Jueces 10:6 - Bible in Tzeltal de Oxchuc y Tenejapa

⁶ Ja'uc me to, te israeletic la xcha'pasic te bila ma lecuc ta sit Cajwaltic, la xch'uunic loc'ombaetic yu'un Baal soc yu'un Astarté, soc diosetic yu'un Siria, diosetic yu'un Sidón, diosetic yu'un Moab, diosetic yu'un Amón, soc diosetic yu'un te filisteoetique. Ja' la yijq'uitay ta yo'tanic te Cajwaltic, ma'yuc bay ya squejan sbaiquix ta stojol.

Bible in Tzeltal Bachajón

⁶ Pero te snich'nab Israel la scha'pasic xan te bin chopol ta stojol Jehová, la yac' sbahic ta a'batinel yu'un te baaletic soc te Astarot, te diosetic yu'un Siria, Sidón, Moab, Amón soc yu'un te filisteohetic. La yihquitay ta yo'tanic te Jehová, ma ba la yac' sbahic ta a'batinel yu'un.

Jueces 10:6 Referans Kwoze

2 Reyes 23:13

Te muc' ajwalil la sjinbey sc'oplal te toyol ch'uunjibaletic te ay ta stojol sloq'uib c'aal yu'un Jerusalén, te ay ta stojol sur ta Wits Olivoiltic, te ja' la spas te Salomón te c'ax ta muc' ajwalil yu'un Israel, te ja' yu'un te Astarté antsil dios te ilaybil nax sba, te lotil dios yu'un sidonetique; soc yu'un Quemos, yan loc'omba te ilaybil nax sba, te lotil dios yu'un moabetique; soc yu'un Milcom, loc'omba te ilaybil nax sba, te lotil dios yu'un te amonetique.

1 Reyes 11:33

Melel te Salomón la yijq'uitayonix ta yo'tan, ochix ta xch'uunel Astarté, antsil-dios yu'un sidonetic; te Quemos, dios yu'un moabetic; soc Milcom te dios yu'un amonetique. Ma lecuc ta jsit te bitic spasoje. Ma ba la yac' c'otuc ta pasel yu'un te mandaliletic cu'un soc te c'op chapal cu'une. Ma jichuc la spas te bit'il la spas te David, ja' te state.

1 Reyes 11:7

Ja' nix ta yorail a, te Salomón la spas toyol ch'uunjibaletic ta wits te ay ta stojol sloq'uib c'aal yu'un Jerusalén te banti ya yich' ich'el ta muc' te loc'omba te mero ilaybil sba te yich'ojic ta muc' te moabetic, te Quemos sbiile, soc nix te yan loc'omba te mero ilaybil sba te Moloc sbiil, te ja' yich'ojic ta muc' te amonetique.

1 Reyes 11:5

Te Salomón la xch'uun te Astarté, te antsil-dios yu'un sidonetic, soc te Milcom, te mero ilaybil sba te loc'omba te sdiosinejic te amonetique.

Jeremías 2:13

“Te lum cu'une cha'chajp mulil la spas: la yijq'uitayon ta yo'tanic, te cuxul sloq'uibja' c'oemone, soc la spasic pozoetic yu'un stuquelic, lomen pozoetic te ma xpamaj ya'lele.

Salmos 106:36

La squejan sbaic ta stojol te loc'ombaetic te ma Diosuque, te ja' sjinjibal c'otic yu'une.

2 Reyes 17:16

La xch'aybeyic spisil te mandaliletic yu'un te Cajwaltic te Dios yu'unique. La spasic cheb alal toroetic ta ultesbil bronce, soc sloc'omba Asera, soc la to xch'uunic te spisil te eq'uetic ta ch'ulchan, soc la xch'uunic te Baal.

Jueces 16:23

Te ajwaliletic yu'un te filisteoetic la stsob sbaic ta spasel sq'uinul te la yaiyic tsalawe, soc la yac'beyic milbil smajt'an te Dagón, te lotil dios yu'unique. La yaiyic c'ayoj: “Te dios cu'untic la yac'botic ta jc'abtic te Sansón, ja' te jcontrotique”, xiic ta c'ayoj.

2 Crónicas 28:23

La yac'bey milbil smajt'an te lotil diosetic ta Damasco, te ja' nax ac'ot ta jinel yu'une. La scuy te ya xcoltayot yu'unic teme ya yac'bey milbil smajt'ane, melel coltayotic yu'un ta sc'op te muc' ajwaliletic yu'un Siria. Ja'uc me to, ja' nax sjinjibal a c'ot soc ta spisil Israel.

1 Reyes 16:31

Melel ma'yuc sc'oplal ta yo'tan te la spas te muliletic la spas te Jeroboam snich'an Nabat. C'axem to xan jich a te bi la spas te Acabe c'alal nujbin soc Jezabel yantsil-nich'an Et-baal, muc' ajwalil ta Sidón. Jich jajch' xch'uun soc jajch' yalbey wocol te Baal.

1 Samuel 5:2

La yich'ic ochel ta templo yu'un Dagón te loc'omba sdiosinejic, la yac'beyic ta sts'eel.

