San Mateo 27:4 - Bible in Tzeltal de Oxchuc y Tenejapa

⁴ Jich la yal: —La jtaix jmul, melel la caq'uix ta malel xch'ich'el te mach'a ma'yuc smule —xi'. Ja'uc me to, albot yu'unic: —Ma jwentatiquix te jo'otique. Ayix ta awenta atuquel —la yutic.

Nuevo Testamento Tzeltal de Amatenango

⁴ Jich a yal: —Mulawonix yuꞌun la kakꞌix ta entregal ta milel te winik te maꞌyuk smule —xchi. Pero la sjakꞌtalanik: —Ma kocheltikuk te joꞌotike. Jaꞌat ayix ta akuenta —xyutik.

Bible in Tzeltal Bachajón

⁴ hich c'oht yal: La jta jmul yu'un la jcac' ta c'abal te Mach'a mayuc smul, xchi. Pero la yalbeyic: ¿Bin cochelcotic a te ho'otcotique? ¡Ila aba atuquel! la yutic.

San Mateo 27:4 Referans Kwoze

1 Juan 3:12

Ma me jichucotic te bit'il te Caine. Melel te bit'il u'uninot yu'un te pucuje, jich la smil te yijts'ine. ¿Bi yu'un te la smile? Yu'un lec yat'el la yil te yijts'ine. Yan stuquel, amen te yat'ele.

1 Pedro 1:19

Ja' tojbil acolelic a te xch'ul xch'ich'el te Cristoe te milbil smajt'an Dios c'ot, jich bit'il alal chij te ma'yuc bila boloben soc ts'ilajem ta sbaq'uetale.

Hebreos 7:26

Jich te Jesuse, ja' Muc' Sacerdote te ya xju' yu'un ya scoltayotique, ch'ul Dios stuquel, ma sna' sleel smul, ma'yuc mulil quechel ta swenta, ma ba slac'oj sba soc te jmulawiletique, soc ic'otix moel c'alal ta stoyolil te ch'ulchane.

Tito 1:16

Sna'ojbeyic sba ta sc'opic te Diose, ja'uc me to, chican ta yat'elic te ma ba sna'ojbeyic sbae. Boloben yo'tanic, toybaetic, xujt' ma'yuc swentail te yat'elique.

1 Timoteo 4:2

Soc ya me xjajch' yantaybeyic sc'op te mach'atic cheb yo'tanique, te puro lotil c'op ya yalique, te jc'axel pimuben yo'tanic. Ma'yuc bila ya xc'otix ta yo'tanic xujt'uc.

Romanos 3:19

Jna'ojtic stojol te bit'il spisil te bila ya yal te mandalile, ja' sc'oplalic te mach'atic ayic ta swenta te mandalile, swenta yu'un jich macal yeic ya xc'ot spisilic a. Spisil ants-winiquetic quechelic ta yich'el castigo yu'un te Diose.

Hechos 13:28

Jich la sc'anbeyic te Pilato te ya yal mandal te ya yich' milel, manchuc teme ma'yuc smul la stabeyic te ya xju' ya x'ac'ot ta lajel yu'un.

San Juan 19:7

La yalic te judioetique: —Te jo'otique ay mandaliletic cu'untic te ya yal tey a te bit'il ya yich' milel, melel la yal sba te ja' Snich'an Diose —xiic.

San Lucas 23:47

Te c'alal la yil te centurión yu'un soldado te bila c'ot ta pasele, la yalbey yutsil sc'oplal te Diose. Jich la yal: —Melel nix a te ma'yuc smul in winic to —xi' yu'un.

San Lucas 23:41

Te jo'otique stojil te ayotic ta castigo yu'un te amen cat'eltique. Yan in winic to, ma'yuc bila amen spasoj stuquel —xi'.

San Lucas 23:22

Ta yoxebal buelta la yal te Pilatoe: —¿Bila amen spasoj? Te jo'one ma'yuc bi amen la jtabey te ya x'ac'ot ta lajel yu'une. Ya me cac'bey castigo, patil ya jcoltay bael —xi'.

San Mateo 27:54

Te centurión yu'un soldadoe soc te mach'atic sjoineje te yacalic ta scanantayel Jesús soque, bayal xiwic yu'un te la yilic te bit'il nijc' te balumilale soc te bayal bila c'ot ta pasele. Jich la yalic: —Melel nix a te ja' Snich'an Dios in winic to —xiic yu'un.

