San Mateo 5:3 - Bible in Tzeltal de Oxchuc y Tenejapa

³ —Bin nax me yutsil te mach'atic me'ba ya yaiy sba ta yo'tanic, te melel ja' me ya x'ochic ta banti ay ta ajwalinel te Diose.

Nuevo Testamento Tzeltal de Amatenango

³ —Ben me tsaꞌam slekilik te machꞌatik meꞌbaꞌ ya yaꞌiy ta yoꞌtanike, porke jaꞌix te Mukꞌ Ajwalil yuꞌunik te Diose.

Bible in Tzeltal Bachajón

³ Bayel me yutsilic te mach'atic mayuc bin ay yu'un ya ya'iyic, como ha yu'unic te cuentahinel yu'un te ch'ulchane.

San Mateo 5:3 Referans Kwoze

Isaías 66:2

Jo'on jpasoj spisil te bitic aye, jich a chicnajic jajch'el. Jo'on Ajwalilon tulan ya cal. “Te mach'a yacon ta sna'el, ja' te me'ba te ay swocole, te yich'ojbon ta muc' te jc'ope.

Proverbios 29:23

Te mach'a toyol ya yac' sba, ya me xpejc'anot; yan te mach'a peq'uel yac'oj sbae, ya me x'ich'ot ta muc'.

Salmos 34:18

Te Cajwaltic nopol ay ta scoltayel te mach'atic lajemiquix ya yaiyic, te ma'yuquix bi ya smaliyique.

Proverbios 16:19

Ja' lec pajal peq'uel ya cac' jbajtic soc te mach'atic me'baetique; ma lecuc teme ya jpucbey jbajtic spojbil c'ulejalil te mach'atic jtoybaetique.

San Lucas 18:14

Ya calbeyex: Te jc'an-patane libre c'otix ta stojol Dios te c'alal sujt' bael ta snae. Yan te fariseo ma'yuc bila la sta stuquel, melel te mach'a cajal ya yac' sbae, peq'uel me ya xc'ot. Yan te mach'a peq'uel ya yac' sbae, ja' me cajal ya xc'ot stuquel —xi' te Jesuse.

2 Crónicas 7:14

jich te lum cu'un te yich'ojbon te jbiile, teme ya xbic'taj, soc teme ya sc'oponon, soc teme ya xtal ta jtojol, soc teme ya yijq'uitay spasel te amen yat'ele, ya me caiybey sc'opic c'alal ta ch'ulchan, ya me jpasbey perdón yu'un te smulique, soc ya me cac' utsubuc xan te slumalique.

Salmos 51:17

Te majt'aniletic ya sc'an te Diose, ja' te mach'a mero ya smel yo'tan yu'un te smule; Dios cu'un, ma ba ya awilay atuquel te mach'a peq'uel ya yaiy sba soc te ma'yuquix ta q'uinal ya yaiy ta yo'tane.

Isaías 57:15

Melel te Mach'a toyole, ja' te mach'a stalel cuxule, te Ch'ul Dios, xi' sbiil, jich ya yal: —Jo'on nainemon ta jun toyol awilal te ch'ultesbile; ja'uc me to, joinej te mach'a peq'uel soc te mach'a ay swocol ta mel-o'tane. Ya cac'bey sbujts' yo'tan soc ya xjam q'uinal yaiy.

Santiago 2:5

Quermanotac te bayal c'uxex ta co'tane, aiya awaiyic stojol in to: ¿Ma bal ja'uc tsabilic yu'un Dios te mach'atic me'ba ayic li'to ta balumilale? Melel ja' sc'ulejalic ya xc'ot te ay xch'uunjel yo'tanique, soc te ya x'ac'bot ainuquic tey a ta bay ay ta ajwalil te Diose, jich te bit'il yalojbey sc'oplal spisil te mach'atic c'ux ya yaiyic ta yo'tanic te Diose.

Isaías 61:1

Te espíritu yu'un Cajwaltic ay ta jtojol. Melel te Cajwaltic stsaojon soc sticunejon tel ta yalel sc'oplal te lec yach'il c'op ta stojol te me'baetique, tal cac' lamajuc xchamelic te mach'a ay swocolique, tal calbey te ya x'ac'otic ta libre te mach'atic ayic ta mosoile, soc te ya xjilic ta libre mach'atic ayic ta chuquele.

2 Crónicas 34:27

te la stijbat awo'tan soc te jun awo'tan la awaiy stojol te bila ya sc'an co'tan jpasbey te lume; ja'uc me to, te bit'il la apejc'an aba ta jtojole, te la ach'i' ac'u', soc te oc'at ta jtojole, jo'on la caiybat stojol. Jo'on Awajwalon ya me calbat.