Jueces 13:1

Ja'uc me to, te israeletic la spasic xan te bi ma lecuc ta sit Cajwaltic, ja' swentail te la yac' ta sc'ab filisteoetic cha'winic (40) ja'wil.

Jueces 6:1

Te israeletic bolob yat'elic ta sit te Cajwaltique. Jich yu'un te Cajwaltic la yac'bey ta sc'ab juqueb ja'wil te madianetique.

Jueces 4:1

C'alal laj bael te Aod, te israeletic jajch'ic xan ta spasel te bila amen ta sit te Cajwaltique.

Jueces 3:7

Te yat'el israeletic amen ta sit Cajwaltic, ja' te bit'il la yijq'uitay ta yo'tanic, soc jajch'ic ta xch'uunel te lotil dios Baal soc te antsil-dios Asera.

Deuteronomio 32:15

Mero jujp' te Jesurún, xwilawet nax yu'un sbujts' q'uinal yaiy, (mero x'oquet nax yu'un sjujp'el), la xch'ay ta yo'tan te Diose, ja' te Jpaswanej yu'une; la yilay te Jcanantaywanej yu'un, la yilay te Jcoltaywanej yu'une.

Deuteronomio 31:16

Te Cajwaltic jich la yalbey te Moisés: —Nopolix ya xlajat. Te lum in to ya me xc'ax bolob ta jc'axel ta swenta te xch'uunel diosetic yu'un te yantic lumq'uinaletic te ya xba yich'e. Jich me ya xch'ayon ta yo'tanic, ya me sjinic te trato jpasoj soque.

Deuteronomio 31:17

Pero ya me xtil jajch'el ta stojolic te sc'ajc'al co'tane, jich me ya jch'ayic jilel, jc'axel ma me ayuc sc'oplalic ta co'tan ya xc'otic. Mero bayal me te swocolic soc te bitic ma lecuc ya xc'ot ta stojolic, ja' swentail te jich me ya yalic: “¿Ma bal ja'uc yacotic ta wocol yu'un te ma ba sjoinejotiquix te Dios cu'untique?” xiic me.

Josué 13:31

olil te Galaad soc te lumetic Astarot soc Edrei. Spisil ja' la yich'ic te olil sts'umbal Maquir te snich'an Manasés, chican te jayeb ta jchajbe.

Jueces 10:5

C'alal laj Jair, la yich' muquel yu'unic ta Camón.

Jueces 11:24

Teme ja' te dios awu'unic, te Quemós sbiil, ya yac'beyex jtebuc q'uinal te ya awu'uninique, ja' awu'unic nix ya xc'ot a, ¿me jichuc? Jich te jo'otique, cu'untic nix c'ot a te bi la yac'botic te Cajwaltique.

Isaías 23:4

Nojuc me q'uexlal ta awo'tan, lum Sidón, te yipat te mar, jich me ya awal: “Ma'yuquix xc'uxul te alajele, ma ba ya x'alajonix. Ma'yuquix calatac ya jch'ijtes, ma'yuc cantsil-alatac ta sp'ijubtesel”, xaat me ta yalel.

Ezequiel 27:16

Te Edom tal yaiy manbajel chonbajel ta atojol, scaj te ay bayal te bila ya x'ain awu'une. Te manbajel chonbajel, ja' la ajel a te yaxal granate-ton, paq'uetic bonbil ta púrpura, buen ch'albil paq'uetic, paq'uetic pasbil ta lino, coral-ton, soc t'ujbil tsajal tonetic.

Deuteronomio 13:6

“Manchuc me mero abanquil o awijts'in, aquerem-nich'anuc, awantsil-nich'anuc, o awinam te mero c'ux ta awo'tane, o ja' te mach'a mero jun awo'tan aba soc, teme ya sujat bael ta smuquen-ch'uunel yantic diosetique, te ma x'ana'beyic sba soc te ni ja'uquic te ame'-atatic la sna'beyic sba, ma me ja'uc xapasbeyic te bila ya sc'an yo'tanic stuquelique.

Deuteronomio 13:8

Ma me ja'uc xapasbeyic te bila ya sc'an yo'tanic. Ma me x'awich'ic ta wenta, ma me xtal jxujt'uc xc'uxul ta awo'tanic, jc'axel ma me x'ana'beyic yo'bolil sba jxujt'uc. Ma me ayuc bila xamac a,

Jueces 8:33

Te c'alal lajemix a te Gedeón, te israeletic la yijq'uitay xan ta yo'tanic te Diose, ja' ba xch'uunic te loc'ombaetic yu'un Baal. Ja' mero la stsa sdiosinic te Baal-berit.

Jeremías 2:20

“Mero bayalix tel c'aal te la atoy aba ta jtojole, ma la ac'an ach'uunbonic jmandal. La awal: “Ma jc'an abatinel”, xaat. Ja' nax la awat'elin spasel mulwej ta bay toyol witsetic soc ta spisil yet'al pimil sc'ab te'etic.

Jeremías 32:23

Ja'uc me to, c'alal ochic bael ta lumq'uinal te la yu'uninic, ma la xch'uunbat te ac'ope, ni ma la spasic te p'ijubtesel la awac'beye, ni ma la spasic jtebuc te amandal la awalbeye. Jich yu'un la aticunbey tel ta stojolic te bila amene.