San Mateo 27:19

Te bit'il nacal ta bay chajbajibal te Pilatoe, la sticun tel aiyej te yiname te manchuc ya yac' sba a, te melel ma'yuc smul te winique. “Yu'un c'ax jwocol ta swaichinel ta ajc'ubal”, xi' tel te sc'ope.

Jonás 1:14

Jich jajch' sc'oponic te Cajwaltique, jich la yalic: —Cajwaltic, ma xawac' lajucotic ta swenta smul te winique. O teme ma'yuc smule, ma me xawac' jmulintic te bit'il ya xlaje. Melel te ja'at Cajwaltic, ja' chican bi ya smulan awo'tan ya apas —xiic.

Jeremías 26:15

Ja'uc me to, ta mero melel na'aic me ta lec: Teme ya amilonic te ja'exe, ya me amulinic soc yajwal te lum te ya amilic jtul winic te ma'yuc smule. Ta mero melel ja' la sticunon te Cajwaltic ta yalel ta jamal ta spisil te bitic la cale —xi' te Jeremiase.

Job 16:2

—Bayal buelta caiyojix te pajal soc te ac'ope. Te ja'ex ma ba ya amuc'tesbonic q'uinal caiy, ja' nax ya awac'bonic xan yich' yip te jwocole.

2 Reyes 24:4

Soc ta scaj te la smalbey xch'ich'elic te mach'atic ma'yuc bi spasojic, te la snojes ta ch'ich' c'oem a te Jerusalén. Ja' yu'un ma ba la sc'anix la spasbey perdón te Cajwaltique.

1 Reyes 21:27

C'alal te Acab la yaiy spisil, la xch'i' sc'u', la slap ch'ixal pac' soc la scom swe'el. La slap ta wayel te ch'ixal paq'uetic, soc bayal la smel yo'tan spisil ora yu'un.

1 Samuel 15:30

La yal xan te Saúl: —La jta jmul. Wocoluc, ich'awon ta muc' jich nix te bit'il muc' ajwalilon a, jich me ya yilic te mamaletic yu'un Israel soc ta spisil te jlumaltique. Ja' yu'un, sujt'ucotic bael, swenta yu'un ya me xba jch'uuntic te Cajwaltic te Dios awu'une —xi'.

1 Samuel 15:24

Patil te Saúl la yalbey te Samuel: —Melel nix a, la jta jmul. Melel la jc'axintaybey te smandal te Cajwaltic soc nix te ac'ope. Scaj te ja' la jxi' stuquel te winiquetique, ja' yu'un la quich'bey ta wenta te sc'opique.

Éxodo 12:31

Jich yu'un ta ajc'ubal nax a, te faraón la sticun ta iq'uel te Moisés soc Aarón, jich la yalbey: —Baaniquix, loc'aniquix bael ta jlumal. Ic'aiquix bael te alumal israeletique. Baan, ich'aic ta muc' te Awajwalique, jich bit'il yacalex ta yalel.

Éxodo 9:27

Jich te faraón la sticun ta iq'uel te Moisés soc Aarón. Jich la yalbey: —La jna'ix te jo'on ta jmule. Ja' jmul soc te jlumale, ma yolojuc te Ajwalil ya awale.

Apocalipsis 11:10

Te mach'atic nainemic ta balumilale, ya xbujts'naj yo'tanic ta lec yu'un te lajemic ya yilique, soc ya spasic q'uin yu'un, soc ya yac'bey sbaic smajt'anic yu'un. Melel bayal c'ax swocolic ta swenta te cheb j'alwanejetic yu'un te Diose.

Job 13:4

Te ja'exe ya amaquic ta lot te bila smelelile; jichex te bit'il doctoretic te ma xlecub jchameletic yu'unique.

1 Samuel 19:5

Manchuc me la sna' te ay lajel tey a, pero loc' sba ta yo'tan te ba smil te filisteo. Jich te Cajwaltic jc'axel la scoltay ta sc'abic ta spisil israeletic. Te ja'at la awil, bin nax awo'tan yu'un te jich c'ot ta pasele. ¿Bi yu'un te ya ac'an ya ata amul ta smilel te mach'a ma'yuc bi snopoje, jich te bit'il ya ac'an ya amil te David te ma'yuc bi amen spasoje? —xi' te Jonatán.

Salmos 94:21

Ya xchajbanbeyic sc'oplal te mach'a ma'yuc bila amen spasoj, ya yaq'uic bael ta lajele.

Proverbios 12:8

Ay ta alel yutsil sc'oplal te mach'a ay sp'ijil sjole; yan te mach'a bol yo'tane, ilaybil stuquel.