San Mateo 16:18 - Bible in Tzeltal de Oxchuc y Tenejapa

¹⁸ Jo'on ya cal te ja'at Pedroat, ta sba te ton in to ya cac' ipajuc ta stsojbol a te jch'uunjeletic cu'une. In te jch'uunjeletic cu'une ma stsalotic yu'un te lajele.

Nuevo Testamento Tzeltal de Amatenango

¹⁸ Joꞌon ya kal te jaꞌat jPedroat, te pꞌej ton kꞌoemat te ya kakꞌ ipajuk a te jchꞌuuneletik kuꞌune. Te jchꞌuuneletik kuꞌune ma xjuꞌ te ya stsalot yuꞌun yip te lajele.

Bible in Tzeltal Bachajón

¹⁸ Soc ho'on ya calbat te ha'at Pedrohat, ta sba ha'i muc'ul ton ini ya jpas te iglesia cu'un, soc te ochibaletic yu'un te tsobojibal mach'atic chamenic ma xhu' stsalbel.

San Mateo 16:18 Referans Kwoze

Isaías 28:16

Jich yu'un ya yal te Cajwaltique: —Ya cac' jp'ij ton ta lum Sión, ja' te jp'ij ton te tsabil, soc te mero bayal yutsile, ja' te mero bayal sc'oplal yu'un spasel na, ja' te ya xtuun yu'un te yiptajibe. Te mach'a ya yac' smuc'ul yo'tan ta stojole, ma ba ya xiw yo'tan.

Colosenses 1:18

Te Cristoe ja' jolol yu'un te jch'uunjeletique te ja' sbaq'uetal c'oeme. Ja' xjajch'ibal ay stuquel. Ja' sbabial te cha'cux tel ta bay te animaetique, swenta yu'un jich me c'ax jich ich'bil ta muc' ya xc'ot yu'un spisil te bitic aye.

San Juan 1:42

Jich la yic' bael tey a ta ba ay te Jesuse. Jesús la yil te Simone. Jich la yalbey: —Ja'at Simonat snich'anat Jonás, ja'uc me to, Cefas abiil ya xc'oat —la yut. Te Cefas te xie, Pedro, xi' c'oem.

Hebreos 12:28

Te bit'il jo'otic ya x'ac'ot ainucotic yu'un Dios tey a te banti ma stac' ta jinele, jich yu'un ac'a me calbeytic bayal wocol yu'un. Spisiluc me co'tantic ya cac' jbajtic ta abatinel ta stojol te Diose. Lecuc me yo'tan cu'untic, soc bayaluc me sc'oplal ta co'tantic te ya jlajin jbatic ta stojole.

Hechos 2:47

Spisil ora la sc'ajintaybeyic yutsilal te Diose, soc lec sc'oplalic yu'un spisil te lume. Te Cajwaltique yan yan ta esmajel yu'un jujun c'aal te jch'uunjeletique, chican jich yipal te ya staic scolelique.

1 Timoteo 3:15

swenta yu'un teme ma ju' te talon ta orae, jich me ya ana' te bila lec ya sc'an pasel ta stojol te yal-snich'an te Diose, ja' bi, ja' te jch'uunjeletic yu'un te cuxul Diose. In te jch'uunjeletique, ja' yoyal soc ja' yiptajib a te smelelil c'ope.

Isaías 54:17

ja'uc me to, ma'yuc mach'a spasoj te at'ejibaletic te ya xju' ya sjinate. Ya me awac' xmajc' jilel ye te mach'a ya sleat ta c'ope. Ja' ya cac'bey te ya yaiy tsalaw te mach'atic ya yac' sbaic ta abatinel cu'une —xi'. Jich la yal te Cajwaltique.

Efesios 5:32

Ja' in to, mero bayal sc'oplal te ma ba na'ot stojol ta neelale. Ja' sc'oplal Cristo soc te jch'uunjeletique.

Efesios 3:10

Jich c'otix ta pasel ta stojol te jch'uunjeletique, swenta yu'un spisil te mach'atic ay yu'elic soc te ay yat'elic ta ch'ulchan, ya me xc'o sna'beyic sba te sp'ijil te Diose.

Proverbios 24:7

Te mach'a ma sna' q'uinal, ma sna' bila ya yal ta stojol juecetic, ta scaj te ma ba c'oem ta yo'tan te p'ijil c'ope.

Job 38:17

¿Awiloj bal banti ayic sti' te xiweltic sba yawil te lajele?

Apocalipsis 21:14

Ay lajchayeb ton yiptajib te sts'ajc'ul te lume ta bay ts'ibubil sbiilic te lajchaytul jpuc-c'opetic yu'un te Alalchije.

Hechos 8:1

Te Saulo lec yo'tan yu'un uuc te laj ta milel te Estebane. Jich ora jajch' ta uts'inel te jch'uunjeletic te ayic ta lum Jerusalene. Spisilic pujq'uic bael ta sq'uinal Judea soc ta sq'uinal Samaria. Ja' xanix jilic ta Jerusalén te jpuc-c'opetique.

Salmos 9:13

Cajwal, na'bon me yo'bolil jba, ila me awil te bit'il ya yac'bonic jwocol te mach'atic ya slab-o'tantayon. Loq'uesawon ta yochibal te lajele.

1 Timoteo 3:5

Melel ¿bit'il c'an ju'uc yu'un swentainel te jch'uunjeletic yu'un Dios teme ma sna' mandal ta snae?

