Levítico 27:30 - Bible in Tzeltal de Oxchuc y Tenejapa

³⁰ “Te jun ta slajunebal te bila ya xloc' ta lumq'uinal awu'unique, chican teme trigo, o cebada, o sit te'etic, ja' me cu'un, jo'on te Awajwalone, melel ch'ultesbil cu'un stuquel.

Bible in Tzeltal Bachajón

³⁰ Te jun ta slajunebal te bin ya xloc' ta lumq'uinal, chican teme sit ts'unub awalil o sit te'etic, ha yu'un Jehová stuquel, ha te bin ac'bil ta stojol Jehová.

Levítico 27:30 Referans Kwoze

Génesis 28:22

Soc te ton te la jtejc'anixe, ja' sna Dios ya xc'ot cu'un. Soc spisil te bila ya yac'bon te Diose, ya me cac'bey jun ta slajunebal smajt'anin”, xi'.

San Mateo 23:23

¡Ya me awil awocolic jts'ibojometic, fariseoetic te cha'lam awo'tanique! Melel ja' nax ya awac'beyic smajt'anin Dios jun ta slajunebal te yerbabuena, soc te eneldo soc te comino. Yan te bila muc' sc'oplal ta pasel te ya yal te mandalile, ja' ma'yuc sc'oplal ta awo'tanic stuquel, jich bit'il in to: ja' te bila toj ta pasele, te c'uxul-o'tanile, soc te xch'uunjel-o'tanile. Ja' ya sc'an pasel awu'unic, soc uuc te yan te yacalex ta pasele.

Nehemías 13:12

Spisil Judá la yich'ic tel te diezmo yu'un trigo, vino soc aceite, la yaq'uic ta banti stsobjibal ta templo.

San Lucas 18:12

Te jo'one ya jcom jwe'el cheb buelta jujun semana soc ya cac'bat jun ta slajunebal te bila ya jtae”, xi'.

2 Crónicas 31:12

la yaq'uic ochel bael tey a soc yutsil yo'tanic te spatanic, soc te diezmo te la yaq'uique, soc te bitic yac'ojic te ch'ultesbil ta stojol te Cajwaltique. La sleic mach'a ya swentain spisil, ja' te jtul levita Conanías sbiile soc te yermano Simei te ya xcoltayot ta at'el yu'une.

Génesis 14:20

Bin nax yutsil te Dios te toyol ay stuquele, melel la yac'batix ta ac'ab te jayeb awajcontro —xi' sc'oplal. Ta spisil biluquetic te yich'oj sujt'el tel Abram, jun la yac'bey smajt'anin ta slajunebal te Melquisedec.

San Lucas 11:42

“Te ja'ex fariseoetic ¡ya me awil awocolic! Melel ja' nax ya awac'beyic smajt'anin Dios jun ta slajunebal te yerbabuena soc ruda soc spisil te aboc'-itaje. Yan te bitic toj ta pasel ta stojol yantic soc te bit'il c'ux ta co'tantic te Diose, ja' in to, ja' pasel ya sc'an awu'unic, soc uuc te yan te yacalex ta spasele.

Nehemías 13:5

Ja' yu'un la yac'bey ta swenta jun muc'ul cuarto, ja' te banti la yich' q'uejel smajt'an Dios ta neelal toe, ja'ic te pom, spisil bitic ya xtuun ta templo, soc te diezmoetic yu'un trigo, vino soc aceite te albil mandal ya yich' aq'uel te levitaetic soc te jc'ayojetic soc te jcanan-ti'nailetic. Soc la yich' q'uejel ta neelal to tey a te patanetic yu'un ya yich'ic te sacerdoteetique.

Nehemías 12:44

Ta c'aal in to la yich' aq'uel yat'elic mach'atic ochic ta swentainel te stsobjibal yu'un te bitic majt'aniletic ta stojol Dios, soc te diezmoetic, soc te sba sit yawal-sts'unubic. Ya yich'ic q'uejel tey a, swenta yu'un tey ya yich' tsobel spisil a te bitic ya yich'ic tel ta sq'uinal te juju-jpam lume, jich nix te bit'il ya yal te mandaliletique. Ja' yu'unic te sacerdoteetic soc te levitaetique. Melel te mach'atic ayic ta Judá bin nax yo'tanic ta stojolic te sacerdoteetic soc te levitaetic te yacalic ta at'el ae.

Levítico 27:29

Soc ja' nix jich ma xju' ya xcha'manot xan sujt'el te mach'a chapalix yu'un te ya xlaje, puersa me jich ya xlaj a.

Levítico 27:31

Teme ay mach'a ya sc'an ya sujt' xan ta stojol jtebuc te jun ta slajunebale, ya xju' ya stoj te bit'il stojole, soc xan te jun ta yo'ebale.

Deuteronomio 18:8

Ja' ni me jich yipal ya yich' coltayel ta swe'el te bit'il ya x'ac'botic te yantique, soc ja' yu'un te bila ya x'ac'bot yu'un te state.

Deuteronomio 26:12

“Te c'alal ya sts'acaj te oxeb ja'wile, te ja' yorail a te ya yich' aq'uel te jun ta slajunebal ta spisile, te c'alal parte awac'ojix a te jun ta slajunebal ta spisil te sit awawal-ats'unube, teme awac'ojbeyix spisil a te levitaetic, te jyanlumetic te nainemic ta banti alumalique, te me'ba alaletic, soc te me'ba antsetic, swenta yu'un ya xju' ya swe'ic spisil te bitic ya sc'anic tey ta lumetic awu'une,

Génesis 47:24

Te jayeb sit ya yac' te awawal, jun me ya awac'bey faraón ta yo'ebal. Te chaneb ya awich'ic jilele, swenta yu'un ya me ats'unic, soc ya me amac'lin abaic a, soc mach'a jayeb ay awu'unic ta anaic soc awal-anich'nab —xi' sc'oplalic.

Génesis 47:26

Jich jajch' ta pasel te mandalil yu'un José ta spamal Egipto te ya yac'bey faraón te jun ta yo'ebal te bila ya sloq'uesique. Ma ba ch'ayem sc'oplal te mandalil c'alal ora yo'tic. Ja' nax ta sq'uinal sacerdoteetic te ma jichuc c'ot ta pasele, te melel ma yu'unuc faraón te sq'uinalique.