Jueces 18:17 - Bible in Tzeltal de Oxchuc y Tenejapa

¹⁷ Te jo'tul jtsajtaywanejetic ochic bael ta na, la stsaquic te loc'omba te lec pasbil ta plata, te efod, soc te yajcananic ta na. Te sacerdote jil ta ti'ts'ajc' soc te lajunwinic xcha'bajc' (600) soldadoetique.

Bible in Tzeltal Bachajón

¹⁷ Te ho'tuhl winiquetic te yilojiquix te q'uinale ochic bahel, la stsaquic te loc'omba pasbil ta c'abal, te efod, te loc'ombahetic yu'un na, soc te loc'omba pasbil ta uhltesbil taq'uin, te c'alal ay ta yochibal te puerta a te sacerdote soc te j'ohlil scha'bahc' (600) winiquetic chapalic soc ya'tejibic yu'un guerra.

Jueces 18:17 Referans Kwoze

Jueces 18:14

Te jo'tul jtsajtaywanejetic te yilojiquix te q'uinal ta lum Lais, la yalbeyic te sjo'tac: —¿Ya bal ana'ic te ay bila li'to? Ja' te na lum ay to, ay efod soc yajcananic ta na, soc loc'omba te buen pasbil ta plata. ¿Bi ya ac'an apasic yu'un? —xiic.

Jueces 18:2

Jich yu'un te mach'atic yu'un Dan la sticunic jajch'el ta Zora soc Estaol jo'tul winiquetic te ma xiwic, swenta yu'un ya xba stsajtayic te q'uinale, yu'un jich me ya sna'ic te bi yilele. Te jo'tul winiquetic bajt'ic ta witstiquil yu'un Efraín, c'otic ta sna Micaía, tey c'ax yu'unic a te ajc'ubale.

Miqueas 5:13

Ya me jinbat te awajcanan soc te tonetic ch'ultesbil awu'une, swenta yu'un ma ba ya xcha'sujt'at bael ta xch'uunel ta yan buelta te loc'ombaetic te ja'at nix la apase.

Isaías 46:7

Ya scajan bael ta snejq'uelic, ya xbajt'ic soc; ya xc'o snajc'anic ta scajtijib, tey ya x'ain a, ni ma stij sba ta yawil. Manchuc me ya yawtayic bayal ta sc'anbeyel coltayele, jc'axel ma sjac', soc ma xju' yu'un ya scoltay ta xc'uxulil te swocolique.

1 Samuel 4:11

Soc la spojic bael te scajonil trato yu'un Dios, soc laj ta milel yu'unic xchebal te snich'nab Elí, ja' te Ofni soc Finees.

Jueces 6:31

Te Joás la sjac'bey sc'opic te mach'atic tal ta joytayel yu'une: —¿Ya bal acoltayic te Baal, ya bal awac' guerra ta swenta? ¡Ja' lec te lajemuquix te ma to sacub q'uinal a te mach'atic ya xc'opojic yu'un Baal! Teme ja' Dios te Baal, ac'beya scoltay sba stuquel, melel ja' yu'un te scajtijib majt'anil te jinbote —xi'.

Éxodo 32:20

La stsac te sloc'omba alal toro, la yac' ochel ta c'ajc', la sjuch' ja' to c'alal c'atp'uj ta tan. Te stanule la spuc bael ta ja', la yac'bey yuch' te israeletique.

Génesis 31:19

Te Labán baem ta xjoxel loq'uel stsotsil xchij a, jich te Raquel la yelc'anbey bael te bitic yajcananinejic ta sna te state.

Génesis 31:30

Te bit'il ya ac'an te ya sujt'atix bael ta alumal, yu'un ya xbaatix ta sna atat, jichuc, ma'yuc bi ya calbat yu'un. Ja'uc me to, ¿bistuc awu'un te la awelc'anbon tel spisil te cajcanan te ay ta jnae? —xi'.

Jueces 18:16

Yacalic ta maliywanej ta ti'ts'ajc' te lajunwinic xcha'bajc' (600) soldado-danetic te chapalic ta lec soc te yat'ejibique.

Jueces 18:18

C'alal la yil te sacerdote te ochic bael te jo'tul ta sna Micaía, soc te la stsaquic te loc'omba, te efod soc te yajcananic yu'un te sna, jich la yalbey: —¿Bi yacalex ta spasel? —xi'.

1 Samuel 19:13

Te Mical la yich' jun loc'omba, la yac'bey ta swayib, la yac'bey sts'anjolin jun jalbil tsotsil tentsun, la smuc ta sábana.

Isaías 41:29

Ma'yuc bi ayic a, ni jtebuc. Ma'yuc bi ya xju' yu'unic spasel; jocholic, yolq'uinal loc'ombaetic.

Ezequiel 21:21

Te muc' ajwalil yu'un Babilonia tey la yaq'uix sba ta banti ya xjetin jajch'el te cheb be. La spasbey snúmero ta na'el te bila ya to xtal ta stojole. Jich la xchajulay te yat'ejibalul t'imalte'e, soc la sjojc'obey te bila cuybil ta diosetic yu'une, soc ta sejc'ub chambalametic.

Oseas 3:4

Melel te israeletic mero bayal c'aal jich nax ayic: Ma'yuc muc' ajwalil, ni ch'in ajwaliletic yu'unic, ma'yuc milbil majt'anil, ni ma'yuc tejc'anbil toneticte ch'ultesbil yu'unique, ma'yuc sc'u' sacerdoteetic, ni yajcananic ta nanatic.