Miqueas 6:8

Te Cajwaltic la yalbatix, ja'at ants-winic, te bila lec ya sc'an pasel soc te bila a te ya smaliybat te ja'ate: Ja' te ya apas te bila toj ta pasele, te junajem awo'tan ta stojol; soc te peq'uel awac'oj aba ta xch'uunel sc'op spisil ora te Dios awu'une.

San Lucas 11:28

La yal te Jesuse: —Ja' bin nax yutsil stuquelic te mach'atic ya yaiybeyic stojol sc'op te Diose soc te ya xch'uunic spasele —xi'.

Salmos 112:1

¡Bin nax yutsil te Cajwaltique! Bin nax me yutsil te mach'a ya yich' ta muc' te Cajwaltic, te lec ya yaiy ta yo'tan te mandaliletic yu'une.

Salmos 1:1

Bin nax me yutsil te ants-winic te ma st'unbey sbe te mach'atic amen yo'tanique, te ma sc'ainbey yat'elic te mach'atic yat'elinejic sleel smulique, soc te ma junuc yo'tan sba soc te mach'atic ya slabanic te Diose,

Job 42:6

Ja' yu'un jc'axel me ya jsujt'esix co'tan, ya me jnajc'an jba ta tan soc ta ts'ubil lum —xi' te Job.

San Mateo 11:25

Ja' nix ta yorail a te jich la yal te Jesuse: —Jtat, te ajwalilat yu'un te ch'ulchane, te balumilale, jelawen yutsil awo'tan te ja' la awac'bey sna'ic stojol spisil in to te mach'atic alaletic c'oeme, ma ja'uc la awac'bey sna'ic stojol te mach'atic ay sp'ijilique soc te ya sna'ic q'uinal ta leque.

San Lucas 4:18

“Te Espíritu yu'un te Cajwaltique julix ta jtojol, yu'un tsabilon yu'un ta yalel te lec yach'il c'op ta stojol te me'baetique. Ticunbilon tel ta scoltayel te mach'atic ay swocolic ya yaiyic ta yo'tanique, soc te ya calbey yaiyic te bit'il ya xcolic ta libre te mach'atic ayic ta chuquele, soc te ya jambey sitic te ma'sitetique, soc te ya jcoltay ta libre te mach'atic mosoinbilique,

San Marcos 10:14

C'alal la yil te Jesuse, ma lecuc la yaiy. Jich la yal: —Ac'a taluc ta jtojol te alaletique. Ma me x'acomic, melel te mach'a jich yo'tanic te bit'il in alaletic to, ja' me ya xju' ya yajwalinic te Diose.

San Mateo 13:16

“Yan te ja'exe, bin nax me awutsilic, te melel ya awilic ta asitic, soc ya awaiyic stojol ta achiquinic.

Isaías 30:18

Ja'uc me to, te Cajwaltic ya smaliyex, yu'un ya sna'beyex yo'bolil abaic; mero toyol yo'tan te ya yac'beyex awilic te xc'uxul yo'tane, melel te Cajwaltic ja' Dios te toj yo'tan ta chajbanwaneje. Bin nax me yutsil q'uinal ya yaiyic spisilic te mach'atic ya smaliyic te Cajwaltique.

Salmos 146:5

Bin nax me yutsil te mach'a ya yich' coltayel yu'un te Dios yu'un Jacob, ja' te ay ta yo'tan smaliyel te Cajwaltic te Dios yu'une.

2 Crónicas 33:12

Ja'uc me to, te c'alal la sta woclajel te Manasés, la sc'opon te Cajwaltic Dios yu'une, c'axem to xan la spejc'an sba ta stojol te Dios yu'un antiguo sme'-state.

Salmos 41:1

Bin nax me yutsil te mach'a ay ta yo'tan te me'baetic te ma'yuc yip te sbaq'uetalique; ya me xcoltayot yu'un Cajwaltic ta yorail woclajel.

2 Crónicas 33:23

Ja'uc me to, ma la spejc'an sba ta stojol Cajwaltic, jich bit'il la spas te state, ja' nax bajt' ta yo'tan stsobel te mulile.

Santiago 1:12

Bin nax yutsil te mach'a jun yo'tan ya xts'ijc' yu'un te swocole. Yu'un teme cujch' yu'un te swocole, ya me yich' corona swenta cuxlejal, ja' bi ja' te yaloj Dios te ya yac'bey spisil te mach'atic c'ux ta yo'tanic te Diose.

San Juan 20:29

Jesús la yalbey: —Tomás, la xch'uunix awo'tan yu'un te la awilonixe. Bin nax me yutsilic te mach'atic ya xch'uune, manchuc teme ma ba ya yilonique —la yut.

San Mateo 24:46

Bin nax me yutsil te abate teme jich yacal ta spasel a te c'alal ya xtal te yajwale.

