te bila lec ta stojol te awal-anich'anique. ¿Ja'uc to bal a te Jtatic te ay ta ch'ulchane? Ya me yac'bey bila lec te mach'a ya sc'anbeye.

Isaías 63:16

Ja' tatilat cu'untic. Manchuc me ma sna' jbatic stuquel te Abraham, ni Israel ma sna'otic te jo'otique; ja'uc me to, ja'at Cajwal, tatilat atuquel; ja'at nix J'ac'wanejat ta libre cu'untic a.

Salmos 72:18

Bayal me yutsil te Diose, ja' te Cajwaltique, ja' te Dios yu'un Israele, te ja' nax stuquel te muq'uic te bila ya spase.

San Mateo 26:29

Ja'uc me to, ya calbeyex awaiyic te ma ba ya cuch'ix te ya'lel ts'usube ja' to te c'alal ya sta yorail ya joinex ta yuch'el ta banti ay ta ajwalinel te Jtate —xi' te Jesuse.

San Mateo 23:9

Ma me ayuc jtuluc ta balumilal te ya acuyic ta atatic, melel jtul nax te Atatique, ja' te mach'a ay ta ch'ulchane.

San Mateo 5:16

Ja' nanix jich te ja'exe tilemex jichuc luz ta stojol te ants-winiquetique, melel teme ya yilic te lequil at'elil ya apasique, jich me ya yalbeyic yutsilal te Jtatic te ay ta ch'ulchane.

2 Crónicas 20:6

jich la yal ta sc'oponel te Diose: —Cajwal, te Diosat yu'un te antiguo jme'-jtat cu'untic, ja'at Diosat yu'un ch'ulchan, ja'at ya xmandalajat yu'un spisil te nacionetique. Ay ta ac'ab te awip soc te awu'ele, mero ma'yuc mach'a ya stoy sba soc yip ta atojol.

San Lucas 15:18

Ya me sujt'on bael ta sna te jtate. Jich me ya xc'o calbey: ‘Jtat, jtaoj jmul ta stojol Dios soc ta atojol uuc.

Zacarías 14:9

Te c'alal ya sta sc'aalelal ja' me ya x'ochix ta muc' ajwalil a te Cajwaltic ta spamal balumilal. Te Cajwaltic ja' xanix ajwalil stuquel, soc ja' xanix ya yich' alel sbiil stuquel.

1 Reyes 8:43

aiybeya sc'op c'alal ta ch'ulchan, c'alal ta banti nainemate, ac'beya spisil te bitic ya sc'anbate, swenta yu'un spisil nacionetic ta balumilal ya sna'bat aba soc ya yich'at ta muc', jich te bit'il yacal ta spasel te lum Israel awu'une, soc ya sna'ic a te ay ta alel wocol ta atojol li' ta templo te jo'on la jpasbate.

Habacuc 2:14

Te yutsilal Cajwaltic ya me xna'ot ta bayuc, ya me snojes ta spamal balumilal, jich bit'il ja' ya xnoj yu'un te mare.

Ezequiel 38:23

Jich me ya cac'bey yilic bayal ta jpam lumetic te smuc'ul cu'el te bit'il jo'on Ch'ul Dioson jtuquele. Ya me cac' sna'bonic jba, ya me sna'bonic xan jba te jo'on Ajwalilone —xi'.

1 Crónicas 17:24

Te bila awaloj ta jamal, ac'a pastajuc ta melel, muc' me ac'oplal ya xc'ot sbajt'el q'uinal. Ayuc me ta alel: “Ja' Dios yu'un Israel te Cajwaltic te Spisil ya xju' yu'une, ja' Dios ta Israel”, xiuc me ac'oplal. C'otuc me ta pasel awu'un te ya acanantay te patil alnich'anetic cu'un te bebe jilel bael cu'un te awabatone.

2 Samuel 7:26

Ac'a ich'otuc ta muc' ta sbajt'el q'uinal te abiile, soc yacuc yich' alel te ja' Dios yu'un Israel stuquel te Ajwalil te Spisil ya xju' yu'une. Te at'el ta muc' ajwalil te ya xc'ot ta swenta te jts'umbal, stalel me ya xjil ta swenta bit'il ya acoltay.

1 Pedro 1:17

Teme ya awalic: “Jtat”, xaex ta stojol te Diose, te ja' ay ta swenta yalel te bi yilel cat'eltique soc te ma'yuc mach'a stsaoj nax ta yo'tane, jich yu'un ya sc'an te ya awaq'uic ta ilel te awich'ojic ta muc' te jayeb c'aal cuxulex ta balumilale.