Gálatas 2:9

Te bit'il la sna'iquix stojol te bit'il Dios la yac'bonix ta jwenta in at'el to, jich la stsacbon jc'ab soc te Bernabé ta swa'el sc'abic te ja'ic te yiptajibic c'oem te jch'uunjeletique. Jich la spasic swenta seña te bit'il joy jbajtic ta at'el soque, swenta yu'un ya me xba at'ejucotic ta bay te jyanlumetique. Yan stuquelic, ya me xba at'ejuquic ta bay te mach'a yich'ojic te circuncisione.

San Mateo 18:17

Teme ma la sc'an yaiybey stojol sc'opic uuc, albeya yaiyic stsojbol te jch'uunjeletique. Teme ma la sc'an yaiybey stojol sc'opic uuc te jch'uunjeletique, jich me ac'a c'otuc awu'unic te bit'il mach'a ma ba xch'uunej te Diose soc jich te bit'il jc'an-patane.

San Mateo 11:23

Jichat uuc lum Capernaúm te atoyoj abaic c'alal ta ch'ulchan, ja'uc me to, c'alal ta infierno ya xch'ojotat coel. Melel te jichuc la yich' pasel jchajp at'eliletic ta banti lum Sodoma jich bit'il te la yich' pasel ta awolilique, chican to ta q'uinal ta ora to te jichuque.

San Mateo 10:2

Te sbiilic te lajchaytul jpuc-c'opetique jich ay: Te mach'a sbabiale, ja' te Simón te Pedro yan sbiile, soc te yijts'ine te Andrés sbiile, soc Jacobo soc te yijts'ine te Juan sbiile te snich'nab te Zebedeoe,

Salmos 69:12

Talel c'axel ya ya'anonic; te jyacubeletique ya sc'ajintayonic.

Génesis 22:17

jich yu'un jelawen to xan ya cac'bat esmajuc bendición ta atojol. Jelawen to xan ya cac' esmajuc ats'umbal, jich yipal ya xc'otic te bit'il sji'al mar, soc te ats'umbale ya me stsal spisil yajcontro.

Apocalipsis 11:15

Te sjuquebal ch'ul abat la yoq'uesin te oq'uese. Ay mach'atic tulan c'opojic ta ch'ulchan la caiy te jich la yalique: “Spisil te muc' ajwaliletic ta balumilal soc te bila ay ta swentaique, ayix ta swenta stuquel te Cajwaltique soc te Cristo yu'une. Ja' me ay ta ajwalinel sbajt'el q'uinal stuquel”, xiic la caiy.

1 Corintios 15:55

Te ja'at lajel, ¿bit'il c'an awaiy xan tsalaw? Muquenal, ¿bit'il c'an ayuc xan awat'ejibe?”, te xie.

Isaías 38:10

“La jnop ta co'tan: Manchuc me lecuc to te jcuxlejale, puersa me ya xboon; pasbilonix mandal te ya xboon ta muquenal te jayeb xan c'aal te cuxulone.

Isaías 28:6

Ja' ya yac' ta lequil chajbanwanej te juecetic te yich'oj yat'elic ta chajbajibal, soc ya yac'bey yip yo'tanic te soldadoetic te ya scanantayic te lume.

Salmos 107:18

Jich ma'yuquix we'elil la swe'elinic; ayiquix ta sti'il lajel.

2 Samuel 18:4

La sjac' te Davide: —Lec ay jiche, ja' me ya jpas te bila lec ya awaiyique —xi'. Te David ora la xujq'uin sba ta yochibal te lume. La yac' c'axuc loq'uel te soldadoetic ta tsojboltsojp ta juju-jmil (1,000) soc ta jo'jo'winic (100).

Salmos 127:5

Bin nax me yutsil te mach'a ay bayal ta jch'ix yat'ejibal t'imalte' c'oem yu'une. Ma ba ya sta q'uexlal ta stojol scontro te c'alal ya scoltay sba ta sc'ab ta stojol te juecetique.

Salmos 129:2

bayal buelta ay mach'atic la yac'boniquix jwocol, pero ma ba ju'em yu'un stsalbelonic c'alal ora.

Jonás 2:6

C'axon xan coel a te banti yich'oj jajch'el tel yip te witstiquile, jich la caiy te bit'il jc'axel macalon jilel tey ae. Pero ja'at, Cajwal, Dios cu'un, ya acoltayon loq'uel, ma ba ya awac'on bael ta muquenal.

San Mateo 4:18

Te bit'il yac ta beel c'axel ta ti'mar yu'un Galilea te Jesuse, la yil cheb winiquetic te yermano sbaique, Simón sbiil te jtule. Ja' nix te Pedro yan sbiile. Soc Andrés sbiil te yijts'ine. Yacalic ta xch'ojel ochel ta mar te stsacjibal-xchayique, melel ja' yat'elic te tsac-chaye.

San Mateo 7:24

“Jich yu'un te mach'a ya yaiybon stojol te jc'ope soc teme ya spas te bila caloje, jich c'oem te bit'il jtul winic te ay sp'ijil yo'tane. Te c'alal la spas sna, la sle p'ijom ton te banti la sjaches ta pasel te snae.

Hechos 20:28

Jich yu'un tsajtaya me abaic ja'ex, soc canantayaic ta stsojbol te chijetic ta banti yac'ojbeyex awat'elic ta scanantayel te Ch'ul Espiritue. Canantayaic te jch'uunjeletic yu'un te Cajwaltic te manbil ta xch'ich'el yu'une.