Salmos 84:12

Cajwal te Spisil ya xju' awu'une, bayal me yutsil q'uinal ya yaiyic te mach'atic ja'at ya smuc'ulinat yo'tanique.

Deuteronomio 8:2

Na'ulayaic ta spisil te cha'winic (40) ja'wil la yaq'uex ta beel ta muc'ul jochol taquin q'uinal te Cajwaltic te Dios cu'untique. Te bit'il jich la spasbeyexe, yu'un me la yac'beyex apejc'an abaic ta stojol swenta prueba, swenta yu'un jich me ya sna'beyex awo'tanic a teme ya ach'uunbeyic, o ma ba ya ach'uunbeyic te mandaliletic yu'une.

Santiago 1:10

Yan te mach'a jc'uleje, binuc nax me yo'tan yu'un te ya xpejc'anbot sc'oplal yu'un te Diose. Melel te mach'a jc'uleje, ja' pajal soc te nich wamal te ma xju' ya xjalaj ta q'uinale.

Proverbios 8:32

“Yo'tic, cal-jnich'an, aiybon awaiyic jc'op; nopbonic co'tan, jich me bayal awutsil ya xc'oex a.

2 Crónicas 33:19

Te la sc'opon Dios soc te bit'il tsacbot sc'op yu'une, soc spisil sc'oplal te smule, te ma tojuc c'ax ta q'uinal, soc te bayuc la spasbey toyol ch'uunjibaletic, soc te bay la yac' sloc'omba Asera, soc te loc'ombaetic te c'alal ma to spejc'anej sba ta stojol a te Diose, ts'ibubil sc'oplal yu'unic ta bay slibroic te j'alwanejetique.

Apocalipsis 22:14

Bin nax me yutsilic te mach'atic ya sac' sc'u'-spaq'uic swenta yu'un jich ya xju' ya slo'beyic sit te te' ya yac' cuxinele, soc jich me ya xju' ya x'ochic bael tey a ta bay sti' sts'ajc'ul te muc'ul lume.

Apocalipsis 19:9

Soc la yalbon te ch'ul abate: —Ts'ibuya ta jun in to: Bin nax me yutsilic te mach'atic ic'bilic ta we'el yu'un te q'uin swenta nujbinel yu'un te Alalchije —la yuton. Soc jich la yalbon xan: —Ja' in to, ja' smelelil sc'op te Diose —xi'.

San Mateo 25:34

“Jich yu'un te muc' ajwalile ya me yalbey te mach'a ayic ta swa'el sc'abe: “La'ic te ja'exe te bin nax awutsilic ta stojol te Jtate. Ochanic, u'uninaic te utsilal te chajbanbil ta awentaic ta xjajch'ibal to tel balumilal.

Salmos 128:1

Bin nax me yutsil te mach'a yich'oj ta muc' te Cajwaltique, soc te ja' st'unojbey te sbee.

San Mateo 11:6

Bin nax me yutsil te mach'a ma xchebaj yo'tan cu'un —la yut bael te Jesuse.

San Mateo 8:11

Ja'uc me to, ya calbeyex te ay me tsobol ya xtalic ta stojol sloq'uib c'aal soc ta stojol smalib c'aal te ya xtal snajc'an sbaic ta we'el soc te Abrahame te Isaaque te Jacobe ta banti ay ta ajwalinel te Dios te ay ta ch'ulchane.

San Mateo 3:2

Tey jajch' yalbey ta stojol spisil te ants-winiquetique: —Sujt'esa awo'tanic ta stojol te Diose, yu'un nopol ya xjajch'ix te bit'il ay ta ajwalinel te Diose —xi' te Juane.

San Mateo 19:14

La yal te Jesuse: —Ma me x'acomic. Ac'a taluc ta jtojol te alaletique, melel te mach'atic jich yo'tanic te bit'il in alaletic to, ja' me ya x'ochic ta banti ay ta ajwalinel te Dios te ay ta ch'ulchane —xi'.

San Lucas 22:29

Jich yu'un te jo'one ya me cac'beyex awat'elic ta ajwalil jich nix te bit'il yac'ojbon cat'el ta ajwalil te Jtate.

San Lucas 22:30

Jich me ya xwe'ex soc ya x'uch'ajex ta jmesa te c'alal ayonix ta ajwalinel te jo'one. Ya me xnajc'ajex ta bay muc'ul nactijibaletic ta chajbanwanej ta stojol te lajchaychajp israeletique.

Apocalipsis 3:17

Melel te ja'ate jich ya awal: “C'ulejon te jo'one. Ju'ix cu'un tsobel bayal te jc'ulejale. Xujt' ma'yuquix jwocol”, te xaate. Ja'uc me to, ma x'ana' te ay bayal awocol soc te bayal yo'bolil aba ta q'uinale, xujt' ma'yuc bila ay awu'un te ma'sitate soc te t'analate.