1 Timoteo 6:16

Ja' te mach'a stalel ma xlaj stuquel, te cuxul ta bay te xojobal q'uinal, te jtul ma'yuc mach'a ya xju' ya xnoptsaj tey a. Jtul ma'yuc mach'a la yilix, soc ma'yuc mach'a ya xju' yu'un yilel. Ja' me ac'a ich'otuc ta muc', soc ja' ac'a yich' ajwalinel sbajt'el q'uinal stuquel. Jichuc.

San Lucas 15:21

Te quereme la yalbey te state: “Jtat, jtaoj jmul ta stojol Dios soc ta atojol uuc. Ma spasix te ya ap'ison ta anich'ane”, xi' ta stojol te state.

San Lucas 2:14

“¡Jelawen ay yutsilal te Dios te ay ta ch'ulchan! Ya yac' lamajuc q'uinal ta balumilal ta stojol spisil ants-winiquetic te ayic ta c'uxtayel yu'une”, xiic.

Isaías 66:1

Te Cajwaltic ya yal: —Ja' jnactijib te ch'ulchane, te balumilal, ja' scajtijib cacan. ¿Banti ya xju' ya apasbon jna? ¿Banti ya xju' ya apasbon jun awilal yu'un ya jcux co'tan a?

San Mateo 6:14

“Melel teme ya apasbeyic perdón te mach'a amen bila spasojbeyexe, ja' nanix jich te Jtatic te ay ta ch'ulchane, ya me spasbeyex perdón uuc.

San Mateo 6:6

Yan te c'alal ya ac'oponic Dios te ja'exe, ochanic ta yutil anaic. Maca te ti'naile. Tey me xac'oponic a te Jtatique te sjoinejat ta muquene. Jich me ya x'ac'botex amajt'anic ta comonsitil yu'un te bila muquen ya apasique.

San Mateo 5:48

Jich yu'un te ja'exe ya sc'an te tojuc awo'tanic jich te bit'il toj yo'tan stuquel te Jtatic te ay ta ch'ulchane.

Levítico 10:3

Patil te Moisés jich la yalbey te Aarón: —Ja' ay ta yo'tan Cajwaltic te c'alal jich la yale: “Te mach'atic ya xnoptsajic ta jtojol, ya me cac'bey yilic te jo'on te Ch'ul Diosone; ta spisil te israeletic ya me cac'bey yilic te xojobil cutsilale”, te xie —la yut. Te Aarón, ma ba c'opoj yu'un.

Gálatas 1:1

Jo'on Pabloon, jpuc-c'opon. Ma ta swentauc nax ants-winiquetic te la yac'bon cat'ele, ja' la yac'bon cat'el te Jesucristoe soc te Jtatic Diose, te la xcha'cuxes tel ta bay animaetic te Jesucristoe.

San Juan 20:17

La yal te Jesuse: —Ma me xapicon yu'un ma to moemucon bael ta bay te Jtate. Baan albeya te yantic quermanotaque ya me xmoon bael ta bay te Jtate te Atatic uuc te ja'exe, te Dios cu'une soc te Dios awu'unic uuc te ja'exe —xi'.

San Mateo 26:42

Jich bajt' ta xchebal buelta ta sc'oponel te Diose: —Jtat, teme puersa ya xc'ax jwocole, ac'a pasuc te bila ya sc'an awo'tane —xi'.

Isaías 37:20

Ta ora yo'tic, Cajwal, Dios cu'untic, coltayawotic ta sc'ab, swenta yu'un ta spisil nacionetic ta balumilal ya me sna'ic te ja'at Cajwalticat, te jip jtul Diosat a —xi' ta sc'oponel.

Romanos 1:7

Ya jpatbeyex awo'tanic ta apisilic te ayex ta lum Roma, te c'ux ya yaiyex ta yo'tan te Diose, soc te ic'bilex swenta ch'ul lum yu'un Dios ya xc'oex. Ayuc me yutsilal soc lamaluc me q'uinal ya awaiyic yu'un ta swenta te Jtatic Diose soc ta swenta te Cajwaltic Jesucristoe.

San Mateo 10:29

“¿Ma bal jsejpuc ch'in taq'uin stojol ta chonel ta ch'iwich te cha'cojt' ch'in mutetique? Ja'uc me to, ma xju' ya xlaj cojt'uc teme ma sc'an yo'tan te Jtatique.